Saraya ɲaha shɔɔnrivɛɛ pu wo faleye ye
39
Ayiwa saraya ɲaha shɔɔnrivɛɛ pu na ba fàya yemu leni da pu wo labye wu pyi fɛfɛɛrɛ xuu wu ni ge, a pʼi yee yàa ni bula ɲaha lize ni, ni lomasa lize, ni lizeɲɛ. A pʼi fɛfɛɛrɛ fàya ya yàa Arɔn mu yemu yʼa li shɛɛ na wʼa yaha Tɛhɛnɛ Baa Kilɛ yahama ni ge, ma na jo ba Tɛhɛnɛ Baa Kilɛ bi yi jo Musa mu wɛ.Efodi wu yaagana
2 Ayiwa, a pʼi efodi wu yàa ni sanni lize ni, ni bula ɲaha lize, ni lomasa lize, ni lizeɲɛ, ni lɛn lize. 3 Pu bi sanni ɲa na pye ba wɛŋɛ ɲɛ wɛ, na kee wɛŋɛ ki kɔn kɔn na pye sanni mɛɛgɛɛ. A fàya suvɛɛ pʼi kee sanni mɛɛgɛɛ kee ni bula ɲaha lize, ni lomasa lize, ni lizeɲɛ, ni lɛn lize pinnɛ shin. 4 A pʼi kapaleŋɛɛ shuun tara efodi wu ɲɔyɔ ye na, na kee taga na wu puu. 5 Kirige kemu ki bye efodi wu na ge, pu bi sanni ni bula ɲaha lize, ni lomasa lize, ni lizeɲɛ, ni lɛn lize taga kee pinnɛ shin ni efodi wu ni shiizhan, ba Tɛhɛnɛ Baa Kilɛ bi yi jo Musa mu wɛ. 6 A pʼi onikisi faakagereye ya tɛ, na yee sɔɔri sɔɔri sanni kɔɔgɔɔ kii ni, na Izirayɛli jalaa pu mɛyɛ yi ka yee na ni ŋmaa ni ba pu ma keŋɛ fɛ ka mɛ faakagereŋɛ na wɛ. 7 A pʼi yee tara efodi wu kapaleŋɛɛ ki na ma pye Izirayɛli jalaa pu wo fundogo kagereye, ba Tɛhɛnɛ Baa Kilɛ bi yi jo Musa mu wɛ.
Dodoparaga ki yaagana
8 Ayiwa, a kacɛbyii pʼi dodoparaga ki bɛ yàa ni sanni ni, ni bula ɲaha lize, ni lomasa lize, ni lizeɲɛ, ni lɛn lize, ba pʼa efodi wu yàa wɛ. 9 Pu bi dodoparaga ki kuri taha, a ki nigurugo ki ɲidaa ni ki kadaa li bɛɛri di bye nigin. Kabanugo ka bɛɛri bi bye sibiri ɲii nigin. 10 A pʼi pɛɛwa faakagereye kuuyo shishɛɛrɛ tara wu na. Kuushiige ki wo kagereye yi ɲɛ sariduwani, ni topazi, ni emerodi. 11 Kuugo shuun wogo ki wo kagereye yi ɲɛ sikaribukili, ni safiiri, ni jama. 12 Kuugo taanri wogo ki wo kagereye yi ɲɛ opali, ni agati, ni ametisi. 13 Kuugo shishɛɛrɛ wogo ki wo kagereye yi ɲɛ kirisoliti, ni onikisi, ni zhasipu. Sanni kɔɔgɔɔ kii funŋɔ ni pu bi yee kagereye ye sɔɔri sɔɔri. 14 Yee kagereye yi bye kɛ ni shuun na saha ni Izirayɛli jalaa pu mɛyɛ yi ni. Izirayɛli gbaweye kɛ ni shuun wu mɛyɛ yi bi ka yee kagereye yi na, gbawege ka bɛɛri, pʼa ki mɛgɛ ka kagereŋɛ nigin wa na ni ŋmaa ni ba pu ma keŋɛ fɛ ka mɛ wɛ. 15 A pʼi sanni nidiimɛ taga ɲɔhɔrɔ tɛhɛɛ shuun wa yàa ba mɛɛrɛ tifanya ɲɛ wɛ, na tee le dodoparaga ki na. 16 A pʼi sanni kɔɔgɔɔ shuun wa yàa, ni sanni kaŋmegee shuun. A pʼi kee kaŋmegee shuu wu le dodoparaga ki fugba wu wo ɲuyɔ shuun wu na. 17 A pʼi sanni ɲɔhɔrɔ tɛhɛɛ shuun wu ɲuyɔ ya le kee kaŋmegee shuun wu na dodoparaga ki ɲuyɔ yi na, 18 na yeyi ɲuyɔ shuun wusama le sanni pɛgɛɛ shuun wu na, na tara efodi wu kapaleŋɛɛ ki na, kɔnhɔ dodoparaga kʼi bye ɲahagbaa li na. 19 A pʼi sanni kaŋmegee shuun wa bɛ yàa, na kee le dodoparaga ki nɔhɔdaan wo ɲuyɔ shuun wu na. 20 A pʼi sanni kaŋmegee shuun watii bɛ yàa sanha, na kee le efodi wu wo kapaleŋɛɛ ki nɔhɔdaan, joogorogoo ki tàan, efodi wu wo kirige ki ɲuɲɔ wu na. 21 A pʼi dodoparaga ki wo kaŋmegee kee, ni efodi wu wo kaŋmegee ki pɔ gbara kiyɛ na ni bula ɲaha yapoo ni, kɔnhɔ dodoparaga kʼi gori yaha efodi wu wo kirige ki ɲuŋɔ ni, ki ganha bu sanha laha efodi wu na wɛ, ma na jo ba Tɛhɛnɛ Baa Kilɛ bi yi jo Musa mu wɛ.
Saraya ɲaha shɔɔnrivɛɛ pu wo faleye yisaya
22 Ayiwa, efodi wu na ba le daha fadedɔɔngɔ kemu na ge, a pʼi bula ɲaha lize taga kee shin. 23 A pʼi ki katige ki kɔn, na ɲɔwaŋa nigbilege ka tara ki na, kɔnhɔ ki ganha bu shɛɛngi wɛ. 24 Pʼi gerenadii pii yàa ni bula ɲaha lize ni, ni lomasa lize, ni lizeɲɛ, ni lɛn lize. Pʼi pee taga fadeboroŋɔ ki ɲɔwaŋa ki maha círi. 25 Pʼi wiiŋɛɛ kii yàa ni sanni nidiimɛ ni, pʼi kee wiiŋɛɛ ki surulo fadeboroŋɔ ki ɲɔwaŋa ki wo gerenadii pu tɛ wu ni, pʼi ki maha círi. 26 Pu bu wiinɛ la tara, pʼa gerenadi wa tara, pu bu wiinɛ la tara, pʼa gerenadi wa tara, fo na shɛ fadeboroŋɔ ki ɲɔwaŋa ki bɛɛri maha círi Kilɛ wo labye wu kaa na, ma na jo ba Tɛhɛnɛ Baa Kilɛ bi yi jo Musa mu wɛ.
27 Ayiwa, a pʼi lɛn lize taga fadegbɔgɔɔ kii yàa Arɔn ni wu jalaa pu mu. 28 A pʼi ɲumiginɛ le, ni ɲudɔŋɔɔ kee, ni kulushipigee ki bɛ yàa ni lɛn lize ni. 29 A pʼi kirige ki yàa ni lɛn lize ni, na ki su ni bula ɲaha lize ni, ni lomasa lize, ni lizeɲɛ, ma na jo ba Tɛhɛnɛ Baa Kilɛ bi yi jo Musa mu wɛ.
30 A pʼi sanni nidiimɛ shɔhɔ na pye ba tige fyɛnrɛ ɲɛ wɛ, na li yàa na pye tuubɛbɛɛnɛ. Lee tuubɛbɛɛnɛ le ya li shɛɛ na wʼa yaha Tɛhɛnɛ Baa Kilɛ yahama ni. A pʼi kama pa ka li na ni ŋmaa ni ba pu ma keŋɛ fɛ ka mɛ wɛ. Pee kama pu ɲɛ na: «WʼA YAHA TƐHƐNƐ BAA KILƐ WO YAHAMA NI.» 31 A pʼi bula ɲaha lize mɛɛ taga lee sanni tuubɛbɛɛnɛ li pɔ ɲumiginɛ li ɲahagbaa li na, ma na jo ba Tɛhɛnɛ Baa Kilɛ bi yi jo Musa mu wɛ.
Fàya puga ki ni ki yaŋmuyɔ ya yàa xɔ
32 Mu Ɲuŋɔ Tacirige Fàya Puga ki labye wu bɛɛri ya pye na wu xɔ. Tɛhɛnɛ Baa Kilɛ ya yemu bɛɛri jo Musa mu ge, a Izirayɛli nagoo pʼi yee bɛɛri pye na saha ni yi jogana li ni. 33 A pʼi ba ni fàya puga ke, ni ki yagboyo yi bɛɛri ni Musa yíri: Ki coco-gbaragaa, ni ki tijaya, ni pubetɔɔnyɔ ye, ni ki benɛɛ ni ki sinsin-ɲidahaa kee, 34 ni dubyapee sɛɛyɛ ye, pʼa yemu ɲaaŋa ge, ni sɛɛgboyo ye yee yemu yʼa panhaŋaa ge, ni ɲahaparaga fàŋa ke, 35 ni kariɲɛɛgɛ ɲɔmɛɛ li keshi we, ni wu ɲɔtɔŋɔb ke, ni wu pubegee kee, 36 ni tabali we ni wu yagbegeye ye, ni buuri wemu pu ma yaha Tɛhɛnɛ Baa Kilɛ ɲaha tàan ge, 37 ni sanni nidiimɛ wu wo sokinnaa tige ke, ni ki sokinnaa pee, ni pu yàa yàa yaŋmuyɔ ye, ni pu sìnmɛ pe, 38 ni saraya nizogoyo yi tawologo sanni wogo ke, ni sindirimɛ pe, ni nudanga yawurire te, ni Fàya Puga ki tajege ki wo kuɲɔparaga ke, 39 ni saraya tawologo daɲaa wogo ke, ni ki daɲaa giriyazhi we, ni ki pubegee kee, ni ki yagbegeye yi bɛɛri, ni pɛgɛ ke ni ki serege ke, 40 ni kaaŋa ki maha maha fakuuyo ye, ni ki tinyeeŋɛɛ kee, ni ki ɲidahaa kee, ni kaaŋa ki tajege ki wo kuɲɔparaga ke, ni ki mɛɛrɛ te, ni ki sikaŋaa kee, ni yagbegeye yemu bɛɛri yʼa labye pyi Ɲuŋɔ Tacirige Fàya Puga ki ni ge, ni yee bɛɛri, 41 ni Kilɛ Ɲuŋɔ Tacirige Fàya Puga ki wo labye fàya ye, ni saraya ɲaha shɔɔnrivɛɛ Arɔn wo fɛfɛɛrɛ fàya ye, ni wu jalaa pu wo fàya ye, pu na ba yemu leni da saraya ɲaha shɔɔnrivɛɛrɛ ti wo labye wu pyi ge.
42 Ayiwa, a Izirayɛli nagoo pʼi we labye we bɛɛri pye cibɛ, ma na jo ba Tɛhɛnɛ Baa Kilɛ bi yi jo Musa mu wɛ. 43 A Musa di wee labye wu bɛɛri pɛrɛgi wee. Li wii, Tɛhɛnɛ Baa Kilɛ ya yi jo jogana lemu na Musa mu ge, a pʼi da pʼa yi bɛɛri pye mu. Ayiwa, a Musa di duba pye pu mu.