Lemu lʼa ná pyi wu ɲɛ fɛfɛɛrɛ fɔɔ wɛ ge
15
A Tɛhɛnɛ Baa Kilɛ di Musa ni Arɔn pye: 2 «Yi yi jo Izirayɛli nagoo pu mu na: ‹Ceshii bu bye ná wemu na, weefɔɔ ɲɛ fɛfɛɛrɛ fɔɔ wɛ. 3 Pee ceshii pʼa wu pye fɛfɛɛrɛ baa fɔɔ pyegana lemu na ge, lee li wa mɛ: Yama pʼa lɔhɔ woni la, pu shiin ya firimɛ pu tapaga ki tɔ la, fɛfɛɛrɛ baa fɔɔ wu ɲɛ wii. 4 Ceshii ɲɛ ná wemu bɛɛri na ge, wu bu sinnɛ kajaŋa bɛɛri na, kee ya pye fɛfɛɛrɛ baa wogo, yatɛɛngɛ bɛɛri na wʼa tiin ge, kee ya pye fɛfɛɛrɛ baa wogo. 5 Sipya bɛɛri wʼa kpɔn kee kajaŋa ki na ge, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 6 Ceshii fɔɔ wʼa tiin yatɛɛngɛ kemu bɛɛri na ge, sipya bɛɛri wʼa tiin kee na ge, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 7 Sipya bɛɛri wʼa kpɔn ceshii fɔɔ ceesɛɛgɛ na ge, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 8 Yama fɔɔ wu bu ɲɔlɔhɔ wo sipya wa na wemu ɲɛ fɛfɛɛrɛ fɔɔ ge, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 9 Shɔnkoro bɛɛri na wee yama fɔɔ wʼa tiin ge, lee ya pye fɛfɛɛrɛ baa wuu. 10 Yaaga tuugo bɛɛri na yama fɔɔ wʼa tiin kelee na sinnɛ ge, sipya bɛɛri wʼa kpɔn kee na ge, wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. Sipya bɛɛri wʼa kee yaaga ka lɔ ge, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 11 Ceshii fɔɔ wu bu gbɔn sipya bɛɛri na, na ta wu ya wu keye je wɛ, weefɔɔ ya yaa na wu fàya je, na lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 12 Cogo yaaga bɛɛri na yama fɔɔ wʼa kpɔn ge, yʼi kee ja. Wu bu gbɔn tige yaaga bɛɛri na, yʼi kee je ni lɔhɔ ni. 13 Ná wemu na ceshii pu wa ge, pu ba xhɔ caŋa kemu, ná wʼa yaa na cewuu nigin pye wu na pye fɛfɛɛrɛ fɔɔ. Wu wu fàya yi je, wu lofoŋɔ taga wuyɛ wuu, wu na bye fɛfɛɛrɛ fɔɔ. 14 Caŋa gbarataanri wogo ki na wu xobangaa shuun kelee gbegbeshazhigaa shuun co. Wu shɛ ni kee ni Tɛhɛnɛ Baa Kilɛ ɲaha tàan Ɲuŋɔ Tacirige Fàya Puga ki tajege ki ɲɔ na. Wu shɛ ki kan saraya ɲaha shɔɔnrivɔɔ wu mu. 15 Saraya ɲaha shɔɔnrivɔɔ wu nigin wa pye jurumu yafa saraga, wu nigin wusama pye saraga nizogoŋɔ. Saraya ɲaha shɔɔnrivɔɔ wu ceshii pu wo yaaŋa ki pye Tɛhɛnɛ Baa Kilɛ ɲaha tàan.16 «‹Ná nara lɔhɔ bu wo, wʼa yaa na lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 17 Fàŋa bɛɛri ni sɛɛgɛ bɛɛri na nara lɔhɔ kʼa nɔ ge, pʼi kee je ni lɔhɔ ni. Ki na ba bye yaha fɛfɛɛrɛ baa wogo fo na shɛ nɔ yakoŋɔ ki na.
18 «‹Cee bu sinnɛ ni ná ni, pu shuun wu bɛɛri ya yaa na lɔhɔ wuu. Pu na ba bye yaha fɛfɛɛrɛ baa fɛɛ fo na shɛ nɔ yakoŋɔ ki na.›»
Lemu lʼa cee pyi wu ɲɛ fɛfɛɛrɛ fɔɔ wɛ ge
19 «‹Shishan ba woni cee wemu fɛni, wu na ba cabyaa gbarashuun pye wu wo lowuuyo yi wo fɔɔnrɔ ti ni. Wa bɛɛri bu gbɔn wu na, weefɔɔ na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 20 Na cee wu yaha ni lowuuyo yi ni, wu bu sinnɛ kajaŋa bɛɛri na, kee ya pye fɛfɛɛrɛ baa wogo. Wu bu diin yaaga bɛɛri na, kee ya pye fɛfɛɛrɛ baa wogo. 21 Sipya bɛɛri wʼa kpɔn wu kajaŋa na ge, weefɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 22 Cee wʼa tiin yaaga kemu bɛɛri na ge, sipya bɛɛri bu gbɔn kee na, wufɔɔ di wu fàya je, wu lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 23 Yaaga ka bu da kajaŋa ki na kelee wu yatɛɛngɛ ki na, sipya bɛɛri wʼa kpɔn kee yaaga ki na ge, wufɔɔ na bye yaha fɛfɛɛrɛ baa fɔɔ fo na shɛ nɔ yakoŋɔ ki na.
24 Ná bu sinnɛ ni wu ni, wu lowuuyo yi wo fɔɔnrɔ ti na bye wee ná wu na. Wu na ba bye yaha fɛfɛɛrɛ baa fɔɔ fo na shɛ nɔ cewuu na. Kajaŋa bɛɛri na wʼa sinnɛ ge, kee na bye fɛfɛɛrɛ baa wogo.
25 Shishan bu cabyaa dama dama ta na woni cee wa fɛni pemu ɲɛ wu lowuuyo wo wɛ, kelee wu lowuuyo yi wo caya yi bu doro yi xakɛ tàan, wu fɛfɛɛrɛ baa wo wu na ba bye yaha yee caya yi bɛɛri funŋɔ ni ba wu lowuuyo wo wu ma bye wɛ. 26 Na pee shishan pu yaha pu na woni wu fɛni, kajaŋa bɛɛri na wʼa sinnɛ ge, kee na ba bye ba wu lowuuyo yi tuun wu wogo ki ɲɛ wɛ. Wu bu diin yaaga kemu bɛɛri na, kee fɛfɛɛrɛ baa wogo na ba bye ba ki ma bye wu lowuuyo yi tuun wu ni wɛ. 27 Sipya bɛɛri wʼa kpɔn kee ka na ge, wufɔɔ na ba bye fɛfɛɛrɛ baa fɔɔ. Wʼa yaa na wu fàya yi je, na lɔhɔ wuu. Wu na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. 28 Shishan pu ba yere caŋa kemu, wu cabyaa gbarashuun pye, wu na pye fɛɛfɛɛ. 29 Caŋa gbarataanri wogo ki na wu xobangaa shuun kelee gbegbeshazhigaa shuun co. Wu shɛ ni kee ni saraya ɲaha shɔɔnrivɔɔ wu mu Ɲuŋɔ Tacirige Fàya Puga ki tajege ki ɲɔ na. 30 Saraya ɲaha shɔɔnrivɔɔ wu nigin wa pye jurumu yafa saraga, wu nigin wusama pye saraga nizogoŋɔ. Wu shishanwonɔ lemu lʼa wu pye fɛfɛɛrɛ baa fɔɔ ge, saraya ɲaha shɔɔnrivɔɔ wu lee wo yaaŋa ki pye wu na Tɛhɛnɛ Baa Kilɛ ɲaha tàan.
31 «‹Yi yi jo Izirayɛli nagoo pu mu na pu ba bye pu ɲɛ fɛfɛɛrɛ sipyii tuun wemu ni wɛ, na pu laraga kɔn. Lee funŋɔ ni, nɛ tatɛɛngɛ kemu ki wa yi niŋɛ ni ge, pu da kee nɔrɔgɔ, lee li ta pu gbo wɛ. 32 Ceshii wa ná wemu na kelee wu nara lɔhɔ na wo ge, le kodoronɔ le wʼa yaa na ɲaari. 33 Lowuuyo bu bye cee wemu na, kelee lɔhɔ ba woni sipya wemu fɛni, kelee ná bu sinnɛ ni cee fɛfɛɛrɛ baa wo ni, le kodoronɔ le wʼa yaa na ɲaari.›»