Lɔhɔ ya foro faaga ka ni
17
A Izirayɛli nagoo pu bɛɛri di yìri Sɛni siwaga ki ni na gaaŋi. A pʼi ganha na yeree na gaaŋi na saha ni Tɛhɛnɛ Baa Kilɛ wo ɲɔmɛjuu li ni. Ba pʼa shɛ nɔ Ɛrɛfidimu ni wɛ, na pu fàya piyɛyɛ yi sin wà, ga pu ya logbaga ta wà wɛ. 2 Wee tuun wu ni a sipyii pʼi ganha na zhaa da dunni ni Musa ni. A pʼi jo: «Logbaga kan wù mu, wù gba.» A Musa di pu pye: «Ɲaha na yʼi wa zhaa da dunni ni na ni wɛ? Ɲaha na yʼi wa Tɛhɛnɛ Baa Kilɛ ɲɔ yegee wɛ?» 3 Waga kʼa bi shɔ sipyiire ti ni wee xuu wu ni, a pʼi jo shan Musa ni na: «Ɲaha su su kʼa mu pye mu ya wèe lɔ yeege Misira fiige ki ni, wèe ni wù nagoo ni wù yatɔɔyɔ, di ba gan waga mu ki gbo naha wɛ?» 4 A Musa di mujugbɔɔ wá Tɛhɛnɛ Baa Kilɛ mu na: «Cogana lekɛ na nɛ da yaa na pii sipyii pii co wɛ? Jɛɛrɛ yɛ lʼa fɔ pʼi na wá ni kagereye ni.» 5 A Tɛhɛnɛ Baa Kilɛ di Musa pye: «Toro sipyiire ti ɲahagbaa na, mʼa Izirayɛli nɔhɔlɛɛ pii lɔ ma fara mayɛ na, pubiin lemu ni mʼa gba lɔhɔ ki kpɔn ge, mʼa lee bɛ co ma keŋɛ ki ni. 6 Nɛ na ba yere ma ɲahagbaa na Orɛbu faaboboŋɔ ki na, mʼa shɛ kee faaboboŋɔ ki kpɔn. Lɔhɔ na voro ki ni sipyiire ti na gba.» A Musa di li pye mu Izirayɛli nɔhɔlɛɛ pu ɲii na. 7 A Musa di wee xuu wu mɛgɛ le na Masa (lee kɔ́ri ɲɛ ɲɔyegere) ni Mɛriba (lee kɔ́ri ɲɛ yogo). Bani wee xuu wu ni Izirayɛli nagoo pʼa yogo kɔn Musa na, na Tɛhɛnɛ Baa Kilɛ ɲɔ yege, bani pʼa jo na: «Tɛhɛnɛ Baa Kilɛ wa wèe niŋɛ ni laa, kelee wu wa wɛ?»Amalɛki nagoo pu ya ta se ta wɛ
8 Caŋa ka Amalɛki nagoo pʼa pa kashɛn kɔn Izirayɛli nagoo pu na Ɛrɛfidimu ni. 9 Wee tuun wu ni a Musa di Zhozuwe pye: «Namaa pii shɔɔnri wù shɛ kashɛn ki ŋmɔ ni Amalɛki nagoo pu ni. Nʼa da ba shɛ dugi yere faaboboŋɔ ki ɲidii ni ɲiga na ni Kilɛ wo pubiin li ni na keŋɛ ni.» 10 A Zhozuwe di kashɛn ki ŋmɔ ni Amalɛki nagoo pu ni ba Musa ya yi jo wu mu wɛ. A Musa ni Arɔn ni Xhuri di dugi faaboboŋɔ ki ɲidii li ni. 11 Musa bu wu keye yi yirige, Izirayɛli nagoo pu na fanha ta Amalɛki na, ga Musa bu wu keye yi tirige, Amalɛki nagoo pu na fanha ta Izirayɛli na. 12 Ayiwa a Musa keye yʼi sii pa waha wu na, a pʼi kagereŋɛ ka lɔ yaha wu tàan a wu diin kee na. Arɔn ni Xhuri, a pee di wu keye yi co yirige, nigin wa bye kabanugo ka na, wa bɛ di ɲɛ ka na, fo na shɛ caŋa ki to Musa keye yi ya tirige wɛ. 13 A Zhozuwe di se ta Amalɛki shi wu na ni ŋmɔpara ni.
14 A Tɛhɛnɛ Baa Kilɛ di Musa pye: «Ye bɛɛri ka, kɔnhɔ yi ganha ba ɲaha wɔ yi na wɛ. Mʼa yi jo Zhozuwe mu na nɛ na ba Amalɛki shi wu tɔ fɛɛfɛɛ fo sipya bɛ funŋɔ da ba dun ni wu ni ke ɲiŋɛ ke na wɛ.»*
15 A Musa di saraya tawologo ka yereŋɛ wà, na kee mɛgɛ le na Adonayi Nisi (Lee kɔri ɲɛ na Tɛhɛnɛ Baa Kilɛ wu ɲɛ nɛ wo jurɔjɔ we.) 16 A wu nugo jo sanha na: «Ni Amalɛki shi wu dʼa sɔɔ na ba do Tɛhɛnɛ Baa Kilɛ wo saanra koo li na, lee na Tɛhɛnɛ Baa Kilɛ wa da ba yogo kɔɔn pu na fo gbee.»