Tɛhɛnɛ Baa Kilɛ bi giin wu ganha binnɛ ni Izirayɛli nagoo pu ni wɛ
33
Ayiwa, a Tɛhɛnɛ Baa Kilɛ di Musa pye: «Pii sipyii pii mʼa yeege Misira fiige ki ni ge, ma ni pu ni, yi yìri laha naha. Nɛ kàa jo nɛ na ba fiige kemu kan Ibirayima ni Ishaaga ni Yakuba yɛ wo kadugo shi nibama wu mu ge, yʼi da se kee fiige ki ni.* 2 Nɛ na ba na mɛlɛkɛ wa tun ma ɲaha na. Nɛ na ba shɛ Kana shɛɛn ni Amɔri shi shɛɛn ni Xhɛti shi shɛɛn ni Ferɛzi shi shɛɛn ni Xhɛvi shi shɛɛn ni Zhebusi shɛɛn pu kɔri laha wà. 3 Yʼa se yi shɛ diin kee fiige ki ni, kee kemu kʼa ɲi nujirimɛ ni sɛrɛ na fo yi na fúu ge. Ga nʼa da ba binnɛ da se ni yi ni wɛ, kɔnhɔ di ganha ba shɛ yi kyɛɛgi koo li na wɛ, bani yee ɲuwegee kʼa waha.»4 Ayiwa, ba sipyiire tʼa pee jomɔ niwa pu logo wɛ, a pu ɲahaya di danha. Sipya wa shishiin ya sɔɔ na wu yalere le wuyɛ na wɛ. 5 A Tɛhɛnɛ Baa Kilɛ di Musa pye na wu yi jo Izirayɛli nagoo pu mu na: «Yee ɲuwegee kʼa waha, nɛ bu binnɛ na gaaŋi ni yee ni, ali jɛɛrɛ yɛ bɛ funŋɔ ni, nɛ na yee kyɛɛgi. Lee wuu na do, yi yi yalere ti wolo nimɛ, nɛ na ba lemu pye yi na ge, di lee cɛ.» 6 Lee funŋɔ ni a Izirayɛli nagoo pʼi laraga kɔn Orɛbu faaboboŋɔ ki na, na pu yalere ti wolo.
Ɲuŋɔ Tacirige Fàya Puga ke
7 Ayiwa, a Musa di fàya puga ki lɔ, na shɛ ki sin laraga ni buguro ti kadugo yíri. A wu ki mɛgɛ le na Ɲuŋɔ Tacirige Fàya Puga. Sipya bɛɛri wʼa giin wu Tɛhɛnɛ Baa Kilɛ ɲidaan cɛ kaa la shizhaa na ge, wufɔɔ na shɛ Ɲuŋɔ Tacirige Fàya Puga ki ni, buguro ti kadugo yíri. 8 Musa ba gaaŋi Ɲuŋɔ Tacirige Fàya Puga ki ni, sipyiire ti bɛɛri na foro foro yere pu fàya piyɛyɛ yi ɲɔ na, na Musa wii fo na shɛ wu pye wʼa jé Ɲuŋɔ Tacirige Fàya Puga ki ni. 9 Ba wʼa jé Ɲuŋɔ Tacirige Fàya Puga ki ni wɛ, ɲahaŋa ki na digi na pa yere Ɲuŋɔ Tacirige Fàya Puga ki tajege ki ɲɔ na, Tɛhɛnɛ Baa Kilɛ na ganha na yu ni Musa ni. 10 Ba Izirayɛli nagoo pʼa ɲahaŋa ki ɲa Ɲuŋɔ Tacirige Fàya Puga ki tajege ki ɲɔ na wɛ, pu bɛɛri na nuguro sin sin pu wo fàya piyɛyɛ yi ɲɔ na, na Tɛhɛnɛ Baa Kilɛ pɛlɛ. 11 Tɛhɛnɛ Baa Kilɛ bi ma yu ni Musa ni ɲɔ ni ɲɔ, ba sipya ni wu naɲii ma yu mɛ wɛ. Pu bu jo xɔ, Musa ma guri pa buguro ti na, ga wu kapyebye Zhozuwe, wee wemu wu ɲɛ lɛvɔɔ ge, Nuni wo ja we, wee na gori yaha Ɲuŋɔ Tacirige Fàya Puga ki ni.
Musa ya Tɛhɛnɛ Baa Kilɛ ɲɛɛri na wu pinnɛ ni pee ni
12 Ayiwa, a Musa di Tɛhɛnɛ Baa Kilɛ pye: «Li wii, mu ya nɛ pye na nɛ wʼa se ni pii sipyii pii ni, ga wemu mu da ba binnɛ ni nɛ ni ge, mu ya ta wee shɛ nɛ na wɛ, na ta mu dʼa jo na muyɛ pyaa kʼa nɛ shɔɔnri lɔ, na nɛ niimɛ ta ma ɲaha tàan. 13 Ayiwa nʼa ma ɲɛɛri, nɛ bu da nɛ niimɛ ta ma ɲaha tàan, le li wa ma funŋɔ ni ge, lee shɛ na na, kɔnhɔ di ma cɛ, di niimɛ bɛ ta ma ɲaha tàan. Mʼa we shi we bɛ jate ma wo sipyii.» 14 A Tɛhɛnɛ Baa Kilɛ di jo: «Nɛyɛ pyaa kʼa da ba binnɛ ni ma ni, na ŋmɔnɔ kan ma mu.» 15 A Musa di jo: «Ma bu da mayɛ pyaa da ba binnɛ ni wù ni wɛ, ma ganha bu wù pye wù yìri naha wɛ. 16 Mu bye mu di ya pinnɛ ni wèe ni wɛ, lʼa jɛ dii na nɛ ni ma sipyii pʼa niimɛ ta mu ɲaha tàan wɛ? Fo mu bu binnɛ ni wèe ni, lee shiin li da ba wèe pye wùyɛ mɛgɛ sipyii nɛ ni ma shi wu ni, na foro ɲiŋɛ ki shi wusama bɛɛri tɛ ni.»
17 Ayiwa, a Tɛhɛnɛ Baa Kilɛ di Musa pye: «Lemu mʼa ɲɛɛri na mu ge, nʼa da ba lee pye ma mu, bani nɛyɛ pyaa kʼa mu shɔɔnri lɔ, mʼa niimɛ ta na ɲaha tàan.» 18 A Musa di Tɛhɛnɛ Baa Kilɛ pye: «Nʼa ma ɲɛɛri, ma nɔɔrɔ wu shɛ na na.» 19 A Tɛhɛnɛ Baa Kilɛ di jo: «Nʼa da ba doro ma ɲaha tàan di na saama pu bɛɛri shɛ ma na, di na mɛgɛ ki bɛ yiri ma ɲii na, kee kemu ki ɲɛ Tɛhɛnɛ Baa Kilɛ wu ge. Nɛ bu jo nɛ di niimɛ pye sipya wemu mu, nɛ ma wu pye ma mu. Nɛ bu jo nɛ ɲuŋɔ ɲaari sipya wemu na, nɛ ma ɲuŋɔ ɲaari wufɔɔ na.* 20 Ga ma kunni wa da já na ɲaha ki ɲa wɛ, bani sipya wa shishiin wʼa da ga nɛ ɲaha ɲa, wu shi pye wɛ.» 21 A Tɛhɛnɛ Baa Kilɛ di nugo jo sanha na: Xuu wa we na tàan, ma na ba yere ke faaga ke na. 22 Nɛ wo nɔɔrɔ wu ba doroo tuun wemu ni, nɛ na ma ŋmɔhɔ faaga wege ki ni, di na keŋɛ taga ma tɔ fo di ba shɛ doro xɔ tuun wemu ni. 23 Lee kadugo na di na keŋɛ ki laha ma na. Ma na ba na kadulewo ɲa, ga na ɲaha ke kunni wa da já ɲa wɛ.