Fɛfɛɛrɛ ti wo kodorogoo
Xuu wemu ni Izirayɛli nagoo pʼa yaa na pu yapɔrɔyɔ yi xuli ge
17
A Tɛhɛnɛ Baa Kilɛ di Musa pye: 2 «Yi jo Arɔn ni wu jalaa pee, ni Izirayɛli nagoo pu bɛɛri mu na: ‹Tɛhɛnɛ Baa Kilɛ ya yemu jo ge, yee yi wa ye na: 3 “Izirayɛli puga ki shɛn wa bɛɛri wʼa nù, kelee dubya, kelee sika gbo buguro ti na kelee buguro ti kadugo yíri, 4 na ta wu ya shɛ ni wu ni Ɲuŋɔ Tacirige Fàya Puga ki tajege ki ɲɔ na, na shɛ wu pye saraga Tɛhɛnɛ Baa Kilɛ mu, Tɛhɛnɛ Baa Kilɛ wo fɛfɛɛrɛ xuu wu ɲɔ na wɛ, pee shishan pu foo na ba yege weefɔɔ na. Wʼa shishan wo. Weefɔɔ niŋɛ na ba gɔn wolo Izirayɛli nagoo pu ni. 5 Lee na do, yani Izirayɛli nagoo pʼa pu saraya yi wo sige ki ni ge, pu na da ma ni yi ni saraya ɲaha shɔɔnrivɔɔ wu mu, Ɲuŋɔ Tacirige Fàya Puga ki tajege ki ɲɔ na, Tɛhɛnɛ Baa Kilɛ ɲaha tàan. Saraya ɲaha shɔɔnrivɔɔ wu na ba yi wo na gaan Tɛhɛnɛ Baa Kilɛ mu na byi ɲaɲiŋɛ saraya. 6 Saraya ɲaha shɔɔnrivɔɔ wu na ba yi shishan pu ɲɛrɛgi ɲɛrɛgi Tɛhɛnɛ Baa Kilɛ wo saraya yi tawologo ki na, Ɲuŋɔ Tacirige Fàya Puga ki tajege ki ɲɔ ki na, na yi sìnmɛ pu sòrogo. Kee na ba bye nugo kemu ya dan Tɛhɛnɛ Baa Kilɛ ni ge. 7 Lee funŋɔ ni Izirayɛli nagoo pu da da pu saraya yi wo nige sikapee pu wo jaalaa pu mu wɛ, kee yapɛrɛɛ kiimu pʼa bi gaan ge. Lee na ba bye ɲɔmɛɛ pu mu, lemu da ga yìri wɛ, pu ni pu kadugo shi nibama wu bɛɛri ni.”8 «‹Mʼa yi jo pu mu sanha na: “Izirayɛli puga ki shɛn wa, kelee nadadiinmɛ wa, wemu wu ɲɛ tiinnɛ na pu mu ge, wee wa bu saraga nizogoŋɔ kelee saraga ka wolo 9 na ta wu ya shɛ ni ki ni Ɲuŋɔ Tacirige Fàya Puga ki tajege ki ɲɔ na, na shɛ ki kan Tɛhɛnɛ Baa Kilɛ mu wɛ, weefɔɔ niŋɛ na ba gɔn wolo wu shi wu ni.”›»
Shishan ya yaa na xhaa wɛ
10 «‹Izirayɛli puga ki shɛn wa, kelee nadadiinmɛ wa, wemu wʼa tiin pu mu ge, wee wa bɛɛri bu shishan xa, pu pye shishan tuugo bɛɛri, wemu wʼa shishan pu xa ge, nɛ na ba ŋmahana ɲɛri weefɔɔ fɛni, na wufɔɔ niŋɛ kɔn wolo wu sipyii pu ni.* 11 Bani ɲìi yaŋmuŋɔ bɛɛri, ki shishan pe ni ki munaa li wa. Pee shishan pe, nɛ wʼa pee kan yee mu jo yʼa pee taga yʼa jurumu yafa wu wo yaaŋa ki pyi saraya tawologo ki na. Bani munaa le li wa shishan pu ni ge, lee lʼa ma jurumu yafa wu wo yaaŋa ki pye.* 12 Lee wuu na nɛ Izirayɛli nagoo pu pye jo: “Wa shishiin ganha ga shishan xa yi ni wɛ. Nadadiinmɛ wemu bɛ wʼa tiin yi mu ge, wu bɛ ganha ga shishan xa wɛ.”
13 Wa bɛɛri wʼa sige xaara kelee shazhiga co sige ki ni ge, wʼa pye Izirayɛli shɛn la, wʼa pye nadadiinmɛ, wemu wʼa tiin yi mu ge la, wufɔɔ wu ki shishan pu wo ɲiŋɛ na, wu gbazhɛnhɛ tɔ pu na. 14 Bani ɲìi yaŋmuŋɔ bɛɛri, shishan pu ɲɛ ki munaa le. Lee na nɛ Izirayɛli nagoo pu pye jo: “Yi ganha ga ɲìi yaŋmuŋɔ ka shishiin shishan xa wɛ, bani ɲìi yaŋmuŋɔ bɛɛri, shishan pu ɲɛ ki munaa le, wa bɛɛri wʼa pee xa ge, weefɔɔ niŋɛ na gɔn wolo wà.”
15 «‹Wa bɛɛri wʼa yaxugo, kelee naŋa yaaga wo yacozaŋa xa ge, wʼa pye Izirayɛli shi shɛn la, wʼa pye nadadiinmɛ, wemu wʼa tiin yi mu ge la, wufɔɔ di wu fàya yi je, wu lɔhɔ wuu. Wufɔɔ na ba bye yaha fɛfɛɛrɛ baa fɔɔ fo na shɛ nɔ yakoŋɔ ki na. Lee kadugo na wu na pye fɛɛfɛɛ. 16 Wu bye wʼi ya wu fàya yi je, na lɔhɔ wuu wɛ, wu nahama pu na ba gori yaha wu ɲuŋɔ ni.›»