Saraya ɲaha shɔɔnrivɛɛ wo fàya ye
28
Ayiwa, a Tɛhɛnɛ Baa Kilɛ di Musa pye sanha na: «Ma ɲahafɔɔ Arɔn ni wu jalaa pee: Nadabu, ni Abiyu, ni Eleyazari, ni Itamari, pu lɔ fulo mayɛ na ma foro Izirayɛli nagoo pu ni. Pu na ba saraya ɲaha shɔɔnrivɛɛrɛ kapyeŋɛɛ ki pyi nɛ mu. 2 Ma na ba fɛfɛɛrɛ fàya ya jooli ma ɲahafɔɔ Arɔn wu mu, nɔɔrɔ we ni wu tayerege ki wuu na. 3 Mʼa jo ni kacɛŋɛɛ cɛvɛɛ pu bɛɛri ni, pee piimu mu nɛ fungɔngɔ fɛɛrɛ nigbɔɔrɔ kan ge, pu na ba Arɔn wo fàya yi yàa. Wu na ba yaha nɛ yahama ni, na yee fàya yi le, na saraya ɲaha shɔɔnrivɛɛrɛ ti wo kapyeŋɛɛ ki pyi nɛ mu. 4 Fàya yemu pʼa da ba yàa ge, yee yi wa mɛ: Dodoparaga, ni efodi, ni fadedɔɔngɔ, ni fadegbɔrɔ lemu ya su ge, ni ɲumiginɛ, ni kirige. Pu na ba yee fɛfɛɛrɛ fàya yi yàa ma ɲahafɔɔ Arɔn ni wu jalaa pu mu, kɔnhɔ pu da saraya ɲaha shɔɔnrivɛɛrɛ ti kapyeŋɛɛ ki pyi nɛ mu. 5 Pu na ba sanni, ni bula ɲaha lize, ni lomasa lize, ni lizeɲɛ, ni lɛn lize lɔ.»Efodi wu yaagana
6 «Pu na ba efodi wu yàa, na wu kemɛ su. Efodi wu wo fàŋa ki na ba zhin ni sanni, ni bula ɲaha lize, ni lomasa lize, ni lizeɲɛ, ni lɛn lize ni. 7 Pʼi kapaleŋɛɛ shuun tara efodi wu na, kɔnhɔ pʼi ba wu puu ni kee ni. 8 Pʼi kirige ki bɛ yàa ba pʼa efodi wu yàa wɛ. Ki ni efodi wu bɛɛri di bye fàŋa nigin. Pʼi ki yàa ni sanni ni, ni bula ɲaha lize, ni lomasa lize, ni lizeɲɛ, ni lɛn lize. 9 Yʼi onikisia faakagereye shuun lɔ, yʼi Izirayɛli jalaa pu mɛyɛ yi ka yee na ni ŋmaa ni. 10 Yʼi mɛyɛ gbaara ka faakagereŋɛ ka na, yʼi gbaara wusama ka faakagereŋɛ kisaŋa na. Yʼi mɛyɛ yi ka lɛgɛ ni. 11 Yʼi Izirayɛli jalaa pu mɛyɛ yi ka yee faakagereye shuun wu na ni ŋmaa ni ba pu ma keŋɛ fɛ ka mɛ kagereŋɛ na wɛ. Yʼi yee faakagereye shuun wu sɔɔri sanni kɔɔgɔɔ shuun wa ni. 12 Yʼi ki tara efodi wu kapaleŋɛɛ ki na. Yee na ba bye fundogo kagereye Izirayɛli jalaa pu shizhaa na. Pu mɛyɛ yi na ba bye mu na Arɔn kapaya shuun wu na Tɛhɛnɛ Baa Kilɛ ɲaha tàan wu funŋɔ da dun yi na tuun bɛɛri ni. 13 Kɔɔgɔɔ shuun wemu ni yee faakagereye yi da ba sɔɔri ge, yʼi kee yàa ni sanni ni. 14 Yʼi sanni nidiimɛ shɔhɔ, yʼi wu kara wuyɛ ni ba mɛɛrɛ ɲɛ wɛ yi pye ɲɔhɔrɔ tɛhɛɛ shuun. Yʼi tee ɲɔhɔrɔ ti tara sanni kɔɔgɔɔ ki na.»
Dodoparaga ki yaagana
15 «Ayiwa, yʼi kiirikɔɔn li wo dodoparaga ki yàab. Ma kacɛbyii pii pye pʼi ki yàa ba efodi wu ɲɛ wɛ. Pʼi ki yàa ni sanni ni, ni bula ɲaha lize, ni lomasa lize, ni lizeɲɛ, ni lɛn lize. 16 Yʼi wu kuri taha wuyɛ na. Wu nigurugo ki ɲidaa lʼa yaa na pye sibiri ɲii nigin, wu kadaa li bɛ di bye sibiri ɲii nigin. 17 Yʼi pɛɛwa kagereye kuuyo shishɛɛrɛ tara wu na. Kuushiige ki wo pɛɛwa faakagereye yʼi bye sariduwani ni topazi, ni emerodi. 18 Kuugo shuun wogo ki wo pɛɛwa faakagereye yʼi bye sikaribukili ni safiiri ni jama. 19 Kuugo taanri wogo ki wo pɛɛwa faakagereye yʼi bye opali ni agati, ni ametisi. 20 Kuugo shishɛɛrɛ wogo ki wo pɛɛwa faakagereye yʼi bye kirisoliti, ni onikisi, ni zhasipu. Yee pɛɛwa faakagereye ye bɛɛri ya yàa na yi sɔɔri sanni kɔɔgɔɔ kii ni. 21 Yi bɛɛri ya yaa na pye pɛɛwa faakagereye kɛ ni shuun na saha ni Izirayɛli jalaa pu gbaweye yi ɲɔ ki ni. Faakagereŋɛ ka bɛɛri pʼi gbawege ka wo mɛgɛ ka ki na ni ŋmaa ni ba keŋɛ fɛ ya gani wɛ.
22 «Yʼi sanni nidiimɛ shɔhɔ, yʼi wu kara wuyɛ ni ba mɛɛrɛ ɲɛ wɛ yi pye ɲɔhɔrɔ. Yʼi tee le dodoparaga ki na. 23 Yʼi sanni kaŋmegee shuun bɛ yàa, yʼi kee le dodoparaga ki fugba guzheŋɛɛ shuun wu na. 24 Yʼi sanni ɲɔhɔrɔ shuun wu le kaŋmegee shuun wu na dodoparaga ki guzheŋɛɛ ki na. 25 Yʼi ɲɔhɔrɔ ti ɲuyɔ shuun wusama le efodi wu wo kapaleŋɛɛ ki wo kɔɔgɔɔ ki ni ɲahagbaa li na. 26 Yʼi sanni kaŋmegee shuun wa bɛ yàa, yʼi kee tara dodoparaga ki guzheŋɛɛ shuun wu na nɔhɔdaan wu ni. 27 Yʼi guri yʼi sanni kaŋmegee shuun wabɛtii yàa sanha. Efodi wu kapaleŋɛɛ kʼa tara nɔhɔdaan wu ni efodi wu na ɲahagbaa li na xuu wemu ni ge, yʼi kee kaŋmegee ki tara wee xuu wu ni. Yʼi kee kaŋmegee ki yaha efodi wu wo kirige ki fugba wu ni. 28 Yʼi dodoparaga ki wo kaŋmegee kee ni efodi wu wo kaŋmegee ki pɔ kiyɛ na ni bula ɲaha lize yapoo la ni, kɔnhɔ dodoparaga kʼi dara yaha kirige ki na, ki ganha ba figi da ɲɛri wɛ.
29 «Lee na do, Arɔn bʼa jin tuun bɛɛri ni fɛfɛɛrɛ xuu wu ni, wu na da jin ni kiirikɔɔn li wo dodoparaga ki ni, kee kemu na Izirayɛli gbaweye yi mɛyɛ yʼa ka ge. Lee funŋɔ ni nɛ Tɛhɛnɛ Baa Kilɛ funŋɔ da ga wɔ yi na wɛ. 30 Mu Musa di Urimu ni Tumimuc wu le kiirikɔɔn li wo dodoparaga ki ni, kɔnhɔ Arɔn ba da zhɛ yere na ɲaha tàan tuun bɛɛri ni, yʼi bye wu dodoŋɔ na. Mu na Arɔn da ba Izirayɛli nagoo pu wo kiiri keree ki luu wu zɔ wu na gbee Tɛhɛnɛ Baa Kilɛ ɲaha tàan.»
Saraya ɲaha shɔɔnrivɛɛ pu wo faleye yisaya
31 «Ayiwa, Arɔn na ba efodi wu leni na dɛri fadedɔɔngɔ kemu na ge, yʼi lomasa lize taga kee bɛɛri yàa. 32 Yʼi ki katige ki kɔn, yʼi ɲɔwaŋa ka shin kemu ya gbile ge, yʼi kee taga katikɔngɔ ki maha círi ba pʼa tɔɔrɔ fadeŋɛ yari wɛ, kɔnhɔ ki ganha bu zhɛɛngi wɛ. 33 Yʼi gerenadii taga fadedɔɔngɔ ki nɔhɔdaan ɲɔwaŋa ki to yi ki maha círi. Yʼi pee gerenadii pu yàa ni bula ɲaha lize ni, ni lomasa lize, ni lizeɲɛ. Yʼi sanni wiiŋɛɛ surulo pee gerenadii pu tɛ ni. 34 Yi bu sanni wiinɛ la le, yi ma gerenadi wa le, na yi leni na se mu fo na shɛ fadeŋɛ ki ɲɔwaŋa ki bɛɛri círi. 35 Arɔn na ba wu wo labye wu pyi ni kee fadedɔɔngɔ ki ni wu katige ni. Wu ba jin fɛfɛɛrɛ xuu wu ni Tɛhɛnɛ Baa Kilɛ ɲaha tàan, ni wu ba fòro pu na da kee wiiŋɛɛ ki tunmɔ nuri. Lee funŋɔ ni wu da xhuu wɛ.
36 «Yʼi sanni nidiimɛ shɔhɔ yi pye ba tige fyɛɛnrɛ ɲɛ wɛ, lʼi bye tuubɛbɛɛnɛ, yʼi pe kama pe ka li na ni ŋmaa ni ba pʼa keŋɛ fɛ kani wɛ na: ‹WʼA YAHA TƐHƐNƐ BAA KILƐ WO YAHAMA NI› 37 Yʼi lee tuubɛbɛɛnɛ li pɔ ni bula ɲaha lize ni ɲumiginɛ li ɲahagbaa li na. 38 Li na ba bye Arɔn gbaa na. Lee funŋɔ ni Arɔn na ba ɲuŋɔ le Izirayɛli nagoo pu wo tiibaara ti bɛɛri tàan, pu na ba temu pyi pu wo fɛfɛɛrɛ saraya yi kanduun wu ni nɛ mu ge. Lee tuubɛbɛɛnɛ li na ba bɔ yaha gbee Arɔn gbaa li na, kɔnhɔ nɛ Tɛhɛnɛ Baa Kilɛ di sɔɔ Izirayɛli nagoo pu na.
39 «Yʼi fadegbɔrɔ la jooli Arɔn mu, li faŋa kʼi bye lɛn lize, yʼi ɲumiginɛ la yàa ni lɛn lize ni, yʼi kirige ka yàa, yʼi ki su. 40 Yʼi fadegbɔgɔɔ, ni kiriye, ni ɲudɔŋɔɔ kii jooli Arɔn jalaa pu bɛ mu, nɔɔrɔ we ni pu tayereye yi wuu na.
41 «Ayiwa, mu Musa wʼa da ba yee fàya yi le Arɔn ni wu jalaa pu na, na sìnmɛ taga pu tìre na le pu wo labye wu ni, na pu yaha nɛ yahama ni, kɔnhɔ pu da saraya ɲaha shɔɔnrivɛɛrɛ ti kapyeŋɛɛ ki pyi nɛ mu. 42 Yʼi lɛn fàŋa kulushipiire ta jooli pu mu. Tee na ba pu nɔhɔ tɔ na co losiye ye na, na ba da shegee kii na. 43 Arɔn ni wu jalaa pu na ba pee leni, pu ba da jé Ɲuŋɔ Tacirige Fàya Puga ki ni, kelee pu ba da zhɛ la shɔɔnri saraya tawologo ki na fɛfɛɛrɛ ti xuu wu ni. Lee funŋɔ ni pu da ba kanahana la pye lemu na já xu nɔ pu na wɛ. Lee na ba bye saliya wemu da ga yìri wɛ, Arɔn ni wu kadugo shi wu mu.»