Kilɛ-pɛɛŋɛ ni tiimɛ wo kodorogoo
19
Ayiwa, a Tɛhɛnɛ Baa Kilɛ di Musa pye:2 «Jo ni Izirayɛli nagoo pu bɛɛri ni, mʼa pu pye: ‹Yi yiyɛ pye fɛfɛɛrɛ wuu, bani Fɛfɛɛrɛ wo nɛ ɲɛ, nɛ Tɛhɛnɛ Baa Kilɛ, yi Kilɛ we.*
3 «‹Yee wa bɛɛri ya yaa na gbɔɔrɔ tɛri ma to, ni ma nu na, yʼi da cadɛɛnyɛ yi yɛri. Nɛ wu ɲɛ Tɛhɛnɛ Baa Kilɛ, yi Kilɛ we.*
4 «‹Yi ganha bu ɲaha ɲɛri yapɛrɛɛ yíri, yʼi da kee pɛlɛ wɛ. Yi ganha bu tɔɔrɔ ɲa di daga yapɛrɛ yàa da bɛlɛ wɛ. Nɛ wu ɲɛ Tɛhɛnɛ Baa Kilɛ, yi Kilɛ we.*
5 «‹Yi ba da ɲaɲiŋɛ saraga wolo di gan Tɛhɛnɛ Baa Kilɛ mu, yʼi ki wologana ɲɔ kɔnhɔ Tɛhɛnɛ Baa Kilɛ di sɔɔ ki na. 6 Caŋa kemu yʼa ki wolo ge, yʼi ki xa kee caŋa ke, xaara ta bu gori, yʼi tee xa ɲimuguro ti na. Ta bu gori na nɔ caŋa taanri wogo ki na, yʼi tee sòrogo na ni. 7 Yi bu ta xa caŋa taanri wogo ki bɛ na, saraga ki da joo nige wɛ, bani kʼa ɲɛri fɛfɛɛrɛ baa yaaga. 8 Sipya bɛɛri wʼa ti xa ge, li jaagi kanhama na ba do weefɔɔ ɲuŋɔ ni, bani yaaga kemu kʼa yaha Tɛhɛnɛ Baa Kilɛ yahama ni ge, wʼa kee nɔrɔgɔ. Wu niŋɛ na ba gɔn wolo wu sipyii pu ni.
9 «‹Yi ba yalɔɔrɔ luu yi wo fiige ki ni, yi ma kɛrɛyɛ yi koɲɔgoyo yi wo shinma wu yaha wà, yi ganha bu wee kɔn wɛ. Yi ganha bu kɛrɛyɛ yi bɛ fugi wɛ.* 10 Yi ba ɛrɛzɛn wu bɛ kɔn, yi ganha bu kɛrɛyɛ yi fugi wɛ, ɛrɛzɛn wemu wʼa to to kɛrɛyɛ yi ni ge, yi ganha bu wee bɛ bulo wɛ. Yʼi yee yaha wà funmɔ fɛɛ ni nadadiinmɛɛ pu mu. Nɛ wu ɲɛ Tɛhɛnɛ Baa Kilɛ, yi Kilɛ we.
11 «‹Yi ganha ba nagaara pyi wɛ. Yi ganha ba kafinɛyɛ yu, kelee na naŋmahara pyi yiyɛ na wɛ.*
12 «‹Yi ganha ba gari nɛ mɛgɛ na kafinɛyɛ ɲuŋɔ tàan wɛ, lee wa yi to Kilɛ wu mɛgɛ kyɛɛgi. Nɛ wu ɲɛ Tɛhɛnɛ Baa Kilɛ we.*
13 «‹Ma ganha ba juruni ma sipyiɲii ni ba nanɔrɔɔa ɲɛ wɛ. Ma ganha ga wa yaaga shɔ wu na wɛ.
«‹Ma kapyebye sara ganha ga shɔn ma keŋɛ ni wɛ.*
14 «‹Ma ganha ga ɲudunnɔ shɛhɛlɛ wɛ, ma di ganha ga yaaga yaha fyɛn koo ni wu pa birege ki na wɛ, ga ta fyagi ma Kilɛ wu na. Nɛ wu ɲɛ Tɛhɛnɛ Baa Kilɛ, yi Kilɛ we.*
15 «‹Yi ganha ba kiiri kɔɔn ni tiibaara ni wɛ. Ma ganha ga kaɲii kan funmɔ fɔɔ mu wu funmɔ wuu na wɛ. Ma ganha ga kaɲii kan fanhafɔɔ mu wu fanha ki wuu na wɛ. Ma ba da ma sipyiɲii kiiri kɔn, wu kɔn ni tifire ni.*
16 «‹Ma ganha ba kalɔhɔrɔ yu da mari ma sipyii pu tɛ ni wɛ. Ma ganha ga kafinɛyɛ taga ma sipyiɲii ɲuŋɔ le xu ni wɛ. Nɛ wu ɲɛ Tɛhɛnɛ Baa Kilɛ we.
17 «‹Ma ganha ga ma ceboro kɔ ma zɔ wu na wɛ. Ma sipyiɲii bu kaa pye lemu ya saha wɛ, li jo wu ɲii na, kɔnhɔ ma ganha bu mayɛ le jurumu ni wu wuu na wɛ.* 18 Ma ganha ba sipyii kakuuŋɔɔ fɔhɔɔ tɔni pu mu wɛ. Ma ganha bu ma shi shɛɛn pu co ni tɛhɛ ni wɛ. Ma sipyiɲii di daan ma mu ba mayɛ pyaa ki ɲɛ wɛ. Nɛ wu ɲɛ Tɛhɛnɛ Baa Kilɛ we.*
19 «‹Yʼa na wo ɲɔmɛjogoo ki koo ɲaari.
«‹Ma ganha ga ma yapɔrɔyɔ yi yaha tuugo ka ki tuugo ka dugi wɛ. Ma ganha ga shinma tuuyo shuun nugi tɛgɛ nigin ni wɛ. Ma ganha ga fàya tuuyo shuun jooli fadeŋɛ da leni wɛ.*
20 «‹Ná wa bu bulozhɔ wa co curɔɔrɔ na, wemu ɲuŋɔ sanha wolo wɛ, wu kafɔɔ wu bɛ di sanha wu yaha wuyɛ mu wɛ, ná watii bu sinnɛ ni wu ni, katahana pu da daha wee ná wu na, ga pu da pu shuun wu gbo wɛ, bani bulozhɔ wu bi sanha bye wuyɛ wo wɛ. 21 Wee ná wu dubyapoo nigin wolo kan Tɛhɛnɛ Baa Kilɛ mu Ɲuŋɔ Tacirige Fàya Puga ki tajege ki ɲɔ ki na, wu pye wu katiibaana li wo yaaŋa ki wo saraga. 22 Saraya Ɲaha shɔɔnrivɔɔ wu na ba wu jurumu wu wo yafa wu yaaŋa ki pye wu na Tɛhɛnɛ Baa Kilɛ ɲaha tàan, ni yaaŋa ki wo dubyapoo wu ni. Jurumu wemu wʼa pye ge, wee na yafa wu mu.
23 «‹Yi ba shɛ jé Kana fiige ki ni, na tiire tuuyo bɛɛri nɔrɔgi temu nagoo ya li ge, yi na ba tee tiire ti wo nagoo pu wii fɛfɛɛrɛ baa wuu fo na shɛ da yee taanri, yi da pu li wɛ. 24 Yee shishɛɛrɛ wuu li na, yʼi tee tiire ti wo nagoo pu bɛɛri yaha Tɛhɛnɛ Baa Kilɛ yahama ni, yʼi kalenɛ gba, yʼi wu sɔ. 25 Yee kaguro wuu li na, yʼi tee tiire ti nagoo pu li, lee funŋɔ ni yi yalɔɔrɔ ti da da dan yi na. Nɛ wu ɲɛ Tɛhɛnɛ Baa Kilɛ, yi Kilɛ we.
26 «‹Yi ganha ga yaaga ka shishiin xa na ki shishan pu yaha ki ni wɛ. Yi ganha ba celɔrɔ ceeni wɛ, yi ganha ba cɛmɛ pyi wɛ.* 27 Yi ganha ba yi ɲuyɔ yi nɔhɔ kɔɔn wɛ, yi ganha ba yi ɲahazhɔlɔɔ pu kabanuyo yi xuri wɛ.* 28 Yi ganha ba yi ceesɛɛyɛ yi shɛɛngi shɛɛngi xuu wuu na wɛ, yʼi ganha ba yi ceesɛɛyɛ yi ɲɛgɛlɛ bɛ wɛ. Nɛ wu ɲɛ Tɛhɛnɛ Baa Kilɛ we.
29 «‹Ma ganha ga ma poro pushɔ le yapɛrɛɛ kalɛgɛɛ wo dɔdɔɔrɔ ni, di fanhara shan wu na wɛ, kɔnhɔ dɔdɔɔ ganha bu ɲɛhɛ fiige ki ni, kʼi ɲi katiibaagaa na wɛ.*
30 «‹Yʼa na wo cadɛɛnyɛ yi yɛri, yʼi da pɛɛŋɛ tɛri na fɛfɛɛrɛ xuu wu na. Nɛ wu ɲɛ Tɛhɛnɛ Baa Kilɛ we.*
31 «‹Piimu pʼa xuu pu yiri, na celɔrɔ pyi ge, yi ganha bu daha pee fɛni wɛ. Yi ganha ba celɔrɔ pyi wɛ, lee wʼa yi nɔrɔgɔ. Nɛ wu ɲɛ Tɛhɛnɛ Baa Kilɛ, yi Kilɛ we.*
32 «‹Ta yìri mʼa yeree ɲuzhifiire fɔɔ ɲaha tàan, ma da gbɔɔrɔ tɛri sipyilɛyɛ na. Ma da fyagi ma Kilɛ wu bɛ na. Nɛ wu ɲɛ Tɛhɛnɛ Baa Kilɛ we.
33 «‹Nadadiinmɛ wa bu ba diin yi mu yi fiige ki ni, yi ganha ba juruni wu ni ba nanɔɔlɔɔb ɲɛ wɛ.* 34 Yi nadadiinmɛɛ pu co ba kantiinlɛɛ pu ɲɛ wɛ. Pʼi daan yi mu ba yiyɛ pyaa ki ɲɛ wɛ, bani yee bɛ pu bye nadadiinmɛɛ Misira fiige ki ni. Nɛ wu ɲɛ Tɛhɛnɛ Baa Kilɛ, yi Kilɛ we.
35 « ‹Yi ganha ba tiibaara pyi wɛ. Yi ganha ba ti pyi kiiri ni wɛ, yi ganha ba ti pyi daanna yɛrɛyɛ yi bɛ ni wɛ, ma na jo mɛtɛrɛ we, ni kilo we, ni litiri we.* 36 Yi mɛtɛrɛ wʼa yaa na fa, yi kilo wʼa yaa na fa, yi litiri wʼa yaa na fa. Nɛ wu ɲɛ Tɛhɛnɛ Baa Kilɛ, yi Kilɛ we, wee wemu wʼa yi yeege Misira fiige ki ni ge.
37 « ‹Yʼa na wo saliyaa pu bɛɛri ni na wo ɲɔmɛjogoo ki bɛɛri koo ɲaari. Nɛ wu ɲɛ Tɛhɛnɛ Baa Kilɛ we.› »