Tiimɛ ni can keree
23
Ayiwa, a Tɛhɛnɛ Baa Kilɛ di Izirayɛli nagoo pu pye sanha na: «Ma ya kaa lemu can cɛ wɛ, ma ganha ba lee kaa caaga wɛ. Ma ganha ga bye sipyikuuŋɔ sɛɛri kafinɛyɛ ɲuŋɔ tàan wɛ.*2 «Ma ganha ga yaa sipyiɲɛhɛmɛɛ na yʼi kakuunɔ pye wɛ. Kaa lemu ya tii wɛ, ma ganha ga sɔɔ sipyiɲɛhɛmɛɛ mu, mʼa bye lee wo sɛɛri kayuu tɛgɛ ni wɛ.
3 «Ma ganha ga sipya wa pɔrɔŋɔ wa na kayuu tajogo ni wɛ. Ali funmɔ fɔɔ bɛ wɛ.*
4 «Mʼa pɛn sipya wemu mu ge, ma bu wee wo nù nibɛɛngɛ, kelee wu kafaŋa nibɛɛngɛ ɲa, ki sinnagaa kuruŋɔ pa wu kan. 5 Mʼa pɛn sipya wemu mu ge, ma bu wu kafaŋa ɲa kʼa to ni tuguro ni, ali ma funŋɔ bi ɲɛ ma wu tɛgɛ wɛ, shɛ wu tɛgɛ wu kafaŋa ki yɛ yirige.*
6 «Ma ganha ga funmɔ fɔɔ kaɲii shɔ wu na kayuu ni wɛ.
7 «Can ɲɛ kaa lemu bɛɛri ni wɛ, ma ganha bu sɔɔ lee na wɛ. Sipya wemu ɲɛ jaagi baa ge, kelee wemu wʼa tii ge, ma ganha ga wee wa le xu ni wɛ. Bani nɛ da ba kaɲii kan nahama fɔɔ mu wɛ. 8 Yaaga kemu ya peele kan ma mu, kɔnhɔ di ma ɲɔ fɔnhɔri ge, ma ganha ga kee ka shɔ wɛ. Bani yee yakanya ye tuuyo wa fyɛngɛrɛ waa sipya na, sipyii piimu pʼa tii ge, na pee wo ɲɔmɛhɛɛ nahana.*
9 «Nadadiinmɛ wemu wu ɲɛ ma fiige ki ni ge, ma ganha ga kawaa pye wee wa na wɛ. Lemu li wa nabɔrɔ ni ge, yiyɛ pyaa ki bɛ wa lee cɛ, bani yʼa nabɔrɔ pye toro Misira fiige ki ni.»*
Ɲiŋɛ ki wo yeeŋmɔnɔ le, ni cadɛɛngɛ ki wo keree
10 «Ma na ba ɲiŋɛ ki faani, na ki yalɔɔrɔ ti luu fo na shɛ nɔ yee gbaara na. 11 Ga yee gbarashuun wuu li na, mʼa ɲiŋɛ ki yaha ki bɛ di ŋmɔ. Yi wo shi shɛɛn piimu pu ɲɛ funmɔ fɛɛ ge, pee bɛ na ba pu wo ɲɔlige wolo ki ni. Lemu bu gori pee kadugo yíri naŋa yaaya yi na ba lee li. Lee ninunɔ yʼa da ba bye yi ɛrɛzɛn kɛrɛyɛ ye, ni yi oliviye kɛrɛyɛ yi bɛ na.*
12 «Ma na ba labye pye fo cabyaa gbaara, ga, caŋa gbarashuun wogo ki na mʼa labye wu yereŋɛ, kɔnhɔ ma nù we, ni ma kafaŋa ke, ni ma bulozhɔ wu ja we, ni ma nadadiinmɛ wu ŋmɔ.
13 «Ɲɔmɛhɛɛ kiimu bɛɛri nʼa jo yi mu ge, yi kasɛɛgɛ yaha ki na, yʼi da ki koo ɲaari. Yi ganha ga da pɛɛŋɛ yaaga katii mɛgɛ yiri wɛ. Sipya ganha ga da pɛɛŋɛ yaaga katii mɛgɛ logo bɛ yɛrɛ yi ɲɔ na wɛ.
Kaleŋɛɛ nigbɔhɔɔ taanri wu wo kodorogoo
(Ɛkizode 34:18-26 ; Dutɛrɛnɔmɛ 16:1-17)
14 «Ayiwa, yee bɛɛri kaleŋɛɛ nigbɔhɔɔ taanri yʼa da ba bye nɛ mɛgɛ na. 15 Shizhɛnhɛrɛ baa buuri kalenɛ, yi na ba lee pyi. Tɛrɛ lemu tɛhɛnɛ lʼa kɔn na shɛ yi na Abibu yeŋɛ ki ni ge, yi na ba shizhɛnhɛrɛ baa buuri wu li na ta cabyaa gbarashuun lee tɛrɛ li ni, ma na jo ba nɛ yi jo yi mu wɛ. Bani Abibu yeŋɛ ki ni yee ya foro Misira fiige ki ni. Sipya wa shishiin kewaya wo ganha bu da ba yere na ɲaha tàan lee kalenɛ li ni wɛ.* 16 Yalɔɔrɔ ti wo kalenɛ: Yi ba yapyiire temu faa pye yi kɛrɛyɛ yi ni, yi ba da tee wo yasɛyɛ nizhiiye yi ɲɔ kɔn da gɔɔn tuun bɛɛri ni, yʼi lee kalenɛ le pye. Yee li ba jíri, a yʼi tiire ti wo yasɛyɛ yi bɛɛri kemɛ, yʼi yalɔɔrɔ ti wo kalenɛ li pye.* 17 Namaa pu bɛɛri na ba yeree na ɲaha tàan tɔɔɲii taanri, yee li funŋɔ ni.
18 «Yi ganha ga shizhɛnhɛrɛ buuri taha saraga yatɔɔgɔ na di wolo gan na mu wɛ. Saraga yatɔɔyɔ xaara ti bɛ wo sìnmɛ pu ganha bu shɔn wɛ.
19 «Yi da ma ni yi shinmafomɔ wu wo shinmashiimɛ wu ni Tɛhɛnɛ Baa Kilɛ, yi Kilɛ wu wo pɛɛŋɛ puga ki ni. Wa ganha ga sikapige shɔhɔ ki nu jirimɛ ni wɛ.*»
Tɛhɛnɛ Baa Kilɛ ya ɲɔmɛɛ lɔ Izirayɛli nagoo pu mu sani pʼa gaaŋi ge
20 Ayiwa, a Tɛhɛnɛ Baa Kilɛ di Musa pye sanha na: «Nʼa da ba mɛlɛkɛ wa tun yi ɲaha na, wee na ba yi mara koo li na. Fiige kemu nɛ gbegele yi mu ge, wu na ba yi ɲaha co ma leŋɛ kee ni. 21 Yi kasɛɛgɛ yaha yiyɛ na wu ɲaha tàan, yʼi da wu ɲɔmɛɛ coni. Yi ganha ba wu kaala wɛ, bani yi bu saliya kyɛɛgi, wʼa da lee taga yi sa wɛ, ma li kaɲuŋɔ pye nɛ wo mɛgɛ ki wa wu na. 22 Ga yi ba wu ɲɔmɛɛ coni, yemu bɛɛri nɛ jo yi mu ge, na yee bɛ koo ɲaari, wee tuun wu ni yi pɛɛn pu na ba bye nɛ bɛ wo pɛɛn, piimu pʼa kashɛn kɔɔn yi na ge, nɛ bɛ na da kashɛn kɔɔn pee na. 23 Nɛ wo mɛlɛkɛ wu na ba doro yi ɲaha na, na yi leŋɛ Amɔri shi shɛɛn, ni Xhɛti shi shɛɛn, ni Ferɛzi shi shɛɛn, ni Kana shɛɛn, ni Xhɛvi shi shɛɛn, ni Zhebusi shɛɛn wo fiige ki ni. Nɛ na ba wee shi we bɛɛri kyɛɛgi. 24 Ga yi ganha bu shɛ sogolo pee wo yasunyɔ yi tàan, yʼi da yi pɛlɛ wɛ. Pɛɛŋɛ tuugo kemu pʼa byi ge, yi ganha bu shɛ kee taanni pu fɛni wɛ. Yasunyɔ yemu bɛɛri pʼa yàa ge, yʼi shɛ yee kyɛɛgi. Benɛɛ piimu bɛ pʼa bɛlɛ ge, yʼi pee bɛ kyɛɛgi. 25 Yʼi da kapyeŋɛɛ pyi Tɛhɛnɛ Baa Kilɛ, yi Kilɛ wu mu. Lee bu bye, nɛ na ba baraga le yi ni, na ɲɔlige ni logbaga kan yi mu, na yi tanha yama na. 26 Cee wa shishiin yacɛrɛ da ga gyɛɛgi ma fiige ki ni wɛ, seganha bɛ di da bye ki ni wɛ. Nɛ na ba yi shi wu caŋa ɲɛhɛɛ ki ɲɛhɛ.
27 «Ayiwa, shi wemu wu wa yi ɲaha na ge, nɛ na ba fyaara leŋɛ wee ni fo xuuni sani yi nɔ wu na ge. Xuu bɛɛri ni yʼa tigi ge, wee shi we bɛɛri na baa gbee. Yi pɛɛn pu bɛɛri na ba baa yi ɲaha na. 28 Nɛ na ba todanagereye tun yi ɲaha na, yee di shɛ Xhɛvi shi shɛɛn, ni Kana shɛɛn, ni Xhɛti shi shɛɛn pu niinɛ. 29 Ga yee nigin funŋɔ ni bɛ nʼa da ba pu kɔri niinɛ wɛ. Lee bɛ wɛ, fiige ki niwaga na gori, yacoyo na ɲɛhɛ ki ni yi fɛni. 30 Ga jɛri jɛri nʼa da da pu kɔri fo na shɛ yi pye yʼa ɲɛhɛ na nɔ fiige ki comɔ. 31 Nɛ na ba yi fiige ki tɛhɛnɛ wolo na co Suumɔ Loɲiga ki na fo na shɛ nɔ Filisiti fiige ki wo suumɔ lɔhɔ ki na. Na co Sinayi siwaga ki na fo na shɛ nɔ Efirate gba wu na. Bani nɛ na ba ke fiige ke shɛɛn le ma keŋɛ ni, ma na ba pu kɔri niinɛ. 32 Yi ganha bu kariɲɛɛgɛ ɲɔmɛɛ la shishiin lɔ ni pu ni wɛ. Yi ganha bu la shishiin lɔ ni pu yasunyɔ yi bɛ ni wɛ. 33 Yi ganha bu pu yaha pu tiin yi wo fiige ki ni wɛ. Lee bu bye, pu na ba yi pye yʼa jurumu pye. Bani yi na ba pu wo yasunyɔ yi pɛlɛ, kee ma bye yi coco-tifuugo.»