Katanhaŋaa kiimu na jurumu yafa saraga ya wo ge
5
«Sipya wemu wʼa pye kaa la wo sɛɛri, ma li ɲa ɲii na, kelee ma li logo ge, pu bu wu yiri na wu shɛ can jo lee kaa li shizhaa na, wu bye wu ya sɔɔ na can wu jo wɛ, jurumu wufɔɔ ya pye, tee tigire ti na bye wu ɲuŋɔ ni.*2 «Saliya wʼa yaaga kemu bɛɛri wii na fɛfɛɛrɛ baa wogo ge, sipya wa bu gbɔn kee ka tuugo bɛɛri na, naŋa yaaga kemu ki ɲɛ fɛfɛɛrɛ baa wogo ge, kelee kanha yapɔrɔgɔ kemu ki ɲɛ fɛfɛɛrɛ baa wogo ge, kʼa pye kee ka nixhugo la, kelee ɲiŋɛ yafuugo nixhugo. Wu bu gbɔn kee ka tuugo bɛɛri nixhugo na, ali wu ɲɛhɛ bye wu ya foro li fiin wɛ, wʼa pye fɛfɛɛrɛ baa fɔɔ. Tee tigire ti na bye wu ɲuŋɔ ni.*
3 «Sipya wemu ɲɛ fɛɛfɛɛ wɛ, wu shiin bu gbɔn wee wa wo yaaga na, kʼa pye yaaga tuugo bɛɛri, ali wu mɛhɛ bye wu ya foro li fiin wɛ, wu ga ba li cɛ tuun bɛɛri ni, tee tigire ti na bye wu ɲuŋɔ ni.a
4 «Sipya wa bu tɔɔ wɛrɛŋɛ kaaga fɛni, na gàa kaa bɛɛri na, na wu da lee pye, lʼa pye nizaana la, lʼa pye niguunɔ la. Wu bye wu ya fɛnhɛ wu funŋɔ kɔn na na kaa wɛ, ali wu ɲɛhɛ da wʼa kaa wuyɛ kategee, wu ba foro li fiin tuun bɛɛri ni, tee tigire ti na bye wu ɲuŋɔ ni.b
5 «Ayiwa, sipya bɛɛri wʼa le kaa le la pye ge, wufɔɔ wu yere wu jurumu wu na. 6 Lee kadugo na, wufɔɔ di ba wee jurumu we wo yaaŋa pye Tɛhɛnɛ Baa Kilɛ mu. Wufɔɔ di ba ni dubyashɔ kelee sikashɔ ni, wu ba wee pye wu wo jurumu wu wo yafa saraga. Saraya ɲaha shɔɔnrivɔɔ wu na ba wu wo jurumu yafa wu wo yaaŋa ki pye wu na.
La baa fɛɛ ya yaa na jurumu yafa saraya yemu wo ge
7 «Dubyashɔ, kelee sikashɔ se bye wu ya ta sipya wemu ni di gan wu wo jurumu wu yafa saraga wɛ, wufɔɔ di ba ni xobangaa shuun, kelee gbegbeshazhigaa shuun ni Tɛhɛnɛ Baa Kilɛ mu. Nigin wa na ba bye wu wo jurumu wu wo yafa saraga, nigin wusama di bye saraga nizogoŋɔ. 8 Wu ba ni ki ni saraya ɲaha shɔɔnrivɔɔ wu mu. Lemu li wa jurumu yafa wo saraga ki wuu li ge, saraya ɲaha shɔɔnrivɔɔ wu fɛnhɛ lee wolo. Wu li katige ke kɛgi, ga wu ganha bu ɲuŋɔ ki kɔn laha fɛɛfɛɛ wɛ. 9 Wu li shishan pa ɲɛrɛgi ɲɛrɛgi saraya tawologo ki kabanugo ki na, wu li shishan pusama wo saraya tawologo ki ɲidaa li na. Jurumu yafa saraga ki wa kii. 10 Wu shazhira shuun wuu li pye saraga nizogoŋɔ, na saha ni li kodorogoo ni. Saraya ɲaha shɔɔnrivɔɔ wu weefɔɔ wo jurumu yafa wu wo yaaŋa ki pye wu na. Wufɔɔ wo jurumu wu na yafa wu mu.
11 «Wufɔɔ bye wu ya xobangaa shuun we kelee gbegbeshazhigaa shuun wu ta wɛ, wufɔɔ di ba ni myɛ niviinmɛ kiloo taanri ni wu pa bye jurumu yafa saraga. Wu ganha bu sìnmɛ le pu ni wɛ, wʼi ganha bu nudanga yawurire bɛ taha pu na wɛ, bani jurumu yafa saraga ki wa kii. 12 Wu ba ni pee myɛviinmɛ pu ni saraya ɲaha shɔɔnrivɔɔ wu mu. Wee di ba keŋɛ ɲii nigin wolo pu ni wu pye kee saraga ke wo fundogo yaaga. Wu lee keŋɛ ɲii le sòrogo saraya tawologo ki na ba Tɛhɛnɛ Baa Kilɛ wo na saraya yi ɲɛ wɛ. Jurumu yafa wo saraga ki wa kii. 13 Jurumu wemu wʼa pye le kaa le la wo bye funŋɔ ni ge, saraya ɲaha shɔɔnrivɔɔ wu na wee jurumu wu wo yaaŋa ki pye wu na, wu jurumu wu na yafa wu mu. Saraya ɲaha shɔɔnrivɔɔ wu na kee saraga ki keree shɔɔnri shinma saraga ki wo keree shɔɔnrigana na.»
Ma bu nahana, lee wo saraga
14 Ayiwa, a Tɛhɛnɛ Baa Kilɛ di jo ni Musa ni sanha na wu pye: 15 «Yaŋmuyɔ yemu yʼa yaha nɛ Tɛhɛnɛ Baa Kilɛ wo yahama ni ge, sipya wa bu wuregi na kapyebaana la pye kee ka shizhaa na, na jurumu pye wuyɛ kategeec, wufɔɔ di dubyapoo manɛ baa wo wa co wu dubyaa pu ni, wu ba ni wee ni Tɛhɛnɛ Baa Kilɛ mu, wu pye wu kapyebaana li wo yaaŋa ki saraga. Dubya wu ɲuŋɔkana lʼa yaa na pɛrɛmɛ pemu ta ge, pee ya yaa na bɛ ni warifyɛn sikili ɲɔ ki ni, kee kemu kʼa teŋɛ na saha ni Fɛfɛɛrɛ xuu wu wo warifyɛn sikili wu ni ge.d 16 Na fara lee na, yaaga kemu keree na wʼa kapyebaana li pye ge, wu kee pɛrɛmɛ kan, wu guri wu pɛrɛmɛ pu taaga kaguro wogo ki bɛ fara pɛrɛmɛ pu na, wu wu bɛɛri kan saraya ɲaha shɔɔnrivɔɔ wu mu. Saraya ɲaha shɔɔnrivɔɔ wu ma saraga ki wolo, na jurumu yafa wu wo yaaŋa ki pye wufɔɔ na, wu jurumu wu na yafa wu mu.
17 «Sipya wa bu wuregi na Tɛhɛnɛ Baa Kilɛ wo saliya wu ɲɔmɛɛ la kyɛɛgi, ali wufɔɔ ɲɛhɛ bi li kyɛɛgi wuyɛ kategee, wufɔɔ ya jaagi. Tee tigire ti na bye wu ɲuŋɔ ni. 18 Wari ɲɔ kemu kʼa teŋɛ ge, dubyapoo wemu wo ɲuŋɔkana lʼa da pee pɛrɛmɛ pu ta ge, wufɔɔ di wee wa co wu dubyaa pu ni, wemu wu ɲɛ manɛ baa wo ge, wu ba wu kan saraya ɲaha shɔɔnrivɔɔ wu mu wu pye wu jaagi wu wo yaaŋa saraga. Jurumu wemu wʼa pye wuyɛ kategee ge, saraya ɲaha shɔɔnrivɔɔ wu na wee wo yafa yaaŋa ki pye wu na, wu jurumu wu na yafa wu mu. 19 Yaaŋa saraga ki wa kii, bani jaagi fɔɔ wu bye weefɔɔ Tɛhɛnɛ Baa Kilɛ ɲaha tàan.»
Ma bu kafinɛyɛ jo, kelee ma kaa taha kafinɛyɛ na
20 Ayiwa, a Tɛhɛnɛ Baa Kilɛ di Musa pye sanha na: 21 «Sipya wa bu kanahana la pye Tɛhɛnɛ Baa Kilɛ ɲaha tàan, ma na jo wu sipyiɲii ma pa yaaga ka kalifa wu na, a wu ba kafinɛyɛ jo wu mu kee keree na, kelee wʼa shɛ yaaga ka cin wa mu, na ba kafinɛyɛ jo ki keree na, kelee wu shiin na yaaga ka yu kelee na ki ŋmahana, na kafinɛyɛ jo ki keree na, 22 kelee yaaga ka na piin, a wu ki ɲa, na ɲɔ waha, kelee wu shiin ya kàa kafinɛyɛ ɲuŋɔ tàan le jurumu kaa le la bɛɛri shizhaa na, 23 jurumu wʼa pye, na jaagi shan wuyɛ ɲuŋɔ ni. Yaaga kemu wʼa yu, kelee na ki ta naŋmahara ti ni ge, yaaga kemu kʼa bi kalifa wu na ge, kelee yapɛɛngɛ kemu wʼa ɲa ge, wu na kee tɛrɛŋɛ. 24 Yaaga kemu bɛɛri ɲuŋɔ tàan wʼa kaa taha kafinɛyɛ na ge, wu da kee yaaga ke tɛrɛŋɛ. Caŋa kemu wu da wee jaagi wu wo yaaŋa saraga ki wolo ge, kee caŋa kiyɛ pyaa wu da kee yaaga ke tɛrɛŋɛ ki ɲɔporo na, na guri sanha na ki pɛrɛmɛ pu taaga kaguro wogo taha ki na na kan ki kafɔɔ wu mu. 25 Wari ɲɔ kemu kʼa teŋɛ ge, dubyapoo wemu wo ɲuŋɔkana lʼa da pee pɛrɛmɛ pu ta ge, wufɔɔ di wee wa co wu dubyaa pu ni, wemu wu ɲɛ manɛ baa wo ge, wu ba wu kan saraya ɲaha shɔɔnrivɔɔ wu mu wu pye wu jaagi wu wo yaaŋa saraga Tɛhɛnɛ Baa Kilɛ mu. 26 Saraya ɲaha shɔɔnrivɔɔ wu na jurumu yafa wu wo yaaŋa ki pye wu na Tɛhɛnɛ Baa Kilɛ ɲaha tàan, kanahana lemu wʼa pye ge, lee na yafa wu mu.»