FƐFƐƐRƐ NI FƐFƐƐRƐ BAARA WO KODOROGOO
Xaara temu ti ɲɛ fɛfɛɛrɛ wuuro ni temu ti ɲɛ fɛfɛɛrɛ baa wuuro ge
(Dutɛrɛnɔmɛ 14:3-21)
11
A Tɛhɛnɛ Baa Kilɛ di Musa ni Arɔn pye: 2 «Yi jo Izirayɛli nagoo pu mu na: Ɲìi yaŋmuyɔ yemu bɛɛri yi wa ɲiŋɛ ke na ge, yemu yʼa da já da xhaa ge, yee ye. 3 Yemu wo fereye yʼa taa na pye shuun, yʼi ɲà tɛrɛŋɛ na zanha ge, yi na já da yee xaa. 4 Yemu yʼa ɲà tɛrɛŋɛ na zanha yɛ, kelee yi fereye na taa na pye shuun yɛ ge, yi ganha ba yee xaa wɛ, ma na jo ɲɔhɔŋɔ, kee wʼa dɛrɛŋɛ na zanha, ga ki fereŋɛ kʼi yaa taa na pye shuun wɛ. Yi na da kee wii fɛfɛɛrɛ baa wogo. 5 Yi ganha ba kɔkɔbalea xaa wɛ. Lʼa ɲà tɛɛŋɛ na zanha, ga li fereŋɛ kʼi ya taa na pye shuun wɛ. Yi na da lee wii fɛfɛɛrɛ baa wuu. 6 Yi ganha ba xɔbere xaa wɛ. Lʼa ɲà tɛɛŋɛ na zanha, ga li fereŋɛ kʼi ya taa na pye shuun wɛ. Yi na da lee wii fɛfɛɛrɛ baa wuu. 7 Yi ganha ba shalaa xaa wɛ. Wu fereŋɛ kʼa taa na pye shuun, ga wʼi ya dɛrɛŋɛ na zanha wɛ. Yi na da wee wii fɛfɛɛrɛ baa wo. 8 Yi ganha ba yee xaa wɛ, yi ganha ba gbuun bɛ yi nixhuyo na wɛ. Fɛfɛɛrɛ baa yaŋmuyɔ yi wa yii yee mu.Lɔhɔ yaŋmuyɔ yemu yʼa nɔhɔ ni yemu yi ɲɛ fɛɛfɛɛ ge
9 «Ayiwa, ɲìi yaŋmuyɔ yemu yi wa lɔhɔ ki ni ge, yemu yʼa da já da xhaa ge, yee yi wa mɛ: Lɔhɔ yaŋmuyɔ yemu bɛɛri yi wa ni locɛnrɛgɛɛ, ni kɔɔrɔ ni ge, kʼa pye suumɔ lɔhɔ la kʼa pye gba lɔhɔ la, yi na já da yi xaa. 10 Ga lɔhɔ yaŋmuyɔ yemu bɛɛri yi wa locɛnrɛgɛɛ ni kɔɔrɔ baa suumɔ lɔhɔ kelee gba lɔhɔ ki ni ge, yee na ba bye yi mu tanhaŋa. 11 Yee na ba bye yi mu tanhaŋa, yi ganha ba yi xaara xaa wɛ, yi nixhuyo bɛ di bye yi mu tanhaŋa yaaya. 12 Lɔhɔ yaaga bɛɛri ki ɲɛ locɛnrɛgɛɛ ni kɔɔrɔ baa ge, kee ɲɛ yee mu tanhaŋa yaaga.
Shazhɛɛyɛ yemu yi ɲɛ fɛɛfɛɛ ni yemu yʼa nɔhɔ ge
13 «Yee ya yaa na shazhɛɛyɛ yemu tánha shazhɛɛyɛ yi tɛ ni, yi ganha ba yi xaa-i ge, yee yi wa mɛ: Ɲaa ni tobinŋɛ ni suumɔ lɔhɔ wo ɲaa, 14 ni kalaga, ni tobinyɛ tuuyo yi bɛɛri, 15 ni kanriya tuuyo yi bɛɛri, 16 ni doga, ni totoɲaŋmiinɛ, ni totorofige, ni kaŋmii ni li tuuyo yi bɛɛri, 17 ni totorogo, ni curuŋɔ, ni jaseye ka ka torogo, 18 ni masageŋɛ nivige, ni tikpanga, ni tobinŋɛ, 19 ni masageŋɛ, ni benigɔnb tuuyo yi bɛɛri, ni Kilɛ-xuuroc ni zaginna.
Ɲiŋɛ yakokaara ti fɛfɛɛrɛ wuuro ni ti fɛfɛɛrɛ baa wuuro
20 «Ɲiŋɛ yakokaara temu bɛɛri ti wa ni kapaya ni tɔɔyɔ shishɛɛrɛ ni ge, tee na bye yi mu tanhaŋa. 21 Tee yakokaara kapaya ni tɔɔyɔ wuuro ti ni, temu yʼa da já da xhaa ge, tee ti wa mɛ: Temu ti wa ni tɔvɛrɛyɛ bɛ ni na sirani ɲiŋɛ ki na ge. 22 Temu yʼa da já da xhaa ge, tee ti wa mɛ: kabeeye tuuyo yi bɛɛri, ni vɛnhɛnɛɛ. 23 Ga yakokaara tisara bɛɛri ti wa ni kapaya ni tɔɔyɔ shishɛɛrɛ ni ge, tee na bye yi mu tanhaŋa.
Sipya ya yaa na kpɔn yaŋmunɔhɔŋɔ nixhugo na wɛ
24 «Ye yaŋmuyɔ ye na ba yi pyi fɛfɛɛrɛ baa fɛɛ. Wa ba gbɔn ka nixhugo na, weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. 25 Sipya bɛɛri wʼa kee yaaga ka nixhugo lɔ ge, weefɔɔ di wu fàya je. Weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na.
26 «Yabobogo bɛɛri ki ɲɛ ki fereŋɛ ki ya taa na pye shuun wɛ, kelee ki ya ɲà tɛrɛŋɛ na zanha wɛ, yee na ba bye fɛfɛɛrɛ baa yaŋmuyɔ yi mu. Sipya bɛɛri wʼa kpɔn kee ka na ge, weefɔɔ na bye fɛfɛɛrɛ baa fɔɔ. 27 Yaboboyo yemu bɛɛri yʼa ɲaari tɔɔyɔ shishɛɛrɛ na, na ɲɛ fereye baa ge, yee na ba bye yi mu fɛfɛɛrɛ baa woyo. Sipya bɛɛri wʼa kpɔn kee ka nixhugo na ge, weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. 28 Sipya bɛɛri wʼa kee ka nixhugo lɔ ge, wufɔɔ di wu fàya je. Weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. Fɛfɛɛrɛ baa yaŋmuyɔ yi ɲɛ yii yee mu.
Ɲiŋɛ yafuuyo yi fɛfɛɛrɛ woyo ni yi fɛfɛɛrɛ baa woyo
29 «Ɲiŋɛ yafuuyo yemu yi ɲɛ fɛfɛɛrɛ baa yee mu ge, yee yi wa mɛ: piizhɔn, ni kanifɔgɔ, ni kakeye tuuyo yi bɛɛri, 30 ni ɲahamaɲuŋɔ, ni gbenitanra, ni kɔɔpinŋɛ, ni kudun ni geŋmori. 31 Ɲiŋɛ yafuuyo yi bɛɛri ni, ye yi wa fɛfɛɛrɛ baa woyo yee mu. Sipya bɛɛri wʼa kpɔn ka nixhugo na ge, weefɔɔ na ba gori yaha fɛfɛɛrɛ baa fɔɔ fo na shɛ nɔ yakonŋɔ ki na. 32 Keka nixhugo bu do yaaga tuugo bɛɛri ɲuŋɔ ni, kee yaaga ke na ba jate fɛfɛɛrɛ baa wogo. Kʼa pye tige yaaga la, kʼa pye fàŋa la, kʼa pye sɛɛgɛ la, kʼa pye bɔrɔgɔ la. Yaaga tuugo bɛɛri ni pʼa gbegele ge, pu na ba ki je, kʼa bye yaha fɛfɛɛrɛ baa wogo fo na shɛ nɔ yakoŋɔ ki na. Lee kadugo na, ki na guri bye fɛfɛɛrɛ wogo. 33 Ke yaaga keka nixhugo bu do cogo yaaga funŋɔ ni, ki funŋɔ yaaga ki na ɲɛri fɛfɛɛrɛ baa wogo. Kee cogo yaaga kʼa yaa na ki ja. 34 Kee cogo yaaga ke wo lɔhɔ ka bu nɔ ɲɔyalige bɛɛri na, kee na bye fɛfɛɛrɛ baa wogo. Ki bu je yagbaga tuugo bɛɛri ni, na ki yaha yaaga tuugo bɛɛri funŋɔ ni, ki na bye fɛfɛɛrɛ baa wogo. 35 Keka nixhugo bu do yaaga ka tuugo bɛɛri ɲuŋɔ ni, kee na bye fɛfɛɛrɛ baa wogo, kʼa pye buuri fɔ́ fɔ́ yaaga la, ki shiin ya pye tashɔhɔŋɔ la, yi ki waraga, bani kʼa ɲɛri fɛfɛɛrɛ baa wogo, yee na ba bye fɛfɛɛrɛ baa woyo yee mu. 36 Keka nixhugo bu do lobulowii ni, kelee keeŋɛ funŋɔ ni, lɔhɔ ki na bye fɛfɛɛrɛ wogo, ga mu wemu wʼa ki nixhugo ki wolo ge, mu na bye fɛfɛɛrɛ baa fɔɔ. 37 Keka nixhugo bu do yashi tuugo bɛɛri ɲuŋɔ ni, wee yashi wu na gori yaha fɛfɛɛrɛ ni. 38 Ga lɔhɔ bu le xɔ yashi wemu ni, a keka nixhugo di do wu ni, wee yashi wʼa ɲɛri fɛfɛɛrɛ baa wo yee mu.
39 «Yaboboyo yemu yi wa yee wo nixhaya ge, kee ka bu xhu, wemu bɛɛri wʼa kpɔn ki nixhugo ki na ge, weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. 40 Sipya bɛɛri wʼa ka nixhugo xa ge, weefɔɔ di wu fàya je. Weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. Wemu bɛ wʼa ki nixhugo ki lɔ ge, wee bɛ di wu fàya je. Weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na.
41 «Yaaga bɛɛri kʼa fuulo ɲiŋɛ ke na ge, kee ɲɛ tanhaŋa yaaga, wa ganha ga kee ka xa wɛ. 42 Yaaga tuugo bɛɛri kʼa fuulo ɲiŋɛ ke na ge, kelee ɲiŋɛ yafuugo bɛɛri kʼa ɲaari tɔɔyɔ shishɛɛrɛ na, kelee tɔɔyɔ niɲɛhɛyɛ na ge, wa ganha ga kee ka xa wɛ, tanhaŋa yaŋmuyɔ yi wa yii. 43 Yi ganha bu yiyɛ pye pʼa danha ye ɲiŋɛ yafuuyo ye ya shishiin wuu na wɛ. Yi ganha bu yiyɛ le fɔɔnrɔ ni ni yi ni, yʼi yi pye fɛfɛɛrɛ baa sipyii wɛ. 44 Nɛ wu ɲɛ Tɛhɛnɛ Baa Kilɛ, yi Kilɛ we. Yi yiyɛ yaha na yahama ni, yi na ba bye fɛfɛɛrɛ wuu, bani Fɛfɛɛrɛ wo nɛ ɲɛ. Ye yaŋmuyɔ ye yʼa fuulo mɛ ɲiŋɛ ki na ge, wa ganha bu kee ka shishiin yaha ki wu pye fɛfɛɛrɛ baa fɔɔ wɛ.* 45 Nɛ wu ɲɛ Tɛhɛnɛ Baa Kilɛ we: Nɛ wʼa yee yeege Misira fiige ki ni, na bye yi Kilɛ. Lee wuu na yi na ba bye fɛfɛɛrɛ wuu, bani Fɛfɛɛrɛ wo nɛ ɲɛ.
46 «Saliya wemu wʼa ɲaha tii yaboboyo ye, ni shazhɛɛrɛ te, ni lɔhɔ yaŋmuyɔ yi bɛɛri, ni ɲiŋɛ yakokaara ti bɛɛri na ge, wee wu ɲɛ we. 47 Yaaga kemu ki ɲɛ fɛfɛɛrɛ baa wogo, ni kemu ki ɲɛ fɛfɛɛrɛ wogo ge, yʼi yee cɛ wolo yiyɛ ni. Kemu kʼa xhaa ni kemu ki ɲɛ ki ya xhaa wɛ ge, yʼi yee bɛ cɛ wolo yiyɛ ni.