Saraya ɲaha shɔɔnrivɛɛ pu wo nibyegee saraya nizogoyo yi keree na
6
Ayiwa, a Tɛhɛnɛ Baa Kilɛ di Musa pye, 2 na wu yi jo Arɔn ni wu jalaa pu mu na: «Saraya nizogoyo yi wo kodorogoo ki wa kiiri: Saraga nizogoŋɔ kʼa yaa na piige ki bɛɛri pye na sori saraya tawologo ki na, fo na shɛ nɔ ɲisɔɔgɔ ki na. Saraya tawologo ki wo na kʼa yaa na kori yaha na ɲí. 3 Ɲiga ki ba mugi, saraya ɲaha shɔɔnrivɔɔ wu ma yìri ɲisɔɔgɔ ki na, na wu lɛn fàya yi le, wu kulushipire le, ni wu fadegbɔrɔ le. Saraga ki kʼa sogi saraya tawologo ki na ge, wʼa kee wo shɔɔnrɔ ti kuu, na ti yaha saraya tawologo ki kabanugo. 4 Wu bu xhɔ, wu yee fàya yi wolo, wu yatii le, wu shɔɔnrɔ ti lɔ, wu shɛ ti wo buguro ti kadugo yíri xuu wa ni wemu ɲɛ fɛɛfɛɛ ge. 5 Saraya tawologo ki wo na kʼa yaa na kori yaha na ɲí, ki ganha ga fugi bada wɛ. Ɲisɔɔgɔ bɛɛri, saraya ɲaha shɔɔnrivɔɔ wu ma kajiiye le ki ni, na saraya nizogoŋɔ ki taha wà, na ɲaɲiŋɛ saraga ki wo sìnmɛ pu sòrogo ki na 6 Nagbɛrɛyahaŋa kʼa yaa na kori yaha gbee saraya tawologo ki na, ki ganha ga fugi bada wɛ.Saraya ɲaha shɔɔnrivɛɛ pu wo nibyegee shinma saraya yi wo keree na
7 «Ayiwa, shinma saraga wo kodorogoo ki wa mɛ: Arɔn wo jalaa pu pʼa da da kee wo saraya tawologo ki na Tɛhɛnɛ Baa Kilɛ ɲaha tàan. 8 Saraya ɲaha shɔɔnrivɔɔ wu ma keŋɛ ɲii nigin wolo myɛviinmɛ sìnmɛ wo pu ni, na nudanga yawurire ti bɛɛri fara wà, na yee sòrogo saraya tawologo ki na na pye fundogo saraga. Kee nugo ki kʼa dan Tɛhɛnɛ Baa Kilɛ ni. 9 Myɛ pemusama pʼa kori ge, Arɔn ni wu jalaa pʼi pee li shizhɛnhɛrɛ baa, fɛfɛɛrɛ xuu wa ni Ɲuŋɔ Tacirige Fàya Puga ki kaaŋa ki ni. 10 Pu ba da saraga myɛ pu wɔ, pu ganha bu shizhɛnhɛrɛ le pu ni wɛ. Pu wo taa li wa lere, nɛ Kilɛ wʼa lee kan pu mu na wo shinma saraya nizogoyo yi ni. Fɛfɛɛrɛ yaaga ki ɲɛ kii ba jurumu yafa wo saraga ke ni yaaŋa wo saraga ki ɲɛ wɛ. 11 Arɔn wo tirige shɛɛn namaa pu yɛ pu da já da ki li. Pu wo taa li wa lere gbee, na foro saraya nizogoyo yi ni, yemu yʼa wo na gaan Tɛhɛnɛ Baa Kilɛ mu ge. Sipya watii bɛɛri wʼa kpɔn kee ka na ge, kapegee kʼa ma le*.»
Saraya ɲaha shɔɔnrivɛɛ wo saraya yi kodorogoo
12 Ayiwa, a Tɛhɛnɛ Baa Kilɛ di Musa pye sanha na: 13 «Caŋa ɲii lemu tɛhɛnɛ na mʼa Arɔn ni wu jalaa pu tìre, na pu yaha nɛ yahama ni ge, saraya yemu pʼa yaa na wo na gaan nɛ Tɛhɛnɛ Baa Kilɛ mu ge, yee yi wa mɛ: Caŋa caŋa, pʼi myɛviinmɛ kiloo taanri wolo kan na mu. Mʼa taaga ka wolo ɲisɔɔgɔ na, na ba taaga kisaŋa wolo yakoŋɔ. 14 Pee myɛ pʼa yaa na pu tɔnhɔ sìnmɛ ni, na pu káa teŋɛɛ ni, na wee ŋmɔmia wu cere cere, na wu wolo saraga Tɛhɛnɛ Baa Kilɛ mu. Kee nugo ki kʼa dan wu ni. 15 Arɔn ja wemu wu da ba deŋɛ wu faara na pye saraya ɲaha shɔɔnrivɛɛ wo ɲuŋɔfɔgbɔ wu ge, kee saraga ke wu bɛ ya yaa na wo. Kee wa saraga, kemu na ba wo gbee ge. Ki bɛɛri ki da zòrogo fɛɛfɛɛ Tɛhɛnɛ Baa Kilɛ mu. 16 Saraya ɲaha shɔɔnrivɛɛ pʼa myɛ saraya yemu wo ge, yi bɛɛri ya yaa na sòrogo fɛɛfɛɛ, yafiin bɛ ya yaa na li ka ni wɛ.»
Saraya ɲaha shɔɔnrivɛɛ pu wo nibyegee jurumu yafa wo saraga ki keree na
17 Ayiwa, a Tɛhɛnɛ Baa Kilɛ di nugo Musa pye sanha na: 18 «Yi jo Arɔn ni wu jalaa pu mu na jurumu yafa wo saraga ki wo kodorogoo ki wa kiiri: Xuu wemu ni pʼa saraya nizogoyo yi kɔɔngi ge, wà jurumu yafa wo saraga kʼa yaa na kuun, Tɛhɛnɛ Baa Kilɛ ɲaha tàan. Fɛfɛɛrɛ yaaga ki ɲɛ kii fo xuuni. 19 Saraya ɲaha shɔɔnrivɔɔ wemu wʼa da jurumu yafa saraga ki wolo ge, wee di ki xa. Xuu wemu wu ɲɛ fɛɛfɛɛ ge, wu ki xa wà, Ɲuŋɔ Tacirige Fàya Puga ki kaaŋa ki ni. 20 Sipya bɛɛri wʼa kpɔn tee saraga xaara ta na ge, kapegee kʼa ma le. Ki shishan pu bu nɔ fàŋa bɛɛri na, wee xuu wʼa yaa na wu cere je fàŋa ki ni, fɛfɛɛrɛ xuu wa ni. 21 Pu bu xaara ti shɔhɔ cogo shɔɔ ni, pu bu xɔ, pʼi lee ja. Pu bu ti shɔhɔ daɲaa tɔɔrɔ shɔɔ ni, pʼi lee kemɛ shugo, pʼi li sho ni lɔhɔ ni. 22 Saraya ɲaha shɔɔnrivɔɔ wu puga shɛɛn piimu bɛɛri pu ɲɛ namaa ge, pee bɛɛri na já te xaara ta xa. Fɛfɛɛrɛ yaaga ki ɲɛ kii fo xuuni. 23 Ga jurumu yafa saraga bɛɛri wo shishan pʼa jé Ɲuŋɔ Tacirige fàya Puga ki ni, na taga jurumu yafa wo yaaŋa ki pye fɛfɛɛrɛ xuu wu ni ge, kee saraga ka shishiin ganha bu xha wɛ. Kʼa yaa na ki sòrogo.»