Saraya ɲaha shɔɔnrivɛɛ pu teŋɛgana pu wo labye wu na
29
Ayiwa, a Kilɛ di Musa pye sanha na: «Lemu ma da bye mʼa Arɔn ni wu jalaa pu yaha nɛ yahama ni, kɔnhɔ pu da saraya ɲaha shɔɔnrivɛɛrɛ ti wo kapyeŋɛɛ ki pyi nɛ mu ge, lee li wa mɛ: Nupepinŋɛ nigin, ni dubyapee shuun ma da joo, yemu ɲɛ manɛ baa ge. 2 Mʼa farini myɛ pa lɔ, mʼa shizhɛnhɛrɛ baa buuri wa yàa, mʼa pa tɔnhɔ sìnmɛ ni ma pye shizhɛnhɛrɛ baa buuri, mʼa pa pye shizhɛnhɛrɛ baa tidaya, mʼa sìnmɛ yɔ yee na. 3 Mʼa yi bɛɛri le daŋa nigin funŋɔ ni, mʼa ba ni yi ni na fara nupepinŋɛ ke ni dubyapee shuun wu na.4 «Ma ba ni Arɔn ni wu jalaa pu ni Ɲuŋɔ Tacirige Fàya Puga ki tajege ki ɲɔ na, pʼi ba lɔhɔ wuu. 5 Mʼa fàya yi lɔ, mʼa fadegbɔrɔ li le Arɔn na, ni efodi wu wo fadedɔɔngɔ ke, ni efodi we, ni dodoparaga ke. Mʼa efodi wu wo kirige ki taga wu pɔ. 6 Mʼa ɲumiginɛ li migile wu ɲuŋɔ ki na, mʼa sanni tuubɛbɛɛnɛ li pɔ ɲumiginɛ li na. 7 Mʼa sindirimɛ pu lɔ, mʼa pu le wu ɲuŋɔ ki ni, mʼa wu tìre. 8 Mʼa wu jalaa pu yiri, mʼa ba pu bɛ wo fadegbɔgɔɔ ki le pu na. 9 Mʼa kiriye pɔ Arɔn ni wu jalaa pu na. Mʼa ɲumigiŋɛɛ taga pu ɲuyɔ yi migile. Lee teŋɛgana li na ma da ba Arɔn ni wu jalaa pu teŋɛ pu wo labye wu na. Saraya ɲaha shɔɔnrivɛɛrɛ ti na ba bye yaha pu wuuro fo gbee. Wee ɲɛ saliya wemu da ga yìri wɛ.
10 «Mʼa ba ni nupee li ni Ɲuŋɔ Tacirige Fàya Puga ki ɲahagbaa na. Arɔn ni wu jalaa pʼi ba pu keye taha nupee li ɲuŋɔ ni. 11 Mʼa nupee li kɔɔn Tɛhɛnɛ Baa Kilɛ ɲaha tàan Ɲuŋɔ Tacirige Fàya Puga ki tajege ki ɲɔ na. 12 Mʼa nupee li shishan pa lɔ ni kabee ni mʼa pu fara fara saraya tawologo ki yeŋɛɛ ki na, mʼa shishan pusama wo saraya tawologo ki ɲidaa li na. 13 Sìnmɛ pemu pu ma laara ti tɔ ge, mʼa pee bɛɛri lɔ, na fara ɲɛrɛ li na, ni zanlogoo shuun we, ni sìnmɛ pemu pu ma bye zanlogoo ki na ge. Mʼa yi bɛɛri sòrogo saraya tawologo ki na. 14 Ga mʼa nù wu xaara te, ni wu sɛɛgɛ ke, ni wu fure ti sòrogo buguro ti kadugo yìri. Kee ɲɛ jurumu yafa wo saraga.
15 «Lee kadugo na mʼa dubyapoo nizhiimɛ wu co, Arɔn ni wu jalaa pʼi pu keye taha wu ɲuŋɔ ni. 16 Mʼa wu kɔɔn, mʼa wu shishan pu ɲɛrɛgi ɲɛrɛgi saraya tawologo ki kabaya shishɛɛrɛ wu bɛɛri na. 17 Mʼa dubya wu puri, mʼa wu laara te ni wu tɔɔyɔ yi je, mʼa yi taha xaara te ni ɲuŋɔ ki na. 18 Mʼa dubya wu bɛɛri sòrogo saraya tawologo ki na. Kee ɲɛ saraga nizogoŋɔ kemu ya wolo kan Tɛhɛnɛ Baa Kilɛ mu ge. Saraga nizogoŋɔ ki ɲɛ kii, ki nugo na dan Tɛhɛnɛ Baa Kilɛ ni.
19 «Lee kadugo na mʼa dubya shuun wo wu bɛ co, Arɔn ni wu jalaa pʼi pu keye taha wu ɲuŋɔ ki na. 20 Mʼa wu kɔɔn, mʼa wu shishan pa lɔ, mʼa pu fara Arɔn ni wu jalaa pu kanige cɛ ɲuwɛyɛ yi nigevɛŋɛɛ ki na, mʼa pa fara pu kanige keye yi wo kabefunŋmogooa ki na, mʼa pa fara pu kanige tɔɔyɔ yi wo nibefunŋmogoo ki na. Mʼa shishan pusama ɲɛrɛgi ɲɛrɛgi saraya tawologo ki kabanuyo shishɛɛrɛ wu na. 21 Shishan pe pu wa saraya tawologo ki na ge, mʼa pee pa lɔ, ni sindirimɛ pa, mʼa yee ɲɛrɛgi ɲɛrɛgi Arɔn ni wu fàya yi na, mʼa ya ɲɛrɛgi ɲɛrɛgi wu jalaa pee ni pu wo fàya yi bɛ na. Lee yahagana li na Arɔn ni wu fàya ye, ni wu jalaa pee ni pu fàya yi da ba yaha nɛ yahama ni.
22 «Mʼa wee dubyapoo wu wo sìnmɛ pu lɔ, ni wu naŋa keb, ni sìnmɛ pemu pu ma bye laara ti na ge, ni ɲɛrɛ le, ni zanlogoo shuun we, ni sìnmɛ pemu pu ma bye zanlogoo ki na ge, ni kanige cɛ shii le. Wee dubyapoo wu ɲɛ sipya teŋɛ teŋɛ saraga dubya. 23 Shizhɛnhɛrɛ baa buuri daŋa kemu kʼa yereŋɛ Tɛhɛnɛ Baa Kilɛ ɲaha tàan ge, mʼa buuri ɲuŋɔ nigin, ni sìnmɛ buuri ɲuŋɔ nigin, ni tidaŋa nigin wolo kee daŋa ki ni. 24 Mʼa yee yaŋmuyɔ yi bɛɛri le Arɔn ni wu jalaa pu keye ni, mʼa pu pye na pu yi figi figi nɛ Tɛhɛnɛ Baa Kilɛ ɲaha tàan. 25 Lee kadugo na mʼa yee yaŋmuyɔ yi shɔ pu mu, mʼa yi sòrogo saraya tawologo ki ni, saraga nizogoŋɔ ki ɲuŋɔ ni. Saraga ki ɲɛ kii, na ki sòrogo na ni, ki nugo di dan Tɛhɛnɛ Baa Kilɛ ni.
26 «Mʼa Arɔn wo teŋɛ teŋɛ saraga dubyapoo wu wo gbii wu lɔ, mʼa wu figi figi Tɛhɛnɛ Baa Kilɛ ɲaha tàan. Wee gbii wu na ba bye mu wo taa. 27 Lee kadugo na mʼa li shɛ Izirayɛli nagoo pu na na Arɔn ni wu nagoo pu teŋɛ teŋɛ saraga dubya wu gbii wemu wʼa figi figi Tɛhɛnɛ Baa Kilɛ ɲaha tàan ge, ni dubya wu shii lemu pʼa laha, na li yirige Tɛhɛnɛ Baa Kilɛ ɲaha tàan ge, na yee shuun wʼa yaha nɛ Tɛhɛnɛ Baa Kilɛ yahama ni. 28 Lee wuu na Izirayɛli nagoo pu na ba yee kaan gbee Arɔn ni wu jalaa pu mu. Ɲaɲiŋɛ saraya yemu pu da ba wo na gaan nɛ Tɛhɛnɛ Baa Kilɛ mu ge, pu na ba yi luu yee ni.
29 «Arɔn ga ba xhu, pu na wu wo fɛfɛɛrɛ fàya yi kan wu jalaa pu mu. Pu na ba yi le pu tìreduun we ni pu teŋɛduun wu ni saraya ɲaha shɔɔnrivɛɛrɛ ti na. 30 Arɔn ja wemu na ba wu faa saraya ɲaha shɔɔnrivɛɛrɛ ti na ge, wee na ba yi le na ta cabyaa gbarashuun, wu ba jin tuun wemu ni Ɲuŋɔ Tacirige Fàya Puga ki ni di la shɔɔnri fɛfɛɛrɛ xuu wu ni.
31 «Ayiwa, mʼa Arɔn ni wu jalaa pu teŋɛ teŋɛ saraga dubyapoo wu xaara tisara lɔ, mʼa shɛ ti shɔhɔ xuu wa ni wemu ɲɛ fɛfɛɛrɛ xuu ge. 32 Arɔn ni wu jalaa pu na ba dubyapoo wu xaara ti xa, ni daŋa ki wo buuri wu bɛ ni, Ɲuŋɔ Tacirige Fàya Puga ki tajege ki ɲɔ na. 33 Kee saraga ke kʼa pye pu wo jurumu yafa saraga, na pu teŋɛ pu wo labye wu na, na pu yaha nɛ yahama ni ge, pee yɛ pu da ba kee saraga ki wo yaŋmuyɔ yi li. Sipya watii ganha bu li ki ni wɛ, bani fɛfɛɛrɛ yaligee ki ɲɛ kii. 34 Ta bu shɔn tee xaara ti ni kelee wa bu shɔn wee buuri wu ni, yʼi yee sòrogo. Yee ya yaa na li nige wɛ, bani fɛfɛɛrɛ yaligee ki ɲɛ kii.
35 «Tuduro temu nɛ jo ma mu Arɔn ni wu jalaa pu shizhaa na ge, mʼa ti pye cibɛ ba nʼa yi jo ma mu wɛ, mʼa pu deŋɛ wu wo keree ki ɲaha shɔɔnri fo ma ta cabyaa gbarashuun. 36 Kee cabyaa gbarashuun wu funŋɔ ni, caŋa bɛɛri mʼa jurumu yafa wo saraga nupee li wolo. Kee saraga ke ni ma da ba saraya tawologo ki pye fɛɛfɛɛ. Lee kadugo na mʼa sìnmɛ wo wu na, wʼi yaha na yahama ni. 37 Ma na ba jurumu yafa wo saraga ki wolo saraya tawologo ki na fo na shɛ da cabyaa gbarashuun, kɔnhɔ wʼi yaha nɛ yahama ni. Lee funŋɔ ni saraya tawologo ki na ba gemɛ bye fɛɛfɛɛ. Yaaga bɛɛri kʼa kpɔn ki na ge, kee bɛ na bye fɛɛfɛɛ.»
Saraya yemu na ba wo ɲiga bɛɛri ge
38 «Ayiwa, saraya yemu ma da ba wo ɲiga bɛɛri saraya tawologo ki na ge, yee yi wa mɛ: Ɲiga bɛɛri kʼa mugi ge, yee nigin dubyapiye shuun, yee ma da wolo. Kee saraga ke na ba wo gbee. 39 Dubya nigin wa na ba wolo saraga ɲisɔɔgɔ tàan, shuun wo wu na ba wolo yakoŋɔ. 40 Ma ba da ɲisɔɔgɔ wo dubyapige saraga ki wolo, mʼa farini myɛ kiloo taanri tɔnhɔ olivu sìnmɛ litiri nigin ni taaga ni ma taha ki na, mʼa duvɛn litiri nigin ni taaga pye ki saraga niwoŋɔ. 41 Farinimyɛ saraga ni sìnmɛ ni duvɛn saraga niwoŋɔ kemu kʼa fara ɲisɔɔgɔ wo dubya wu na ge, mʼa yee ninuyɔ fara yakoŋɔ ki bɛ wo wu na ma wolo. Saraga nizogoŋɔ ki ɲɛ kii, ki nugo na dan Tɛhɛnɛ Baa Kilɛ ni. 42 Yi ni yi kadugo shi nibama wu bɛɛri na ba kee saraga ke wo gbee, Ɲuŋɔ Tacirige Fàya Puga ki tajege ki ɲɔ na Tɛhɛnɛ Baa Kilɛ ɲaha tàan. Nɛ na ba yi ɲuŋɔ cirini wee xuu wu ni, na yu ni ma ni.»
Tɛhɛnɛ Baa Kilɛ wu ɲɛ Izirayɛli nagoo pu wo Kilɛ we
43 «Wee xuu wu ni nʼa da ba Izirayɛli nagoo pu ɲuŋɔ cirini. Nɛ wo nɔɔrɔ wu na ba wee xuu wu pye fɛɛfɛɛ. 44 Nɛyɛ pyaa na ba Ɲuŋɔ Tacirige Fàya Puga ke ni saraya tawologo ki pye fɛɛfɛɛ. Nɛ na ba Arɔn ni wu jalaa pu bɛ pye fɛɛfɛɛ, kɔnhɔ pu da saraya ɲaha shɔɔnrivɛɛrɛ kapyeŋɛɛ pyi na mu. 45 Nɛ na ba diin Izirayɛli nagoo pu niŋɛ ni, na bye pu Kilɛ. 46 Pu bɛ na ba li cɛ na nɛ wu ɲɛ Tɛhɛnɛ Baa Kilɛ, pu wo Kilɛ we, na nɛ wʼa pu yeege Misira fiige ki ni, kɔnhɔ di ba diin pu niŋɛ ni. Nɛ ɲɛ Tɛhɛnɛ Baa Kilɛ, pu wo Kilɛ we.»