Na ya Arɔn jalaa shuun sòrogo
10
A Arɔn wo jalaa shuun wa di yìri, pee ɲɛ Nadabu ni Abiyu, a pee di pu wo yawurire shɔhɔɔ ki lɔ, na na ka le ki ni, na nudanga yawurire ta wo ki ɲuŋɔ ni, na kee tanhaŋa na* ki lɔ na pa Tɛhɛnɛ Baa Kilɛ ɲaha tàan, na ta kee na ki shi kaa di bi ta jo pu mu wɛ. 2 Wee tuun wu ni a na ka di yìri Tɛhɛnɛ Baa Kilɛ yìri, na ba pu sòrogo, a pʼi xhu Tɛhɛnɛ Baa Kilɛ ɲaha tàan.3 A Musa di Arɔn pye: «Go ye Tɛhɛnɛ Baa Kilɛ bi jo na: ‹Sipyii piimu pʼa fuloo nɛ na ge, pee ya yaa na pɛɛŋɛ tɛri nɛ wo fɛfɛɛrɛ ti na. Nɔɔrɔ na ba daha nɛ na sipyiire ti bɛɛri ɲii na.› » A fɛhɛnɛ di Arɔn kpɔn. 4 A Musa di Mishayɛli ni Elizafan yiri, pee ɲɛ Uziyɛli wo jalaa. Uziyɛli di ɲɛ Arɔn to wu wo ceborona. A Musa di pu pye: «Yi fulo yʼi yi cebooloo pu nixhuyo yi lɔ laha fɛfɛɛrɛ xuu wu ni, yʼi shɛ ni pu ni buguro ti kadugo yíri.» 5 A pee di fulo, na pu nixhuyo yi lɔ na pu fàya yi yaha pu na, na gari ni pu ni buguro ti kadugo yíri ba Musa ya yi jo wɛ.
6 A Musa di Arɔn ni wu jalaa Eleyazari ni Itamari pye: «Yi ganha bu yi ɲuzhiire ti wuregi le tiyɛ ni wɛ, yi ganha bu yi fàya yi shɛɛngi wɛ, kɔnhɔ yi bɛ ganha bu xhu, yʼi Tɛhɛnɛ Baa Kilɛ wo loyire li kile shan sipyiire ti bɛɛri ɲuŋɔ ni wɛ. Piimu Tɛhɛnɛ Baa Kilɛ ya sòrogo ge, yee cebooloo pee, Izirayɛli puga ki bɛɛri, pee pʼa da ba pu yamɛhɛɛ ki su. 7 Yi ganha bu da yìri laha, Ɲuŋɔ Tacirige Fàya Puga ki ɲɔ na wɛ, kɔnhɔ yi ganha bu xhu wɛ, bani Tɛhɛnɛ Baa Kilɛ wo sindirimɛ pu wa yi na.» Yemu Musa ya jo ge, a pʼi yee koo ɲaari.
Kafugo yagbaya yi wo kodorogoo
8 A Tɛhɛnɛ Baa Kilɛ di Arɔn pye: 9 «Ma ni ma jalaa pu ni, yi ba da jé Ɲuŋɔ Tacirige Fàya Puga ki ni tuun wemu ni, yi ganha bu duvɛn gba wɛ, yi ganha bu kafugo yagbaga katii bɛ gba wɛ, lee bɛ wɛ yi na xhuu. Wee ɲɛ saliya wemu da ga yìri wɛ yi kadugo shi nibama wu bɛɛri mu, 10 kɔnhɔ yaaga kemu ya yaha Tɛhɛnɛ Baa yahama ni, ni yaaga kemu ya nɔhɔ ge, yʼi yee cɛ shɔɔnri yiyɛ ni, yaaga kemu ki ɲɛ fɛfɛɛrɛ wogo, kemu di ɲɛ fɛfɛɛrɛ baa wogo ge. 11 Yi ganha ba kafugo yagbaya gbuu wɛ, kɔnhɔ Tɛhɛnɛ Baa Kilɛ ya saliya ɲɔmɛhɛɛ kiimu jo Izirayɛli nagoo pu mu Musa ɲɔ na ge, yʼi já ya pu kalaa kee bɛɛri ni.»
Saraya xaara ti wo kodorogoo
12 Arɔn jalaa shuun wemu wʼa kori ge Eleyazari ni Itamari, a Musa di Arɔn ni pee pye: «Shinma saraga kemu kʼa kori Tɛhɛnɛ Baa Kilɛ wo saraya nizogoyo yi ni ge, yi kee lɔ yi pye shizhɛnhɛrɛ baa buuri, yʼi wu li saraya yi tawologo ki fɛɛ ni, bani fɛfɛɛrɛ yalige ki ɲɛ kii kemu ki ɲɛ fɛɛfɛɛ fo xuuni ge.* 13 Yʼi wu li fɛfɛɛrɛ xuu wa ni. Saraya nizogoyo ye pʼa wo na gaan Tɛhɛnɛ Baa Kilɛ mu ge, ma ni ma nagoo pu wo taa li wa lere yee saraya yi ni. Yemu yʼa jo nɛ mu ge, yee yi wa ye. 14 Gbiia wu pʼa yirige na wu figi figi Tɛhɛnɛ Baa Kilɛ ɲaha tàan ge, ni shii li pʼa kan Tɛhɛnɛ Baa Kilɛ mu ge, ma ni ma jalaa pee ni ma pushaa pu ni, yʼi yee bɛ li fɛfɛɛrɛ xuu wa ni. Bani yee yʼa kan na pye mu ni ma jalaa pu wo tahaa na foro Izirayɛli nagoo pu wo ɲaɲiŋɛ saraya yi ni.* 15 Shii lemu pu ma wolo kan Tɛhɛnɛ Baa Kilɛ mu ge, ni gbii we pu ma figi figi Tɛhɛnɛ Baa Kilɛ ɲaha tàan ge, na fara sìnmɛ pu na, pee pemu pʼa sòrogo ge, Izirayɛli nagoo pu na ba ma ni yee ni. Pu ba yi figi figi Tɛhɛnɛ Baa Kilɛ ɲaha tàan, yee na ba bye yi woyo, ma ni ma jalaa pu ni. Wee wa saliya wemu da ga yìri wɛ, ma na jo ba Tɛhɛnɛ Baa Kilɛ ya yi jo wɛ.»
Jurumu yafa saraga ki wo xaara te
16 Ayiwa, sikapoo wu pʼa wolo jurumu yafa saraga ki ge, a Musa di wu yegeŋɛ pye, na pu ta pʼa wu sòrogo. A wu luu di yìri Eleyazari ni Itamari tàan, Arɔn wo jalaa shuun wusama. A wu pu pye: 17 «Ɲaha na yee di ya ta jurumu yafa saraga sika wu xa fɛfɛɛrɛ xuu wu ni-i wɛ? Go fɛfɛɛrɛ yaaga ki ɲɛ kii fo xuuni, a Tɛhɛnɛ Baa Kilɛ di wu kan yee mu kɔnhɔ yee di sipyiire ti wo nahama pu lɔ, yʼi pu wo jurumu yafa yaaŋa ki pye Tɛhɛnɛ Baa Kilɛ ɲaha tàan. 18 Saraga ki shishan pu ya ta jé fɛfɛɛrɛ xuu wu ni wɛ, go yee bi yaa na ki xa fɛfɛɛrɛ xuu wu ni ma na jo ba nɛ yi jo yi mu wɛ.»
19 A Arɔn di Musa pye: «Niɲaa pʼa pu wo jurumu yafa saraga ke ni pu wo saraga nizogoŋɔ ki wolo Tɛhɛnɛ Baa Kilɛ ɲaha tàan. Lemu lʼa nɛ ta mɛ ge, nɛ da bi jurumu yafa wo saraga ki xa niɲaa, ta lee bi da daan Tɛhɛnɛ Baa Kilɛ ni ya?»
20 Musa ya yee logo ge, na sɔɔ yee na.