Piimu pʼa yaa na fɛfɛɛrɛ yakanya yi li ge
22
A Tɛhɛnɛ Baa Kilɛ di Musa pye: 2 «Izirayɛli nagoo pʼa fɛfɛɛrɛ yakanya yemu wo na gaan nɛ mu ge, keree kiimu ki da já Arɔn ni wu jalaa pu sige yee li na ge, kee shɛ pu na, kɔnhɔ pu ganha bu na fɛfɛɛrɛ mɛgɛ ki nɔhɔ wɛ. Nɛ wu ɲɛ Tɛhɛnɛ Baa Kilɛ we.3 «Yi jo pu mu na: ‹Yi kadugo shi nibama wu bɛɛri ni, yi tirige shɛn ná bɛɛri wu ɲɛ fɛfɛɛrɛ baa fɔɔ ge, wu ga fulo Izirayɛli nagoo pu wo fɛfɛɛrɛ yakanga ka na, pʼa kemu kan nɛ mu ge, weefɔɔ niŋɛ na ba gɔn wolo wá nɛ ɲaha tàan. Nɛ wu ɲɛ Tɛhɛnɛ Baa Kilɛ we. 4 Arɔn wo tirige shɛn wa bɛɛri wu ɲɛ ni togo ni, kelee ceshii ge, wu ganha ga fɛfɛɛrɛ yakanga ka li wɛ, fo wu ga ba bye fɛfɛɛrɛ fɔɔ. Gbo ya sipya wemu bɛɛri pye fɛfɛɛrɛ baa fɔɔ ge, sipya wemu bɛɛri wʼa kpɔn wee na ge, ni sipya wemu bɛɛri wo nara lɔhɔ kʼa wo ge, 5 ni sipya wemu wʼa kpɔn ɲiŋɛ yafuugo tuugo bɛɛri na, kemu ya sipya pyi fɛfɛɛrɛ baa fɔɔ ge, kelee na kpɔn sipya wa na wemu wu ɲɛ fɛfɛɛrɛ baa fɔɔ ge, ti pye fɛfɛɛrɛ baara tuugo bɛɛri, wee wa bɛ ganha ga fɛfɛɛrɛ yakanga ka li wɛ. 6 Sipya bɛɛri wu ɲɛ pee yahama pa ni ge, weefɔɔ fɛfɛɛrɛ baa wo wu na ba gori yaha fo na shɛ nɔ yakoŋɔ ki na. Wu da já fɛfɛɛrɛ yakanya yi li wɛ, fo wu ba shɛ lɔhɔ wuu. 7 Caŋa ki ba do xɔ, wʼa pye fɛfɛɛrɛ fɔɔ, lee kadugo na, wu na já fɛfɛɛrɛ yakanya yi li, bani wu wo yaligee ki wa kere.
8 «‹Yaaga kemu ya xu kiyɛ mu ge, kelee yacoŋɔ ya xa na kemusaŋa yaha ge, saraya ɲaha shɔɔnrivɔɔ wu ganha ga kee ka xa wɛ, wu na bye fɛfɛɛrɛ baa fɔɔ. Nɛ wu ɲɛ Tɛhɛnɛ Baa Kilɛ we.
9 «‹Saraya ɲaha shɔɔnrivɛɛ pʼa yaa na nɛ wo ɲɔmɛjogoo ki koo ɲaari. Pu ganha bu yaligee keree taga puyɛ le jurumu ni wɛ. Pu bu nɛ fɛfɛɛrɛ yalige ki nɔhɔ, pu na xhuu. Nɛ wu ɲɛ Tɛhɛnɛ Baa Kilɛ, wee wemu wʼa pu pyi fɛfɛɛrɛ wuu ge.
10 «‹Sipya wemu ɲɛ saraya ɲaha shɔɔnrivɛɛ pu wo kpuun shɛn wa wɛ, weefɔɔ ganha ga nɛ wo fɛfɛɛrɛ yakanga ka li wɛ. Saraya ɲaha shɔɔnrivɔɔ wu wo nabunje, kelee wu baaripye bɛ ganha ga fɛfɛɛrɛ yakanga ka li wɛ. 11 Ga saraya ɲaha shɔɔnrivɔɔ wu bu bulo wemu shɔ ni wu naafuu ni, kelee bulo wemu wʼa se wu puga ge, pee na já da wu yaligee ki li.
12 «‹Saraya ɲaha shɔɔnrivɔɔ wa wo poro pushɔ bu gbaga jé ná watii mu wemu ɲɛ saraya ɲaha shɔɔnrivɔɔ wɛ, wee cee wu ganha ba fɛfɛɛrɛ yakanya yi li nige wɛ. 13 Ga saraya ɲaha shɔɔnrivɔɔ wa wo poro pushɔ poo bu xhu, kelee ná wu na wu yaha, pya di ɲɛ wu mu wɛ, a wu ba diin topuga, ba wu nɔhɔpiire ti tuun wu ɲɛ wɛ, wee tuun wu ni wu na já da wu to wu yaligee ki li. Sipyitiimɛ wa shishiin ganha ga ki li wɛ.
14 «‹Ná wa bu wuregi, na fɛfɛɛrɛ yakanga ka li, wufɔɔ ya yaa na kee yakanga ki tɛgɛ tɛrɛŋɛ saraya ɲaha shɔɔnrivɔɔ wu na, na ki pɛrɛmɛ pu taaga kaguro wogo taha ki na.
15 «‹Izirayɛli nagoo pʼa fɛfɛɛrɛ yakanya yemu wo na gaan Tɛhɛnɛ Baa Kilɛ mu ge, saraya ɲaha shɔɔnrivɛɛ pu ganha ba yee nɔrɔgɔ wɛ. 16 Lee bɛ wɛ, Izirayɛli nagoo pu ba yee fɛfɛɛrɛ yakanya yi lia, pu na da jaagi shaan puyɛ ɲuŋɔ ni, lʼa bye fanha fo pʼa wee jaagi wu wo yaaŋa pyi. Nɛ wu ɲɛ Tɛhɛnɛ Baa Kilɛ we, wemu wʼa yee yakanya yi pyi fɛɛfɛɛ ge.›»
Yapɔrɔyɔ tuuyo yemu ya yaa na wo saraya yi ge
17 A Tɛhɛnɛ Baa Kilɛ di Musa pye sanha na: 18 «Yi jo Arɔn ni wu jalaa pee, ni Izirayɛli nagoo pu bɛɛri mu na: ‹Izirayɛli wo puga shɛn wa bɛɛri, kelee nadadiinmɛ wa bɛɛri wu ɲɛ Izirayɛli nagoo pu tɛ ni ge, wee wa bɛɛri ba da saraga nizogoŋɔ wolo Tɛhɛnɛ Baa Kilɛ mu, kʼa pye ɲɔfaaga wogo la, ki shiin ya pye daan na mu wogo la, 19 wufɔɔ funŋɔ bi ɲɛ Kafɔɔ di sɔɔ wu saraga ki na, kʼa yaa na pye nupoo, kelee dubyapoo, kelee sikapoo, manɛb ɲɛ wemu na wɛ. 20 Manɛ ɲɛ yapɔrɔgɔ kemu na ge, yi ganha bu kee ka wolo wɛ, kee saraga ke da joo wɛ.* 21 Sipya wa ba da ɲaɲiŋɛ saraga wolo di gan Tɛhɛnɛ baa Kilɛ mu, na foro wu niiye ye kelee wu yapɔrɔbya wu ni, kʼa pye ɲɔfaaga la, kʼa pye daan na mu wo saraga la, wu funŋɔ bi ɲɛ wu saraga kʼi jo, yapɔrɔgɔ kʼa yaa na pye manɛ baa. 22 Yapɔrɔgɔ kemu ki ɲɛ fyɛn, kelee ki yatɛngɛ ka na gbere kelee na kɔn, kelee nɔɔyɔ na ɲɛ ki na, kelee tako na ɲɛ ki na ge, yi ganha ga kee yapɔrɔgɔ ke ka shi wolo gan Tɛhɛnɛ Baa Kilɛ mu wɛ. Yi ganha ga kee ka shishiin sòrogo saraya nizogoyo yi tawologo ki ni Tɛhɛnɛ Baa Kilɛ mu wɛ. 23 Nù, kelee dubya, kelee sika wemu wo yatɛngɛ kʼa tɔnnɔ kelee na gbere ge, ma na já wee wa wolo na pye daan na mu wo saraga, ga wu wa da joo ɲɔfaaga saraga na wɛ. 24 Yapɔrɔgɔ kemu wo jɔhɔɔ kʼa jé wà, kelee ki na tunŋi, kelee ki jɔhɔɔ na wolo, kelee na ki kɔn ge, yi ganha ga kee ka wolo di gan Tɛhɛnɛ Baa Kilɛ mu wɛ. Yi ganha ba lee pyi yi wo fiige ki ni wɛ.c 25 Yi ganha ga kee ka shi shɔ nabun bɛ mu di wolo saraga di bye yi Kilɛ wu yalige wɛ, bani manɛ wu ɲɛ yi na, tabɛbaaga ki wa yi na. Yee wo saraga ki da ga jo yee mu wɛ.›»
26 Ayiwa, a Tɛhɛnɛ Baa Kilɛ di Musa pye sanha na: 27 «Nupige, kelee dubyapige, kelee sikapige ka bu se, kʼa yaa na cabyaa gbarashuun pye ni ki nu wu ni. Na co caŋa gbarataanri wogo ki na, ki na já bye saraga nizogoŋɔ Tɛhɛnɛ Baa Kilɛ mu, wʼa sɔɔ ki na. 28 Ga nushɔ, kelee dubyashɔ, kelee sikashɔ, yi ganha ga wee wa ni wu bige pinnɛ gbo caŋa nigin wɛ.
29 «Yi ba da cemɛ cɛ wo saraga wolo Tɛhɛnɛ Baa Kilɛ mu, yʼi ki wolo ki wologana na, kɔnhɔ kʼi jo yi mu. 30 Caŋa kemu yʼa ki wolo ge, yʼi ki xaara ti bɛɛri xa kee caŋa, yaaga ganha bu shɔn ti ni wɛ. Nɛ wu ɲɛ Tɛhɛnɛ Baa Kilɛ we.
31 «Yi na ɲɔmɛjogoo ki mara, yʼi da ki koo ɲaari. Nɛ wu ɲɛ Tɛhɛnɛ Baa Kilɛ we. 32 Yi ganha ba na fɛfɛɛrɛ mɛgɛ ki nɔrɔgɔ wɛ. Izirayɛli nagoo pu bɛɛri ya yaa na li cɛ na fɛfɛɛrɛ wo nɛ ɲɛ. Nɛ wu ɲɛ Tɛhɛnɛ Baa Kilɛ we, wee wemu wʼa yee pyi fɛfɛɛrɛ wuu ge. 33 Nɛ wʼa yee yeege Misira fiige ki ni, na bye yee Kilɛ. Nɛ wu ɲɛ Tɛhɛnɛ Baa Kilɛ we.»