Ná ni cee torogana
18
A Tɛhɛnɛ Baa Kilɛ di Musa pye: 2 «Jo ni Izirayɛli nagoo pu ni mʼa pu pye na: ‹Nɛ wu ɲɛ Tɛhɛnɛ Baa Kilɛ, yi Kilɛ we. 3 Misira fiige kemu ni yi bye ge, lemu lʼa byi wà ge, yi ganha ba lee pyi wɛ. Kana fiige ki ni nʼa se ni yi ni ge, lemu lʼa byi wà ge, yi ganha bu shɛ lee pyi wɛ. Yi ganha bu daha pu wo kalɛgɛɛ ki fɛni wɛ. 4 Yʼa na wo ɲɔmɛjogoo ki koo ɲaari, yʼi na wo saliya wu mara, yʼi da wu koo ɲaari. Nɛ wu ɲɛ Tɛhɛnɛ Baa Kilɛ, yi Kilɛ we.5 Yʼa na wo saliya we, ni na ɲɔmɛjogoo ki koo ɲaari. Sipya wemu ba kee koo ɲaari, weefɔɔ na ba ɲiifɛɛrɛ pye. Nɛ wu ɲɛ Tɛhɛnɛ Baa Kilɛ we.*
6 «‹Wa shishiin ganha ga fulo wu ceboro yɛ pyaa pyaa na wu sinnɛ ni wu ni wɛ. Nɛ wu ɲɛ Tɛhɛnɛ Baa Kilɛ we. 7 «‹Ma ganha ga sinnɛ ni ma nu wu ni wɛ, ma nu wu ɲɛ wii, ma ga lee pye ma to wu mʼa shiige, na ma nu wu bɛ shiige.
8 «‹Ma ganha ga sinnɛ ni ma to wu shɔ wa shishiin ni wɛ. Shiige mʼa le ma to wu ɲaha ni.*
9 «‹Ma ganha ga sinnɛ ni ma ceboroshɔ ni wɛ, wʼa pye ma to wu poro fucɛɛrɛ la, wu shiin ya pye ma nu wu fucɛɛrɛ la. Wʼa se ni ma ni kpɔnnunɔ na la, wu shiin ya se kpuun latii na la, ma ganha ga sinnɛ ni wu ni wɛ.*
10 «‹Ma ganha ga sinnɛ ni ma ja poro fucɛɛrɛ ni, kelee ni ma poro fucɛɛrɛ wo poro fucɛɛrɛ ni wɛ. Mayɛ pyaa ki wo shiige ki wa kere.
11 «‹Ma ganha ga sinnɛ ni ma to shɔ poro fucɛɛrɛ ni wɛ. Ma to wu nize wu ɲɛ wii. Ma ceboroshɔ wu ɲɛ were.
12 «‹Ma ganha ga sinnɛ ni ma to muzhɔ kelee ni wu cuun ni wɛ. Ma to wu ceboroshɔ yɛ pyaa pyaa ki ɲɛ kere.*
13 «‹Ma ganha ga sinnɛ ni ma nu wu muzhɔ kelee ni wu cuun ni wɛ. Ma nu wu ceboroshɔ yɛ pyaa pyaa ki ɲɛ kere.
14 «‹Ma ganha ga sinnɛ ni ma topire shɔ ni, mʼa ma topire li shiige wɛ. Ma nu wu ɲɛ were.
15 «‹Ma ganha ga sinnɛ ni ma ja shɔ ni wɛ. Ma ja wu wo shɔ wu wa, ma ganha ga sinnɛ ni wu ni wɛ.*
16 «‹Ma ganha ga sinnɛ ni ma ceborona shɔ ni wɛ. Ma ceborona wu mʼa shiige.*
17 «‹Ma ganha ga sinnɛ ni cee ni, mʼa guri mʼa sinnɛ ni wu poro fucɛɛrɛ bɛ ni wɛ. Ma ganha ga sinnɛ ni wee cee wu wo ja poro fucɛɛrɛ, kelee ni wu poro fucɛɛrɛ wo poro fucɛɛrɛ ni wɛ. Cebooloo pu ɲɛ pii. Kakuudiinɛ li ɲɛ lere.*
18 «‹Ma ganha ga ma shɔ wu cuun, kelee wu muzhɔ leŋɛ, mʼa sinnɛ ni wu ni, na ma shɔ wu yaha ɲìi na wɛ. Lee wa ma ni ɲiizhaga ni pu tɛ ni.
19 «‹Ma ganha ga sinnɛ ni cee ni, na wu yaha ni lowuuyo ni wɛ, bani wu ɲɛ ma bye fɛɛfɛɛ wee tuun wu ni wɛ.*
20 «‹Ma ganha ga sinnɛ ni ma sipyiɲii shɔ ni wɛ, ma na bye fɛfɛɛrɛ baa fɔɔ.*
21 «‹Ma ganha ga ma pya wa shishiin wolo saraga yapɛrɛɛ Molɔki mu wɛ. Ma ganha ga ma Kilɛ wu mɛgɛ ki le fɔɔnrɔ ni wɛ. Nɛ wu ɲɛ Tɛhɛnɛ Baa Kilɛ we.*
22 «‹Ma ganha ga sinnɛ ni ná ni ba cee ɲɛ wɛ. Tanhaŋa kaa li ɲɛ lere.*
23 «‹Ma ganha ga yabobogo sha wɛ, lee na ma pye fɛfɛɛrɛ baa fɔɔ. Cee bɛ ganha ga wuyɛ kan yabobogo mu ki dugi wɛ. Kawuriye yi ɲɛ yere.*
24 «‹Yi ganha ba yiyɛ pyi fɛfɛɛrɛ baa fɛɛ ni kii keree kii tuuyo ni wɛ. Bani shi wemu nɛ wa gɔri na lɛri yi ɲaha na ge, kii keree kii pee ya taga puyɛ pye fɛfɛɛrɛ baa sipyii. 25 A fiige ki bɛɛri di ɲɛri pye fɛfɛɛrɛ baa wogo. Lee wuu na nɛ lee foo le tɔ pu mu. Pu fiige kʼa pu tugi.
26 «‹Yee pi ge, yee ya yaa na nɛ wo saliyaa pee ni nɛ wo ɲɔmɛjogoo ki koo ɲaari. Kantiinlɛ fara nadadiinmɛ na, wemu wʼa tiin yi mu ge, wa shishiin ganha ga le katanhana le la pye wɛ. 27 Bani sipyii piimu pʼa fɛnhɛ tiin kee fiige ke ni yee ɲaha na ge, kii katanhaŋaa kii bɛɛri pee ya pye, a fiige kʼi ɲɛri pye fɛfɛɛrɛ baa wogo. 28 Yi bɛ ba kee katanhaŋaa ki shi pyi, na fiige ki ɲɛri pye fɛfɛɛrɛ baa wogo, ki na ba yi bɛ tugi, ba kʼa shɛnshiilee pu tugi tugigana lemu na wɛ, pee piimu pʼa fɛnhɛ tiin ki ni yee ɲaha na ge.
29 «‹Sipya bɛɛri wʼa le katanhana le la shi pye ge, weefɔɔ niŋɛ na ba gɔn wolo wu sipyii pu ni.
30 «‹Lee wuu na yʼa na wo ɲɔmɛjogoo ki koo ɲaari, kɔnhɔ yi ganha ba kii katanhaŋaa ki shi pyi wɛ, kee kiimu kʼa bi fɛnhɛ na byi yee ɲaha na ge. Yi ganha bu kee taga yiyɛ pye fɛfɛɛrɛ baa sipyii wɛ. Nɛ wu ɲɛ Tɛhɛnɛ Baa Kilɛ, yi Kilɛ we.›»