22
«Nagaa bu shɛ do piige ni wa puga na da gyɛɛgi di jé, wu bu da co, na wu kpɔn gbo. Kiiri da gɔn wu gbovɔɔ wu na wɛ. 2 Ga nagaa wu bu da co caŋa ni, na wu kpɔn gbo. Wu gbovɔɔ wu na ba jaagi. Nagaa bɛɛri wʼa yaaga yu ge, wu da kee saraa. Ki saraa wu bu bye wu ya ta wu mu wɛ, pʼi wuyɛ pyaa ki pɛrɛ taga kee yaaga ki saraa. 3 Yaaga kemu wʼa yu ge, ki ɲìi wogo bu shɛ da wu keŋɛ ni, kʼa pye nù la, kʼa pye kafaŋa la, ki shiin ya pye dubya la, kee wo tɛhɛɛ shuun wu da zaraa.Ma bu kakara pye wa mu, ma ni wuunɔ lemu wʼa yaa ge
4 «Sipya wa wo yapɔrɔyɔ bu shɛ wa wo shinma li, kelee na wu ɛrɛzɛn tiire li. Yapɔrɔyɔ yi kafɔɔ wu wa da wu wo shinma tɛgɛ ki shinma nijemɛ we kelee wu ɛrɛzɛn tiire tɛgɛ ki ɛrɛzɛn nijemɛ wu kan tɛgɛ ki kafɔɔ wu mu wu kakara ti tɛgɛ.
5 «Wa bu na le, a kʼi shɔ tahaya ya na, na shɛ wa wo shinma kuun sòrogo, kelee shinma wu nilɛxhɔgɔ, kelee shinma wu wɛrɛ wo. Na ki levɔɔ wʼa da wee shinma wu saraa.
6 «Sipya wa bu wari, kelee yaaga katii kan wa mu wu yaha. A pʼi ba ki sinnagaa yu ki yahavɔɔ wu kaban. Ki yuvɔɔ wu bu da co, ki tɛhɛɛ shuun wu da zaraa. 7 Nagaa wu bu bye wu ya ta co wɛ. Yaaga ki maravɔɔ wu shɛ yere Kilɛ ɲaha tàan, wu gàa na wee ya ta yaaga ki lɔ wɛ.
8 «Nakaara bu ɲa yaaga ka wo keree ni, kʼa pye nù la, kʼa pye kafaŋa la, kʼa pye dubya la, kʼa pye fadeŋɛ kelee yaaga tuugo bɛɛri, kemu ya piin, we di go wee wogo, we bɛ di yu wee wogo ge. Pu shuun wu bɛɛri ya yaa na shɛ yere Kilɛ ɲaha tàan. Kilɛ bu shɛ wemu jaagi, weefɔɔ di yaaga ki tɛhɛɛ shuun kan wewu mu.
9 «Sipya wa bu kafaŋa, kelee nù, kelee dubya, kelee yapɔrɔgɔ tuugo bɛɛri kaa tiiŋɛ wu sipyiɲii wa na, Kee yaaga ke ba xhu, kelee ki yatɛngɛ ka ma kɛgi, kelee pu bu ki yu na ta wa ya foro li fiin wɛ, 10 wemu na yaaga ki kaa bi tiiŋɛ ge, wee di gàa Tɛhɛnɛ Baa Kilɛ na yaaga ki kafɔɔ wu ɲii na na jo wee keŋɛ ya ta nɔ yaaga ki na wɛ. Yaaga ki kafɔɔ wu bɛ di sɔɔ kee kaaga ki na. Yaaga ki kaa ya bi tiiŋɛ wemu na ge, wee da yafiin saraa wɛ. 11 Ga yapɔrɔgɔ ki bu da kʼa yu wu puga, wu da ki foo tɔ ki kafɔɔ wu mu. 12 Yacoŋɔ bu da kʼa yapɔrɔgɔ ki co, yacoŋɔ kʼa xa na kemusaŋa yaha ge, wu kee lɔ pa zhɛ, kee na ba bye wu sɛɛri. Lee bu bye, wu da yapɔrɔgɔ ki foo tɔ wɛ.
13 «Wa bu shɛ wu sipyiɲii yapɔrɔgɔ ɲɛɛri, ki yatɛngɛ ka bu shɛ gɛgi, kelee ki ma xu, na ta ki kafɔɔ wu ɲɛ wà wɛ. Mu wemu wʼa shɛ ki ɲɛɛri ge, ma da ki foo tɔ ki kafɔɔ wu mu. 14 Ga li bu shɛ da nago kanna yapɔrɔgɔ ki kafɔɔ wu bɛ ɲii na kakara tʼa pye. Mu wemu wʼa shɛ yapɔrɔgɔ ki ɲɛɛri ge, mu da ki foo tɔ ki kafɔɔ wu mu wɛ. Yapɔrɔgɔ ki kafɔɔ wu shiin bu da wʼa bi ki kan wari ɲɔ ka ɲuŋɔ tàan, wee wari we wu da bye ki footɔnɔ.
15 «Doɲiŋɛ pushɔ wemu ɲɛ nacɛbaa, pʼi sanha wu co curɔrɔ na-ɛ ge, ná bu wee wa faanna ta, na sinnɛ ni wu ni. Wu da wu bɔri kan, na wu leŋɛ wu shɔ. 16 Cee wu to wu bye wu ya sɔɔ na wu poro wu kan wu mu wɛ, cee bɔri ɲɛ wari xakɛ wemu ge, wu na wee saraa.*
Kapyebaagaa kiimu na já xu nɔ sipya na ge
17 «Cee bɛɛri wʼa siganma pyi ge, yʼi wee gbo. Yi ganha da wu yaha wɛ.*
18 «Ná bɛɛri wʼa pinnɛ ni yapɔrɔgɔ ni ge, yʼi wee gbo.*
19 «Wa bɛɛri wʼa saraga wolo pɛɛŋɛ yaaga katii mu Tɛhɛnɛ Baa Kilɛ kadugo na ge, yʼi weefɔɔ gbo.*
Labaafɛɛ wo maragana
20 «Nadadiinmɛɛ piimu pu wa yi niŋɛ ni ge, wa ganha ga kawaa pye wee wa na, kelee na wu co bulo comɔ ni wɛ. Yi yi funyɔ kɔn li na na yee bɛ pʼa pye toro nadadiinmɛɛ Misira fiige ki ni.
21 «Wa ganha ga kawaa pye naxhugoshɔ kelee cirimɛ na wɛ. 22 Wa bu kawaa tuugo bɛɛri pye wee wa na, a wu mɛyire wá na mu, nɛ na lee mɛyire li logo. 23 Nɛ na ba luu yirige yi tàan, na yi gbo kashɛn sige ni. Yi cèe na bye naxhugoshaa, yi nagoo na bye cirimɛɛ.
24 «Nɛ wo sipyii piimu pu ɲɛ funmɔ fɛɛ yi tɛ ni ge, wa bu foo le wee wa na, wufɔɔ ganha bu ɲudahara taha foo li na ba sipyii pusamaa ya pu wo fɔhɔɔ ki leni wɛ.
25 «Ma sipyiɲii bu wu fadegbɔhɔ tiimɛ ma mu yaaga ka ɲuŋɔ tàan, yani caŋa ki to ge, shɛ ki kan wu mu. 26 Bani kee yɛ ki ɲɛ wu fatɔŋɔ. Ki bu bye kʼi ɲɛ wu mu wɛ, wʼa ba ɲaha taga wu yɛ tɔ piige na sinnɛ wɛ? Wu na ba mɛyire wá na mu, di mʼa li logo, bani ɲiɲaara fɔɔ nɛ ɲɛ.*
27 «Wa ganha ga Kilɛ shɛhɛlɛ wɛ. Wa ganha ga wu shi wu ɲahagbaa fɔɔ laŋi wɛ.
28 «Yi yalɔɔrɔ ti shinmashiimɛ we ni yi duvɛn nilɛ nizhiimɛ wemu yʼa yaa na wo na gaan nɛ mu ge, yi ganha ba wu yɛri wʼa mɔgi koo na wɛ. Yʼi da yi jashiilee pu bɛ yɛri nɛ yahama ni. 29 Yi niiyɛ yi fara yi dubyaa pu na, pu nagoo nizhiilee piimu pu ɲɛ bee ge, yʼi da pee bɛ wo yʼa gaan saraga Kilɛ mu. Pu bu se na cabyaa gbarashuun pye ni nii pu ni, caŋa gbarataanri wogo ki na yʼi pu wolo saraga na mu.
30 «Yee bɛɛri ya yaa na pye fɛɛfɛɛ. Yacoyo ya yapɔrɔgɔ kemu bɛɛri gbo ge, yi ganha bu kee ka shishiin xa wɛ. Yi kee kan puun mu.»