Ma bu jurumu pye, ma ni lemu ya yaa ge
20
A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na: ‹Izirayɛli nagoo pu fara nadadiinmɛɛ pu na, pee piimu pʼa tiin pu mu ge, sipya bɛɛri wʼa wu pya wa wolo saraga yapɛrɛɛ Molɔki mu ge, weefɔɔ na gbo. Fiige ki shɛɛn pu na wufɔɔ wá gbo ni kagereye ni. 3 Nɛyɛ pyaa na ba ŋmahana ɲɛri weefɔɔ fɛni, na wu niŋɛ kɔn wolo wu shi shɛɛn pu ni, bani wʼa wu pya wa wolo saraga yapɛrɛɛ Molɔki mu, na nɛ fɛfɛɛrɛ xuu wu nɔhɔ, na nɛ fɛfɛɛrɛ mɛgɛ ki kyɛɛgi. 4 Wee ná wu wʼa wu pya wu kan yapɛrɛɛ Molɔki mu ge, sipyiire ti bu tiyɛ pye kanna ti ya wu ɲa wɛ, na bye pu ya wu gbo wɛ, 5 nɛyɛ pyaa na ba ŋmahana ɲɛri weefɔɔ ni wu gbawege ki fɛni, ni sipyii piimu bɛɛri pʼa taha wu fɛni, na puyɛ le dɔdɔɔrɔ ni ni Molɔki wo pɛɛŋɛ ki ni ge. Nɛ na ba pee bɛɛri niŋɛ kɔn wolo pu sipyii pu ni.6 « ‹Sipya bɛɛri wʼa ɲaha ɲɛri xuu yirivɔɔ yíri kelee ceefɔɔ yíri, na dɔdɔɔrɔ pye ni yee wo pɛɛŋɛ ki ni ge, nɛ na ba ŋmahana ɲɛri weefɔɔ fɛni, na wu niŋɛ kɔn wolo wu sipyii pu ni.
7 « ‹Yi yiyɛ pye fɛɛfɛɛ, yʼi yiyɛ yaha na yahama ni, bani nɛ wu ɲɛ Tɛhɛnɛ Baa Kilɛ, yi Kilɛ we. 8 Yi na saliya ɲɔmɛhɛɛ ki mara, yʼi da ki koo ɲaari. Nɛ wu ɲɛ Tɛhɛnɛ Baa Kilɛ we, wee wemu wʼa yee yaha wuyɛ yahama ni ge.
9 « ‹Sipya bɛɛri wʼa wu to, kelee wu nu laŋi ge, weefɔɔ na gbo. Wuyɛ pyaa kʼa pye kaɲuŋɔ na xu nɔ wuyɛ na, bani wʼa wu to, kelee wu nu laŋi.*
10 « ‹Ná wa bu dɔdɔɔrɔ pye ni wu sipyiɲii shɔ ni, dɔdɔna wu fara dɔdɔshɔ wu na, pu shuun wu bɛɛri na gbo.*
11 « ‹Ná bu sinnɛ ni wu to shɔ ni, wu to wʼa shiige. Pu shuun wu bɛɛri na gbo. Puyɛ pyaa kabee na bye puyɛ na.*
12 « ‹Ná wa bu sinnɛ ni wu jashɔ ni, pu shuun wu bɛɛri na gbo. Kawuriye pʼa pye. Puyɛ pyaa kabee na bye puyɛ na.*
13 « ‹Ná wa bu sinnɛ ni ná wa ni ba ná ni cee ma sinnɛ mɛ wɛ, katanhana pʼa pye pu shuun wu bɛɛri. Pu na gbo, puyɛ pyaa kabee na bye puyɛ na.*
14 « ‹Ná wa bu cee leŋɛ, na guri wee cee wu nu bɛ leŋɛ, kapetiinɛ li wa lere. Pu taanri wu bɛɛri na zorogo na ni, kɔnhɔ lee kapetiinɛ li shi ganha bu ɲa yi tɛ ni wɛ.*
15 « ‹Ná wa bu sinnɛ ni yapɔrɔgɔ ni, wu na gbo. Yʼi yapɔrɔgɔ ki bɛ gbo.*
16 « ‹Cee bu fulo yapɔrɔgɔ tuugo bɛɛri na, na binnɛ ni ki ni, yʼi wee cee we ni kee yapɔrɔgɔ ki gbo. Pʼa yaa na pu gbo. Puyɛ pyaa kabee na bye puyɛ na.
17 « ‹Ná wa bu wu ceboro fucɛɛrɛ lɔ, wu to wu poro pushɔ, kelee wu nu wu poro pushɔ. Wu bu wu sinnɛ, a cee wu bɛ di sinnɛ ni wu ni, shiige kereye yi ɲɛ yere, pu niŋɛ na gɔn wolo pu sipyii pu ni, pu shi shɛɛn pu ɲii na. Ná wʼa wu ceboroshɔ wu shiige, pee nahama pu wo jaagi kanhama pu na ba do ná wu ɲuŋɔ ni.*
18 « ‹Ná wa bu sinnɛ ni cee lowuuyo wo ni, wʼa wu shishan koo li nɔhɔ mugi, a cee wu bɛ di wu shishan koo li nɔhɔ mugi. Pu shuun wu bɛɛri niŋɛ na ba gɔn wolo pu shi shɛɛn pu ni.a
19 « ‹Ma ganha ga sinnɛ ni ma nu wu ceboroshɔ ni, kelee ni ma to wu ceboroshɔ ni wɛ, bani ma ceboroshɔ wu mʼa shiige. Pu nahama pu jaagi kanhama pu na ba do pu ɲuŋɔ ni.*
20 « ‹Ná wa bu sinnɛ ni wu topire shɔ ni, kelee ni wu yalɔ shɔ ni, topire le, kelee yalɔ wu wʼa shiige. Pu jurumu wu jaagi kanhama pu na do pu ɲuŋɔ ni. Pu shuun wu na pu wo jaan wu pari pya baa.
21 « ‹Ná wa bu wu ceborona wo shɔ lɔ, kanɔhɔyɔ yi ɲɛ yere. Wu ceborona wu nɔhɔ wʼa mugi. Pu shuun wu na pu wo jaan wu pari pya baa.*
22 « ‹Yi na wo saliyaa pu bɛɛri, ni na wo ɲɔmɛjogoo ki bɛɛri mara, yʼi da ki koo ɲaari. Lee funŋɔ ni, fiige kemu ni nʼa gaaŋi di zhɛ yi yaha, yʼi diin ki ni ge, kee da ba yi tugi wɛ. 23 Shi wemu nʼa da ba gɔri laha wà yi ɲahagbaa na ge, yi ganha bu shɛ daha pee wo kalɛgɛɛ ki fɛni da byi wɛ, bani kee kapyegee kii bɛɛri bye wuu na pu keree ya nɛ sanri. 24 Nɛ yee pye jo: “Yee pʼa da ba pu ɲiŋɛ ki ta na pye yi wogo. Nɛyɛ pyaa kʼa da ba ki kan yi mu yi ta. Fiige ki ɲɛ kii kemu bɛɛri kʼa ɲi nujirimɛ ni sɛrɛ na, fo yi na fúu ge.” Nɛ wu ɲɛ Tɛhɛnɛ Baa Kilɛ, yi Kilɛ we. Nɛ wʼa yee shɔɔnri lɔ shi wusama tɛ ni.
25 « ‹Lee wuu na do, xaara temu ti ɲɛ fɛfɛɛrɛ wuuro ni temu ti ɲɛ fɛfɛɛrɛ baa wuuro ge, ni shazhɛɛyɛ yemu yi ɲɛ fɛfɛɛrɛ woyo ni yemu yi ɲɛ fɛfɛɛrɛ baa woyo ge, yi yee cɛ shɔɔnri yiyɛ ni. Xaara ni shazhɛɛyɛ ni ɲiŋɛ yakokaara temu ti ɲɛ fɛfɛɛrɛ baa wuuro ge, nɛ tee tɛhɛnɛ kɔn shɛ yee na. Yi ganha bu yiyɛ pye fɛfɛɛrɛ baa sipyii ni yee fɛfɛɛrɛ baa yaŋmuyɔ yi ni wɛ.
26 « ‹Yi pye fɛfɛɛrɛ wuu, yʼi bye na wuu, bani fɛfɛɛrɛ wo nɛ ɲɛ, nɛ Tɛhɛnɛ Baa Kilɛ. Nɛ yee waa laha shi wusama na, kɔnhɔ yʼi bye na wuu.
27 « ‹Cɛmɛ ɲɛ ná wemu mu, kelee cee wemu mu na xuu yiri, kelee na celɔrɔ pyi ge, pee na gbo, pu na ba pu wá gbo ni kagereye ni. Puyɛ pyaa kabee na bye puyɛ na.› »