Levitike 13

YAMA PEMU PʼA CEESƐƐGƐ KYƐƐGI GE, PEE WO KODOROGOO

Togo wo kodorogoo

A Tɛhɛnɛ Baa Kilɛ di Musa ni Arɔn pye: 2 «Pugo bu foro sipya wa ceesɛɛgɛ na, kelee taberege, kelee tafige ka, kemu ya funni na zhaa di bye ba togo ɲɛ-ɛ ge, pʼi shɛ ni wufɔɔ ni saraya ɲaha shɔɔnrivɛɛ Arɔn mu, kelee wu ja wa. 3 Saraya ɲaha shɔɔnrivɔɔ wu ceesɛɛgɛ ki yama pu sɛɛri. Shiire temu ti wa tayaŋa ki ni ge, tee bu da tʼa fiinŋɛ foro, a nɔɔgɔ ki bɛ di da kʼa shɛ funŋɔ ni, togo ki ɲɛ kii. Saraya ɲaha shɔɔnrivɔɔ wu bu wu sɛɛri xɔ, wu li shɛ na fɛfɛɛrɛ baa fɔɔ wu ɲɛ wii. 4 Tayaŋa ki bu da kʼa fiinŋɛ, na funni, kʼi ya shɛ funŋɔ ni wɛ, shiire temu ti ɲɛ ki na ge, tee bɛ di ya fiinŋɛ foro wɛ, saraya ɲaha shɔɔnrivɔɔ wu weefɔɔ waa yaha wu yɛ xuu ni wu ta cabyaa gbarashuun. 5 Caŋa gbarashuun wogo ki na, saraya ɲaha shɔɔnrivɔɔ wu yama fɔɔ wu sɛɛri. Yama pu bu da pʼa yere yaha tanugo ni, pu bye pʼi ya ta shɛ ɲaha na wɛ, saraya ɲaha shɔɔnrivɔɔ wu wu yaha wu yɛ xuu ni sanha wu cabyaa gbarashuun wa bɛ pye. 6 Caŋa gbarashuun wogo ki na saraya ɲaha shɔɔnrivɔɔ wu wu sɛɛri sanha tɔɔɲii shuun wuu li ni. Wu bu tayaŋa ki ta ki na wuu na fòro, kʼi ya ta shɛ nige ɲaha na wɛ, saraya ɲaha shɔɔnrivɔɔ wu li shɛ na fɛfɛɛrɛ fɔɔ wu ɲɛ wii. Taberege yɛ kʼa pye kii. Yama fɔɔ wu na wu fàya yi je, lee kadugo na wu na bye fɛɛfɛɛ. 7 Ga taberege ki yama pu bu shɛ ɲaha na, a la di fara ki na, na ta saraya ɲaha shɔɔnrivɔɔ wu di bi li shɛ xɔ yama fɔɔ wu na na wʼa pye fɛɛfɛɛ, wu guri shɛ wuyɛ shɛ sanha saraya ɲaha shɔɔnrivɔɔ wu na. 8 Saraya ɲaha shɔɔnrivɔɔ wu na zhɛ wu sɛɛri, taberege ki bu da kʼa shɛ ɲaha na, na xuu wa bɛ lɔ ceesɛɛgɛ ki ni, saraya ɲaha shɔɔnrivɔɔ wu li shɛ na fɛfɛɛrɛ baa fɔɔ wu ɲɛ wii. Togo ki wa kii.

9 «Togo yama bu sipya wa ta, yʼi shɛ ni wufɔɔ ni saraya ɲaha shɔɔnrivɔɔ wu mu. 10 Saraya ɲaha shɔɔnrivɔɔ wu shɛ wu sɛɛri. Wu bu shɛ puro ta tayaŋa ki ni li dʼa fiinŋɛ, shiire temu ti ɲɛ tayaŋa ki ni ge, na tee bɛ fiinŋɛ, a nɔɔgɔ ki ɲaha di ɲaaŋa foro, 11 togo ki wa kere wu ceesɛɛgɛ ki na kemu xɔmɔ ya taan wɛ ge. Saraya ɲaha shɔɔnrivɔɔ wu na li shɛ na fɛfɛɛrɛ baa fɔɔ wu ɲɛ wii. Wu ganha bu da zhɛ wu yaha wu yɛ xuu ni wɛ, fɛfɛɛrɛ baa fɔɔ wu ɲɛ wii. 12 Togo ki bu jaaga ceesɛɛgɛ ki na, a yama pʼi ceesɛɛgɛ ki bɛɛri lɔ, na co ɲuŋɔ ki na fo na pa nɔ tɔɔyɔ yi na, xuu wemu bɛɛri saraya ɲaha shɔɔnrivɔɔ wʼa wii ge, 13 wu na wu sɛɛri, wu bu togo ki ta kʼa ceesɛɛgɛ ki bɛɛri lɔ, wu na li shɛ na yama fɔɔ wʼa pye fɛɛfɛɛ. Ni wu bɛɛri dʼa fiinŋɛ foro, wʼa pye fɛɛfɛɛ. 14 Ga nɔɔɲɛ ga ba ɲa wu na caŋa kemu, wʼa ɲɛri fɛfɛɛrɛ baa fɔɔ. 15 Saraya ɲaha shɔɔnrivɔɔ wu ba wee nɔɔɲɛ wu ɲa, wu li shɛ na fɛfɛɛrɛ baa fɔɔ wu ɲɛ yama fɔɔ we: Nɔɔɲɛ wu ɲɛ fɛɛfɛɛ wɛ, togo ki ɲɛ kii. 16 Nɔɔɲɛ wu ɲaha bu ɲɛri sanha na fiinŋɛ foro, yama fɔɔ wu na guri zhɛ saraya ɲaha shɔɔnrivɔɔ wu mu. 17 Saraya ɲaha shɔɔnrivɔɔ wu bu shɛ wu sɛɛri, na nɔɔɲɛ wu ta wʼa fiinŋɛ foro, saraya ɲaha shɔɔnrivɔɔ wu na li shɛ na wu yama pʼa pye fɛfɛɛrɛ wo. Yama fɔɔ wʼa pye fɛfɛɛrɛ fɔɔ.

18 «Ayiwa, puro ba foro wa ceesɛɛgɛ na, na ba xhɔ, 19 a nɔɔfige ka di foro li tɛgɛ ki ni, kelee taberege nikiikaanga ka kemu ya funni ge, wufɔɔ di shɛ wuyɛ shɛ saraya ɲaha shɔɔnrivɔɔ wu na. 20 Saraya ɲaha shɔɔnrivɔɔ wu na zhɛ wufɔɔ sɛɛri, wu bu shɛ nɔɔgɔ ki ta kʼa tigi shɛ ceexaara ti funŋɔ ni, shiire te ti ɲɛ nɔɔgɔ ki ni ge, tee bɛ dʼa fiinŋɛ, saraya ɲaha shɔɔnrivɔɔ wu li shɛ na fɛfɛɛrɛ baa fɔɔ wu ɲɛ weefɔɔ. Togo tuugo ka ki ɲɛ kii kemu kʼa foro puro li tɛgɛ ki ni ge. 21 Ga saraya ɲaha shɔɔnrivɔɔ wu bu nɔɔgɔ ki sɛɛri, na shiire ti ta ti ya fiinŋɛ foro wɛ, nɔɔgɔ ki bɛ di ya tigi shɛ ceexaara ti ni wɛ, wu bu ki ɲaha ta kʼa ɲɛri na wuu na fòro, wu weefɔɔ waa yaha wu yɛ xuu ni wu ta cabyaa gbarashuun. 22 Nɔɔgɔ ki bu shɛ ɲaha na, na xuu wa bɛ lɔ ceesɛɛgɛ ki ni, saraya ɲaha shɔɔnrivɔɔ wu li shɛ na fɛfɛɛrɛ baa fɔɔ wu ɲɛ wufɔɔ, togo tuugo ka ki ɲɛ kii. 23 Ga taberege ki bu gori yaha ki siimɛ na, na bye ki ya shɛ ɲaha na wɛ, puro li wo nɔɔperege ki ɲɛ kii. Saraya ɲaha shɔɔnrivɔɔ wu na li shɛ na fɛfɛɛrɛ fɔɔ wu ɲɛ wufɔɔ.

24 «Na bu xuu wa fori wa ceesɛɛgɛ ni, a taforogo kʼi fiinŋɛ foro, na ganha na funni, kelee na kiikaan, 25 saraya ɲaha shɔɔnrivɔɔ wu na ki sɛɛri, taforogo ki shiire ti bu da tʼa fiinŋɛ foro, nɔɔgɔ ki bɛ dʼa tigi kari funŋɔ ni, togo ki ɲɛ kii kemu kʼa foro na ki wo taforogo ki ni ge. Saraya ɲaha shɔɔnrivɔɔ wu na li shɛ na fɛfɛɛrɛ baa fɔɔ wu ɲɛ wufɔɔ. Togo ki wa wu na.

26 «Ga saraya ɲaha shɔɔnrivɔɔ wu bu taforogo ki wii, wu bye wu ya ta shifiire ɲa ki ni wɛ, taforogo ki bɛ di ya tigi shɛ funŋɔ ni wɛ, ki ɲaha bɛ dʼa ɲɛri na wuu na fòro, saraya ɲaha shɔɔnrivɔɔ wu weefɔɔ waa yaha wu yɛ xuu ni wu ta cabyaa gbarashuun. 27 Caŋa gbarashuun wogo ki na, saraya ɲaha shɔɔnrivɔɔ wu ki sɛɛri. Taforogo ki bu da kʼa pii, na xuu wa bɛ lɔ ceesɛɛgɛ ki ni, wu na li shɛ na fɛfɛɛrɛ baa fɔɔ wu ɲɛ wufɔɔ. Togo ki ɲɛ kii. 28 Ga taforogo ki bu gori yaha ki siimɛ na, na bye ki ya ta pii, na xuu wa bɛ lɔ ceesɛɛgɛ ki ni wɛ, wu bu ki ɲaha ta kʼa ɲɛri na wuu na fòro, na taforogo yɛ kʼa pye kii. Saraya ɲaha shɔɔnrivɔɔ wu li shɛ na fɛfɛɛrɛ fɔɔ wu ɲɛ wufɔɔ. Taforogo ki wo nɔɔperege kʼa pye kii.

29 Nɔɔgɔ ka bu gɔn ná kelee cee na, wu ɲuŋɔ ke ni, kelee ɲɔŋmenɛ le na, 30 saraya ɲaha shɔɔnrivɔɔ wu kee nɔɔgɔ ki sɛɛri. Ki bu da kʼa shɛ ceesɛɛgɛ ki funŋɔ ni, ki shiire ti bɛ ɲaha dʼa fofa, na yiige, saraya ɲaha shɔɔnrivɔɔ wu li shɛ na fɛfɛɛrɛ baa fɔɔ wu ɲɛ wufɔɔ. Tako wu ɲɛ wii, ɲuŋɔ kelee ɲɔŋmenɛ wo togo. 31 Saraya ɲaha shɔɔnrivɔɔ wu bu tako wu wo nɔɔgɔ ki ta ki ya tigi kari ceesɛɛgɛ ki funŋɔ ni wɛ, shiwɔɔrɔ bɛ di ɲɛ ki ni wɛ, saraya ɲaha shɔɔnrivɔɔ wu weefɔɔ waa yaha wu yɛ xuu ni wu ta cabyaa gbarashuun. 32 Caŋa gbarashuun wogo ki na saraya ɲaha shɔɔnrivɔɔ wu tako wu nɔɔgɔ ki sɛɛri, la bu da li ya fara nɔɔgɔ ki na wɛ, ki shiire ti bu da ti ya fofa wɛ, nɔɔgɔ ki bu da ki ya tigi kari ceesɛɛgɛ ki funŋɔ ni wɛ, 33 yama fɔɔ wu wu ɲuŋɔ ki xuu, ga wu ganha bu tako wu wo xuu wu xuu wɛ. Saraya ɲaha shɔɔnrivɔɔ wu wu waa yaha sanha wu yɛ xuu ni wu tɔɔɲii shuun wuu ni wu ta cabyaa gbarashuun. 34 Caŋa gbarashuun wogo ki na saraya ɲaha shɔɔnrivɔɔ wu tako wu sɛɛri. La bu da li ya fara nɔɔgɔ ki na wɛ, ki bu da ki ya tigi kari ceesɛɛgɛ ki funŋɔ ni wɛ, saraya ɲaha shɔɔnrivɔɔ wu na li shɛ na fɛfɛɛrɛ fɔɔ wu ɲɛ wufɔɔ. Wu na wu fàya yi je, na bye fɛfɛɛrɛ fɔɔ. 35 Ga la bu fara tako wu nɔɔgɔ ki na, na saraya ɲaha shɔɔnrivɔɔ wu ta wʼa li shɛ xɔ na wufɔɔ ya pye fɛfɛɛrɛ fɔɔ, 36 saraya ɲaha shɔɔnrivɔɔ wu shɛ wufɔɔ sɛɛri. Wu bu la ta lʼa fara tako wu nɔɔgɔ ki na, wu ganha bu diin da shiire ti wii ti bi fofa wɛ, fɛfɛɛrɛ baa fɔɔ wu ɲɛ wufɔɔ. 37 Ga tako wu nɔɔgɔ ki bu gori yaha ki siimɛ na, a shiwɔɔrɔ di foro nɔɔgɔ ki ni, tako wʼa xɔ. Yama fɔɔ wʼa pye fɛfɛɛrɛ fɔɔ. Saraya ɲaha shɔɔnrivɔɔ wu na li shɛ na wʼa pye fɛfɛɛrɛ fɔɔ.

38 «Tafiye bu foro ná wa na kelee cee wa na yemu yʼa funni ge, 39 saraya ɲaha shɔɔnrivɔɔ wu wufɔɔ sɛɛri. Yi bu da yi na funni, yʼi ya fiinŋɛ co wɛ, puuro ti ɲɛ tere temu tʼa foro ceesɛɛgɛ ki na ge. Fɛfɛɛrɛ fɔɔ wu ɲɛ weefɔɔ.

40 «Ná ɲuzhiire bu muu, ɲumuugo ki wa wu mu, fɛfɛɛrɛ fɔɔ wu ɲɛ wii. 41 Ɲuŋɔ ki ɲahagbaa shiire te bu da tee na muu, gbadɛmuugo ki wa wu mu. Fɛfɛɛrɛ fɔɔ wu ɲɛ wii. 42 Ga taberege ka bu foro ɲuŋɔ ki tamuugo ki ni kadugo yíri wu ni, kelee ɲahagbaa li na, na ɲaaŋa dooni, togo ki ɲɛ kii, kemu kʼa foro tamuugo ki ni kadugo yíri wu ni, kelee ɲahagbaa li na ge. 43 Saraya ɲaha shɔɔnrivɔɔ wu na ki sɛɛri. kadugo yíri kelee ɲahagbaa li wo tamuugo ki wo tayaŋa ki bu da pugo kemu ɲaha kʼa ɲaaŋa dooni, ki ni ceesɛɛgɛ wo togo di ɲɛ nigin ge, 44 togo fɔɔ wu ɲɛ wee yama fɔɔ we, fɛfɛɛrɛ baa fɔɔ wu ɲɛ wii. Saraya ɲaha shɔɔnrivɔɔ wu na li shɛ na fɛfɛɛrɛ baa fɔɔ wu ɲɛ weefɔɔ. Togo ki ɲɛ wu na, kemu ya foro wu ɲuŋɔ ni ge.

45 «Togo bu bye sipya wemu na, fashɛngɛyɛ weefɔɔ da da leni. Wu ganha ba wu ɲuzhiire ti yari wɛ, wu yaaga ka taga ɲabozhiire te tɔ, wu da xhuulo na: Fɛfɛɛrɛ baa fɔɔ! Fɛfɛɛrɛ baa fɔɔ! 46 Na pee yama pu yaha wu na, fɛfɛɛrɛ baa fɔɔ wu ɲɛ wii. Wu na ba yaha wu yɛ xuu ni, wu tashɔngɔ ki na ba bye buguro ti kadugo yíri.»

Fàya kelee seeye yemu yʼa kafunŋɔ kpuun ge

47 Fàŋa ka bu kafunŋɔ kpɔn, kʼa pye dubya shiire fàŋa la, ki shiin ya pye lɛn fàŋa la, 48 lize la, fale la, wʼa pye dubya shiire kelee lɛn la, kʼa pye sɛɛgɛ, kelee sɛɛgɛ yagbegeŋɛ tuugo bɛɛri, 49 kafunŋɔ ki ɲaha bu da ba jasɔnlomɔ ɲɛ wɛ, kelee na ɲaaŋa, fàŋa ke, kelee sɛɛgɛ ki na, lize we, kelee fale wu na, kelee sɛɛgɛ yagbegeŋɛ ki tuugo bɛɛri na, togo tuugo ka ki ɲɛ kii. Pu na zhɛ ki shɛ saraya ɲaha shɔɔnrivɔɔ wu na. 50 Saraya ɲaha shɔɔnrivɔɔ wu na kafunŋɔ ki sɛɛri, na kee yaaga ki waa yaha ki yɛ xuu ni na ta cabyaa gbarashuun. 51 Caŋa gbarashuun wogo ki na, wu kafunŋɔ ki sɛɛri. Kafunŋɔ ki bu da kʼa shɛ ɲaha na fàŋa ki na, lize we, kelee fale wu na, sɛɛgɛ ke, kelee sɛɛgɛ yagbegeŋɛ ki tuugo bɛɛri, togo tuugo ka ki ɲɛ kii kemu ya kolo ge. Yaaga kemu na ki ɲɛ ge, kee ɲɛ fɛfɛɛrɛ wogo wɛ. 52 Kee kafunŋɔ ki wa fàŋa kemu na ge, kelee lize, kelee fale wemu na ge, wu dubya shiire wo kelee wu lɛn wo, kʼa pye sɛɛgɛ yagbegeŋɛ tuugo bɛɛri na, saraya ɲaha shɔɔnrivɔɔ wu kee yaaga ki sòrogo. Togo ki ɲɛ kii kemu ya kolo ge. Kee yaaga ke na zòrogo na ni. 53 Ga saraya ɲaha shɔɔnrivɔɔ wu bu kafunŋɔ ki sɛɛri, na ki ta ki ya ta shɛ ɲaha na fàŋa ki na wɛ, lize we, kelee fale wu na wɛ, sɛɛgɛ yagbegeŋɛ ki tuugo ki bɛɛri na wɛ, 54 saraya ɲaha shɔɔnrivɔɔ wu ki yaaga pye pʼi ki jé, wu ki waa yaha ki yɛ xuu ni ki tɔɔɲii shuun wuu ni wu ta cabyaa gbarashuun. 55 Saraya ɲaha shɔɔnrivɔɔ wu na ki nijege ki sɛɛri. Kafunŋɔ ki ɲɛwiinɛ bu da li ya ɲɛri wɛ, ki mɛhɛ bye kʼi ya shɛ bɛ ɲaha na wɛ, kee yaaga ke ɲɛ fɛfɛɛrɛ wogo wɛ. Ki na wá na ni. Kee yaaga ke ɲaha kelee ki kadugo ki xuu wa wʼa kyɛɛgi ki ni. 56 Saraya ɲaha shɔɔnrivɔɔ wu bu ki sɛɛri, pu da ki jé xɔ, na la ta lʼa foro kafunŋɔ ki ni, wu kafunŋɔ ki wo xuu wu kɔn laha fàŋa ke, kelee sɛɛgɛ ki na, lize we, kelee fale wu na. 57 Ga kafunŋɔ ki bu guri foro sanha fàŋa ke, lize we, kelee fale we, kelee sɛɛgɛ yagbegeŋɛ ki tuugo ki bɛɛri na, togo ki ɲɛ kii kemu ya se ɲaha na ge. Pu na yaaga ki wá na ni.

58 «Fàŋa bɛɛri, lize kelee fale bɛɛri, sɛɛgɛ yagbegeŋɛ tuugo bɛɛri pʼa jé, a ki kafunŋɔ kʼi xhɔ ge, pu na guri ki jé ki jii shuun wuu ni, kʼa bye fɛfɛɛrɛ wogo.»

59 «Dubya shiire, kelee lɛn fàŋa, lize kelee fale, kelee sɛɛgɛ yagbegeŋɛ tuugo bɛɛri kʼa kafunŋɔ kpɔn ge, we saliya we wʼa yaa na wee koo ɲaari ki yaaga na, na li shɛ na ki ɲɛ fɛfɛɛrɛ wogo kelee fɛfɛɛrɛ baa wogo.»