Ɛkizode 20

Kilɛ ya saliya ɲɔmɛhɛɛ kɛ kan Izirayɛli mu

(Dutɛrɛnɔmɛ 5:1-21)

Wee tuun wu ni a Kilɛ di pe jomɔ pe bɛɛri jo na: 2 «Nɛ ɲɛ Tɛhɛnɛ Baa Kilɛ, ma Kilɛ we, wemu wʼa ma yeege Misira fiige ki ni, bulooro puga ki ni ge. 3 Ma ganha bu kilɛlɛɛ piitiilee yaha mayɛ mu nɛ kadugo na wɛ. 4 Ma ganha bu yapɛrɛ yàa di yaha mayɛ mu wɛ. Yaaga bɛɛri ki ɲɛ fugba we ni, kelee ɲiŋɛ ke na, kelee ɲiŋɛ ke nɔhɔdaan lɔhɔ ki ni ge, ma ganha bu kee ka shishiin wo jaa yàa di yaha mayɛ mu wɛ. 5 Ma ganha ba nuguro sinni yee ya fɛɛ ni wɛ, ma di ganha ba kapyeŋɛɛ pyi yi mu wɛ. Bani nɛ Tɛhɛnɛ Baa Kilɛ, ma Kilɛ we, nɛ ɲɛ naŋmege Kilɛ. Piimu bu nɛ kɔ, nɛ pee wo tiibaara ti gɔɔrɔ wo pu nagoo na, fo na shɛ nɔ pu sii taanri wuu ni shishɛɛrɛ wuu li na. 6 Ga nɛ kaa ba dan wemu ni, a wufɔɔ di nɛ ɲɔmɛjogoo ki bɛ mara, nɛ ma na taanɲɛɛgɛ ki shɛɛ weefɔɔ na fo na shɛ nɔ wu shi wu segee kabɔfoŋɔɔ niɲɛhɛŋɛɛ na. 7 Ma ganha ba ma Kilɛ wu mɛgɛ ki yiri ɲuŋɔ baa wɛ, bani wemu wʼa Tɛhɛnɛ Baa Kilɛ mɛgɛ ki yiri ɲuŋɔ baa ge, wu ya goroo jaagi kanhama shanbaa weefɔɔ ɲuŋɔ ni wɛ. 8 Mʼa ma funŋɔ yaha nidogo cadɛɛngɛ ki na, mʼa ki yaha Tɛhɛnɛ Baa Kilɛ mu. 9 Ma da labye pyi cabyaa gbaara funŋɔ ni, ma da ma kapyeŋɛɛ ki bɛɛri pyi. 10 Ga caŋa gbarashuun wogo ki ɲɛ cadɛɛngɛ kemu ya yaha Tɛhɛnɛ Baa Kilɛ, ma Kilɛ wu yahama ni ge. Ma ganha ba labye wa shishiin pyi kee caŋa ki na wɛ, mu fara ma ja ni ma poro pushɔ ni ma bulo ná ni ma bulozhɔ ni ma nù ni ma kafaŋa ni ma yapɔrɔyɔ yi bɛɛri ni ma nadadiinmɛ wemu wu wa ma yíri ge. 11 Bani cabyaa gbaara funŋɔ ni Tɛhɛnɛ Baa Kilɛ yʼa fugba we ni ɲiŋɛ ke ni suumɔ lɔhɔ ni ki funŋɔ yaŋmuyɔ yi bɛɛri yàa, na ŋmɔ caŋa gbarashuun wogo ki na. Lee lʼa Tɛhɛnɛ Baa Kilɛ pye wʼa baraga le cadɛɛngɛ ki ni, na ki yaha wuyɛ yahama ni. 12 Ma da ma to ni ma nu pɛlɛ, Tɛhɛnɛ Baa Kilɛ, ma Kilɛ na ba fiige kemu kan ma mu ge, kɔnhɔ ma shi caŋa ɲɛhɛɛ di ɲɛhɛ kee ni. 13 Ma ganha bu sipya gbo wɛ. 14 Ma ganha bu dɔdɔɔrɔ pye wɛ. 15 Ma ganha bu nagaara pye wɛ. 16 Ma ganha bu kafinɛyɛ taha ma sipyiɲii na wɛ. 17 Ma ɲii ganha bu foro ma sipyiɲii puga fɛni wɛ. Ma ɲii ganha bu foro ma sipyiɲii shɔ fɛni, kelee wu bulona, kelee wu bulozhɔ, kelee wu nù, kelee wu kafaŋa, kelee wu keŋɛ yaŋmuŋɔ ka shishiin fɛni wɛ.»

18 Sipyiire ti bɛɛri bi Kilɛ-sɛlɛŋɛɛ kee ni maga ki mɛɛ li nuri, na Kilɛ-ɲiŋɛɛ kee ni wuriluu li ɲaa faaboboŋɔ ki na. Tuun wemu ni pʼa yee ɲa ge, a pʼi fya fo na jɛlɛ, na yere laraga ni. 19 A pʼi Musa pye: «Mu wʼa yu ni wèe ni, wèe na da nuri ma ɲɔ na, ga Kilɛ yɛ pyaa ganha ba yu ni wèe ni wɛ, lee bɛ wɛ wù na xhuu.» 20 A Musa di sipyiire ti pye: «Yi ganha fya wɛ, bani Kilɛ ya pa yee pɛrɛgi wii, kɔnhɔ wu ɲìi fyaara di bye yi zɔlɔɔ pu na, lee di yi ɲaha kɔn jurumu bye na.» 21 Ayiwa, a sipyiire tʼi yere laraga ni. Ga a Musa di fulo ɲahaŋa niwɔhɔŋɔ ki na, kee kemu ni Tɛhɛnɛ Baa Kilɛ bye ge.

Kilɛ ya saliya wemu teŋɛ saraya tawoloyo yi shizhaa na ge

22 Ayiwa, a Tɛhɛnɛ Baa Kilɛ di Musa pye: «Yi jo Izirayɛli nagoo pu mu na nɛ jo na: ‹Yʼa li ɲa nʼa jo ni yi ni ma na yaha fugba wu ni. 23 Yi ganha bu da pɛɛŋɛ yaaga ka shishiin yàa yiyɛ mu ni warifyɛn kelee ni sanni ni wɛ. Yi ganha bu da pɛɛŋɛ yaaga ka shishiin fara nɛ na wɛ. 24 Yʼi ba saraya tawologo ka yàa na mu ni puuro ni. Yi na ba yi dubyaa ni yi niiyɛ yi wo saraya nizogoyo ye ni ɲaɲiŋɛ saraya yi wo kee ɲuŋɔ ni. Nɛ ba nayɛ shɛ xuu wemu bɛɛri ni, nɛ na ba baraga le yi ni wee xuu wu ni. 25 Yi ba da saraya tawologo yereŋɛ na mu ni faakagereye ni, yi ganha bu yi tɛ wɛ, bani yi bu ceregee taga yi tɛ yi da nɔhɔ. 26 Yi ganha bu saraya tawologo yàa, yʼi taduguŋɔ yàa ki na wɛ. Kɔnhɔ wa ganha bu ba ki dugivɔɔ ceepile wo ɲa wɛ.› »