Kilɛ ya kariɲɛɛgɛ ɲɔmɛɛ lɔ ni Izirayɛli nagoo pu ni
24
Ayiwa, a Tɛhɛnɛ Baa Kilɛ di Musa pye sanha na: «Dugi pa na yíri faaboboŋɔ ki na. Ma da ma ni Arɔn, ni Nadabu ni Abiyu ni Izirayɛli nɔhɔlɛɛ kɛlɛɛ gbarashuun (70) wu ni. Yi ba ma, yʼi ba yere laraga ni, yʼi nuguro sin, yʼi ɲahaya ye buri buri, yʼi na pɛlɛ. 2 Mu Musa yɛ nigin di fulo na na. Pusamaa ganha bu fulo wɛ. Sipyiire tisara bɛ ganha bu dugi ni ma ni faaboboŋɔ ki na wɛ.»3 Ayiwa, a Musa di shɛ Tɛhɛnɛ Baa Kilɛ wo jomɔ pe ni wu saliyaa pu bɛɛri paari sipyiire ti mu. A sipyiire ti bɛɛri di pu mujoŋɔɔ ki pinnɛ na jo: «Yemu bɛɛri Tɛhɛnɛ Baa Kilɛ ya jo ge, wù na ba yi bɛɛri koo ɲaari.»
4 Ayiwa, a Musa di Tɛhɛnɛ Baa Kilɛ wo jomɔ pu bɛɛri ka. Ɲimuguro ti na, a wu ba soo yìri na saraya tawologo ka yàa faaboboŋɔ ki fɛɛ li ni, na faakagereye kɛ ni shuun sin na saha ni Izirayɛli nagoo gbaweye kɛ ni shuun wu ni. 5 A wu xhɔ na Izirayɛli nagoo pu wo lɛvɛɛ pii pye na pu saraga nizogoŋɔ wolo Tɛhɛnɛ Baa Kilɛ mu, pʼi nupɛhɛɛ gbo pu pye ɲaɲiŋɛ saraga. 6 A Musa di yapɔrɔyɔ yi shishan pu taa niŋɛ ni, na taaga ka le yɛrɛyɛ ni, na taaga kisaŋa ɲɛrɛgi saraya tawologo ki na. 7 A wu xhɔ na kariɲɛɛgɛ ɲɔmɛɛ li wo sɛmɛ wu lɔ, na wu kalaa ni mujugbɔɔ ni sipyiire ti mu. A Izirayɛli nagoo pʼi jo: «Yemu bɛɛri Tɛhɛnɛ Baa Kilɛ ya jo ge, wèe na ba yi bɛɛri pye yi cegee na.»
8 Ayiwa, a Musa di yɛrɛyɛ yi wo shishan pu lɔ, na pu ɲɛrɛgi ɲɛrɛgi Izirayɛli nagoo pu na, na jo: «Tɛhɛnɛ Baa Kilɛ ya kariɲɛɛgɛ ɲɔmɛɛ lemu lɔ yee mu kii ɲɔmɛhɛɛ kii bɛɛri keree na ge, lee wo shishan pu ɲɛ pe.»*
9 Lee kadugo na a Musa di dugi faaboboŋɔ ki na, wu ni Arɔn, ni Nadabu, ni Abiyu, ni Izirayɛli nɔhɔlɛɛ kɛlɛɛ gbarashuun we (70). 10 A pʼi shɛ Izirayɛli wo Kilɛ wu ɲa. Wu tɔɔyɔ yi tatahaŋa ki ɲɛ ba pɛɛwa faakagereŋɛ ka ɲɛ wɛ, kemu mɛgɛ ki ɲɛ na safiiri ge. Ki ɲaha ki ɲɛ bula ɲaha kemu wo fɛfɛɛrɛ ti ɲɛ ba fugba wuyɛ pyaa wuuro ti ɲɛ-ɛ ge. 11 Ga Tɛhɛnɛ Baa Kilɛ ya ta yaaga pye Izirayɛli nagoo pu wo sipyigbɔɔ pu na wɛ. A pʼi Kilɛ ɲa. Lee kadugo na, a pʼi li, na gba.
Musa ya dugi Sinayi faaboboŋɔ na
12 Ayiwa, a Tɛhɛnɛ Baa Kilɛ di Musa pye: «Dugi pa na yíri faaboboŋɔ ki na, mʼa yere naha. Nɛ na ba faaya kɔrɔyɔ kan ma mu yemu na nɛ na saliya ni na ɲɔmɛjogoo ki ka ge, kɔnhɔ ma Izirayɛli nagoo pu kalaa yi ni.» 13 A Musa ni wu kapyebye Zhozuwe di yìri, a Musa di dugi kari Kilɛ wo faaboboŋɔ ki na. 14 A Musa di nɔhɔlɛɛ pu pye: «Yee pu wù sige naha, yani wù kuri pa ge. Ayiwa, Arɔn ni Xhuri na bye ni yi ni. Kayuu la ba bye wa mu yi ni, weefɔɔ wu nɔ pu na.» 15 Ayiwa, a Musa di dugi kari faaboboŋɔ ki na, a ɲahaŋa kʼi faaga ki tɔ. 16 A Tɛhɛnɛ Baa Kilɛ wo nɔɔrɔ wu gori yaha Sinayi faaboboŋɔ ki na. A ɲahaŋa kʼi ki tɔ cabyaa gbaara funŋɔ ni. Caŋa gbarashuun wogo ki na, na Tɛhɛnɛ Baa Kilɛ yaha ɲahaŋa ki ni a wu Musa yiri. 17 A Izirayɛli nagoo pʼi Tɛhɛnɛ Baa Kilɛ wo nɔɔrɔ wu ɲa ba na ma sori mɛ faaboboŋɔ ki na wɛ. 18 A Musa di jé ɲahaŋa ki ni, na dugi kari faaboboŋɔ ki na. A wu di caya kɛlɛɛ shishɛɛrɛ (40) ni piiye kɛlɛɛ shishɛɛrɛ (40) pye faaboboŋɔ ki na.*