Nudanga wusuna saraya yi tawologo
30
«Ayiwa, yʼi saraya tawologo ka bɛ yàa pʼi ba nudanga yawurire ti sòrogo wà. Yʼi ki yàa ni akasha tiye ni. 2 Ki ɲidaa lʼi bye keŋɛ ɲii nigin, ki kadaa li bɛ di bye keŋɛ ɲii nigin. Ki ɲidaa ni ki kadaa li bɛɛri di bye nigin. Ki ɲuŋɔkana lʼi bye keŋɛ ɲii shuun. Yʼi yeŋɛɛ shishɛɛrɛ yaha ki guzheŋɛɛ ki na, mʼa ki pinnɛ yàa ni kee yeŋɛɛ ki ni. 3 Yʼi sanni nidiimɛ taga ki bɛɛri tɔ, ki fugba we, ni ki kabanuyo ye, ni ki yeŋɛɛ ki bɛ. Yʼi sanni kabara taga ki ɲɔ ki maha círi. 4 Yʼi sanni kaŋmegee shuun shuun le ki kabanuyo shuun wu na ɲɔ kabara li nɔhɔdaan wu ni, kɔnhɔ pu ba da wu lɔ, pʼi pubegee ki le kee kaŋmegee ki ni. 5 Yʼi kee pubegee ki bɛ yàa ni akasha tiye ni, yʼi sanni taga ki wɔɔgɔ. 6 Yʼi kee saraya tawologo ki yereŋɛ ɲahaparaga fàŋa ki ɲahagbaa na, na saha ni kariɲɛɛgɛ ɲɔmɛɛ li keshi wu ɲɔtɔŋɔ ki ni, kee kemu na jurumu yafa wʼa byi ge. Kee fàŋa ki kadugo yíri keshi wu bi bye. Wee xuu wu ni nʼa da ba ma ɲuŋɔ cirini. 7 Kee saraya tawologo ki na Arɔn wʼa da ba nudanga yawurire ti sòrogo ɲisɔɔgɔ bɛɛri, wu ba da jé di sokinnaa pu gbegele tuun wemu ni. 8 Wu da nudanga yawurire ti sòrogo yakoyo yi bɛɛri ni, wu ba da zhɛ sokinna pu le tuun wemu ni. Yi ni yi kadugo shi nibama wu bɛɛri na ba nudanga yawurire sòrogo tuun bɛɛri ni Tɛhɛnɛ Baa Kilɛ ɲaha tàan.9 «Ayiwa, yi ganha ga nudanga yawurire tuugo katii sòrogo kee saraya tawologo ki na wɛ. Yi ganha ga saraga nizogoŋɔ kelee myɛ saraga wolo ki na wɛ. Yi ganha ga saraga niwoŋɔ wolo ki na wɛ. 10 Yee bɛɛri Arɔn na ba jurumu yafa wo yaaŋa ki pye tɔɔɲii nigin pe, saraga tawologo ki yeŋɛɛ ki na. Jurumu yafa saraga kemu pu da ba wolo ge, kee wo shishan ni wʼa da ba kee yaaŋa ki pye. Mu na wa da ba jurumu yafa wo yaaŋa ki pyi tɔɔɲii nigin pe yee li funŋɔ ni yi shi nibama wu bɛɛri niŋɛ ni. Kee saraya tawologo ki na ba gemɛ bye fɛɛfɛɛ, na yaha nɛ wo kapyeŋɛɛ ki kaa na.»
Izirayɛli nagoo pu wo ɲuwuupɛrɛmɛ pe
11 Ayiwa, a Tɛhɛnɛ Baa Kilɛ di nugo Musa pye sanha na: 12 «Ma ba da Izirayɛli nagoo pu tɔrɔ, wa bɛɛri ya yaa na wu ɲuwuupɛrɛmɛ kan Tɛhɛnɛ Baa Kilɛ mu wu tɔrɔduun wu ni. Lee funŋɔ ni, pee tɔrɔmɔ pu da ba bɔɔngɔ ka shishiin nɔ pu na wɛ. 13 Ɲuwuupɛrɛmɛ pu na ba gan kangana lemu na ge, lee li wa mɛ: Sipyii piimu bɛɛri pʼa tɔrɔ ge, wa bɛɛri di warifyɛn sikilia taaga kan, na saha ni fɛfɛɛrɛ xuu wu wo sikili wu tidugumɔ ni. Kee sikili taaga kʼa yaa na pye giramaa gbaara shishiin. Kee sikili taaga ki na ba bye yakanga kemu ya kan Tɛhɛnɛ Baa Kilɛ mu ge. 14 Sipya bɛɛri wʼa tɔrɔ, na co yee kɛlɛɛ shuun (20) na, na duri ge, pee bɛɛri ya yaa na ke yakanga ke kan Tɛhɛnɛ Baa Kilɛ mu. 15 Naafuu fɔɔ wo nigaan ganha bu doro sikili taaga tàan wɛ, funmɔ fɔɔ bɛ ganha bu xhuuŋɔ sikili taaga ki na wɛ. Wa bɛɛri ya yaa na ke sikili taaga ke kan Tɛhɛnɛ Baa Kilɛ mu, kɔnhɔ wu wu munaa ɲuŋɔ wolo. 16 Ma na ba munahaa ki wo ɲuwuupɛrɛmɛ pu shuu Izirayɛli nagoo pu mu, na wu taga na Ɲuŋɔ Tacirige Fàya Puga ki keree shɔɔnri. Lee na, nɛ na ba na funŋɔ tun Izirayɛli nagoo pu na, na pu munahaa ki ɲuŋɔ wo.»
Fɛfɛɛrɛ lɔhɔ ki wo pɛgɛ ki yaagana
17 Ayiwa, a Tɛhɛnɛ Baa Kilɛ di Musa pye na: 18 «Yi pɛgɛ ka yàa ni daɲaa tɔɔrɔ ni, yʼi serege yàa ki na ni daɲaa tɔɔrɔ ni. Yʼi shɛ ki sin Ɲuŋɔ Tacirige Fàya Puga ke, ni saraya yi tawologo ki tɛ wu ni, yʼi lɔhɔ taga ki ɲi.b 19 Arɔn ni wu jalaa pu na ba pu keye ni pu tɔɔyɔ yi jii ni kee lɔhɔ ki ni. 20 Pu ba da jé tuun wemu ni Ɲuŋɔ Tacirige Fàya Puga ki ni, kelee pu ba da vulo saraya tawologo ki na di la shɔɔnri pʼi saraga nizogoŋɔ ka wolo Tɛhɛnɛ Baa Kilɛ mu, pu na ba fɛnhɛ pu keye ni pu tɔɔyɔ yi je kee lɔhɔ ki ni. Lee funŋɔ ni pu da xhuu wɛ. 21 Pu na ba pu keye ye ni pu tɔɔyɔ yi jii mu lee jegana li na, kɔnhɔ pu ganha bu xhu wɛ. Lee na ba bye saliya wemu na gori yaha gbee Arɔn ni wu shi nibama wu mu, pu wo lɛgɛɛ ki bɛɛri ni ge.»
Nudanga sìnmɛ pu yaagana
22 Ayiwa, a Tɛhɛnɛ Baa Kilɛ di nugo Musa pye sanha na: 23 «Nudanga yawurire ti bɛɛri wo nizaara ta kemɛ wá tiyɛ na: Mire lɔhɔ wo kiloo kaguro, ni sinamɔmi nudanga wo kiloo shuun ni taaga, kanɛli nudanga wo kiloo shuun ni taaga, 24 ni kasec kiloo kaguro na saha ni fɛfɛɛrɛ xuu wu wo tidugumɔ pu wo yataanga ki ni, ni olivu sìnmɛ litirilee gbaara. 25 Nudanga sìnmɛ yaavɔɔ wa di yi suri yiyɛ ni, wu yi yàa pye nudanga sìnmɛ fɛfɛɛrɛ wo. Pee fɛfɛɛrɛ sìnmɛ pu na ba yaha na daga na dire wu pyi. 26 Mʼa pee sìnmɛ pu taga Ɲuŋɔ Tacirige Fàya Puga ke, ni kariɲɛɛgɛ ɲɔmɛɛ li keshi wu tìre. 27 Mʼa pu taga tabali we ni wu yagbegeye yi bɛɛri tìre, mʼa pu taga sokinnaa tige ke ni ki yagbegeye yi tìre, mʼa nudanga yawurire ti wo saraya tawologo ki bɛ tìre. 28 Mʼa pu taga saraya nizogoyo yi tawologo ke ni ki yagbegeye yi bɛɛri tìre, na fara pɛgɛ ke ni ki serege ki bɛ na. 29 Mʼa yee yaŋmuyɔ yi bɛɛri pye fɛɛfɛɛ ma yaha na yahama ni, yi na gemɛ bye fɛɛfɛɛ. Yaaga bɛɛri kʼa kpɔn yi na ge, kee na bye fɛfɛɛrɛ yaaga. 30 Mʼa Arɔn ni wu jalaa pu bɛ tìre, mʼa pu yaha na yahama ni na wo kapyeŋɛɛ ki kaa na, pʼi bye saraya ɲaha shɔɔnrivɛɛ.
31 «Lee kadugo na mʼa yi jo Izirayɛli nagoo pu mu na: ‹Pe sìnmɛ pe na ba bye fɛfɛɛrɛ sindirimɛ yi ni yi shi nibama wu mu. Pu na ba yaha Tɛhɛnɛ Baa Kilɛ yɛ wo kapyeŋɛɛ ki kaa na. 32 Sipya wa shishiin ganha ga pu taga wu ceesɛɛgɛ ki tìre wɛ. Pʼa yàa yaagana lemu na ge, sipya wa shishiin ganha ga wu wo sindirimɛ yàa lee yaagana li na wɛ. Fɛfɛɛrɛ wo pu wa pii. Yi pu co fɛfɛɛrɛ comɔ ni. 33 Sipya bɛɛri wʼa pe sìnmɛ pe wo yaagana li tuugo yàa ge, kelee sipya bɛɛri wʼa pe sìnmɛ pe taga sipya watii tìre wemu ɲɛ saraya ɲaha shɔɔnrivɔɔ wɛ ge, weefɔɔ na gɔri yeege wu wo shi shɛɛn pu ni.› »
Fɛfɛɛrɛ yawurire ti wo yaagana
34 Ayiwa, a Tɛhɛnɛ Baa Kilɛ di Musa pye: «Nudanga yawurire ta lɔ wá tiyɛ na: sitate, ni ɔngiled, ni galibanɔmu. Mʼa tee yawurire te wo ɲuŋɔkana ansansie nidiimɛ lɔ. 35 Mʼa ti kan nudanga yawurire yaavɔɔ wa mu, wee di ti suri tiyɛ ni wu pye fɛfɛɛrɛ nudanga yawurire. Wu suumɔ bɛ le ti ni, pʼi ti yaha fɛfɛɛrɛ labye wu kaa na. 36 Mʼa ta su ma pye myɛ, mʼa pee yaha kariɲɛɛgɛ ɲɔmɛɛ li keshi wu ɲahagbaa na, Ɲuŋɔ Tacirige Fàya Puga ki ni, xuu wemu ni nʼa da ba ma ɲuŋɔ cirini ge, wee xuu wu ni. Tee na ba bye yi mu yawurire temu ya kemɛ pye fɛɛfɛɛ ge. 37 Wa shishiin ganha ga tee nudanga yawurire te wo yaagana li tuugo yàa yaha wuyɛ mu wɛ. Yi ti yaha fɛfɛɛrɛ yahama ni nɛ Tɛhɛnɛ Baa Kilɛ mu. 38 Sipya bɛɛri wʼa te yawurire te wo yaagana li tuugo yàa, na daga na wuyɛ wuregi ge, weefɔɔ na gɔri yeege wu wo shi shɛɛn pu ni.»f