Levitike 16

Jurumu yafa wo yaaŋa ki caŋa

Arɔn wo jalaa shuun wu wʼa shɛ yere Tɛhɛnɛ Baa Kilɛ ɲaha tàan, na xhu ge, pee nixhugo na Tɛhɛnɛ Baa Kilɛ ya jo ni Musa ni. 2 A Tɛhɛnɛ Baa Kilɛ di Musa pye: «Yi jo ma ɲahafɔɔ Arɔn mu na wu ganha ba jin tuun bɛɛri ni fɛfɛɛrɛ ti wo fɛfɛɛrɛ xuu wu ni, ɲahaparaga fàŋa ki kadugo yíri wɛ, wee xuu wemu ni kariɲɛɛgɛ ɲɔmɛɛ li keshi we ni wu ɲɔtɔŋɔ ki wa ge, kɔnhɔ wu ganha bu xhu wɛ. Bani nɛ na ba nayɛ shɛɛ ɲahaŋa ki ni keshi wu ɲɔtɔŋɔ ki ɲuɲɔ wu na.

3 «Jegana lemu na Arɔn wa da ba jin fɛfɛɛrɛ xuu wu ni ge, lee li wa mɛ. Wu nupepinŋɛ nigin co pa bye jurumu yafa wo saraga, ni dubyapoo nigin wee di bye saraga nizogoŋɔ. 4 Wu na ba lɛn fɛfɛɛrɛ fadegbɔrɔ le, na lɛn kulushipire le, wu lɛn kirige taga wuyɛ pɔ, wu lɛn ɲumiginɛ migile. Wu ba lɔhɔ wuu, ye fɛfɛɛrɛ fàya ye wʼa da le. 5 Izirayɛli nagoo pʼi ba ni sikapee shuun ni wu mu pu pye jurumu yafa wo saraga, ni dubyapoo nigin, wee di bye saraga nizogoŋɔ. 6 Arɔn di nupee li pye saraga wuyɛ pyaa wo jurumu wu wuu na, wu wu ni wu puga shɛɛn pu wo jurumu yafa wu wo yaaŋa ki pye. 7 Wu sikapee shuun wu co, wu shɛ ni pu ni Tɛhɛnɛ Baa Kilɛ ɲaha tàan Ɲuŋɔ Tacirige Fàya Puga ki tajege ki ɲɔ na. 8 Arɔn di kagaanshaan pye sikapee shuun wu na, sikapoo wemu na gan Tɛhɛnɛ Baa Kilɛ mu, wemu di yaha wʼa gaaŋi ge, pʼi pu cɛ shɔɔnri puyɛ ni. 9 Tɛhɛnɛ Baa Kilɛ wo kagaan li bu daha sikapoo wemu na, Arɔn na shɛ ni wee ni Tɛhɛnɛ Baa Kilɛ ɲaha tàan, na shɛ wu pye sipyiire ti wo jurumu yafa saraga. 10 Sikapoo niyahama wu wo kagaan li bu daha sikapoo wemu na, Arɔn na ba ni wee ɲìi wo ni Tɛhɛnɛ Baa Kilɛ ɲaha tàan, na ba jurumu yafa wu wo yaaŋa ki pye wu na, na na wu yaha kari sipoŋɔ ki ni na pye sikapoo niyahama we. 11 Arɔn na ba ni nupee li ni wuyɛ pyaa wo jurumu wu wuu na, na ba wu ni wu puga shiin pu wo jurumu yafa wu wo yaaŋa ki pye puyɛ na, na wu kuun wu wo jurumu wu wuu na. 12 Wu yawurire shɔɔ la ɲi saraya tawologo ki wo naganhaa ki na, Tɛhɛnɛ Baa Kilɛ ɲaha tàan, wu keŋɛ ɲìi shuun lɔ nudanga yawurire ti wo myɛ pu ni, wu shɛ ni yee ni ɲahaparaga fàŋa ki kadugo yíri. 13 Wu shɛ nudanga yawurire ti myɛ pu le naganhaa ki ni Tɛhɛnɛ Baa Kilɛ ɲaha tàan, kɔnhɔ wurege kʼi jurumu yafa wu tapyege ki tɔ, kee kemu kʼa tɔ kariɲɛɛgɛ ɲɔmɛɛ li keshi wu ɲɔ na ge, lee na wu da xhuu wɛ. 14 Wu nupee li shishan pa lɔ, wu wu kabee taga pee ɲɛrɛgi ɲɛrɛgi tɔɔɲii gbarashuun jurumu yafa wu tapyege ki Kilɛ-nɔhɔ ki na, wu pu ɲɛrɛgi ɲɛrɛgi tɔɔɲii gbarashuun jurumu yafa wu tapyege ki ɲahagbaa li na. 15 Wu sipyiire ti wo jurumu yafa wo sikapoo wu kuun, wu shɛ ni pee shishan pa ni ɲahaparaga faŋa ki kadugo yíri. Wu shɛ pee shishan pu bɛ pye ba wʼa nupee li wo pu pye wɛ. Wu pa ɲɛrɛgi ɲɛrɛgi jurumu yafa wu tapyege ki na, wu pa ɲɛrɛgi ɲɛrɛgi ki ɲahagbaa li bɛ na. 16 Izirayɛli nagoo pʼa ɲɔmɛyahana ni katiibaagaa kiimu bɛɛri pye ge, wu kee wo nɔhɔmɔ pu yaaŋa ki pye fɛfɛɛrɛ xuu wu na. Wu lee ninunɔ pye Ɲuŋɔ Tacirige Fàya Puga ki bɛ na, kee kemu kʼa tiin ni pu ni pu nɔhɔmɔ pu niŋɛ ge. 17 Wu ba da jé fɛfɛɛrɛ xuu wu ni di kee yaaŋa ki pye, sipya bɛ ya yaa na ta Ɲuŋɔ Tacirige Fàya Puga ki ni wɛ, fo na shɛ wu pye wʼa foro. Wu na wuyɛ pyaa wo jurumu yafa yaaŋa ki pye, ni wu puga shɛɛn pu wogo ke, ni Izirayɛli nagoo pu bɛɛri wogo ke. 18 Wu bu foro, wu shɛ saraya yi tawologo ki ni, Tɛhɛnɛ Baa Kilɛ ɲaha tàan, wu shɛ jurumu yafa wu wo yaaŋa ki pye saraya yi tawologo ki bɛ na. Wu nupee li wo shishan pe ni sikapoo wu wo shishan pa taga saraya tawologo ki yeŋɛɛ ki wɔɔgɔ. 19 Wu wu kabee taga shishan pu ɲɛrɛgi ɲɛrɛgi tɔɔɲii gbarashuun saraya yi tawologo ki na. Wu ki pye fɛɛfɛɛ na foro Izirayɛli nagoo pu wo nɔhɔmɔ pu ni, wu ki yaha Tɛhɛnɛ Baa Kilɛ yahama ni.»

Sikapoo wemu na ba yaha na gaaŋi ge

20 «Arɔn ba fɛfɛɛrɛ xuu we, ni ɲuŋɔ tacirige fàya puga ke, ni saraya tawologo ki pye fɛɛfɛɛ tuun wemu ni, wu sikapoo wu ɲìi wo co pa. 21 Wu wu keye shuun wu taha sikapoo ɲìi wo wu ɲuŋɔ ni. Izirayɛli nagoo pʼa katiibaagaa kiimu bɛɛri pye, na kapyebaagaa kiimu bɛɛri pye, na jurumu wemu bɛɛri pye ge, Arɔn di yere kee bɛɛri na, wu ki kaa jo, wu ki ɲɛri taha sikapoo wu ɲuŋɔ ni. Lee kadugo na wu wee sikapoo wu kan sipya wa mu, wemu wʼa bi gbegele yaha li mɛgɛ na ge, wefɔɔ di wu kɔri shɛ yaha siwaga ki ni. 22 Sikapoo wu na ba dugo pu nahama pu bɛɛri tàan, na gari ni pu ni sipoŋɔ ki ni. Lee shɛgana li na sikapoo wʼa da ba yaha zhɛ sipoŋɔ ki ni.

23 «Lee kadugo na Arɔn di guri pa Ɲuŋɔ Tacirige Fàya Puga ki ni, lɛn fàya yemu wʼa le na jé fɛfɛɛrɛ xuu wu ni ge, wu ba yee wolo yaha wà. 24 Wu shɛ lɔhɔ wuu xuu wa ni wemu wu ɲɛ fɛɛfɛɛ ge, wu wuyɛ pyaa wo fàya yi le. Lee kadugo na wu foro wu ba wu wo saraga nizogoŋɔ ke ni sipyiire ti wo saraga nizogoŋɔ ki wolo. Wu wu wo jurumu yafa wu wo yaaŋa ki pye, wu sipyiire ti bɛ wo jurumu yafa wu wo yaaŋa ki pye. 25 Yapɔrɔyɔ yemu pʼa wolo jurumu yafa wu wo saraga ki ge, wu yee wo sìnmɛ pu sòrogo saraya tawologo ki ɲuŋɔ ni.

26 «Ná wemu wʼa sikapoo wu kɔri kari sipoŋɔ ki ni ge, wee di ba wu fàya yi je, wu lɔhɔ wuu. Lee kadugo na wu na jé buguro ti ni.

27 «Nupee le ni sikapoo we, yee yemu pʼa pye jurumu yafa wo saraga ke, na shɛ ni yi shishan pu ni fɛfɛɛrɛ xuu ni, na shɛ jurumu yafa wu wo yaaŋa ki pye ge, pʼi shɛ ni yee ni buguro ti kadugo yíri. Pʼi shɛ yi sɛɛyɛ ye, ni yi xaara te, ni yi fure ti sòrogo. 28 Sipya wemu wu da zhɛ yi sòrogo ge, wee di ba wu fàya yi je, wu lɔhɔ wuu. Lee kadugo na wu na je buguro ti ni.

29 We na ba bye yee mu saliya wemu da ga yìri wɛ. Yee li yeŋɛ gbarashuun wogo ki cabyaa kɛ wu caŋa, yʼi suun le. Wa ganha bu keŋɛ le kapyii la shishiin ni wɛ, ma kantiinlɛ fara ma nadadiinmɛ na, wee wemu wʼa tiin yi mu ge. 30 Bani kee caŋa ki na pʼa da ba jurumu yafa wu wo yaaŋa ki pye yi na, na yi pye fɛɛfɛɛ. Yi na ba bye fɛɛfɛɛ na foro yi jurumu wu bɛɛri ni Tɛhɛnɛ Baa Kilɛ ɲaha tàan. 31 Kee caŋa ki na ba bye yi mu caŋmɔŋɔ ba cadɛɛngɛ ki ɲɛ wɛ. Yi na ba suun le. Saliya wu ɲɛ wii wemu da ga yìri wɛ. 32 Pʼa saraya ɲaha shɔɔnrivɔɔ wemu tìre, na wu teŋɛ wu to wu faara saraya ɲaha shɔɔnrivɛɛrɛ ti wo labye wu na ge, wee wʼa da ba jurumu yafa wu wo yaaŋa ki pye. Wu na ba lɛn fàya yi li, fɛfɛɛrɛ fàya ye. 33 Wu na ba jurumu yafa wu wo yaaŋa ki pye fɛfɛɛrɛ ti wo fɛfɛɛrɛ puga ki na, na ki pye Ɲuŋɔ Tacirige Fàya Puga ki na, ni saraya tawologo ke. Wu na ba jurumu yafa wu wo yaaŋa ki pye saraya ɲaha shɔɔnrivɛɛ pu na, na ki pye sipyiire ti bɛɛri na. 34 Ɲɔmɛɛ li wa lii lemu wa da ga yìri wɛ. Izirayɛli nagoo pu wo jurumu wu bɛɛri wo jurumu yafa yaaŋa ki na ba bye pu na tɔɔɲii nigin yee li funŋɔ ni.» A pʼi li pye ba Tɛhɛnɛ Baa Kilɛ bi yi jo Musa mu wɛ.