Fàya puga ki wo fàya yi yaagana
26
«Mʼa kacɛbyii pii pye pʼi fakuuyo tabaaya kɛ shin yemu yʼa gbile ge. Pʼi yi shin ni lɛn lize ni, ni bula ɲaha lize, ni lomasa lize, ni lizeɲɛ. Pʼi serubɛɛn yàa yi na, pʼi lize taga pee su. 2 Fakuugo ka bɛɛri ɲidaa ya yaa na pye keŋɛ ɲii kɛlɛɛ shuun ni gbarataanri (28). Ki kadaa di bye keŋɛ ɲii shishɛɛrɛ. Yee fakuuyo yi bɛɛri wo ɲuŋɔkana di bye nigin. 3 Yʼi fakuuyo kaguro wa jooli gbara yiyɛ na, yʼi kaguro wusama bɛ jooli gbara yiyɛ na. 4 Fakuuyo kaguro kaguro wemu wʼa jooli gbara yiyɛ na ge, yʼi yapɔɔrɔ ta shin ni bula ɲaha lize ni, yʼi ta le le we kaguro we wo fakuusaŋa ki na, yʼi ta le le wewu kaguro wu bɛ wo fakuushiige ki na. 5 Fakuuyo kaguro nizhiimɛ wu wo fakuusaŋa ki bye ni yɔpɔgɔɔ kɛlɛɛ kaguro (50) ni. Wewu kaguro wu bɛ wo fakuushiige ki ɲɛ ni yapɔɔrɔ kɛlɛɛ kaguro (50) ni. Fakuusaya shuun wu wo yapɔɔrɔ ti bɛɛri ya yaa na saha saha ni tiyɛ ni. 6 Mʼa sanni gbaragaa kɛlɛɛ kaguro (50) yàa, kee di ba daga fakuuyo yi co gbara yiyɛ na, kɔnhɔ fàya puga ki bɛɛri di bye fatɔgbɔhɔ nigin.7 «Lee kadugo na yʼi fakuuyo nigbiliye kɛ ni nigin wa shin ni sika shiire ni, yee di ba bye fàya puga ki fatɔŋɔ. 8 Kee fakuugo ka bɛɛri wo ɲidaa ya yaa na pye keŋɛ ɲii kɛlɛɛ taanri (30), ki kadaa di bye keŋɛ ɲii shishɛɛrɛ (40). Yi kɛ ni nigin wu bɛɛri wo ɲuŋɔkana di bye nigin. 9 Yʼi fakuuyo kaguro wa jooli gbara yiyɛ na yi pye fakuugo nigin, yʼi gbaara wusama jooli gbara yiyɛ na. Yi na ba gbaara wu wo fakuugo gbaara wogo ki kuri daha fàya puga ki ɲahagbaa li na. 10 Fakuuyo kaguro wemu wʼa jooli gbara yiyɛ na ge, yʼi yapɔɔrɔ kɛlɛɛ kaguro (50) le yee wo fakuusaŋa ki ɲɔ na. Yʼi yapɔɔrɔ kɛlɛɛ kaguro (50) le gbaara wu bɛ wo fakuushiige ki ɲɔ na. 11 Yʼi gbaragaa kɛlɛɛ kaguro (50) yàa ni daɲaa tɔɔrɔ ni, kee di ba daga fàya shuun wu co gbara yiyɛ na, kɔnhɔ yʼi bye fatɔgbɔhɔ nigin. 12 Fàŋa kemusaŋa ki da ba gori puga ki kadaa li cɛ fɛni kadugo yíri wu ni ge, yʼi kee yaha kee di digi pa puga ki kadugo yíri wu ni. 13 Fàŋa ki na ba puga ki ɲɔ wɔrɔ ki ɲidaa li cɛ fɛni ni keŋɛ ɲii nigin ni, lee fàŋa keŋɛ ɲii nigin wu na ba yaha puga ki kabanuyo shuun wu na, na ki tɔ ɲɔ. 14 Yʼi ba dubyapee sɛɛyɛ ɲaaŋa, yʼi yee taga fatɔgbɔhɔ ka yàa, yʼi kee taga yeyi fatɔgbɔyɔ yi tɔ, yʼi sɛɛyɛ ya gbo yemu yʼa panhaŋaa ge, yʼi yee wo fatɔgbɔhɔ ki taga yi bɛɛri ɲɔ tɔ.»
Fàya puga ki wo kɔɔjaya ye
15 «Lee kadugo na yʼi akasha tige kɔrɔyɔ ya ja, yʼi yi tɛ tɛ. Yee na ba sin sin na taga puga ki shuu. 16 Kɔɔjaga ka bɛɛri ɲidaa ya yaa na pye keŋɛ ɲii kɛ, ki kadaa di bye keŋɛ ɲii nigin ni taaga. 17 Kɔɔjaga ka bɛɛri di bye ni tɔɔyɔ shuun ni, yʼi bye yiyɛ tàan, yʼi sin sin. Kɔɔjaya yemu bɛɛri yʼa da ba daga fàya puga ki yereŋɛ ge, yʼi yee bɛɛri pye mu. 18 Yʼi kɔɔjaya kɛlɛɛ shuun (20) yàa fàya puga ki woroo kulo kacɛ ki kaa na. 19 Yʼi warifyɛn ɲidahaa kɛlɛɛ shishɛɛrɛ (40) yàa kɔɔjaya kɛlɛɛ shuun (20) wu kaa na, kɔɔjaga ka bɛɛri, yʼi ma warifyɛn ɲidahaa shuun le ki tɔɔyɔ yi na. 20 Yʼi kɔɔjaya kɛlɛɛ shuun (20) yàa puga ki suumɔ kulo kacɛ ki kaa na. 21 Yʼi warifyɛn ɲidahaa kɛlɛɛ shishɛɛrɛ (40) yàa yee bɛ na, ka bɛɛri ɲidahaa shuun. 22 Yʼi kɔɔjaya gbaara tɛ puga ki kadugo yíri wu kaa na caŋatomɔ kacɛ ki na. 23 Yʼi kɔɔjaya ya tɛ, yʼi ba yee yereŋɛ shuun shuun fàya puga ki kadugo yiri guzheŋɛɛ ki na. 24 Yʼi yi gbara yiyɛ na na co nɔhɔdaan wu ni fo fugba wu ni, yʼi kaŋmii nigin taga fugba wu wo ɲuyɔ shuun wu co gbara yiyɛ na. Guzheŋɛɛ shuun wu wo kɔɔjaya yi bɛɛri ya yaa na pye ninuyɔ. 25 Lee funŋɔ ni kɔɔjaya yi bɛɛri na bye gbarataanri ni yi warifyɛn ɲidahaa kɛ ni gbaara, kɔɔjaga ka bɛɛri ɲidahaa shuun.
26 «Yʼi akasha tinbaraa kaguro tɛ, yʼi kee pari ke kabanugo ke wo kɔɔjaya yi na, 27 yʼi tinbaraa kaguro wa tɛ yi pari ke kabanugo ke bɛ wo kɔɔjaya yi na, yʼi kaguro wa pari puga ki funŋɔ ki bɛ wo kɔɔjaya yi na caŋatomɔ kacɛ ki na. 28 Niŋɛ wo tinbara lʼa yaa na toro kɔɔjaya yi niŋɛ ki ni, lʼi lɔ fàya puga ki ɲuŋɔ ka na, lʼi shɛ foro keki ɲuŋɔ ki na. 29 Yʼi sanni taga kɔɔjaya yi bɛɛri tɔ. Yʼi sanni kaŋmegee yaha kɔɔjaya yi na, tiin ki wo taleye. Yʼi sanni taga tiin ki bɛ tɔ. 30 Tuugo kemu kʼa shɛ ma na faaboboŋɔ ki na ge, mʼa fàya puga ki yàa kee tuugo ki shi.»
Ɲahaparaga fàŋa ki yaagana
31 «Ayiwa, mʼa fàya puga ki wo ɲahaparaga fàŋa ki yàa ni bula ɲaha lize ni, ni lomasa lize, ni lizeɲɛ, ni lɛn lize. Mʼa kacebyii pii pye pu serubɛɛn yàa ki na, pʼi pee su. 32 Yʼi akasha tiin shishɛɛrɛ wa tɛ, yʼi sanni taga ki bɛɛri tɔ. Yʼi sanni nigee kii yàa, yʼi kee le le kee tiin ki na. Yʼi warifyɛn ɲidahaa shishɛɛrɛ yàa, yʼi tiin ki teŋɛ kee ɲidahaa ki na. 33 Yʼi ɲahaparaga fàŋa ki le tiin ki wo nigee ki na.
«Yi na ba kariɲɛɛgɛ ɲɔmɛɛ li keshi wu yaha ɲahaparaga fàŋa ki kadugo yíri. Kee ɲahaparaga fàŋa ki na ba puga ki taa, xuu wa ma bye fɛfɛɛrɛ wo, xuu wa ma bye fɛfɛɛrɛ ti bɛɛri wo fɛfɛɛrɛ wo.* 34 Lee kadugo na yʼi keshi wu ɲɔtɔŋɔ ki tɔ wu na fɛfɛɛrɛ ti bɛɛri wo fɛfɛɛrɛ xuu wu ni. 35 Yi na ba tabali wu yaha fɛfɛɛrɛ xuu wu ni ɲahaparaga fàŋa ki ɲahagbaa na, puga ki suumɔ kulo kacɛ ki na. Yi na ba sokinnaa tige ki sin puga ki woroo kulo kacɛ ki na, na ki ɲaha saha ni tabali wu ni.
36 «Mʼa ba kacebyii pu pye pʼi kuɲɔparaga ka bɛ yàa fàya puga ki tajege ki wuu na. Pʼi ki yàa ni bula ɲaha lize ni, ni lomasa lize, ni lizeɲɛ, ni lɛn lize. Pʼi ki su. 37 Yʼi ba akasha tiin kaguro yàa, yʼi sanni taga ki bɛɛri tɔ. Yʼi sanni nigee yàa le ki na, kuɲɔparaga kʼi ba le kee na. Yʼi daɲaa ɲidahaa kaguro yàa kee tiin ki kaa na.»