Musa ya sipyiire ti gbegele pʼi shɛ Kilɛ ɲuŋɔ círi Sinayi faaboboŋɔ ki na
19
Izirayɛli nagoo pu na foro Misira fiige ki ni, li yeŋɛ taanri wogo ki cabishiinɛ li na pʼa nɔ Sinayi siwaga ki ni. 2 Ɛrɛfidimu ni pʼa yìri, na nɔ Sinayi siwaga ki ni. Ba pʼa nɔ wà wɛ, na pu buguloo pu sin sin sipoŋɔ ki ni, faaboboŋɔ ki ɲahatiimɛ pu ni. 3 A Musa di dugi na kari Kilɛ yíri. A Tɛhɛnɛ Baa Kilɛ di diin faaboboŋɔ ki ɲuŋɔ ni na Musa yiri na wu pye: «Yi jo Yakuba wo puga ki mu, Izirayɛli nagoo pee, 4 na le nɛ pye Misira shɛɛn pu na, na yee lɔ na pa nayɛ yíri ba ɲaa ya wu nagoo luu wɛ ge, yee ya lee ɲa. 5 Nimɛ, yi bu na ɲɔmɛɛ co, na na kariɲɛɛgɛ ɲɔmɛɛ† li mara, yi na ba bye nɛyɛ pyaa wuu na toro shi wusama bɛɛri na, bani ɲiŋɛ ki bɛɛri ɲɛ nɛ wogo.* 6 Nɛ na ba yi pye saraya ɲaha shɔɔnrivɛɛ ɲuŋɔfɛɛ shi wusama bɛɛri mu, na yi teŋɛ na wo saanra ti ni, na yi gbegele yaha nayɛ yahama ni. Shɛ pee jomɔ pe jo Izirayɛli nagoo pu mu.»* 7 A Musa di ba nɔhɔlɛɛ pu bɛɛri pinnɛ, Tɛhɛnɛ Baa Kilɛ ya jomɔ pemu jo wu mu ge, na pee bɛɛri jo pu mu. 8 A sipyiire ti bɛɛri di wu ɲɔ shɔ na: «Tɛhɛnɛ Baa Kilɛ ya yemu jo ge, wù na ba lee bɛɛri pye.» A Musa di sipyiire ti kafila wu tɛrɛŋɛ kan Kafɔɔ mu.9 A Tɛhɛnɛ Baa Kilɛ di Musa pye: «Nʼa da ba ba ma mu ɲahaŋa niwɔhɔŋɔ ka ni, kɔnhɔ di ba yu ni ma ni tuun wemu ni, sipyiire tʼi da na mujuu li nuri, pu da daa ma na tuun bɛɛri ni.» A Musa di sipyiire ti wo nijoyo yi jo Tɛhɛnɛ Baa Kilɛ mu.
10 A Tɛhɛnɛ Baa Kilɛ di Musa pye: «Tige shɛ sanha sipyiire ti yíri mʼa shɛ ti pye fɛɛfɛɛ niɲaa ni ɲiga, na pʼi pu fàya yi bɛ je. 11 Na pʼi puyɛ gbegele wá caŋa taanri wogo ki na, bani caŋa taanri wogo ki na, Tɛhɛnɛ Baa Kilɛ wuyɛ pyaa wa da ba digi na pa Sinayi faaboboŋɔ ki na sipyiire ti bɛɛri ɲii na. 12 Mʼa tɛhɛnɛ kɔn ma faaboboŋɔ ki bɛɛri maha, mʼa lee shɛ sipyii pu na. Mʼa yi jo waha pu mu na pʼa puyɛ kasɛri, na wa shishiin ganha bu lee tɛhɛnɛ li kɔn ɲɛri di dugi faaga ki na, kelee di gbɔn bɛ ki na wɛ. Wa bɛɛri wʼa kpɔn ki na ge, pu na weefɔɔ gbo.* 13 Wa shishiin ganha bu gbɔn wufɔɔ na wɛ, ga yʼi wufɔɔ wá gbo ni kagereye ni, kelee na ŋmaga taga wu su furi. Wʼa pye sipya la, ki shiin ya pye yapɔrɔgɔ la, ki shi tuugo ya yaa na ki yaha ɲii na wɛ. Maga ki mɛɛ li ba foro tuun wemu ni, wee tuun wu yɛ ni pii wa da já vulo faaboboŋɔ ki na.»
14 Ayiwa, a Musa di digi faaboboŋɔ ki na, na pa sipyiire ti yíri. A wu ba pu pye na pu puyɛ pye fɛɛfɛɛ, na pʼi pu fàya yi bɛ jé. 15 Lee kadugo na a wu sipyiire ti pye sanha na: «Yi yiyɛ gbegele wá ɲigabudoro na, na co niɲaa na na shɛ nɔ ɲigabudoro na, wa shishiin ganha bu fulo wu shɔ na wɛ.»
Tɛhɛnɛ Baa Kilɛ ya tigi Sinayi faaboboŋɔ ki na
16 Caŋa taanri wogo ki ɲisɔɔgɔ ki na, a Kilɛ-sɛlɛŋɛɛ ni Kilɛ-ɲiŋɛɛ di ganha na fòro. A ɲahaŋa niwɔhɔŋɔ ka di ba faaboboŋɔ ki tɔ. A maga mɛɛ nigbɔɔ la di foro xuuni. A buguro ti sipyii pu bɛɛri di ganha na jɛlɛ. 17 Wee tuun wu ni a Musa di sipyiire ti bɛɛri yeege buguro ti na na shɛ Kilɛ ɲuŋɔ círi, a pʼi shɛ yere faaboboŋɔ ki kabanugo. 18 A Tɛhɛnɛ Baa Kilɛ di digi na niŋɛ ni Sinayi faaboboŋɔ ki na, a ki bɛɛri di bye wurege. Kee wurege kʼa bi duri ba kanra wurege ɲɛ wɛ. A faaboboŋɔ ki bɛɛri di jɛlɛ fo xuuni. 19 A maga ki mɛɛ lʼi ganha na duri na se. A Musa di ganha na yu, Kilɛ di wu ɲɔ shuu ni mujugbɔɔ ni. 20 A Tɛhɛnɛ Baa Kilɛ di digi mu lee tigigana li na Sinayi faaboboŋɔ ki ɲidii li ni. A wu Musa yiri, a Musa di dugi kari wu yíri. 21 A Tɛhɛnɛ Baa Kilɛ di Musa pye: «Tigi mʼa shɛ yi jo waha sipyiire ti mu, na pu ganha bu da gburogi pʼi tɛhɛnɛ li kɔn ɲɛri na nɛ pʼa ma ba wii wɛ dɛ! Lee bu bye, pu niɲɛhɛmɛɛ na xhuu. 22 Ali saraya ɲaha shɔɔnrivɛɛ piimu bɛ pʼa fuloo nɛ na ge, na pu bɛ pu puyɛ pye fɛɛfɛɛ, lee bɛ wɛ, nɛ na ba pu bɛ gbo.» 23 A Musa di Tɛhɛnɛ Baa Kilɛ pye: «Sipyii pu wa da ga gbara pu dugi Sinayi faaboboŋɔ ki na wɛ, bani muyɛ pyaa kʼa yi jo na yi waha wèe mu na nɛ wu tɛhɛnɛ kɔn di faaga ki maha, na wa shishiin ganha bu lee kɔn wɛ.» 24 A Tɛhɛnɛ Baa Kilɛ di guri Musa pye: «Tigi shɛ, kadugo tàan, ma ni Arɔn di binnɛ dugi pa. Ga na saraya ɲaha shɔɔnrivɛɛ pee ni sipyiire tisara ganha da gburogi pʼi tɛhɛnɛ li kɔn ye, pʼi fulo na na wɛ dɛ! Lee bɛ wɛ, nɛ na pu gbo.» 25 A Musa di digi kari sipyiire ti yíri, na shɛ yee ɲaha jo pu mu.