Saraya nizogoyo tawologo ki yaagana
27
Ayiwa, a Tɛhɛnɛ Baa Kilɛ di Musa pye sanha na: «Yʼi saraya tawologo ka yàa ni akasha tiye ni. Ki kabanuyo shishɛɛrɛ wu bɛɛri tɔɔngɔ na ba bye nigin, kabanugo ka bɛɛri keŋɛ ɲii kaguro. Ki ɲuŋɔkana lʼi bye keŋɛ ɲii taanri. 2 Yʼi yeŋɛɛ shishɛɛrɛ yaha ki guzheŋɛɛ shishɛɛrɛ wu na, ki ni yeŋɛɛ ki bɛɛri di binnɛ yàa. Yʼi daɲaa taga ki bɛɛri tɔ. 3 Yʼi saraya tawologo ki labye wu yɛrɛyɛ yi bɛɛri yàa ni daɲaa ni: Shɔɔnrɔ le le yɛrɛyɛ ye, ni shɔɔnrɔ kuu kuu yɛrɛyɛ ye, ni tasaa pee, ni xaara su su ŋmahaa kee, ni naganhaa le le yɛrɛyɛ ye. 4 Yʼi daɲaa tɔɔrɔ paragi paragi tiyɛ na yi pye giriyazhi, yʼi daɲaa kaŋmegee le wu guzheŋɛɛ shishɛɛrɛ wu na. 5 Yʼi wee giriyazhi wu le saraya tawologo ki funŋɔ ni, ki niŋɛ ke ni. 6 Yʼi akasha pubegee kii yàa, yʼi daɲaa taga ki bɛɛri tɔ. 7 Kee pubegee ki na ba leni saraya tawologo ki wo kaŋmegee ki na, ki kabanuyo shuun wu na, na saraya tawologo ki luu. 8 Yi na ba saraya tawologo ki yàa ni tijaya ni, na ki funŋɔ ki niwaga yaha. Tuugo kemu kʼa shɛ ma na faaboboŋɔ ki na ge, yʼi saraya tawologo ki yàa kee tuugo ki shi.Fàya puga ki wo kaaŋa ki kuurigana
9 «Ayiwa, yʼi kaaŋa yaha fàya puga ki na, yʼi ki kuuri ni fàya ni yemu yʼa yàa ni lɛn ni ge. Woroo kulo kacɛ ki na, kaaŋa ki fàya yi ɲidaa li na ba bye keŋɛ ɲii xhuu nigin (100). 10 Yʼi tinyeeŋɛɛ kɛlɛɛ shuun (20) yàa, ni daɲaa ɲidahaa kɛlɛɛ shuun (20), tiin ki na ba sin sin kiimu na ge. Yʼi warifyɛn nigee kii yàa, kee di ba le tinyeeŋɛɛ ki na, ni warifyɛn pubegee, fàya yʼi ba daha kee na. 11 Yʼi suumɔ kulo kacɛ ki yàa lee yaagana li na. Kaaŋa ki fàya yi ɲidaa lʼi bye keŋɛ ɲii xhuu nigin (100). Tinyeeŋɛɛ kʼi bye kɛlɛɛ shuun (20), ki daɲaa ɲidahaa ki bɛ di bye kɛlɛɛ shuun (20). Tinyeeŋɛɛ ki wo nigee kee ni fàya yi taha taha begee kee, yee di yàa ni warifyɛn ni. 12 Caŋatomɔ kacɛ ki na, kaaŋa ki fàya yi kadaa lʼi bye keŋɛ ɲii kɛlɛɛ kaguro (50). Tinyeeŋɛɛ kʼi bye kɛ, ki ɲidahaa ki bɛ di bye kɛ. 13 Kilɛ-nɔhɔ kacɛ ki na, kaaŋa ki kadaa li na ba bye keŋɛ ɲii kɛlɛɛ kaguro (50). 14 Kuɲɔɔ li kanige cɛ wu ni, fàya yi ɲidaa li na ba bye keŋɛ ɲii kɛ ni kaguro. Tinyeeŋɛɛ ki na ba bye taanri, ki ɲidahaa ki bɛ ma bye taanri. 15 Kuɲɔɔ li kamɛnɛ cɛ wu ni, fàya yi ɲidaa li na ba bye keŋɛ ɲii kɛ ni kaguro. Tinyeeŋɛɛ ki na ba bye taanri, ki ɲidahaa ki bɛ ma bye taanri. 16 Kuɲɔparaga kemu na ba le kaaŋa ki kuɲɔɔ li na ge, kee ɲidaa di bye keŋɛ ɲii kɛlɛɛ shuun (20). Pʼi ki yàa ni bula ɲaha lize ni, ni lomasa lize, ni lizeɲɛ, ni lɛn lize. Pʼi ki su. Ki tinyeeŋɛɛ kʼi bye shishɛɛrɛ, ni ki ɲidahaa shishɛɛrɛ. 17 Fàya taha taha pubegee kiimu bɛɛri ki da ba daha kaaŋa ki tinyeeŋɛɛ ki bɛɛri na ge, kee bɛɛri di yàa ni warifyɛn ni. Nigee kiimu bɛɛri ki da ba le le ki na ge, yʼi kee bɛ yàa ni warifyɛn ni. Yʼi ki ɲidahaa ki yàa ni daɲaa ni. 18 Kaaŋa ki ɲidaa li na ba bye keŋɛ ɲii xhuu nigin (100). Ki kadaa li ma bye keŋɛ ɲii kɛlɛɛ kaguro (50). Ki ɲubile ma bye keŋɛ ɲii kaguro. Ki fàya yʼi bye lɛn lize. Ɲidahaa ki bɛɛri na ba bye daɲaa. 19 Yɛrɛyɛ yemu bɛɛri ni pu da ba labye pyi fàya puga ki ni ge, na fara fàya puga ki wo sikaŋaa ki na, ni kaaŋa ki wo sikaŋaa kee, yee bɛɛri na ba bye daɲaa.
Sokinnaa tige ki wo sìnmɛ pe
20 «Ayiwa, mu Musa di yi jo Izirayɛli nagoo pu mu na pu pa ni olivu sìnmɛ yɛ pyaa pyaa ni pu nijemɛ. Pee di ba leni sokinnaa pu ni, kɔnhɔ pu da ɲí gbee. 21 Arɔn ni wu jalaa pu na ba sokinnaa tige ki sin Ɲuŋɔ Tacirige Fàya Puga ki ni, ɲahaparaga fàŋa ki ɲahagbaa na, kee kemu kadugo yíri kariɲɛɛgɛ ɲɔmɛɛ li keshi wu wa ge. Sokinnaa pu na ba ɲí nɛ ɲaha tàan na co yakoŋɔ na fo na shɛ ɲiga mugi. Wee na ba bye saliya, Izirayɛli nagoo ni pu shi nibama wu bɛɛri na ba wemu koo ɲaari gbee ge.»