Saraya ɲaha shɔɔnrivɛɛ pu wo nibyegee yaaŋa saraga ki keree na
7
«Ayiwa, yaaŋa saraga wo kodorogoo ki wa kiiri: Saraga ki wa kii kemu ki ɲɛ fɛɛfɛɛ fo xuuni ge. 2 Xuu wemu ni pʼa saraya nizogoyo yi kɔɔngi ge, wà yaaŋa saraga kʼa yaa na kuun, na ki shishan pu ɲɛrɛgi ɲɛrɛgi saraya tawologo ki kabanuyo yi bɛɛri na. 3 Pʼi sìnmɛ pu bɛɛri wolo saraga, naŋa ki fara sìnmɛ fanfanga ki na, 4 ni zanlogoo shuun we, ni ki sìnmɛ pe, ni gbodiye yi wo sìnmɛ pe, ni ɲɛrɛ le, pʼi lee ni zanlogoo ki laha. 5 Saraya ɲaha shɔɔnrivɔɔ wu yee sòrogo saraya tawologo ki na. Yaaŋa saraga ki ɲɛ kii, kemu ya sòrogo Tɛhɛnɛ Baa Kilɛ mu ge. 6 Saraya ɲaha shɔɔnrivɔɔ wu wo tirige shɛɛn piimu pu ɲɛ namaa ge, pee yɛ pʼa te xaara te xaa. Fɛfɛɛrɛ xuu wa ni pu da ti xa, bani yaaga ki ɲɛ kii kemu ki ɲɛ fɛɛfɛɛ fo xuuni ge.7 «Jurumu yafa wo saraga ki kodorogoo ni yaaŋa saraga ki wo kodorogoo ki bɛɛri ki ɲɛ nigin. Saraya ɲaha shɔɔnrivɔɔ wemu wu ma jurumu yafa wu wo yaaŋa ki pye ge, wee wuuro ti ɲɛ xaara te. 8 Saraya ɲaha shɔɔnrivɔɔ wa bu sipya wa wo saraga nizogoŋɔ wolo, kee saraga ki wo sɛɛgɛ ki ma gan wee saraya ɲaha shɔɔnrivɔɔ wu mu. 9 Myɛ saraga bɛɛri, pʼa ki fɔ́ digi ni la, pʼa ki káa teŋɛɛ ni, kelee dagoŋɔ ni la, saraya ɲaha shɔɔnrivɔɔ wemu wu da ki kan Kilɛ mu ge, wee wogo ki da bye kii. 10 Myɛ saraga bɛɛri, ki sìnmɛ wogo fara ki sìnmɛ baa wogo na, yee bɛɛri na ba loolo nidannumɔ na Arɔn jalaa pu bɛɛri na.
Saraya ɲaha shɔɔnrivɛɛ pu wo nibyegee ɲaɲiŋɛ saraya yi keree na
11 «Ayiwa, ɲaɲiŋɛ saraya yemu pʼa wo na gaan Tɛhɛnɛ Baa Kilɛ mu ge, yee wo kodorogoo ki wa kiiri: 12 Sipya wa bu jo wu ɲaɲiŋɛ saraga wolo, kʼi bye fokaanra wogo, wufɔɔ ya yaa na ye yaŋmuyɔ ye taha kee ɲaɲiŋɛ saraga ki na. Sìnmɛ buuri, wu shizhɛnhɛrɛ baa wo, ni shizhɛnhɛrɛ baa ŋmɔmia, na sìnmɛ le wu ni, ni myɛviinmɛ buuri, myɛviinmɛ pemu ya tɔnhɔ sìnmɛ ni ge. 13 Wu shizhɛnhɛrɛ wo buuri bɛ taha wu ɲaɲiŋɛ saraga ki na, kee kemu ki ɲɛ fokaanra wogo ki ge. 14 Pu na ba buuri wa wolo wolo saraga buuri wu bɛɛri ni, na wee yirige fugba we ni Tɛhɛnɛ Baa Kilɛ mu. Saraya ɲaha shɔɔnrivɔɔ wemu wʼa da ba ɲaɲiŋɛ saraga ki shishan pu ɲɛrɛgi ɲɛrɛgi ge, wee buuri wu na ba bye wee wo. 15 Caŋa kemu ɲaɲiŋɛ saraga kʼa da wolo na pye fokaanra wogo ge, pʼi ki xaara ti xa kee caŋa, yaaga ganha bu shɔn ti ni wɛ.
16 «Ɲaɲiŋɛ Saraga ki bu da ɲɔfaaga wogo, kelee daan na mu wo saraga, caŋa kemu pʼa ki wolo ge, pu na já xaara ta xa kee caŋa, na ba tisara xa ɲimuguro ti na. 17 Saraga ki xaara ta bu gori caŋa taanri wogo ki na, pʼi tee sòrogo. 18 Ga wa bu ɲaɲiŋɛ saraga xaara ta xa caŋa taanri wogo ki na, kee saraga ki da joo nige wɛ. Kee saraga kʼa wolo tawaga ni, bani ki xaara tʼa ɲɛri fɛfɛɛrɛ baa xaara. Wa bu tee xaara ta xa, tee tigire ti na bye wufɔɔ ɲuŋɔ ni. 19 Xaara ti bu gbɔn yaaga ka na kemu ɲɛ fɛɛfɛɛ wɛ, wa ganha bu ti xa wɛ, pʼi ti sòrogo. Piimu bɛɛri pu ɲɛ fɛɛfɛɛ ge, pu na já te xaara te xa. 20 Ga sipya wa bu Tɛhɛnɛ Baa Kilɛ wo ɲaɲiŋɛ saraga xaara ta xa, na ta wufɔɔ ɲɛ fɛɛfɛɛ wɛ, weefɔɔ na gɔri yeege wu wo shi shɛɛn pu ni. 21 Yaaga kemu ɲɛ fɛɛfɛɛ wɛ, sipya bu gbɔn kee ka na, wʼa pye sipya la, kʼa pye yapɔrɔgɔ la, kelee ki shiin ya pye tanhaŋa yaaga, wa bu gbɔn kee ka na, na Tɛhɛnɛ Baa Kilɛ wo ɲaɲiŋɛ saraga ki xaara ti xa, weefɔɔ na gɔri yeege wu wo shi shɛɛn pu ni.»
Xaara sìnmɛ ni shishan ya yaa na xhaa wɛ
22 Ayiwa, a Tɛhɛnɛ Baa Kilɛ di Musa pye na wu yi jo Izirayɛli nagoo pu mu na: 23 «Yi ganha ba xaara sìnmɛ xaa wɛ, pʼa pye nù sìnmɛ la, pʼa pye dubya sìnmɛ la, pʼa pye sika sìnmɛ la, yi ganha ba pu xaa wɛ. 24 Yapɔrɔgɔ kemu bu xhu kiyɛ mu, kelee yacoŋɔ bu ki gbo, yi na já kee wo sìnmɛ pu taga kaa latii yàa, ga yi ganha bu pu xa wɛ. 25 Saraya yemu yʼa wo na gaan Tɛhɛnɛ Baa Kilɛ mu na pye saraya nizogoyo ge, sipya bɛɛri wʼa kee ka wo sìnmɛ pa xa ge, weefɔɔ na gɔri yeege wu wo shi shɛɛn pu ni. 26 Xuu bɛɛri ni yi ɲɛ ge, wa ganha ga shishan xa wɛ. Pʼa pye yatɔɔgɔ wo la, pʼa pye shazhiga wo la, wa ganha ga pu xa wɛ. 27 Sipya bɛɛri wʼa shishan xa ge, pu tuugo bɛɛri, weefɔɔ na gɔri yeege wu wo shi shɛɛn pu ni.b»
Saraya ɲaha shɔɔnrivɛɛ pu wo tahaa
28 Ayiwa, a Tɛhɛnɛ Baa Kilɛ di Musa pye na wu yi jo Izirayɛli nagoo pu mu na: 29 «Sipya wa bu ɲaɲiŋɛ saraga wolo Tɛhɛnɛ Baa Kilɛ mu, lemu li ɲɛ Tɛhɛnɛ Baa Kilɛ wo taa li ge, wufɔɔ di lee wolo saraga ki ni wu kan. 30 Saraga xaara temu pu ma sòrogo Tɛhɛnɛ Baa Kilɛ mu ge, wuyɛ pyaa di ba ni tee ni wu keye yi ni. Wu ba ni sìnmɛ pe, ni gbiic wu bɛ ni, kɔnhɔ gbii wu ba figi figi Tɛhɛnɛ Baa Kilɛ ɲaha tàan. 31 Saraya ɲaha shɔɔnrivɔɔ wu sìnmɛ pu sòrogo saraya tawologo ki na. Gbii wu wi ge, wee ɲɛ Arɔn ni wu jalaa pu wo. 32 Ɲaɲiŋɛ saraga bɛɛri ya gbo ge, yʼi ki kanige cɛ shii li kan saraya ɲaha shɔɔnrivɔɔ wu mu. 33 Arɔn wo jalaa pu ni, wemu wu da ba ɲaɲiŋɛ saraga ki shishan pe ni ki sìnmɛ xaara ti kan ge, wee wo taa li da bye shii le. 34 Gbii wemu pu ma figi figi ni shii lemu pu ma wolo ge, nɛ yee lɔ Izirayɛli nagoo pu wo ɲaɲiŋɛ saraya yi ni, na yi kan Arɔn ni wu jalaa pu mu, bani yee yatɛnyɛ ye yi da da gaan pu mu gbee.»
35 Caŋa ɲii lemu tɛhɛnɛ na Arɔn ni wu jalaa pʼa teŋɛ na pye Tɛhɛnɛ Baa Kilɛ wo saraya ɲaha shɔɔnrivɛɛ ge, ye yi ɲɛ pu wo tahaa kee na foro saraya yi ni yemu yʼa sòrogo Tɛhɛnɛ Baa Kilɛ mu ge. 36 Caŋa kemu tɛhɛnɛ na pʼa pu tìre ge, ye yaŋmuyɔ ye Tɛhɛnɛ Baa Kilɛ ya shɛ na Izirayɛli nagoo pu pʼa yee kaan pu mu. Wee ɲɛ saliya pu ni pu kadugo shi nibama wu bɛɛri mu, wemu da ga yìri wɛ.
37 Ayiwa, kii kodorogoo kii ki wa saraya yi wo kodorogoo kee, saraya nizogoyo ye, ni shinma saraya, ni jurumu yafa saraya, ni yaaŋa saraya, ni saraya ɲaha shɔɔnrivɛɛ pu wo teŋɛ teŋɛ saraya, ni ɲaɲiŋɛ wo saraya ye. 38 Sinayi faaboboŋɔ ki na Tɛhɛnɛ Baa Kilɛ ya kii kodorogoo kii kan Musa mu siwaga ki ni. Caŋa kemu wʼa Izirayɛli nagoo pu pye na pu pa pu yakanya yi kan wee Tɛhɛnɛ Baa Kilɛ mu ge, kee caŋa wʼa ki kan.