Ɛkizode 31

Kacebyii piimu na ba fɛfɛɛrɛ puga ki yàa ge

Ayiwa, a Tɛhɛnɛ Baa Kilɛ di Musa pye: 2 «Li wii, nɛ Xhuri ɲabige Bɛtisalɛli shɔɔnri lɔ, wee wemu wu ɲɛ Uri wo ja na foro Zhuda wo gbawege ki ni ge. 3 Nɛ Bɛtisalɛli ɲi na Munaa li na, na fungɔngɔ fɛɛrɛ ni kaɲahacɛnɛ ni lajɛ kan wu mu, kɔnhɔ wu kapyeŋɛɛ tuuyo yi bɛɛri ɲaha cɛ tapyege ni. 4 Wu na ba kacɛŋɛɛ nivoŋɔɔ yari na yeege ni sanni ni warifyɛn ni daɲaa tɔɔrɔ ni. 5 Wu na ba pɛɛwa kagereye tɛni, na yi sɔɔri yiyɛ ni, na tiye tɛni, na kacɛŋɛɛ tuugo bɛɛri pyi. 6 Nɛ kuri na Ayisamaki ja Oliyabu bɛ kan wu mu na pye wu tɛgɛvɔɔ na foro Dan wu gbawege ki ni. Nɛ fungɔngɔ fɛɛrɛ kan kacebyii pu bɛɛri mu, kɔnhɔ labye wemu bɛɛri na nʼa ma yaha ge, pʼi já wee pye. 7 Pee pʼa da ba Ɲuŋɔ Tacirige Fàya Puga ke, ni kariɲɛɛgɛ ɲɔmɛɛ li keshi we, ni wu ɲɔtɔŋɔ ki yàa, kee kemu na jurumu yafa wʼa byi ge. Pu na ba fàya puga ki labye yɛrɛyɛ yi bɛɛri yàa: 8 Tabali wu ni wu yagbegeye ye, ni sanni nidiimɛ wo sokinnaa tige ke ni ki yagboyo yi bɛɛri, ni nudanga yawurire ti wo saraya tawologo ke, 9 ni saraya nizogoyo tawologo ke ni ki yagbegeye yi bɛɛri, ni pɛgɛ ke ni ki serege ke, 10 ni saraya ɲaha shɔɔnrivɛɛ pu wo labye fàya ye, ni Arɔn wo fɛfɛɛrɛ fàya ye, ni wu jalaa pu wo saraya ɲaha shɔɔnrivɛɛrɛ ti wo fàya ye, 11 ni sindirimɛ pe, ni fɛfɛɛrɛ xuu wu wo nudanga yawurire te. Kodorogoo kiimu bɛɛri nɛ shɛ ma na ge, kacebyii pu na ba ye bɛɛri yàa cibɛ na bɛ ni kee kodorogoo ki ni.»

Cadɛɛngɛ ki wo keree

12 Ayiwa, a Tɛhɛnɛ Baa Kilɛ di Musa pye, 13 na wu yi jo Izirayɛli nagoo pu mu na: «Yee ya yaa na kasɛɛgɛ yaha cadɛɛngɛ ki na, bani kee na ba bye ɲaha shɛshɛɛrɛ nɛ ni yere ni yi shi nibama wu bɛɛri tɛ ni, kɔnhɔ yʼi li cɛ na nɛ Tɛhɛnɛ Baa Kilɛ wʼa yee pyi fɛɛfɛɛ. 14 Lee wuu na yʼa cadɛɛngɛ ki yɛri, bani kʼa yaa na pye fɛfɛɛrɛ caŋa yee mu. Sipya bɛɛri wʼa cadɛɛngɛ ki nɔrɔgɔ ge, weefɔɔ na gbo. Sipya bɛɛri wʼa labye pye cadɛɛngɛ ni ge, weefɔɔ na gɔri yeege wu wo shi shɛɛn pu ni. 15 Yi na ba labye pyi cabyaa gbaara funŋɔ ni, ga caŋa gbarashuun wogo ke, kee ɲɛ cadɛɛngɛ ke, sipya wa shishiin ganha bu labye pye kee caŋa wɛ. Kee caŋa kʼa yaha Tɛhɛnɛ Baa Kilɛ wo yahama ni. Sipya bɛɛri wʼa labye pye kee caŋa ki ge, weefɔɔ na gbo. 16 Izirayɛli nagoo pu na ba cadɛɛngɛ ki wo saliya wu ɲaari. Pu kadugo shi nibama wu bɛɛri na ba wu ɲaari. Lee na ba bye pu mu kariɲɛɛgɛ ɲɔmɛɛ nixhɔbaana. 17 Cadɛɛngɛ ki na ba bye ɲaha shɛshɛɛrɛ temu na gori yaha gbee nɛ ni yee tɛ ni ge, bani cabyaa gbaara funŋɔ ni nɛ Tɛhɛnɛ Baa Kilɛ ya fugba ni ɲiŋɛ yàa. Ga a nɛ labye wu yereŋɛ caŋa gbarashuun wogo ki na, na ŋmɔ.»

18 Ba Tɛhɛnɛ Baa Kilɛ ya jo xɔ ni Musa ni Sinayi faaboboŋɔ ki na wɛ, na sɛɛri kɔɔgɔɔ shuun wu kan wu mu. Kilɛ yɛ pyaa kabee li bi wee saliya wu ka faaya kɔɔgɔɔ shuun wu na.