KILƐ ƝUŊƆ TACIRIGE FÀYA PUGA KI YAA WE, NI KI ZIN WE
Cadɛɛngɛ ki keree
35
Ayiwa, a Musa di Izirayɛli nagoo pu bɛɛri yiri pinnɛ na pu pye: «Tɛhɛnɛ Baa Kilɛ ya ɲɔmɛhɛɛ kiimu jo na yee pʼa ki koo ɲaari ge, kee ki wa mɛ: 2 ‹Yʼa yaa na labye pyi cabyaa gbaara funŋɔ ni, ga caŋa gbarashuun wogo ke, kee ya yaa na pye fɛfɛɛrɛ caŋa yi mu, cadɛɛngɛ ki ɲɛ kii kemu kʼa yaha Tɛhɛnɛ Baa Kilɛ yahama ni ge. Sipya bɛɛri wʼa labye pye kee caŋa ki na ge, weefɔɔ na gbo.* 3 Yi ganha bu na gbɛri puga ka shishiin ni cadɛɛngɛ ki caŋa wɛ.› »Izirayɛli nagoo pu wo yakanya Tɛhɛnɛ Baa Kilɛ mu
4 Ayiwa a Musa di jo ni Izirayɛli nagoo pu pinnɛgɛ ki bɛɛri ni na pu pye na Tɛhɛnɛ Baa Kilɛ ya tuduro temu jo kan ge, na tee ti wa mɛ na: 5 «Yi bɛɛri pu ya wolo yi keŋɛ yaŋmuyɔ yi ni yi kan Tɛhɛnɛ Baa Kilɛ mu. Sipya wemu bɛɛri wʼa da wee gan we pye ni funvahaŋa ni ge, wufɔɔ wu pa ni wu keŋɛ yaaga ni wu pa gan Tɛhɛnɛ Baa Kilɛ mu: sanni ni warifyɛn ni daɲaa, 6 ni bula ɲaha lize, ni lomasa lize, ni lizeɲɛ, ni lɛn lize, ni sika shiire, 7 ni dubyapee sɛɛyɛ pʼa yemu ɲaaŋa ge, ni sɛɛgboyo ya yemu yʼa panhaŋaa ge, ni akasha tinnɛ, 8 ni sokinnaa sìnmɛ, ni sindirimɛ ni nudanga yawurire ti wo yàa yàa nudanga yaara te, 9 ni onikisi faakagereye ni pɛɛwa faakagereye yatii bɛ yemu na ba le efodi we ni dodoparaga ki na ge.»
Fàya puga ki wo kacɛbyii pee
10 Ayiwa, a Musa di jo: «Piimu bɛɛri pu wa yi ni kacɛŋɛɛ cɛvɛɛ ge, pee bɛɛri pu pa, kɔnhɔ Tɛhɛnɛ Baa Kilɛ ya yaŋmuyɔ yemu kaa jo ge, pu ba yee bɛɛri yàa. 11 Yee ɲɛ: Ɲuŋɔ Tacirige Fàya Puga ke ni ki fatɔyɔ ye ni ki sɛɛyɛ fatɔyɔ ye, ni yi coco-gbaragaa kee, ni ki kɔɔjaya ye, ni ki tinbaraa ni ki tinyeeŋɛɛ, ni ki ɲidahaa, 12 ni kariɲɛɛgɛ ɲɔmɛɛ li keshi wu ni wu lɔlɔbegee kee, ni wu ɲɔtɔŋɔ ke, kee kemu na jurumu yafa wʼa byi ge, ni ɲahaparaga fàŋa ke, 13 ni tabali wu ni wu lɔlɔbegee, ni wu yagbegeye yi bɛɛri, na fara buuri wu bɛ na, wemu pu ma yaha Tɛhɛnɛ Baa Kilɛ ɲaha tàan ge, 14 ni sokinnaa tige ki ni ki yatoyo ye, ni sokinnaa pee, ni pu sìnmɛ pe, 15 ni nudanga yawurire ti wo saraga tawologo ki ni ki lɔlɔbegee kee, ni sindirimɛ pe, ni nudanga yawurire te, ni Ɲuŋɔ Tacirige Fàya Puga ki tajege ki wo kuɲɔparaga ke, 16 ni saraya nizogoyo yi tawologo ki ni ki daɲaa giriyazhi we, ni ki lɔlɔbegee kee, ni ki yagbegeye yi bɛɛri, na fara pɛgɛ ke ni ki serege ki na, 17 ni kaaŋa ki wo fatɔyɔ ye, ni yi tinyeeŋɛɛ kee, ni yi ɲidahaa kee, na fara kaaŋa ki tajege ki wo kuɲɔparaga ki na, 18 Kilɛ Ɲuŋɔ Tacirige Fàya Puga ki wo sikaŋaa kee, ni kaaŋa ki wo sikaŋaa kee ni ki mɛɛrɛ, 19 ni Kilɛ Ɲuŋɔ Tacirige Fàya Puga ki wo labye fàya ye, ni saraya ɲaha shɔɔnrivɛɛ Arɔn wo fɛfɛɛrɛ fàya ye, ni wu jalaa pu wo fàya ye, pu na ba yemu leni da saraya ɲaha shɔɔnrivɛɛrɛ ti wo labye wu pyi ge.»
Izirayɛli nagoo pʼa pu keŋɛ yaŋmuyɔ kan
20 Ayiwa, a Izirayɛli nagoo pu bɛɛri di laha Musa tàan na gari. 21 Li bye funŋɔ ya tigi piimu bɛɛri mu, pu funyɔ bɛ dʼa taan ge, a pee bɛɛri di ba yakanya kan Tɛhɛnɛ Baa Kilɛ mu Ɲuŋɔ Tacirige Fàya Puga ki yàa we, ni ki yaŋmuyɔ yi bɛɛri, ni saraya ɲaha shɔɔnrivɛɛ pu wo fadeye yi bɛ wo yàa wu wuu na.
22 A sipyii pu bɛɛri, ná fara cee na, piimu bɛɛri funyɔ yʼa bi taan ge, a pee bɛɛri di ba ni pu munahaa tɔɔrɔ, ni pu niye tɔɔrɔ, ni pu kaŋmegee ni pu kabeleŋɛɛ, ni sanni yaŋmuyɔ tuuyo niɲɛhɛyɛ ni. A pu bɛɛri di pu wo sanni wu kan Tɛhɛnɛ Baa Kilɛ mu, na wu figi figi wu ɲaha tàan. 23 Piimu pu bye ni bula ɲaha lize ni kelee lomasa lize, kelee lizeɲɛ, kelee lɛn lize, kelee sika shiire, kelee dubyapee sɛɛyɛ yemu yʼa ɲaaŋa ni loɲiga ni ge, kelee sɛɛgboyo ya yemu yʼa panhaŋab, kee ka shi ɲɛ wemu bɛɛri mu ge, a pee bɛ di ba ni yee ni. 24 Warifyɛn kelee daɲaa tɔɔrɔ ya pye sipya wemu bɛɛri mu wu kan Kilɛ mu ge, a pu bɛɛri di ba yee kan Tɛhɛnɛ Baa Kilɛ mu. Labye tuugo kemu bɛɛri wo akasha tiin ya pye piimu bɛɛri mu ge, a pu bɛɛri di ba ni kee ni. 25 Cèe piimu bɛɛri pʼa lize baari ɲaha cɛ ge, a pee bɛɛri di lize piin pu keye yi na, na shɛ gan. Wee ya pye: bula ɲaha lize, ni lomasa lize, ni lizeɲɛ, ni lɛn lize. 26 Cèe piimu bɛɛri pʼa kacɛŋɛɛ cɛ, li bye funŋɔ di ɲɛ pu mu ge, a pee bɛɛri di sika shiire shin. 27 A Izirayɛli nagoo pu ɲuŋɔfɛɛ pʼi ba ni Onikisi faakagereye, ni pɛɛwa faakagereye ya bɛ ni, yee di ba le le efodi we ni dodoparaga ki na. 28 A pʼi nudanga yaara ni sìnmɛ bɛ kan sokinnaa pee, ni sindirimɛ pe, ni nudanga yawurire ti kaa na. 29 Tɛhɛnɛ Baa Kilɛ ya labye wemu le Izirayɛli nagoo pu keŋɛ ni Musa keŋɛ kurogo ge, dɛgɛ fungɔngɔ ya tigi wemu bɛɛri mu Izirayɛli nagoo pu ni ge, wu ná fara wu cee na, a pu bɛɛri di ba ni fundanga yakanya ni na pa gan Tɛhɛnɛ Baa Kilɛ mu wee labye wu kaa na.
Sipyii piimu na ba fɛfɛɛrɛ puga ki yàa ge
30 Ayiwa, a Musa di Izirayɛli nagoo pu pye: «Li wii, Tɛhɛnɛ Baa Kilɛ ya Xhuri ɲabige Bɛtisalɛli shɔɔnri lɔ, wee wemu wu ɲɛ Uri wo ja na foro Zhuda wo gbawege ki ni ge. 31 Tɛhɛnɛ Baa Kilɛ ya wu ɲi wu munaa li na, na fungɔngɔfɛɛrɛ ni kaɲahacɛnɛ ni lajɛ kan wu mu, kɔnhɔ wu kapyeŋɛɛ tuuyo yi bɛɛri ɲaha cɛ tapyege ni. 32 Wu na ba kacɛŋɛɛ nivoŋɔɔ yari na yeege ni sanni ni warifyɛn ni daɲaa tɔɔrɔ ni. 33 Wu na ba pɛɛwa faakagereye tɛni, na yi sɔɔri yiyɛ ni, na tiye tɛni, na kacɛŋɛɛ tuuyo bɛɛri pyi. 34 Kilɛ ya nugo fungɔngɔ fɛɛrɛ kan wu mu sanha, wu ni Ayisamaki ja Oliyabu ni, na foro Dan wo gbawege ki ni, kɔnhɔ lemu bɛɛri pʼa cɛ ge, pʼi já watii bɛ taanni lee ni. 35 Wʼa pu ɲi fungɔngɔ fɛɛrɛ na, kɔnhɔ pu da tɛŋɛ ni kacɛŋɛɛ wo labye wu tuuyo yi bɛɛri pyi. Pu da fàya suu, pu da yi shin ni bula ɲaha lize, ni lomasa lize, ni lizeɲɛ, ni lɛn lize ni. Pu da kapyeŋɛɛ tuuyo yi bɛɛri pyi, pʼi da kacɛŋɛɛ kii wo puyɛ ni pʼa byi.»