Saraya ɲaha shɔɔnrivɛɛ pu wo fɛfɛɛrɛ ti kodorogoo
21
A Tɛhɛnɛ Baa Kilɛ di Musa pye: «Yi jo saraya ɲaha shɔɔnrivɛɛ pu mu, Arɔn ni wu jalaa pu ni na: ‹Saraya ɲaha shɔɔnrivɔɔ wa ganha ga wu ceboro nixhugo keree taga wuyɛ pye fɛfɛɛrɛ baa fɔɔ wɛ, 2 fo gbo wu bu shɛ da wuyɛ pyaa puga shɛn, wu nu, wu to, wu ja, wu poro pushɔ, wu ɲahafɔɔ, kelee wu cuun. 3 Wu muzhɔ wemu wu ɲɛ nacɛbaa ge, kelee wu cuun fucɛɛrɛ lemu li ɲɛ nacɛbaa ge, ni wee wa bɛ. Na pu yaha gbaya jebaa, wu kpuun li sipyii pu ɲɛ pii, wu na já wuyɛ pye fɛfɛɛrɛ baa fɔɔ wee wa bɛ wo keree na. 4 Wʼa ɲɛri ɲuŋɔfɔɔ wu sipyii pu tɛ ni, wu ganha bu wu fɛfɛɛrɛ ti laha wuyɛ na, di wuyɛ pye fɛfɛɛrɛ baa fɔɔ wɛ.5 «‹Saraya ɲaha shɔɔnrivɛɛ pu ganha ba pu ɲuyɔ yi nɔhɔ kɔɔn wɛ. Pu ganha ba pu ɲahazhɔlɔɔ pu kabanuyo yi xuri wɛ. Pu ganha ba pu ceesɛɛyɛ yi shɛɛngi shɛɛngi wɛ.* 6 Pu na ba puyɛ yaha nɛ Tɛhɛnɛ Baa Kilɛ yahama ni, pu ya yaa pʼa nɛ Tɛhɛnɛ Baa Kilɛ mɛgɛ kyɛɛgi wɛ, bani pee pʼa Tɛhɛnɛ Baa Kilɛ wo saraya nizogoyo yi wo, pu Kilɛ wu wo yaligee ki kunni. Pʼa yaa na pye fɛfɛɛrɛ wuu.
7 «‹Saraya ɲaha shɔɔnrivɔɔ ya yaa na navarashɔ leŋɛ wɛ, ná ya ɲuzogoro wá cee wemu na ge, wu ya yaa wu wee wa leŋɛ wɛ, cee wemu bɛ poo ya wu yaha ge, wu ya yaa wu wee wa bɛ leŋɛ wɛ, bani saraya ɲaha shɔɔnrivɔɔ bɛɛri wʼa yaha wu Kilɛ wu yahama ni. 8 Yʼa pu wii fɛfɛɛrɛ sipyii, bani pee pʼa yi Kilɛ wu wo yaligee ki kaan. Pu na ba bye yi mu fɛfɛɛrɛ sipyii, bani fɛfɛɛrɛ wo nɛ ɲɛ, nɛ Tɛhɛnɛ Baa Kilɛ, nɛ wemu wʼa yee pyi fɛfɛɛrɛ wuu ge.
9 «‹Saraya ɲaha shɔɔnrivɔɔ wa wo poro pushɔ bu wuyɛ pye navarashɔ, na ɲuzogoro wá wuyɛ na, wu to wu ɲuŋɔ wʼa sogi, wʼa yaa na wu sòrogo na ni.›»
Saraya ɲaha shɔɔnrivɛɛ wo ɲuŋɔfɔgbɔ wu wo kodorogoo
10 «‹Ayiwa, saraya ɲaha shɔɔnrivɔɔ wemu wu ɲɛ saraya ɲaha shɔɔnrivɛɛ pu bɛɛri wo ɲuŋɔfɔgbɔ wu ge, wee wemu ɲuŋɔ ni pʼa sindirimɛ pu le, na wu yaha Tɛhɛnɛ Baa Kilɛ yahama ni, na fɛfɛɛrɛ fàya yi le wu na ge, wee ganha ba wu ɲuzhiire yɛri yaabaa wɛ, wʼi ganha ba wu fàya bɛ shɛɛngi wɛ. 11 Wu ganha ga fulo gbo wa shishiin na wɛ. Wu ganha ga wuyɛ le fɛfɛɛrɛ baara ni ali wu to kelee wu nu nixhugo bɛ wo keree na wɛ. 12 Wu ya yaa wu foro fɛfɛɛrɛ xuu wu ni wɛ, kɔnhɔ wu ganha bu Kilɛ wo fɛfɛɛrɛ xuu wu wo katanhana pye wɛ. Bani pʼa sìnmɛ taga wu tire, na wu yaha Tɛhɛnɛ Baa Kilɛ yahama ni. Nɛ wu ɲɛ Tɛhɛnɛ Baa Kilɛ we.
13 «‹Doɲiŋɛ pushɔ nacɛbaa, wee saraya ɲaha shɔɔnrivɔɔ wʼa yaa na leŋɛ wu shɔ. 14 Naxhugoshɔ, kelee ceforogo, kelee ná ya ɲuzogoro wá cee wemu na ge, kelee navarashɔ, wu ya yaa wu wee cee wa shi leŋɛ wɛ, ga doɲiŋɛ pushɔ nacɛbaa wu da ba leŋɛ na foro wu tirige shɛɛn pu ni, 15 kɔnhɔ wu ganha bu fɛfɛɛrɛ baa wo shi wa suri wu tirige shɛɛn pu ni wɛ. Nɛ Tɛhɛnɛ Baa Kilɛ wʼa wu yaha nayɛ yahama ni.›»
16 Ayiwa, a Tɛhɛnɛ Baa Kilɛ di Musa pye sanha na: 17 «Yi jo Arɔn mu na: ‹Ma kadugo shi nibama wu bɛɛri funŋɔ ni, sipya bɛɛri wu ɲɛ ni manɛa ni wu cére ti na ma tirige shɛɛn pu ni ge, wee wa shishiin ganha ga fulo, wu wu Kilɛ wu wo yalige ki kan wu mu wɛ. 18 Sipya wemu bɛɛri wu ɲɛ manɛ fɔɔ ge, wʼa pye fyɛn, kelee losiyaŋa fɔɔ la, wʼa pye munajaga fɔɔ, kelee wu yatɛngɛ ka ma shuuri ka ni la, 19 wʼa pye yatɛngɛgɛŋɛ fɔɔ la, 20 wʼa pye dapinnɛ fɔɔ, kelee sipyishigashigara la, wʼa pye ni tafire ni ɲii le la na la, wʼa pye ŋmagana fɔɔ, kelee tako fɔɔ la, kelee pu shiin ya wu wolo namaa ni, wee wa shishiin ya yaa wu fulo saraya tawologo ki na wɛ. 21 Saraya ɲaha shɔɔnrivɛɛ Arɔn wo tirige shɛn wa bɛɛri wu ɲɛ ni manɛ ni ge, wu ya yaa wu fulo wu Tɛhɛnɛ Baa Kilɛ wo saraya nizogoyo yi wolo wɛ. Manɛ wu ɲɛ wu na, wu ganha ga fulo, wu wu Kilɛ wu wo yalige ki kan wɛ. 22 Wufɔɔ na já wu Kilɛ wu wo yalige ki li, yee yemu yi ɲɛ fɛɛfɛɛ ni yemu yi ɲɛ fɛfɛɛrɛ ti bɛɛri wo fɛfɛɛrɛ woyo ge. 23 Ga wu ganha fulo ɲahaparaga fàŋa ki na, kelee na fulo saraya yi tawologo ki na wɛ, bani manɛ fɔɔ wu ɲɛ wii. Wu ya yaa wu nɛ wo fɛfɛɛrɛ tɛyɛ yi nɔhɔ wɛ, bani nɛ wu ɲɛ Tɛhɛnɛ Baa Kilɛ we, nɛ wʼa yi pyi fɛfɛɛrɛ woyo.›»
24 Ayiwa, a Musa di pee jomɔ pu jo Arɔn ni wu jalaa pee, ni Izirayɛli nagoo pu bɛɛri mu.