Musa yafɛna Zhetoro ya shɛ foro wu na
18
Ayiwa, Tɛhɛnɛ Baa Kilɛ ya lemu bɛɛri pye wu wo sipyii pu mu, Musa ni Izirayɛli nagoo pu ge, Musa yafɛna Zhetoro bi yee bɛɛri logo. Saraya ɲaha shɔɔnrivɔɔ wu bye wii Majan fiige ki ni. Tɛhɛnɛ Baa Kilɛ ya Izirayɛli nagoo pu yeege yeegegana lemu bɛ na Misira fiige ki ni ge, Zhetoro bi yee bɛ logo. 2 Lee bi Musa ta wʼa wu shɔ Sefora yaha kari wu to Zhetoro yíri. Ayiwa, Zhetoro ya gaaŋi ge, na Sefora 3 ni wu jalaa shuun wu bɛ lɔ na kari. Musa bi jashiimɛ wu mɛgɛ le na Geresɔmu, lee kɔ́ri wu ɲɛ na nadadiinmɛ wake. Bani Musa bi jo: «Nadadiinmɛ nɛ ɲɛ fiige katii ni.» 4 Shuun wo wu wi ge, wu bi wee mɛgɛ le na Eliyezɛri, lee kɔ́ri wu ɲɛ na Kilɛ wu ɲɛ nɛ tɛgɛvɔɔ. Bani Musa bi jo: «Nɛ to wu wo Kilɛ wʼa nɛ tɛgɛ, na na shɔ Farawɔn wo ŋmɔpara li na.»5 A Musa yafɛna Zhetoro di ba ni Musa shɔ ni wu jalaa pu ni Musa yíri siwaga ki ni, wu buguro ti na, Kilɛ wo faaboboŋɔ ki kabanugo. 6 A wu te tuduro te yaha shɛ jo Musa mu na: «Nɛ Zhetoro, ma yafɛna we, nʼa pa di ba foro ma na ni ma shɔ wu ni wu jalaa shuun wu ni.»
7 A Musa di foro na shɛ wu yafɛna wu ɲuŋɔ círi. A wu shɛ nuguro sin wu fɛɛ ni, na wu ɲɔ sɔn sɔn. A pʼi puyɛ shaari, na jé Musa wo fàya puga ki ni. 8 Tɛhɛnɛ Baa Kilɛ ya lemu bɛɛri pye Farawɔn ni Misira shɛɛn pu na Izirayɛli nagoo pu kaa na ge, ni Izirayɛli ya kanha kanhagana lemu na koo li na ge, ni Tɛhɛnɛ Baa Kilɛ ya pu shɔ shɔgana lemu na ge, a Musa di yee bɛɛri paari wu yafɛna wu mu. 9 Tɛhɛnɛ Baa Kilɛ ya saama pemu bɛɛri pye Izirayɛli nagoo pu na, na pu shɔ Misira shiin wo fanha ki na ge, a lee di sii tàan Zhetoro ni. 10 A Zhetoro di jo: «Tɛhɛnɛ Baa Kilɛ wʼa sɔni, wee wemu wʼa yee shɔ Misira shɛɛn pee ni Farawɔn na ge. Wʼa wu sipyii pu shɔ Misira shɛɛn wo bulooro ti na. 11 Nɛ li cɛ nimɛ jo Tɛhɛnɛ Baa Kilɛ wʼa pɛlɛ pɛɛŋɛ yaŋmuyɔ yisaya bɛɛri na, bani tuun wemu ni Izirayɛli nagoo pu ɲaa wʼa pa bɛlɛ fo na doro ge, wee tuun wu ni wʼa lee shɛ.» 12 A Musa yafɛna Zhetoro di saraga nizogoŋɔ, ni ɲaɲiŋɛ saraga wolo kan Tɛhɛnɛ Baa Kilɛ mu. A Arɔn ni Izirayɛli nɔhɔlɛɛ pu bɛɛri di ba binnɛ kee saraga ki li ni Zhetoro ni Tɛhɛnɛ Baa Kilɛ ɲaha tàan.
Zhetoro ya Musa yɛri
(Dutɛrɛnɔmɛ 1:9-18)
13 Ɲimuguro ti na, a Musa di shɛ diin na sipyiire ti kiiri wu kɔɔn. A sipyiire tʼi yere Musa ɲahagbaa na na co caŋa ki nɔhɔ kɔnduun wu na, fo na shɛ nɔ yakoŋɔ ki na. 14 Lemu bɛɛri Musa bi byi sipyiire ti mu ge, ba wu yafɛna wʼa lee ɲa wɛ, na jo: «Ɲaha na mu di labye wu pyi le pyegana le na wɛ? Mayɛ nigin mu mʼa diin mɛ, sipyiire tisara bɛɛri na ba yere mu ɲaha tàan ma lɔ ɲisɔɔgɔ ki na fo na shɛ caŋa ki xɔ.»
15 A Musa di jo: «Sipyiire ti wa ma nɛ mu na ma na Tɛhɛnɛ Baa Kilɛ yegee. 16 Kaa la bu jé pii tɛ ni, pʼa ba nɛ mu, nɛ ma ba kiiri wu kɔn. Nɛ ma Kilɛ wo ɲɔmɛjogoo kee ni Kilɛ wo saliya wu shɛ pu na.»
17 Ayiwa, a Musa yafɛna wu wu pye: «Lemu mu wa byi ge, lee ya ɲɔ wɛ. 18 Ma da ba mayɛ fanha xɔ, mʼa pii sipyii pii bɛ fanha xɔ. Bani labye wu fanha kʼa ɲɛhɛ mu na. Mu da ga já wu na ma yɛ nigin wɛ. 19 Niwegee shan nimɛ mʼa na kafila wu logo, yɛrɛ le nʼa da ba gan ma mu ge, ma bu li logo, Kilɛ na bye ni ma ni. Mu ya yaa na pye Kilɛ ni sipyii pu tɛ ni, ma da pu keree ki yu wu mu. 20 Ta pu taanni Kilɛ wo ɲɔmɛjogoo kee ni saliya wu ni. Pʼa yaa na ɲaari ɲaarigana lemu na, na keree kiimu pyi ge, ma da kee bɛ shɛɛ pu na. 21 Mʼa namaa pʼi ɲaha bulo sipyiire ti tɛ ni piimu ɲɛ fungɔnyɔ fɛɛ ge, piimu ɲɛ Kilɛ ɲìi fyaara fɛɛ, can di dan pu ni, pʼi ya gbara kawuriye na-ɛ ge. Mʼa pee teŋɛ sipyiire ti ɲuŋɔ ni ma pye sipyii kabɔfoŋɔɔ nigin nigin (1.000) ɲuŋɔfɛɛ ni sipyii xhuu nigin nigin (100) ɲuŋɔfɛɛ ni sipyii kɛlɛɛ kaguro kaguro (50) ɲuŋɔfɛɛ ni sipyii kɛ kɛ ɲuŋɔfɛɛ. 22 Pee na ba sipyii pu wo kiiri keree ki ɲaha shɔɔnri tuun bɛɛri ni. Pu na ba ma ni kagbɔhɔɔ ki ni ma mu, ga puyɛ pyaa di da kafɛnhɛfɛnhɛŋɛɛ ki shɔɔnri. Mʼa la wolo ma ɲuŋɔ tuguro ti ni, pee di ma tɛgɛ ti lɔ na. 23 Ma ba lee pyi na saha ni Tɛhɛnɛ Baa Kilɛ wo ɲɔmɛjogoo ki ni, ma na ba já lee pye na li ɲɔ fa na ta ma ya kanha wɛ. Sipyiire ti bɛ na guri kari puga ni fundanga ni.»
24 A Musa di sɔɔ wu yafɛna wu woyo yi na, na wu kafila jo wu bɛɛri koo ɲaari. 25 A wu fungɔnyɔ fɛɛ pii shɔɔnri Izirayɛli nagoo pu ni, na pee pye ɲuŋɔfɛɛ. A pii di bye sipyii kabɔfoŋɔɔ nigin nigin (1.000) ɲuŋɔfɛɛ, a pii di bye xhuu nigin nigin (100) ɲuŋɔfɛɛ, a pii di bye kɛlɛɛ kaguro kaguro (50) ɲuŋɔfɛɛ, a pii bɛ di bye sipyii kɛ kɛ ɲuŋɔfɛɛ. 26 Pee bi sipyiire ti kiiri wu kɔɔn tuun bɛɛri ni. Kaa lemu bu bɛlɛ ye pu na, pʼa shɛ ni lee ni Musa mu. Ga kafɛnhɛfɛnhɛŋɛɛ kisaŋaa kunni puyɛ pyaa ki bi kee shɔɔnri. 27 A Musa di koo kan wu yafɛna wu mu, a wu guri kari pu fiige ni.