Sanni nupige ke
32
Sipyiire ti bɛɛri ya pa Musa ta wʼa mɔ wu da ga digi na yìri faaboboŋɔ ki na wɛ ge, a pʼi shɛ puyɛ pinnɛ Arɔn tàan na jo: «Yìri mʼa pɛɛŋɛ yaŋmuŋɔ ka yàa wù mu, kee di wù ɲaha co, bani we Musa we, ná wemu wʼa wèe yeege Misira fiige ki ni ge, lemu lʼa wu ta ge wèe ya lee cɛ wɛ.»* 2 A Arɔn di pu pye: «Sanni wemu wu wa yi cèe ni yi jalaa ni yi pushaa pu niye yi ni ge, yi wee wolo pu niye yi ni yi pa na kan.» 3 A sipyii pu bɛɛri di pu sanni wu wolo pu niye yi ni, na shɛ ni wu ni Arɔn mu. 4 A wu wee sanni wu shɔ, na tee tɔɔrɔ ti ɲa, na ti yàa ba nupepinŋɛ ɲɛ wɛ. A pʼi jo: «Izirayɛli, kilɛ wemu wʼa mu yeege Misira fiige ki ni ge, wee wu ɲɛ we.»* 5 Ba Arɔn ya lee ɲa wɛ, na saraga tawologo ka yàa nupige ki ɲahagbaa na, na mujugbɔɔ wá na: «Ɲiga na ba bye wù Tɛhɛnɛ Baa Kilɛ wu wo kalenɛ li caŋa ke.» 6 Ba ɲiga kʼa pa mugi wɛ, a sipyiire tʼi soo yìri na saraya nizogoyo yi wolo, na ba ni ɲaɲiŋɛ saraya bɛ ni. Lee kadugo na, a sipyiire ti bɛɛri di diin na li, na gba. A pʼi xhɔ, na shɔ to xɔnhɔrɔa na na byi.* 7 Wee tuun wu ni a Tɛhɛnɛ Baa Kilɛ di Musa pye: «Tigi shɛ, bani ma sipyii pee, mʼa piimu yeege Misira fiige ki ni ge, pʼa puyɛ nahana. 8 Nɛ koo lemu kaa jo na waha pu mu ge, pʼa wɛri fiin foro lee tàan. Sanni tɔɔrɔ pʼa ɲa, na tee yàa na pye nupepinŋɛ, na sogolo kee fɛɛ ni, na kee pɛlɛ, na saraya wolo kan ki mu, na jo: ‹Izirayɛli, kilɛ wemu wʼa mu yeege Misira fiige ki ni ge, wee wu ɲɛ we.› »9 A Tɛhɛnɛ baa Kilɛ di nugo Musa pye: «Nɛ li ɲa jo we shi we nige kʼa waha. 10 Na yaha nayɛ na nimɛ. Nʼa da luu yirige pu tàan, di pu bɛɛri kyɛɛgi, di ba shi nigbɔ yeege ma ni.»
Musa ya jo na Kilɛ wu susuro ta Izirayɛli nagoo pu na
11 Ga a Musa di wu Kilɛ wu kemɛ ɲɛɛri, Tɛhɛnɛ Baa Kilɛ we, na jo: «Ɲaha na ma di da luu yirige ma sipyii pu tàan wɛ, pee piimu mu ya yeege Misira fiige ki ni ni sefɛɛrɛ nigbɔɔrɔ ni fanha nigbɔhɔ ni ge? 12 Ma bu lee pye, Misira shɛɛn pu na jo na: ‹Pu ganha kaa na Tɛhɛnɛ Baa Kilɛ ya Izirayɛli nagoo pu yeege wèe fiige ki ni. Wu funŋɔ ki bye wu shɛ pu gbo faaya yi ni, wu pu shi wu xɔ laha ɲiŋɛ ki na.› Tɛhɛnɛ Baa Kilɛ, ma luu li sinniŋɛ. Kakuunɔ lemu mʼa bi giin di bye ma sipyii pu na ge, kuri kadugo, mʼa lee bye ɲɔ yaha. 13 Ma funŋɔ yaha nidogo ni ma kapyebyii pu na: Ibirayima, ni Ishaaga, ni Izirayɛli. Mu ya kaa mayɛ pyaa mɛgɛ ki na, na ɲɔmɛɛ lɔ pu mu na: ‹Nɛ na ba yee shi nibama wu ɲɛhɛ ba fugba wɔrɔɔ ki ɲɛ wɛ. Fiige kemu ɲɔmɛɛ nɛ lɔ pu mu ge, nɛ na ba ki kan pu mu kʼa bye yaha gbee pu wogo.› »* 14 Ayiwa, Tɛhɛnɛ Baa Kilɛ bi giin wu kanhama pemu shan wu sipyii pu ɲuŋɔ ni ge, a wu guri kadugo na lee fiin.*
15 A Musa di ŋmahana ɲɛri, na digi faaboboŋɔ ki na. Sɛɛri faaya kɔɔgɔɔ shuun wemu wu bi bye wu keŋɛ ni ge, kee kɔɔgɔɔ ki wo ɲahaya shuun wu bɛɛri wu bi bye kama. 16 Kilɛ yɛ pyaa kʼa bi kee faaya kɔɔgɔɔ ki yàa, kama pu bɛ di ɲɛ Kilɛ wo keŋɛ fɛ.
17 Ayiwa, ba Zhozuwe ya pa sipyiire ti mujoŋɔɔ logo wɛ, na Musa pye na: «Yogo mujoŋɔɔ kʼa foro buguro ti na.» 18 A Musa di wu pye: «Kii wa setaara mujoŋɔɔ wɛ, kʼi wa se tabaara bɛ wogoo wɛ, ciire mujoŋɔɔ nɛ nuri.»
19 Ba Musa ya pa dɛɛŋɛ buguro ti na, na nupepinŋɛ ki jaa we ni xɔnhɔ-xɔnhɔlɔɔ pu ɲa wɛ, a Musa luu di sii yìri fo xuuni, a wu faaya kɔɔgɔɔ ki shan ja ɲiŋɛ ki na faaboboŋɔ ki fɛɛ ni. 20 Nupepinŋɛ kemu pʼa bi yàa ge, a Musa di kee lɔ, na ki sòrogo na pye shɔɔnrɔ, na tee ɲɛrɛgi lɔhɔ ka ni, na Izirayɛli nagoo pu pye pʼa gba kee ni. 21 Lee kadugo na, a Musa di Arɔn pye: «Pii sipyii pii da lekɛ bɛɛri pye mu na fo mu ya pu pye pʼa le kakuudiinɛ le pye wɛ?» 22 A Arɔn di jo: «Na kafɔɔ, nʼa ma ɲɛɛri, ma ganha bu luu yirige wɛ. Muyɛ pyaa ya pii sipyii pii cɛ kakuuŋɔɔ na dan pu ni. 23 Pʼa nɛ pye na nɛ wu pɛɛŋɛ yaŋmuŋɔ ka yàa pee mu, na kee di pee ɲaha co, na bani mu Musa wemu wʼa pee yeege Misira fiige ki ni ge, na lemu lʼa ma ta ge, na pee ya lee cɛ wɛ. 24 A nɛ pu pye jo sanni ɲɛ sipya wemu bɛɛri mu ge, wufɔɔ wu wu wolo. A pu wee sanni wu wolo wolo kan nɛ mu, a nɛ wu wá na ki ni, a ke nupepinŋɛ ke jaa we di foro ki ni.»
Namaa kabɔfoŋɔɔ taanri ya xu Izirayɛli nagoo pu ni
25 Ayiwa, a Musa di li ɲa na Arɔn ya sipyiire ti yaha tiyɛ mu, a tʼi ti ɲidaan pye. A lee di bye kaɲuŋɔ pu pɛɛn na zhɛhɛni pu na. 26 A Musa di shɛ yere buguro ti tajege ki ɲɔ na, na jo: «Piimu bɛɛri pu wa Tɛhɛnɛ Baa Kilɛ fɛni ge, pee pu pa naha na mu.» A Levi wo gbawege ki namaa pu bɛɛri di fulo wu na. 27 A wu pu pye: «Yemu Tɛhɛnɛ Baa Kilɛ, Izirayɛli wo Kilɛ wʼa jo ge, yee yi wa mɛ: ‹Yi bɛɛri pu yi ŋmɔparaa ki su su yiyɛ na, yʼi buguro ti bɛɛri sahab, kuɲɔgɔɔ kuɲɔgɔɔ, yʼi yi cebooloo ni yi naɲiinɛɛ ni yi tiinɲii pu gbo gbo.› » 28 A Levi wo gbawege ki namaa pʼi li pye ba Musa ya yi jo wɛ. A sipyii kabɔfoŋɔɔ taanri (3.000) shishiin di xhu sipyiire ti ni kee caŋa. 29 A Musa di Levi wo gbawege ki namaa pu pye: «Tɛhɛnɛ Baa Kilɛ yahama ni yee ya yiyɛ yaha niɲaa, wu labye wu kaa na, bani yee ya ta yiyɛ kaala ali yiyɛ pyaa wo jalaa, kelee yi ceboonamaa pu wo gbo wu na wɛ. Tɛhɛnɛ Baa Kilɛ wu baraga le yi ni niɲaa.»
Musa susurodagana shuun wuu Izirayɛli nagoo pu shizhaa na
30 Ayiwa, ɲimuguro ti na a Musa di sipyiire ti pye: «Jurumu nigbɔ yee ya pye. Nʼa da ba guri dugi faaboboŋɔ ki na Tɛhɛnɛ Baa Kilɛ yíri, di shɛ wu ɲɛɛri, la wa la ni wu na yi jurumu wu yafa yi mu.» 31 Ayiwa, a Musa di guri kari Tɛhɛnɛ Baa Kilɛ yíri na shɛ wu pye: «Ee, Kafɔɔ, sipyiire tʼa jurumu nigbɔ pye dɛ! Sanni nupige pʼa yàa na pye kilɛ. 32 Ga lee bɛ na, nʼa ma ɲɛɛri jo ma da bi sɔɔ na yafa pu mu… lee bye lʼi ya pye wɛ, nʼa ma ɲɛɛri jo ma na wo mɛgɛ ki jɔgɔ laha ma wo sɛmɛ wu ni, mʼa wemu ka ge.»*
33 A Tɛhɛnɛ Baa Kilɛ di Musa pye: «Sipyii piimu pʼa jurumu pye nɛ na ge, pee wo mɛyɛ nʼa da jɔgɔ laha na sɛmɛ wu ni. 34 Ayiwa nimɛ, ta se. Xuu wemu nʼa shɛ ma na ge, mʼa te sipyiire te ɲaha co mʼa se wà. Li wii, nɛ wo mɛlɛkɛ wu na ba doro ma ɲaha na. Ga nɛ na ga ba foro pu na caŋa ka, na pu jurumu wu foo tɔ pu mu.»
35 A Tɛhɛnɛ Baa Kilɛ di sipyiire ti kpɔn, bani pʼa bi Arɔn pye wʼa nupepinŋɛ jaa yàa.