Buloo piimu ɲɛ Heburuu ge, pee wo saliyaa
(Dutɛrɛnɔmɛ 15:12-18)
21
Ayiwa, a Tɛhɛnɛ Baa Kilɛ di nugo Musa pye sanha na: «Pii saliyaa pii jo Izirayɛli nagoo pu mu na: 2 ‹Wa bu bulo shɔ, wʼi ɲɛ Heburu, yee gbaara kapyeŋɛɛ wa da bye ma mu bulooro ti ni. Yee gbarashuun wuu li ni mʼa wu yaha, wu bye wuyɛ wo, wʼi ganha bu yaaga katii bɛ saraa nige wɛ.* 3 Wu bu da wʼa jé bulooro ti ni wu yɛ nigin, wu yɛ nigin wu da voro. Wu bu da wu na bye ni wu shɔ ni, wu ni wu shɔ wu da voro. 4 Wu kafɔɔ wu bu da wu na bi cee kan wu mu, a wee di funaŋaa kelee fucɛɛgɛɛ se wu mu. Cee we ni nagoo pu na ba bye kafɔɔ wu wuu, ná wu na foro wu yɛ. 5 Ga bulona wuyɛ pya bu jo na wee kafɔɔ we, ni wu shɔ we, ni wu nagoo pu kaa lʼa dan wee ni, na wee funŋɔ ɲɛ wu foro, wu bye wuyɛ wo wɛ. 6 Wee tuun wu ni, wu kafɔɔ wu na Kilɛ pye wu sɛɛri, na fulo ni bulona wu ni kuɲɔɔ li gbura ki na, kelee gbeetirige ki na, na ŋmaa taga wu ɲuwɛŋɛ furi. Wee bulona wu na ba gori yaha gbee bulooro ti ni wu kafɔɔ wu mu.7 «‹Ná wa bu wu poro pushɔ pɛrɛ na pye bulozhɔ, wee bulozhɔ wu wo yahagana ni bulona yahagana da ba bye nigin wɛ. 8 Wu kafɔɔ wu bu da wʼa bi wu shɔ, na wu yaha wuyɛ pyaa di ba wu leŋɛ wu shɔ. Lee kadugo na a wu la di ba wolo wu na. Wee tuun wu ni wʼa yaa na pya wu to wu yaha wu wu ɲuŋɔ wolo. Li ya saha wu wu pɛrɛ nabuun mu wɛ. Wu bu lee pye, wʼa wu nɔhɔ yaha. 9 Wu bu da wʼa bi wu yaha wu ja kaa na. Saliya wemu wʼa teŋɛ fucɛɛgɛɛ ki shizhaa na ge, wʼa yaa na wu keree shɔɔnri na saha ni wee saliya wu ni. 10 Wu shiin bu bulozhɔ wu leŋɛ, na ba cee watii bɛ leŋɛ taha wu na. Wu ganha bu yaaga bɛ kɔn wolo, bulozhɔ wu wo ɲɔshaga ke ni wu cére fàya, ni wu tasinnɛgɛ keree ni wɛ. 11 Wu bye wu ya bulozhɔ wu funŋɔ ɲiŋɛ kii keree taanri we shizhaa na wɛ, bulozhɔ wu na já voro, na bye wuyɛ wo. Wu da yaaga bɛ saraa wɛ.›»
Ma bu kakuunɔ pye sipya na, wee saliya wu kɔngana
12 «‹Sipya wa bu sipya wa kpɔn gbo, weefɔɔ bɛ ya yaa na wu gbo.* 13 Ga li bu da nago kanna wu ya gbuuro ti ɲɔ wolo li kaa na, na ti pye wɛ, fo ti ma pye kakara Kilɛ yɛ pyaa ya temu lɔ tʼi bye ge, wee tuun wu ni, nɛ na ba talaraga ka shɛ yi na, gbuuro ti pyevɔɔ wu na ba baa na shɛ wuyɛ ŋmɔhɔ wà.* 14 Ga wa bu daa, na wu sipyiɲii peele gbo ni shizhiinmɛ ni, weefɔɔ bɛ ya yaa na wu gbo, ali wu mɛhɛ baa shɛ mara fo nɛ saraya tawologo ki na, yi shɛ wu laha, yʼi ba wu gbo.
15 «‹Sipya wemu bu wu to kelee wu nu kpɔn, weefɔɔ ya yaa na wu gbo.
16 «‹Sipya wemu bu sipya wa ŋmɔhɔ co, wʼa wu pɛrɛ la, pu shiin ya wu co ni wu ni la, wʼa yaa na wu gbo.*
17 «‹Sipya wemu bu wu to kelee wu nu shɛhɛlɛ, weefɔɔ ya yaa na wu gbo.*
18 «‹Sipyii shuun bu dun, a wa di wa kpɔn bana ni kagurogo ni kelee kagereŋɛ. Wu bye wu di ya xu wɛ, ga na sinnɛ yama pu keŋɛ ni. 19 Wu ba já yìri foro wu yɛ ni, na ɲaari ɲaari ni pubiin ni, wee tuun wu ni, yaaga ya yaa na pye wu kpɔnvɔɔ wu na wɛ. Ga wʼa tuun wemu pye yama pu na ge, kpɔnvɔɔ wʼa yaa na wee tuun wu saraa, na guri na wu wɛrɛ pye fo na wu cuuŋɔ.
20 «‹Sipya wemu bu wu bulona kelee wu bulozhɔ kpɔn ni pubiin ni fo na shɛ wu gbo, weefɔɔ ya yaa na jaagi kanhama shan wu ɲuŋɔ ni. 21 Ga bulo wu bu caŋa nigin kelee cabyaa shuun ta ɲìi na, wu kafɔɔ wu ya yaa pu jaagi kanhama shan nige wu ɲuŋɔ ni wɛ, bani wu keŋɛ naafuu wu bye bulo we.
22 «‹Namaa pii yotunwuu bu cee laawo ŋmunuŋɔ shan, a wu yacɛrɛ lʼi se na ta li seduun sanha nɔ wɛ. Latii bye lʼi ya foro lee funŋɔ ni wɛ. Cee wu poo wu bu wari ɲɔ kemu jo, a kiirikɔɔn pʼi sɔɔ kee na, kere jaagivɔɔ wʼa da gan cee wu poo wu mu. 23 Ga latii bu cee wu ta, mʼa lee foo tɔ na saha ni we saliya we ni: Ma bu wa munaa wolo, pʼa da ma munaa wolo lee wo tɛgɛ. 24 Ma bu wa ɲii ja, pʼi ma ɲii ja, ma bu wa gaan wolo, pʼi ma gaan wolo. Ma bu wa keŋɛ kɛgi, pʼi ma keŋɛ kɛgi, ma bu wa tɔɔgɔ kɛgi, pʼi ma tɔɔgɔ kɛgi.* 25 Ma bu wa fori, pʼi ma bɛ fori, ma bu wa bana, pʼi ma bɛ bana, ma bu wa kpɔn na xuu wa pye wʼa tin, pʼi ma bɛ kpɔn pu xuu wa tin ma bɛ mu lee wo tɛgɛ.
26 «‹Wa bu wu bulona kelee wu bulozhɔ kpɔn wu ɲii na fo na li ja, wʼa yaa na wee bulo wu yaha wu bye wuyɛ wo, wu ɲii li ja wu wuu na. 27 Wu shiin bu wu kpɔn fo na wu gaan nigin kɛgi wolo, wʼa yaa na wu yaha wu bye wuyɛ wo, lee gaan li wo gɛgi wu wuu na.› »
Yapɔrɔgɔ bu nɔ sipya na, wee saliya wu kɔngana
28 «‹Nù bu ná kelee cee su na gbo, wee nù wʼa yaa na wu wá gbo ni kagereye ni. Pu ganha bu wu xaara ti xa wɛ. Nù wu kafɔɔ wu wi ge, yaaga ganha bu bye wee na wɛ. 29 Ga nù wu bu da wʼa bi tee na sipyii suu, a pʼi yi jo wu kafɔɔ wu mu, wee di ya ta sɔɔ na kasɛɛgɛ yaha wu na wɛ. Wu ga ba sipya su gbo, wee nù wʼa yaa na wu wá gbo ni kagereye ni, na wu kafɔɔ wu bɛ gbo na taha wu na. 30 Ga pu bu nù wu kafɔɔ pye na wu wu munaa li ɲuŋɔ wolo, na katahana lemu bɛɛri taha wu na wu munaa li pɛrɛmɛ, lee wʼa yaa na saraa, na wu munaa li ɲuŋɔ wolo. 31 Nù wu mɛhɛ funana kelee fucɛɛrɛ bɛ su gbo, wee saliya we wʼa da ɲaari wu na. 32 Nù wu bu bulona kelee bulozhɔ su gbo, wee tuun wu ni nù wu kafɔɔ di warifyɛn tuuŋɔɔ kɛlɛɛ taanri (30) kan bulo wu kafɔɔ wu mu, pʼi nù wu wá gbo ni kagereye ni.›»
Ma bu wa keŋɛ yaaga kyɛɛgi, ma ni saliya wemu wʼa yaa ge
33 «‹Sipya wa bu wege ka ɲɔ mugi yaha, kelee na wege ka su, na ki yaha wà wu ya ki ɲɔ tɔ wɛ, wa wo nù kelee wu kafaŋa bu do ki ni, na xhu. 34 Kee yapɔrɔgɔ ki bi da wari ɲɔ kemu ta ge, wege ki kafɔɔ wu na wee wari wu kan yapɔrɔgɔ ki kafɔɔ wu mu, na yapɔrɔgɔ ki nixhugo ki lɔ.
35 «‹Sipya wa wo nù bu sipya watii wo nù su na gbo, wee nù wʼa yaa na wu pɛrɛ, na wari wu taa niiyɛ shuun wu kafɛɛ shuun wu na. Pʼa nuxugo ki bɛ wo xaara ti taa pu na. 36 Ga nù wu bu da wʼa bi tee na suu, a pʼi yi jo wu kafɔɔ wu mu wee di ya ta kasɛɛgɛ yaha wu na wɛ, wee tuun wu ni, nù wu kafɔɔ wu ma nuxugo ki tɛgɛ kan nuxugo ki kafɔɔ wu mu, na nuxugo ki lɔ.›»
Ma bu kanahana pye, ma ni saliya wemu ya yaa ge
37 «‹Sipya wa bu nù kelee dubya yu, na wu gbo kelee na wu pɛrɛ, niiyɛ kaguro wufɔɔ da daga wee nù wu foo tɔ, kelee dubyaa shishɛɛrɛ wufɔɔ da daga wee dubya wu foo tɔ.›»