SARAYA ƝAHA SHƆƆNRIVƐƐ PU WO LABYE WU ƝƆKƆƆNRƆ
Pʼa Arɔn ni wu jalaa pu teŋɛ na pye saraya ɲaha shɔɔnrivɛɛ
8
Ayiwa, a Tɛhɛnɛ Baa Kilɛ di Musa pye: 2 «Pa ni Arɔn ni wu jalaa pu ni Ɲuŋɔ Tacirige Fàya Puga ki tajege ki ɲɔ na, na fara saraya ɲaha shɔɔnrivɛɛ pu wo fàya ye, ni sindirimɛ pu bɛ na. Mʼa ba ni pu wo jurumu yafa saraga nupee li bɛ ni, ni dubyapee shuun we, ni daŋa ke, kee kemu ni shizhɛnhɛrɛ baa buuri wu ɲɛ ge. 3 Mʼa Izirayɛli nagoo pu bɛɛri yiri pinnɛ wà.» 4 Yemu Tɛhɛnɛ Baa Kilɛ ya jo Musa mu ge, a Musa di lee pye. A Izirayɛli nagoo pu bɛɛri di ba binnɛ Ɲuŋɔ Tacirige Fàya Puga ki tajege ki ɲɔ na.5 A Musa di sipyiire ti pye: «Tɛhɛnɛ Baa Kilɛ ya jo na lemu li pye ge, lee li wa le.» 6 A wu Arɔn ni wu jalaa pu pye pʼa fulo, na lɔhɔ taga pu wuu. 7 A wu fadegbɔrɔ li le Arɔn na, na kirige ki pɔ wu na, na fadedɔɔngɔ ki le wu na, na efodi* wu le taha wà, na wee wo kirige ki taga wu pɔ kadugo ke ni. 8 A wu dodoparaga ki le shan wu dodoŋɔ ki na, na Urimu ni Tumimua wu lee kee funŋɔ ni. 9 A wu ɲumiginɛ li migile wu ɲuŋɔ ki na, na sanni tuubɛbɛɛnɛ li lɔ, lemu lʼa yàa na pye ba tige fyɛɛnrɛ ɲɛ-ɛ ge, na lee pɔ ɲumiginɛ li ɲahagbaa na, ma na jo ba Tɛhɛnɛ Baa Kilɛ ya yi jo wu mu wɛ. Lee tuubɛbɛɛnɛ lʼa li shɛɛ na wʼa yaha Tɛhɛnɛ Baa Kilɛ yahama ni.*
10 Lee kadugo na, a Musa di sindirimɛ pu lɔ, na Ɲuŋɔ Tacirige Fàya Puga ke ni ki funŋɔ yaŋmuyɔ yi bɛɛri tìre na yaha Tɛhɛnɛ Baa Kilɛ yahama ni. 11 A wu sìnmɛ pa ɲɛrɛgi ɲɛrɛgi saraya tawologo ki ɲuŋɔ ni tɔɔɲii gbarashuun, na xhɔ na ki tìre, na ki yagbegeye yi bɛɛri tìre, na pɛgɛ ke ni ki serege ki bɛ tìre na yaha Tɛhɛnɛ Baa Kilɛ yahama ni. 12 A wu xhɔ na sìnmɛ pa le Arɔn ɲuŋɔ ni, na wu tìre ma yaha Tɛhɛnɛ Baa Kilɛ yahama ni. 13 Ba wʼa xɔ wɛ, na Arɔn jalaa pu pye pʼa fulo. A wu pu bɛ wo fadegbɔgɔɔ ki le le pu na, na kiriye yi taga pu pɔ pɔ, na ɲumigiŋɛɛ ki migile migile pu na, ba Tɛhɛnɛ Baa Kilɛ ya yi jo wu mu wɛ.
14 Lee kadugo na a Musa di pu pye pʼa pa ni jurumu yafa saraga nupee li ni. A Arɔn ni wu jalaa pʼi pu keye taha li ɲuŋɔ ni. 15 A Musa di nupee li kuun, na wu kabee taga shishan pa lɔ, na pee fara fara saraya tawologo ki yeŋɛɛ ki na na maha círi, na ki pye fɛɛfɛɛ. A wu xhɔ, na shishan pusama wo saraya tawologo ki wo ɲidaa li na, na saraya tawologo ki pye fɛɛfɛɛ kɔnhɔ jurumu yafa wo yaaŋa kʼi da byi ki na. 16 A wu nupee li sìnmɛ pu bɛɛri lɔ, pemu pu ma laara ti tɔ ge, na fara ɲɛrɛ li na, ni zanlogoo kee ni ki wo sìnmɛ pe, na yee sòrogo saraya tawologo ki na. 17 Ga nù wusama wi ge, wu sɛɛgɛ, ni xaara tisara na fara laara ti na, a wu shɛ yee sòrogo buguro ti kadugo yíri, ma na jo ba Tɛhɛnɛ Baa Kilɛ bi yi jo wu mu wɛ.
18 Lee kadugo na a wu pu pye pʼa pa ni dubyapoo wu ni, wemu wu da bye saraga nizogoŋɔ ki ge. A Arɔn ni wu jalaa pʼi ba pu keye taha wu ɲuŋɔ ki ni. 19 A Musa di wu kuun na wu shishan pu ɲɛrɛgi ɲɛrɛgi saraya tawologo ki kabanuyo yi bɛɛri na. 20 A wu wu puri, na xaara ti kɔn cereye cereye, na yi ni ɲuŋɔ ke, ni sìnmɛ pu sòrogo. 21 A wu laara te ni tɔɔyɔ yi je ni lɔhɔ ni, na yi bɛ sòrogo ni dubya wusama ni saraya tawologo ki na. Saraga nizogoŋɔ ki ɲɛ kii, kee nugo kʼa dan Tɛhɛnɛ Baa Kilɛ ni. Saraga nizogoŋɔ ki ɲɛ kii Tɛhɛnɛ Baa Kilɛ mu, ma na jo ba wʼa yi jo Musa mu wɛ.
22 Lee kadugo na a Musa di pu pye pʼa pa ni dubyapoo shuun wo wu ni, wee wemu wu ɲɛ Arɔn ni wu jalaa pu wo teŋɛ teŋɛ dubyapoo wu ge. A Arɔn ni wu jalaa pʼi pu keye taha wee dubya wu ɲuŋɔ ni. 23 A Musa di wu kuun, na wu shishan pa lɔ, na pee fara Arɔn kanige cɛ ɲuwɛŋɛ ki nige ke na, ni wu kanige cɛ kabenigbɔɔ le, ni wu kanige cɛ nibenigbɔɔ le na. 24 A wu xhɔ na Arɔn jalaa pu bɛ pye pʼa fulo. A wu shishan pa fara pu bɛ kanige cɛ ɲuwɛyɛ yi niye ye na, na fara pu kanige cɛ kabefunŋmogoo kee, ni pu kanige cɛ nibefunŋmogoo ki na. A wu xhɔ na shishan pusama ɲɛrɛgi ɲɛrɛgi saraya tawologo ki kabanuyɔ yi bɛɛri na. 25 A wu dubya wu sìnmɛ pu lɔ: naŋa ke, ni sìnmɛ pemu pu ma laara ti tɔ ge, ni ɲɛrɛ le, ni zanlogoo kee ni ki wo sìnmɛ pe, ni kanige cɛ shii le. 26 Daŋa kemu kʼa yereŋɛ Tɛhɛnɛ Baa Kilɛ ɲaha tàan ni shizhɛnhɛrɛ baa buuri wu ni ge, a wu shizhɛnhɛrɛ baa buuri ɲuŋɔ nigin wa lɔ wee ni, ni sìnmɛ wo buuri ɲuŋɔ nigin wa, ni ŋmɔmib ɲile nigin, na yee taha sìnmɛ pe ni kanige cɛ shii li na, 27 na yee bɛɛri le Arɔn ni wu jalaa pu keyɛ ni, na pu pye na pu yi kan Tɛhɛnɛ Baa Kilɛ mu. A pʼi yi figi figi Tɛhɛnɛ Baa Kilɛ ɲaha tàan. 28 A Musa di xhɔ na yee yaŋmuyɔ yi shɔ pu keye yi ni, na yi sòrogo saraya tawologo ki na ni saraga nizogoŋɔ ki ni. Arɔn ni wu jalaa pu wo teŋɛ teŋɛ saraga kʼa pye kere. Saraga nizogoŋɔ ki wa kii, na ma kemu sòrogo ge. Kee wo nugo ki kʼa dan Tɛhɛnɛ Baa Kilɛ ni. 29 A Musa di xhɔ na dubya wu gbiic wu lɔ, na wu figi figi Tɛhɛnɛ Baa Kilɛ ɲaha tàan. A wee gbii wu bye Musa yɛpyaa wo na foro Arɔn yɛ wo teŋɛ teŋɛ saraga dubya wu ni, ba Tɛhɛnɛ Baa Kilɛ bi yi jo wu mu wɛ.
30 Ayiwa, a Musa di sindirimɛ pu lɔ, na shishan pa bɛ lɔ saraya tawologo ki na, na pee ɲɛrɛgi ɲɛrɛgi Arɔn ni wu fàya yi na, na fara wu jalaa pee ni pu fàya yi bɛ na. Lee funŋɔ ni, a wu Arɔn ni wu fàya ye, ni wu jalaa pee ni pu fàya yi yaha mu Tɛhɛnɛ Baa Kilɛ yahama ni.
31 A Musa di Arɔn ni wu jalaa pu pye: «Yi dubya shuun wo wu wo xaara ti shɔhɔ Ɲuŋɔ Tacirige Fàya Puga ki tajege ki ɲɔ na. Yi wo teŋɛ teŋɛ saraga buuri wemu wu wa daŋa ki ni ge, yʼi wee ni xaara ti pinnɛ xa Fàya Puga ki tajege ki ɲɔ ki na, ma na jo ba nɛ bi yi jo wɛ, jo: ‹Arɔn ni wu jalaa di ti xa›. 32 Xaara ta ni buuri wa bu gori, yʼi yee sòrogo. 33 Yʼi gori yaha Ɲuŋɔ Tacirige Fàya Puga ki tajege ki ɲɔ na fo cabyaa gbarashuun, yi ganha bu laha ki ɲɔ na wɛ fo na shɛ yi wo teŋɛ teŋɛ cabyaa gbarashuun wu pye wʼa fa. Bani cabyaa gbarashuun wu ɲɛ yee wo deŋɛ wu wo cabyaa ki ɲɔ ke. 34 Lemu lʼa pye mɛ niɲaa ge, Tɛhɛnɛ Baa Kilɛ wʼa jo na lee li pye, kɔnhɔ yi wo jurumu wu yafa yi mu. 35 Yi na ba gori yaha caŋa ni piige Ɲuŋɔ Tacirige Fàya Puga ki tajege ki ɲɔ na fo cabyaa gbarashuun. Lee kadugo na yi na já da Tɛhɛnɛ Baa Kilɛ wo labye wu pyi kɔnhɔ yi ganha bu xhu wɛ, bani tee tuduro ti tʼa jo nɛ mu.»
36 Ayiwa, Tɛhɛnɛ Baa Kilɛ bi tuduro temu bɛɛri jo Musa mu wu jo Arɔn ni wu jalaa pu mu ge, a pʼi tee bɛɛri pye.