Siivɔɔ ya yaa na kodorogoo kiimu ɲaari kɔnhɔ wu bye fɛɛfɛɛ ge
12
A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: Cee bu yere yacɛrɛ na, na funana se, wu na ba gori yaha fɛfɛɛrɛ baara ni, fo na ta cabyaa gbarashuun, ma na jo ba wu lowuuyo wo wu ma bye wɛ. 3 Caŋa gbarataanri wogo ki na, pʼa pya wu kɔn.* 4 Wu na ba cabyaa kɛlɛɛ taanri ni taanri (33) pye sanha wu na pye fɛɛfɛɛ na foro wu shishan pu ni. Wu ganha bu gbɔn fɛfɛɛrɛ yaaga ka shishiin na wɛ, wu ganha bu jé fɛfɛɛrɛ puga ki ni wɛ, fo wu fɛfɛɛrɛ ti wo cabyaa ki ɲɔ ba shɛ fa.5 «Wu bu digi fucɛɛrɛ na, cewuu shuun wu da ba bye na kori yaha fɛfɛɛrɛ baara ni ba wu lowuuyo wo wu ma bye wɛ. Lee kadugo na wu cabyaa kɛlɛɛ gbaara ni gbaara (66) pye, wu na pye fɛɛfɛɛ na foro wu shishan pu ni.
6 «Wu fɛfɛɛrɛ ti caya yi ɲɔ ba fa, na saha ni wu pya wu tuugo ni, wu ná kelee wu cee, wu shɛ ni yee nigin dubyapige ni saraya ɲaha shɔɔnrivɔɔ wu mu Ɲuŋɔ Tacirige Fàya Puga ki tajege ki ɲɔ na, kee di bye saraga nizogoŋɔ. Wu shɛ ni gbegbeshazhira nigin, kelee ni xobanra nigin ni, lee di bye jurumu yafa wo saraga ke. 7 Saraya ɲaha shɔɔnrivɔɔ wu na ba yee saraya yi wolo Tɛhɛnɛ Baa Kilɛ ɲaha tàan, na jurumu yafa wu wo yaaŋa ki pye. Lee bu bye, wu na bye fɛɛfɛɛ na foro wu shishan pu ni. Cee bu digi funana na kelee fucɛɛrɛ, le li wa wee wo kodoronɔ. 8 Dubya se bye wu ya ta cee wu ni wɛ, wu gbegbeshazhigaa shuun co, kelee xobangaa shuun. Nigin wa di bye saraga nizogoŋɔ, nigin wa di bye jurumu yafa wo saraga ke. Saraya ɲaha shɔɔnrivɔɔ wu na ba jurumu yafa wu wo yaaŋa ki pye wu na, wʼa bye fɛɛfɛɛ.