Musa ya kuri dugi sanha faaboboŋɔ ki na ni faaya kɔɔgɔɔ shuun watii bɛ ni
34
A Tɛhɛnɛ Baa Kilɛ di Musa pye: «Faaya kɔɔgɔɔ shuun wa tɛ ba nizhiigee ki ɲɛ wɛ. Kɔɔgɔɔ shuun wemu mʼa kɛgi ge, jomɔ pemu pu bye kee na ge, di ba pee ka ki na. 2 Mayɛ gbegele yani ɲiga ki mugi ge. Ɲiga ki ba mugi mʼa dugi Sinayi faaboboŋɔ ki na, mʼa ba yere na ɲaha tàan faaboboŋɔ ki ɲidii li ni. 3 Sipya wa shishiin ganha bu dugi ni ma ni wɛ. Sipya wa shishiin ganha bu ɲa bɛ faaga ki niboŋɔ bɛɛri na wɛ. Ali dubya kelee nù, wee wa shishiin ganha bu naha faaboboŋɔ ki fɛɛ ni wɛ.»4 A Musa di faaya kɔɔgɔɔ shuun wu tɛ ba nizhiigee ki ɲɛ wɛ. A Musa di ba soo yìri na dugi Sinayi faaboboŋɔ ki na, ba Tɛhɛnɛ Baa Kilɛ bi yi jo jogana lemu na wɛ. Kee kɔɔgɔɔ shuun wu bye wu keŋɛ ni.
5 A Tɛhɛnɛ Baa Kilɛ di digi ɲahaŋa ki ni, na ba yere Musa tàan, na wuyɛ mɛgɛ yiri na: «Tɛhɛnɛ Baa Kilɛ». 6 A Tɛhɛnɛ Baa Kilɛ di doro wu ɲahagbaa na, na mujugbɔɔ wá na: «Tɛhɛnɛ Baa Kilɛ we, Tɛhɛnɛ Baa Kilɛ we, ɲiɲaara fɔɔ we, saama fɔɔ Kilɛ. Wu luu yirimɛ ya tàan wɛ. Wu taanɲɛɛgɛ ni wu ɲɔmɛɛ fɛɛrɛ tʼa pɛlɛ.* 7 Wʼa wu taanɲɛɛgɛ ki pyi lɛgɛɛ kabɔfoŋɔɔ niɲɛhɛŋɛɛ mu. Wʼa tiibaara ni gazhiire ni jurumu yafa kaan. Wu ya kaɲii kaan jaagi fɔɔ mu wɛ. Wʼa tii pu wo tiibaara kakuuŋɔɔ fɔhɔɔ tɔni pu nagoo ni pu ɲabiye na, fo na shɛ nɔ pu sii taanri wuu ni pu sii shishɛɛrɛ wu na.»
8 Wee xuu wu bɛɛri ni a Musa di nuguro sin na Kilɛ pɛlɛ. 9 A wu jo: «Na Kafɔɔ, nɛ bu da nɛ niimɛ ta ma ɲaha tàan, nʼa ma ɲɛɛri jo ma pye ni wù ni, bani pii sipyii pii niwegee kʼa waha. Wù tiibaara ni wù jurumu wu yafa wù mu. Ma wù pye ma wuu.»
Kilɛ ya kariɲɛɛgɛ ɲɔmɛɛ li lɔvonɔ lɔ
(Ɛkizode 23:14-19 ; Dutɛrɛnɔmɛ 7:1-5 ; 16:1-17)
10 A Tɛhɛnɛ Baa Kilɛ di jo: «Li wii, nʼa ɲɔmɛɛ lɔ ma mu. Nʼa da kakanhaŋaa pye ma shi shɛɛn pu bɛɛri ɲii na, kakanhaŋaa kiimu ɲɔhɔ sanha bye ɲa shi wa shishiin niŋɛ ni ɲiŋɛ ke kabaŋa ka shishiin na wɛ. Shi wemu bɛɛri wʼa ma kuuri ge, wee bɛɛri na ba Tɛhɛnɛ Baa Kilɛ wo kapyegee ki ɲa, nɛ na ba kakanhaŋaa kiimu pye ma keŋɛ ni ge. 11 Ɲɔmɛhɛɛ kiimu nʼa da ba jo ma mu niɲaa ge, mʼa kee koo ɲaari. Li wii, nʼa da ba Amɔri shi shɛɛn, ni Kana shɛɛn, ni Xhɛti shi shɛɛn, ni Ferɛzi shi shɛɛn, ni Xhɛvi shi shɛɛn, ni Zhebusi shɛɛn pu kɔri di laha ma ɲahagbaa na. 12 Yi kasɛɛgɛ yaha yiyɛ na, fiige kemu ni yʼa da ba shɛ jé ge, yi ganha bu kariɲɛɛgɛ leŋɛ ni kee fiige ki wo sipyii pu ni wɛ, kɔnhɔ pu ganha ba bye yi co co tifuuyo wɛ. 13 Yi pu saraya tawoloyo yi bɛɛri ja ja, yʼi pu benɛɛ pu ja ja, yʼi pu yapɛrɛzhɔ Asera wo tiin ki bɛɛri kɔn kɔn.* 14 Ma ganha ga nuguro sin pɛɛŋɛ yaaga katii fɛɛ ni wɛ, bani Tɛhɛnɛ Baa Kilɛ mɛgɛ ki ɲɛ ‹Naŋmege›a: Naŋmege Kilɛ wu ɲɛ wii.
15 «Lee wuu na yi ganha bu da kariɲɛɛgɛ ɲɔmɛɛ lɔ ni ke fiige ke wo sipyii pu ni wɛ, bani pu ba dɔdɔɔrɔ pyi ni pu wo pɛɛŋɛ yaŋmuyɔ yi ni tuun wemu ni, na saraya wo yi mu, pu na yi bɛ yiri, yi ma shɛ li yee saraya yi ni. 16 Lee bɛ kadugo na, yi na da pu pushaa shaa na gaan yi jalaa mu pu cɛɛ. Na pee pushaa pu yaha dɔdɔɔrɔ na ni pu wo pɛɛŋɛ yaŋmuyɔ yi ni, pu na ba yi jalaa pu bɛ tɔɔgɔ le lee ni.
17 «Yi ganha ga tɔɔrɔ ɲa di bye pɛɛŋɛ yaaga wɛ.*
18 «Yʼi da shizhɛnhɛrɛ baa buuri kalenɛ li pyi. Abibu yeŋɛ ki ba yere, yi na ba shizhɛnhɛrɛ baa buuri wu li na ta cabyaa gbarashuun, wu liduun wu ni, ba nɛ yi jo yi mu wɛ. Bani kee yeŋɛ ki ni yʼa foro Misira fiige ki ni.*
19 «Pushiilee pu bɛɛri na ba bye nɛ wuu, ali yi yapɔrɔyɔ yi wo bee nizhiilee pu bɛ, niiyɛ yi fara yapɔrɔbya wu na.* 20 Yi na ba yi kafabiye bee nizhiilee pu bɛɛri ɲuyɔ wo ni dubyapiye kelee sikapiye ni. Yi bu bye yi ya kafabige kemu ɲuŋɔ wolo wɛ, yʼi kee katige kɛgi. Yi na ba yi wo jalaa nizhiilee pu bɛɛri ɲuyɔ wo. Yi ganha ba ma na mu na wo pɛɛŋɛ puga ki ni ni kewaya ni wɛ.*
21 «Yi na ba labye pyi cabyaa gbaara funŋɔ ni, ga caŋa gbarashuun wogo ki na yi na ŋmɔ, ali li mɛhɛ bye tasusuu, kelee yalɔɔrɔ tuun, yʼa da ŋmɔ.*
22 «Yi ba yi alikama wu wo yalɔɔrɔ ti ɲɔ kɔn tuun wemu ni, yʼi cewuu ki wo kalenɛb li pye. Ɲiŋmɔhɔ ki ba ga, yʼi yalɔɔrɔ ti bɛ wo kalenɛ li pye.* 23 Izirayɛli nagoo pu ni, namaa pu bɛɛri na ba yere nɛ Tɛhɛnɛ Baa Kilɛ ɲaha tàan tɔɔɲii taanri yee funŋɔ ni, Izirayɛli wo Kilɛ we. 24 Nɛ na ba shi wusama kɔri laha yi ɲahagbaa na, di la fara yi fiige ki tɛhɛŋɛɛ ki na. Sipya wa shishiin wa da ɲii yeege yi fiige ki fɛni, na yi yaha yi na ma na yeree nɛ Tɛhɛnɛ Baa Kilɛ, yi Kilɛ wu ɲaha tàan tɔɔɲii taanri yee funŋɔ ni wɛ.
25 «Yi ba da saraga wolo na mu, yi ganha bu ki shishan pu pinnɛ wolo ni shizhɛnhɛrɛ buuri ni wɛ. Ɲuwuuro Kalenɛ li wo saraga yatɔɔgɔ ki wo xaara ti bɛ ganha bu shɔn wɛ.*
26 «Yʼa ma ni yi faa yapyiire nizhiire ti ni Tɛhɛnɛ Baa Kilɛ, yi Kilɛ wu wo pɛɛŋɛ puga ki ni. Yi ganha ga sikapige shɔhɔ ki nu jirimɛ ni wɛ.»*
27 Ayiwa, a Tɛhɛnɛ Baa Kilɛ di Musa pye: «Pe jomɔ pe ka, bani nɛ kariɲɛɛgɛ ɲɔmɛɛ lɔ ma ni Izirayɛli nagoo pu mu na saha ni pee jomɔ pu ni.»
28 Ayiwa, a Musa di caya kɛlɛɛ shishɛɛrɛ (40) ni piiye kɛlɛɛ shishɛɛrɛ (40) pye Tɛhɛnɛ Baa Kilɛ yíri wà. Wu ya yalige li wɛ, wʼi ya lɔhɔ gba wɛ. A Kilɛ di kariɲɛɛgɛ ɲɔmɛɛ li wo saliya wu ka kɔɔgɔɔ ki na, wee ɲɛ ɲɔmɛjogoo kɛ we.
Musa ɲaha kʼa ɲi
29 A Musa di digi Sinayi faaboboŋɔ ki na ni kariɲɛɛgɛ ɲɔmɛɛ li saliya wu kɔɔgɔɔ shuun wu ni wu keŋɛ ni. Tɛhɛnɛ Baa Kilɛ ya jo ni Musa ni ge, a wu ɲaha kʼi ɲɛri na ɲí, ga Musa di bi ta lee cɛ wɛ.* 30 Ba Arɔn ni Izirayɛli nagoo pu bɛɛri ya Musa ɲaha ki ɲa ki na ɲí wɛ, a pʼi fya di vulo wu na.
31 A Musa di pu yiri, a Arɔn ni sipyiire ti ɲahagbaa fɛɛ pu bɛɛri di guri pa wu yíri. A Musa di jo ni pu ni. 32 Lee kadugo na, a Izirayɛli nagoo pusamaa bɛɛri di fulo. Tɛhɛnɛ Baa Kilɛ bi tuduro temu bɛɛri jo Musa mu Sinayi faaboboŋɔ ki na ge, a wu kee bɛɛri paari pu mu. 33 Ba Musa ya jo xɔ wɛ, na fàŋa ka tɔ wu ɲaha ki na. 34 Na co wee tuun wu na Musa ba da zhɛ yere Tɛhɛnɛ Baa Kilɛ ɲaha tàan tuun bɛɛri ni wu jo ni wu ni, wʼa fàŋa ki laha wu ɲaha ki na fo wu ba shɛ laha wu tàan. Ba wʼa yìri Tɛhɛnɛ Baa Kilɛ yíri na pa wɛ, ye wʼa jo wu mu ge, wʼa ba yee jo Izirayɛli nagoo pu mu. 35 Izirayɛli nagoo pu bu Musa ɲaha ki wii, pʼa ki ta ki na ɲí. Wee tuun wu ni Musa na fàŋa ki taga ɲaha ki tɔ sanha fo wu ba gaaŋi di zhɛ jo ni Kilɛ ni tuun wemu ni, wʼa na ki mugi.