Izirayɛli nagoo pʼa yaŋmuyɔ yemu kan fàya puga ki yàa wu kaa na ge
25
A Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na pu pa na kan. Sipyii piimu bɛɛri pʼa da ba na kan ni funvahaŋa ni ge, mʼa pee bɛɛri wo yakanya yi shɔ. 3 Yakanya yemu pʼa yaa na kan ge, yee yi wa mɛ: sanni, ni warifyɛn, ni daɲaa, 4 ni bula ɲaha lize, ni lomasa lize, ni lizeɲɛ, ni fapilɛpilɛgɛɛ ki nivigee ni sika shiire, 5 ni dubyapee sɛɛyɛ pʼa yemu ɲaaŋa ge, ni sɛɛgboyo ya yemu yʼa panhaŋaa ge, ni akasha tiin, 6 ni sìnmɛ pemu na ba leni sokinnaa pu ni ge, ni nudanga yaara temu ni pu da ba sindirimɛ nudanga wo pe, ni nudanga yawurire ti yari ge, 7 ni pɛɛwa faakagereye ya, yee yemu mɛgɛ ki ɲɛ na Onikisib ge, ni pɛɛwa faakagereye ya bɛ yee yemu na ba bye efodi we ni dodoparaga ki wo yalere ge. 8 Pu na ba xuu wa yàa yaha na yahama ni, kɔnhɔ di diin pu niŋɛ ni. 9 Nʼa da ba fàya bugi wu yaagana li tuugo shɛ ma na, di yaŋmuyɔ yi bɛ wo yaagana li tuugo shɛ ma na, yʼi shɛ yi bɛɛri yàa cibɛ na bɛ ni yee ni.Kariɲɛɛgɛ ɲɔmɛɛ li keshi wu yaagana
10 «Pu na ba akasha tiin ki taga keshi wa yàa. Wu ɲidaa na ba bye keŋɛ ɲii shuun ni taaga, wu kadaa di bye keŋɛ ɲii nigin ni taaga, wu tɔɔngɔ di bye keŋɛ ɲii nigin ni taaga. 11 Ma ba sanni nidiimɛ taga wu funŋɔ ke ni wu kadugo ki bɛɛri tɔ. Ma sanni ɲɔ kabara le wu ɲɔ ki na ma ki maha círi. 12 Ma sanni kaŋmegee shishɛɛrɛ yàa, ma ba kee le keshi wu guzheŋɛɛ shishɛɛrɛ wu na, kabanugo bɛɛri kaŋmegee shuun. 13 Mʼa akasha tiye pubegee kii tɛ, mʼa sanni taga ki tɔ. 14 Mʼa kee pubegee ki le sanni kaŋmegee ki ni, keshi wu kabanuyo shuun wu na, pu da kee taga pʼa wu luu. 15 Kee pubegee ki na ba le yaha wà keshi wu kaŋmegee ki na, wa ganha ga ki wolo wɛ. 16 Kariɲɛɛgɛ ɲɔmɛɛ li saliya ɲɔmɛhɛɛ kiimu nʼa da ba gan ma mu ge, mʼa kee le keshi wu ni.
17 «Mʼa ba keshi wu ɲɔtɔŋɔc ki bɛ yàa ni sanni nidiimɛ ni. Ki ɲidaa di bye keŋɛ ɲii shuun ni taaga, ki kadaa di bye keŋɛ ɲii nigin ni taaga. Kee na ba bye jurumu yafa wo saraya yi tawologo. 18 Mʼa sanni shɔhɔ ma taga serubɛɛn shuun yàa ɲɔtɔŋɔ ki kabanuyo shuun wu na. 19 Nigin wa di bye ke ɲuŋɔ ke na, nigin wusama di bye ke ɲuŋɔ ke na. Mʼa pee serubɛɛn pu pinnɛ yàa ni keshi wu ɲɔtɔŋɔ ki ni ɲuyɔ shuun wu na.d 20 Pee serubɛɛn pu na ba ɲahaya saha ni puyɛ ni, na keshi wu ɲɔtɔŋɔ ki wii, na kapaya ye yirige fugba we ni na taga keshi wu ɲɔtɔŋɔ ki tɔ. 21 Saliya ɲɔmɛhɛɛ kiimu nʼa da ba gan ma mu ge, mʼa kee le kariɲɛɛgɛ ɲɔmɛɛ li keshi wu funŋɔ ni, mʼa ɲɔtɔŋɔ ki tɔ wu na. 22 Wee xuu wu ni nʼa da ba nayɛ shee ma na keshi wu ɲɔtɔŋɔ ki fugba wu ni, serubɛɛn pu tɛ wu ni. Wee xuu wu ni nʼa da ba na ɲɔmɛjogoo ki yu ma mu, ma da ki yu Izirayɛli nagoo pu mu.»
Kilɛ wo buuri wu wo tabali wu yaagana
23 «Ayiwa, mʼa tabali wa yàa ni akasha tiye ni. Wu ɲidaa di bye keŋɛ ɲii shuun, wu kadaa di bye keŋɛ ɲii nigin, wu tɔɔngɔ di bye keŋɛ ɲii nigin ni taaga. 24 Mʼa sanni nidiimɛ taga wu bɛɛri wɔɔgɔ, mʼa sanni kabara taga wu ɲɔ ki maha círi 25 Mʼa tiye ya ja ma taga koɲɔgoŋɔ ki yirige fugba ni, ki jogi wu bye kabɛhɛɛ shishɛɛrɛ ɲuŋɔkana na. Mʼa sanni taga kee bɛ wɔɔgɔ círi. 26 Mʼa sanni kaŋmegee shishɛɛrɛ yàa, mʼa kee le tabali wu guzheŋɛɛ shishɛɛrɛ wu na tɔɔyɔ shishɛɛrɛ wu tàan. 27 Kee kaŋmegee ki na ba bye fugba wu wo koɲɔgoŋɔ ki fɛɛ ni. Pu na ba tabali wu lɔlɔbegee ki leni kee kaŋmegee ki ni. 28 Mʼa kee pubegee ki bɛ yàa ni akasha tiye ni, mʼa sanni taga ki wɔɔgɔ. Pu na ba tabali wu luu ni kee ni. 29 Mʼa golɛyɛ bɛ yàa, ni pɛhɛɛ, ni booyo, ni cɛɛgbuugoo saraya niwoyo yi wo kapyeŋɛɛ ki kaa na. Mʼa yee bɛ yàa ni sanni nidiimɛ ni. 30 Buuri wemu yʼa da ba wo da gaan na mu ge, ma na ba wee buuri we tɛri wee tabali wu na. Buuri ya yaa na fɔ wee tabali wu na nɛ ɲaha tàan tuun wa shishiin ni wɛ.*»
Sanni sokinnaa pu yaagana
31 «Mʼa sanni nidiimɛ shɔhɔ ma taga sokinnaa tige yàa. Sokinnaa tige ki ɲidaa le, ni ki ceefuu le, ni ki geye ye, na fara yaara ta na temu na yàa ba tige yasɛyɛ ɲɛ-ɛ ge, na yaginɛginɛgɛɛ kii yàa tee fɛɛ ni, na fara tige fyɛɛnrɛ na. Yee bɛɛri ya yaa na pinnɛ yàa na pye sanni tige nigin. 32 Mʼa geye gbaara yaha sokinnaa tige ki ceefuu li na. Taanri wa di bye ke kabanugo ke na, taanri wa di bye ke kabanugo ke bɛ na. 33 Sokinnaa tige ki geye gbaara wu bɛɛri nigin nigin ya yaa na pye ni amandi tige yasɛyɛ taanri ni, na fara yaginɛginɛgɛɛ ki na ni tige fyɛɛnrɛ te. 34 Tige ki ceefuu le, lee di bye ni amandi tige yasɛyɛ shishɛɛrɛ ni, na fara yaginɛginɛgɛɛ kee ni tige fyɛɛnrɛ ti na. 35 Yaginɛginɛrɛ nigin wa di bye geye nizhiiye shuun wu wo geshɔhɔmɔ pu ni tige ki ceefuu li na, geye shuun we wʼa taha yee na ge, la di bye yee wo geshɔhɔmɔ pu ni, la di bye yisaya wo geshɔhɔmɔ pu ni. Geye gbaara wu bɛɛri di bye ni yaginɛginɛgɛɛ ki ni yi geshɔhɔmɔ pu ni. 36 Kee yaginɛginɛgɛɛ ki fara geye yi na, yi bɛɛri di binnɛ yàa ni sokinnaa tige ki ni. Sanni nidiimɛ wo tuukunnɔgɔ nigin di shɔhɔ taga yi pinnɛ yàa. 37 Ma sokinna pɛhɛɛ gbarashuun yàa, mʼa kee teŋɛ sokinnaa tige ki geye yi bɛɛri na, kɔnhɔ pu ba le, pu kpɛɛngɛ kʼi do ɲahagbaa na. 38 Mʼa sokinnaa pu yàa yàa gbaragaae ni pu shɔɔnrɔ kuu kuu yɛrɛyɛ yi bɛ yàa ni sanni nidiimɛ ni. 39 Ma na ba sanni nidiimɛ kiloo kɛlɛɛ taanri (30) taga sokinnaa tige ke ni ki yatoyo yi bɛɛri yàa.
40 «Ayiwa Musa, sɛɛgɛ taan mʼa shɛ ye yaŋmuyɔ ye yàa cibɛ na saha ni yi tuuyo yi ni yee yemu yʼa shɛ ma na faaboboŋɔ ki na ge.»