Togo fɔɔ bu juuŋɔ, wʼa yaa na toro kodorogoo kiimu ni ge
14
A Tɛhɛnɛ Baa Kilɛ di Musa pye: 2 «Togo fɔɔ bu juuŋɔ, wu ba da wuyɛ pye fɛɛfɛɛ caŋa kemu, saliya wemu wʼa yaa na ɲaari ge, wee wu ɲɛ we. Pu na zhɛ ni wufɔɔ ni saraya ɲaha shɔɔnrivɔɔ wu mu. 3 Saraya ɲaha shɔɔnrivɔɔ wu na foro buguro ti kadugo yíri, na shɛ wu sɛɛri. Wu bu li ɲa na togo fɔɔ wʼa cuuŋɔ, 4 wemu wʼa da wuyɛ pye fɛɛfɛɛ ge, saraya ɲaha shɔɔnrivɔɔ wu pu pye pu fɛfɛɛrɛ shazhigaa shuun ɲìi wogoo co wu mu. Pʼi sɛdiri tinnɛ la lɔ, ni lizeɲɛ, ni izopua wɛzhana. 5 Saraya ɲaha shɔɔnrivɔɔ wu pu pye pu shazhira nigin wa kuun pu le lofoŋɔ ka ni cogo yaaga ka funŋɔ ni. 6 Ɲìi wo shazhira li li ge, saraya ɲaha shɔɔnrivɔɔ wu lee lɔ, ni sɛdiri tinnɛ le, ni lizeɲɛ we, ni izopu wɛzhana le. Wu yi mini ni ɲìi wo shazhira li ni, leli wo shishan pu ni, lee lemu pʼa kuun na le lofoŋɔ ki ni ge. 7 Togo fɔɔ wu wʼa yaa na pye fɛɛfɛɛ ge, wu ki ɲɛrɛgi wee na fo tɔɔɲii gbarashuun. Lee kadugo na, wu li shɛ na wʼa pye fɛɛfɛɛ. Wu shazhira ɲìi wuu li yaha kari sige ki ni.8 Wemu wʼa wuyɛ pyi fɛɛfɛɛ ge, wee di wu fàya yi je, wu wu shiire ti bɛɛri xuu, wu lɔhɔ wuu, wu na bye fɛɛfɛɛ. Lee kadugo na wu na já jé buguro ti ni, ga wʼa yaa na cabyaa gbarashuun ta wu na jé wu fàya puga ki ni. 9 Caŋa gbarashuun wogo ki na wu wu shiire ti bɛɛri xuu, ɲuŋɔ ke, ni ɲahazhɔ we, ni ɲɛshiire te, wu wu shiire ti bɛɛri xuu. Wu wu fàya yi je, wu lɔhɔ wuu, lee kadugo na wu na bye fɛɛfɛɛ. 10 Caŋa gbarataanri wogo ki na, wu ba ni dubyapepiinyɛ shuun ni yi manɛb baa woyo, ni yee nigin dubyapya, wu manɛ baa wo, ni myɛviinmɛ kiloo gbarashɛɛrɛ, na pu tɔnhɔ sìnmɛ ni, kee di bye shinma saraga, ni sìnmɛ litiri taaga. 11 Saraya ɲaha shɔɔnrivɔɔ wu wʼa fɛfɛɛrɛ ti pyi ge, wee di shɛ ni wee ná we ni ye yaŋmuyɔ ye ni Ɲuŋɔ Tacirige Fàya Puga ki tajege ki ɲɔ na, Tɛhɛnɛ Baa Kilɛ ɲaha tàan.
12 Saraya ɲaha shɔɔnrivɔɔ wu dubyapepinŋɛ nigin wa co, wu kee pye yaaŋa saraga ni sìnmɛ litiri taaga ki ni. Wu yi yirige wu yi figi figi Tɛhɛnɛ Baa Kilɛ ɲaha tàan. 13 Xuu wemu ni pʼa jurumu yafa wo saraga yatɔɔyɔ ye, ni saraga nizogoyo yi wo yatɔɔyɔ yi kɔɔngi fɛfɛɛrɛ xuu wu ni ge, wu shɛ dubyapepinŋɛ ki kuun wee xuu wu ni. Yaaŋa wo saraga ke, kee ɲɛ saraya ɲaha shɔɔnrivɔɔ wu wogo, ma na jo ba jurumu yafa wo saraga ki ɲɛ wɛ. Fɛfɛɛrɛ yaaga ki ɲɛ kii fo xuuni. 14 Saraya ɲaha shɔɔnrivɔɔ wu yaaŋa saraga ki wo shishan pa lɔ, wemu wʼa wuyɛ pyi fɛɛfɛɛ ge, wu pa fara weefɔɔ wo kanige cɛ ɲuwɛŋɛ ki nige ki na. Wu pa fara wu kanige keŋɛ ki kabenigbɔɔ li na, wu pa fara wu kanige tɔɔgɔ ki nibenigbɔɔ li na. 15 Saraya ɲaha shɔɔnrivɔɔ wu sìnmɛ litiri taaga ki lɔ, wu pa le wu kamɛnɛ keŋɛ ki wo kadawii li ni. 16 Saraya ɲaha shɔɔnrivɔɔ wu wu kanige keŋɛ ki wo kabee li mini sìnmɛ pu ni wu kamɛnɛ keŋɛ ki kadawii li ni, wu kabee li taga sìnmɛ pu ɲɛrɛgi ɲɛrɛgi fo tɔɔɲii gbarashuun Tɛhɛnɛ Baa Kilɛ ɲaha tàan. 17 Sìnmɛ pusama pʼa kori saraya ɲaha shɔɔnrivɔɔ wu keŋɛ ki ni ge, wemu wʼa wuyɛ pyi fɛɛfɛɛ ge, wu pa fara weefɔɔ wo kanige cɛ ɲuwɛŋɛ ki nige ki na. Wu pa fara wu kanige keŋɛ ki kabenigbɔɔ li na, wu pa fara wu kanige tɔɔgɔ ki nibenigbɔɔ li na, wu taha yaaŋa saraga ki wo shishan pu na, pee pemu wʼa fɛnhɛ fara ɲaha na ge. 18 Sìnmɛ pusama pʼa kori saraya ɲaha shɔɔnrivɔɔ wu keŋɛ ki ni ge, wemu wʼa wuyɛ pyi fɛɛfɛɛ ge, wu pusama fara wee wo ɲuŋɔ ki ni. Saraya ɲaha shɔɔnrivɔɔ wu togo fɔɔ wu wo jurumu yafa wo yaaŋa ki pye Tɛhɛnɛ Baa Kilɛ ɲaha tàan. 19 Lee kadugo na saraya ɲaha shɔɔnrivɔɔ wu jurumu yafa wo saraga ki wolo. Wemu wʼa wuyɛ pyi fɛɛfɛɛ ge, wu wee wo fɔɔnrɔ ti wo yaaŋa ki pye. Lee kadugo na wu saraga nizogoŋɔ ki kuun. 20 Saraya ɲaha shɔɔnrivɔɔ wu saraga nizogoŋɔ ke ni myɛ saraga ki sòrogo saraya nizogoyo yi tawologo ki ni. Saraya ɲaha shɔɔnrivɔɔ wu weefɔɔ wo jurumu yafa wu wo yaaŋa ki pye wu na, weefɔɔ na bye fɛɛfɛɛ.
Togo fɔɔ wemu bu bye funmɔ fɔɔ
21 «Togo fɔɔ bu da funmɔ fɔɔ, ye yaŋmuyɔ ye bɛɛri kaa lʼa jo ge, yi se di da da wu ni wɛ. Wu na ba ni dubyapepinŋɛ nigin yɛ ni, na pa bye yaaŋa ki wo saraga ke, pu na kee figi figi Tɛhɛnɛ Baa Kilɛ ɲaha tàan, na wu wo jurumu yafa wu wo yaaŋa ki pye wu na. Wu ba ni myɛviinmɛ kiloo taanri ni, na pu tɔnhɔ sìnmɛ ni, pee di bye shinma saraga ke, ni sìnmɛ litiri taaga, 22 ni xobangaa shuun kelee gbegbeshazhigaa shuun, na saha ni wu se ɲuŋɔkana ni. Nigin wa na ba bye jurumu yafa saraga, nigin wusama na bye saraga nizogoŋɔ. 23 Caŋa gbarataanri wogo ki na wu da ba ni ye yakanya ye bɛɛri ni wu wo fɛfɛɛrɛ ti wuu na, saraya ɲaha shɔɔnrivɔɔ wu mu, Ɲuŋɔ Tacirige Fàya Puga ki tajege ki ɲɔ na, Tɛhɛnɛ Baa Kilɛ ɲaha tàan. 24 Saraya ɲaha shɔɔnrivɔɔ wu yaaŋa saraga ki wo dubyapepinŋɛ ki lɔ ni sìnmɛ litiri taaga ki ni, wu yi yirige, wu yi figi figi fugba wu ni, Tɛhɛnɛ Baa Kilɛ ɲaha tàan. 25 Saraya ɲaha shɔɔnrivɔɔ wu yaaŋa saraga dubyapepinŋɛ ki kuun. Wu yaaŋa saraga ki shishan pa lɔ, wemu wʼa wuyɛ pyi fɛɛfɛɛ ge, wu pa fara wee wo kanige cɛ ɲuwɛŋɛ ki wo nige ki na, wu pa fara wu kanige keŋɛ ki kabenigbɔɔ li na, wu pa fara wu kanige tɔɔgɔ ki nibenigbɔɔ li na. 26 Saraya ɲaha shɔɔnrivɔɔ wu sìnmɛ pa le wu kamɛnɛ keŋɛ ki wo kadawii li ni. 27 Wu wu kanige kabee li taga kamɛnɛ keŋɛ ki wo sìnmɛ pu ɲɛrɛgi ɲɛrɛgi fo tɔɔɲii gbarashuun Tɛhɛnɛ Baa Kilɛ ɲaha tàan. 28 Sìnmɛ pemu pu wa saraga ɲaha shɔɔnrivɔɔ wu keŋɛ ki ni ge, wemu wʼa wuyɛ pyi fɛɛfɛɛ ge, wu pee sìnmɛ pa fara wee wo kanige cɛ ɲuwɛŋɛ ki wo nige ki na. Wu pa fara wu kanige keŋɛ ki wo kabenigbɔɔ li na, wu pa fara wu kanige tɔɔgɔ ki wo nibenigbɔɔ li na, yaaŋa saraga ki wo shishan pu tafaraga ki ni. 29 Sìnmɛ pusama pʼa kori saraya ɲaha shɔɔnrivɔɔ wu keŋɛ ki ni ge, wemu wʼa wuyɛ pyi fɛɛfɛɛ ge, wu sìnmɛ pusama fara weefɔɔ wo ɲuŋɔ ki ni, kɔnhɔ wu jurumu yafa wu wo yaaŋa ki pye wu na Tɛhɛnɛ Baa Kilɛ ɲaha tàan. 30 Lee kadugo na saraya ɲaha shɔɔnrivɔɔ wu xobanra nigin wa co, kelee gbegbeshazhira nigin, na saha ni saraga ki wolovɔɔ wu wo se ɲuŋɔkana ni, 31 tee temu wo se wʼa pye wu ni ge, wu nigin wa pye jurumu yafa wo saraga, wu nigin wa pye saraga nizogoŋɔ na fara shinma saraga ki na. Wemu wʼa wuyɛ pyi fɛɛfɛɛ ge, saraya ɲaha shɔɔnrivɔɔ wu na wee wo jurumu yafa yaaŋa ki pye wu na Tɛhɛnɛ Baa Kilɛ ɲaha tàan.»
32 Ayiwa, togo ya sipya wemu co, a wu juuŋɔ, se di ɲɛ wu ni wu fɛfɛɛrɛ yaŋmuyɔ yi wolo-e ge, we saliya we weefɔɔ ya yaa na ɲaari.
Piyɛyɛ wo kafunyɔ yi wo kodorogoo
33 A Tɛhɛnɛ Baa Kilɛ di Musa ni Arɔn pye: 34 «Kana fiige kemu nɛ kan yi mu yi ta ge, yi ba shɛ jé kee ni tuun wemu ni, kee fiige kemu ki ɲɛ yi wogo ge, nɛ ba kee wo puga ka pye kʼa kafunŋɔ kpɔn, 35 wemu wogo ki ɲɛ puga ki ge, wee di shɛ saraya ɲaha shɔɔnrivɔɔ wu mu wu shɛ wu pye: ‹Taberege ka kʼa foro nɛ puga ki ni ba kafunŋɔ ɲɛ wɛ.› 36 Saraya ɲaha shɔɔnrivɔɔ wu na pu pye pu shɛ puga ki yaŋmuyɔ yi bɛɛri yeege, sani wu shɛ jé ki ni wu ki sɛɛri ge. Lee funŋɔ ni, yaaga yaaga ki wa puga ki ni ge, kee ka shishiin dʼa bye fɛfɛɛrɛ baa wogo wɛ. Lee bu bye, saraya ɲaha shɔɔnrivɔɔ wu na na jé, na puga ki sɛɛri. 37 Wu na taberege ki sɛɛri. Wu bu taberege ki ta kʼa wegeye kɔn, ki ɲaha di ɲɛ ba jasɔnlomɔ ɲɛ wɛ, kelee na ɲaaŋa, taberege ki bɛ dʼa tigi kari kasɔrɔgɔ ki funŋɔ ni, 38 saraya ɲaha shɔɔnrivɔɔ wu foro puga ki ni. Wu ba ba foro kuɲɔɔ li ni, wu pu pye pu puga ki tɔ fo cabyaa gbarashuun. 39 Caŋa gbarashuun wogo ki na saraya ɲaha shɔɔnrivɔɔ wu guri pa puga ki sɛɛri, wu ba ba taberege ki ta kʼa pii, na xuu wa bɛ lɔ kasɔrɔgɔ ki ni, 40 kagereye yemu na taberege ki ɲɛ ge, saraya ɲaha shɔɔnrivɔɔ wu pu pye pu yee wolo puga ki kasɔrɔgɔ ki ni, pʼi shɛ yi wá kulo li kadugo, xuu wa ni wemu ɲɛ fɛfɛɛrɛ baa wo wɛ. 41 Wu pu pye pu puga ki funŋɔ ki bɛɛri gbuuri, pʼi shɛ tee puuro ti wá kulo li kadugo, xuu wa ni wemu ɲɛ fɛfɛɛrɛ baa wo ge. 42 Pʼi kagereye yatii lɔ pu pa le puga ki ni yeyi tɛgɛ, pʼi puuro tatii taga puga ki wɔɔgɔ.
43 «Ayiwa, kagereye yi bu wolo, na puga ki gbuuri, na ki wɔɔgɔ, a kafunŋɔ kʼi guri foro sanha, 44 saraya ɲaha shɔɔnrivɔɔ wu guri shɛ ki sɛɛri. Wu bu shɛ taberege ki ta kʼa pii na xuu wa bɛ lɔ kasɔrɔgɔ ki ni, togo ki ɲɛ kii kemu kʼa kakara pyi ge. Fɛfɛɛrɛ baa wogo ki ɲɛ kee puga ke. 45 Pu na kee puga ki shan, na ki kagereye ye, ni ki mara mara yagboyo ye, ni ki puuro ti bɛɛri kuu, na shɛ yi wá kulo li kadugo xuu wa ni wemu ɲɛ fɛfɛɛrɛ baa wo ge.
46 «Kee puga kʼa tɔ na caya yemu bɛɛri ta ge, sipya wemu bɛɛri wʼa jé ki ni yee caya yi na ge, weefɔɔ na ba gori yaha fɛfɛɛrɛ baa fɔɔ fo na shɛ nɔ yakoŋɔ ki na. 47 Sipya bɛɛri wʼa sinnɛ kee puga ki ni ge, wufɔɔ di wu fàya je. Sipya bɛɛri wʼa li ki ni ge, wufɔɔ di wu fàya je.
48 «Saraya ɲaha shɔɔnrivɔɔ wu bu guri pa puga ki wii, lee di ki ta kʼa wɔɔgɔ xɔ, wu bu taberege ki ta ki ya shɛ ɲaha na wɛ, saraya ɲaha shɔɔnrivɔɔ wu li shɛ na kee puga kʼa pye fɛfɛɛrɛ wogo, bani ki kafunŋɔ kʼa xɔ. 49 Wu na shazhigaa shuun co, na sɛdiri tinnɛ lɔ, ni lizeɲɛ, ni Izopu wɛzhana, wu shɛ puga ki pye fɛɛfɛɛ. 50 Wu shazhira nigin wa kuun wu le lofoŋɔ ka ni cogo yaaga ka ni. 51 Wu sɛdiri tinnɛ li lɔ, ni Izopu wɛzhana le, ni lizeɲɛ we, ni ɲìi wo shazhira le, wʼa shazhira li shishan pu le lofoŋɔ kemu ni ge, wu yi mini kee ni wu ɲɛrɛgi ɲɛrɛgi puga ki na fo tɔɔɲii gbarashuun. 52 Lee pyegana li na wʼa da puga ki pye fɛɛfɛɛ ni shazhira li shishan pu ni, ni lofoŋɔ ke, ni ɲìi wo shazhira le, ni sɛdiri tinnɛ le, Izopu wɛzhana le, ni lizeɲɛ wu ni. 53 Wu shɛ ɲìi wo shazhira li yaha kulo li kadugo, li da se sige ki ni. Mu na wʼa da puga ki wo nɔhɔmɔ pu laha ki na, kʼa bye fɛɛfɛɛ.»
54 Ayiwa, le kodoronɔ le li wa togo ki tuuyo yi bɛɛri na, ni tako we, 55 ni fàŋa kelee puga wo kafunŋɔ ke, 56 ni puyo ye, ni nɔɔyɔ yemu yʼa kɔrɔyɔ tɔ ge, ni tafiye yemu yʼa funni ge. 57 Lee kodoronɔ le lʼa li shɛɛ na ke yaaga ke ɲɛ fɛfɛɛrɛ baa wogo kelee ki ɲɛ fɛfɛɛrɛ wogo. Lee li wa togo ki wo kodoronɔ le.