Arɔn ni wu jalaa pu wo labye wu ɲɔkɔɔnrɔ
9
Ayiwa, ba cabyaa gbarashuun wʼa toro wɛ, caŋa gbarataanri wogo ki na a Musa di Arɔn ni wu jalaa pee ni Izirayɛli nɔhɔlɛɛ pu yiri. 2 A wu Arɔn pye: «Nupige nigin co mayɛ mu ma pye jurumu yafa saraga, mʼa dubyapoo nigin co ma pye ma wo saraga nizogoŋɔ, yi bɛɛri di bye manɛa baa woyo. Mʼa ba ni yi Tɛhɛnɛ Baa Kilɛ ɲaha mu. 3 Lee kadugo na mʼa yi jo Izirayɛli nagoo pu mu na pu bɛ pu pa ni sikapoo nigin ni pu wo jurumu yafa saraga, pʼi ba ni yee nigin nupige, ni yee nigin dubyapige ni pu pye saraya nizogoyo, yi bɛɛri di bye manɛ baa woyo. 4 Pʼi ba sanha ni nupee nigin ni dubyapoo nigin ni pu pye ɲaɲiŋɛ saraga. Pʼi ba yee kan Tɛhɛnɛ Baa Kilɛ mu, pʼi myɛ pa tɔnhɔ sìnmɛ ni pu pye shinma saraga, pʼi kee fara yi na, bani Tɛhɛnɛ Baa Kilɛ na ba wuyɛ shɛ yi na niɲaa.»5 Ayiwa, yaŋmuyɔ yemu kaa Musa ya jo ge, a pʼi ba ni yee ni Ɲuŋɔ Tacirige Fàya Puga ki tajege ki ɲɔ na, a Izirayɛli nagoo pu bɛɛri di fulo na yere Tɛhɛnɛ Baa Kilɛ ɲaha tàan. 6 A Musa di jo: «Tɛhɛnɛ Baa Kilɛ ya jo na yee pu lemu pye ge, lee li wa le, yi li pye, yi na wu nɔɔrɔ wu ɲa.»
7 A Musa di Arɔn pye: «Fulo saraya tawologo ki na, mʼa ma wo jurumu yafa saraga ke ni ma wo saraga nizogoŋɔ ki wolo, mʼa ma wo jurumu yafa yaaŋa ki pye, mʼa sipyiire ti bɛ wo jurumu yafa yaaŋa ki pye. Ma bu xhɔ mʼa sipyiire ti bɛ wo saraya yi wolo, mʼa guri pu wo jurumu yafa yaaŋa ki pye sanha, ma na jo ba Tɛhɛnɛ Baa Kilɛ ya yi jo wɛ.»*
8 Ayiwa, a Arɔn di fulo saraya tawologo ki na, na wuyɛ pyaa wo jurumu yafa saraga nupee li kuun. 9 A wu jalaa pʼi pee shishan pu shɔ na kan wu mu. A wu wu kabee le pee ni na pu taga saraya tawologo ki yeŋɛɛ ki fara fara, na xhɔ na pusama wo saraya tawologo ki ɲidaa li na. 10 A wu jurumu yafa saraga nù wu sìnmɛ pe, ni wu zanlogoo kee ni wu ɲɛrɛ li sòrogo saraya tawologo ki na, ma na jo ba Tɛhɛnɛ Baa Kilɛ bi yi jo Musa mu wɛ. 11 Ga a wu shɛ nù wu xaara te ni wu sɛɛgɛ ki sòrogo buguro ti kadugo yíri.
12 A wu xhɔ na saraga nizogoŋɔ ki kuun. A wu jalaa pʼi pee shishan pu shɔ na kan wu mu, a wu pu ɲɛrɛgi ɲɛrɛgi saraya tawologo ki kabaya yi bɛɛri na. 13 A pʼi kee saraga ki xaara ti kɔn cereye cereye, na yee ni ɲuŋɔ ki kan wu mu, a wu yi sòrogo saraya tawologo ki na. 14 A wu laara te ni tɔɔyɔ yi je, na yi bɛ taha saraga nizogoŋɔ ki ɲuŋɔ ni na sòrogo saraya tawologo ki na.
15 Lee kadugo na a Arɔn di sipyiire ti bɛ wo saraya yi wolo. A wu sipyiire ti wo jurumu yafa saraga sikapoo wu co, na wu kuun, na wu wolo jurumu yafa saraga, ba wʼa nupige ki pye wɛ. 16 A wu xhɔ na fulo ni sipyiire ti bɛ wo saraga nizogoŋɔ ki ni, na ki wolo na saha ni ki kodorogoo ki ni. 17 A wu fulo ni shinma saraga ki bɛ ni, na keŋɛ ɲii nigin wolo ki ni, na lee sòrogo saraya tawologo ki na na fara ɲisɔɔgɔ ki wo saraga nizogoŋɔ ki na. 18 Sipyiire ti bi pa ni nupee, ni dubya wemu ni di ba bye ɲaɲiŋɛ saraga* ge, a wu yee bɛ kuun. A wu jalaa pʼi pee shishan pa shɔ na kan wu mu, a wu pee ɲɛrɛgi ɲɛrɛgi saraya tawologo ki kabanuyo yi bɛɛri na. 19 A pʼi nupee le, ni dubyapoo wu wo sìnmɛ xaara ti kɔn: laara ti wo sìnmɛ pe, ni zanlogoo kee ni ki wo sìnmɛ pe, ni ɲɛrɛɛ kee, ni dubyapoo wu wo naŋa ke. 20 A pʼi gbiileeb shuun wu fara yee na na kan Arɔn mu. A Arɔn di sìnmɛ xaara ti sòrogo saraya tawologo ki na. 21 A wu gbiilee pu lɔ, ni kanige cɛ shegee kee, na yi figi figi Tɛhɛnɛ Baa Kilɛ ɲaha tàan, ma na jo ba Musa ya yi jo wɛ.
22 Ayiwa, ba Arɔn ya jurumu yafa saraga ke ni saraga nizogoŋɔ ke, ni ɲaɲiŋɛ saraga ki wolo xɔ wɛ, na wu keye yi yirige fugba wu ni, sipyiire ti shizhaa wu na, na duba pye pu mu. A wu xhɔ na digi saraya tawologo ki na.
23 A Musa ni Arɔn di binnɛ jé Ɲuŋɔ Tacirige Fàya Puga ki ni. Ba pʼa pa foro wɛ, na duba pye sipyiire ti mu. Wee tuun wu ni a Tɛhɛnɛ Baa Kilɛ wo nɔɔrɔ wu wuyɛ shɛ sipyiire ti bɛɛri na. 24 A na di yìri Tɛhɛnɛ Baa Kilɛ yíri, na ba saraga nizogoŋɔ ke ni sìnmɛ pu sòrogo saraya tawologo ki na. Ba sipyiire ti bɛɛri ya lee ɲa wɛ, na fundanga mujoŋɔɔ wá, na do do, na pu ɲahaya ye buri buri.