Ɛkizode 16

Izirayɛli nagoo pʼa piin jo Sɛni siwaga ki ni

Caŋa ka Izirayɛli nagoo pu bɛɛri ya pa foro Elimu ni na shɛ nɔ Sɛni siwaga ki ni. Wee xuu wu ɲɛ Elimu ni Sinayi tɛ wu ni. Pʼa nɔ wà yee li yeŋɛ shuun wogo ki cabyaa kɛ ni kaguro wogo ki caŋa ke, pu na foro xɔ Misira fiige ki ni. 2 Ma Izirayɛli nagoo pu yaha wee xuu wu ni, a pʼi ganha na Musa ni Arɔn yɔhɔyɔhɔ siwaga ki ni. 3 Izirayɛli nagoo ya pu pye: «Ali Tɛhɛnɛ Baa Kilɛ da bi wèe gbo Misira fiige ki ni, lee ya bi pɔrɔ wèe mu. Wèe nidɛɛnyɛ yi bye wà xaara shɔhɔɔ ki tàan, na buuri li wù ligana na. Yee kunni ya pa ni wèe ni ke siwaga ke ni, kɔnhɔ yi ba xuugo taga ke ceborogo ke bɛɛri ɲuŋɔ tugo naha.»

Maanɛ we ni shazhɛɛyɛ yi keree

4 Ayiwa, a Tɛhɛnɛ Baa Kilɛ di Musa pye: «Nʼa da ba yalige tirige yee mu na yìri fugba we ni ba zanha ɲɛ wɛ. Sipyiire ti na ba fòro ki fɛni, na pu ɲiga bɛɛri wo ɲɔlige kori. Nɛ na ba pu taanna wii pu bu da pu na da ba nɛ wo saliya wu koo ɲaari, kelee pu shiin bu da pu da ba wu koo ɲaari wɛ. 5 Cewuu li caŋa gbaara wogo ki ba nɔ, ɲɔlige kemu pʼa tee na luu caŋa bɛɛri ge, pʼi kee tɛhɛɛ shuun lɔ kee caŋa, pʼi shɛ kee shɔhɔ.»

6 A Musa ni Arɔn di Izirayɛli nagoo pu bɛɛri pye: «Niɲaa yakoŋɔ yee da ba li cɛ na Tɛhɛnɛ Baa Kilɛ wʼa yee yeege Misira fiige ki ni. 7 Ɲiga ɲisɔɔgɔ na yʼa da ba Tɛhɛnɛ Baa Kilɛ wo nɔɔrɔ wu ɲa, bani wʼa yee yɔhɔyɔhɔ wu logo, yee ya wemu pye wu na ge. Wèe pi ge, jɔgɔ yɛ wèe di ɲɛ fo yee pu na yʼa wèe yɔhɔyɔhɔ wɛ?» 8 A Musa di jo: «Xaara Tɛhɛnɛ Baa Kilɛ wʼa da ba gan yee mu yee pu xa yakoŋɔ ke ni, na yalige kan yee mu ɲiga ɲisɔɔgɔ na, yee na li na din. Bani Tɛhɛnɛ Baa Kilɛ ya yee yɔhɔyɔhɔ wu logo, yee ya wemu pye wu na ge. Wèe pi ge, ɲaha wèe di ɲɛ wɛ? Yee ya ta wèe yɔhɔyɔhɔ woo, Tɛhɛnɛ Baa Kilɛ yi wa yɔhɔyɔhɔ.»

9 A Musa di Arɔn pye sanha na: «Yi jo Izirayɛli nagoo pu bɛɛri mu na pu fulo Tɛhɛnɛ Baa Kilɛ na, bani wʼa pu yɔhɔyɔhɔ wu logo.» 10 Na Arɔn yaha wu na yu ni Izirayɛli nagoo pu ni, a pʼi ba binnɛ Tɛhɛnɛ Baa Kilɛ wo nɔɔrɔ wu ɲa ɲahaŋa ni siwaga ki kacɛ ki na.

11 A Tɛhɛnɛ Baa Kilɛ di Musa pye: 12 «Izirayɛli nagoo pʼa mu yɔhɔyɔhɔ ge, nɛ yi logo. Shɛ yi jo pu mu na xaara pʼa da ba xha cadogo ke na, na yalige li pu ligana na ɲiga ɲisɔɔgɔ na. Lee na yʼa da ba li cɛ na nɛ wu ɲɛ Tɛhɛnɛ Baa Kilɛ, yee wo Kilɛ we.» 13 Kee yakoŋɔ kiyɛ pyaa ni a shazhɛɛyɛ di ba, na ba buguro ti bɛɛri tɔ. Ɲimuguro ti na a mɛŋɛ di gbɔn na buguro ti bɛɛri shuu. 14 Ba mɛŋɛ kʼa wo wɛ, a yaŋmurɔ ta di bye ɲiŋɛ ki na siwaga ki ni wà. Tee bi cɛ́rɛ ba zanha kagereye ɲɛ wɛ. 15 A Izirayɛli nagoo pʼi tee ɲa na puyɛ pye na: «Ɲaha ki ɲɛ kii wɛ?» Pʼa bi tee yaŋmurɔ ti cɛ wɛ. A Musa di pu pye na: «Tɛhɛnɛ Baa Kilɛ wʼa yalige kemu kan yee mu yi li ge, kee ki wa.» 16 Yemu Tɛhɛnɛ Baa Kilɛ ya jo ge, yee yi wa mɛ: «Wa bɛɛri wu shɛ wu ɲɔlige kuu. Sipyii piimu pu ɲɛ ma puga ge, mʼa pee wo ɲɔlige kuu, shɛn nigin bɛɛri yataanga ki ɲìi shishɛɛrɛ shishiin.»

17 Ayiwa, a Izirayɛli nagoo pʼi li pye mu. A pʼi di niɲɛhɛmɛ kuu, a pʼi di nifɛnhɛŋɛɛ kuu. 18 Ga ba pʼa pa yataanga ki le wu ni na wu taanna wɛ, piimu pʼa niɲɛhɛmɛ wu kuu ge, yaaga ya ta kori pee mu wɛ. Piimu pʼa nifɛnhɛŋɛɛ kuu ge, pee bɛ wo wʼi ya ta xuuŋɔ wɛ. Wa bɛɛri bi ta wʼa wu caŋa ɲii wo ɲɔlige lɔ. 19 A Musa di pu pye: «Wa shishiin ganha bu yaaga yaha ki shɔn wu wo yalige ki ni wɛ.» 20 Ga a pii di bye pu ya Musa ɲɔmɛɛ co wɛ, na pu wo yalige ka yaha ɲisɔɔgɔ sige. A fyɛɛnrɛ di jé ki ni, a ki nugo di ganha na fòro. A Musa luu di yìri pu tàan. 21 Na co kee caŋa ki na, ɲisɔɔgɔ bɛɛri, pʼa shɛ kee caŋa ki wo ɲɔlige kuu. Ba caŋa kʼa yìri dugi wɛ, kisaŋa ma ɲa.

22 Ayiwa, ba cewuu li caŋa gbaara wogo kʼa nɔ wɛ, a pʼi shɛ ɲɔliye shuun kuu. A pʼi yataanga ki ɲìi gbarataanri taanri shishiin kuu pu wo sipyii pu bɛɛri nigin nigin mu. A sipyiire ti ɲahagbaa fɛɛ pʼi shɛ yee jo Musa mu. 23 A Musa di jo: «Go yee Tɛhɛnɛ Baa Kilɛ ya jo. Ɲiga ki wa cadɛɛngɛ ke, caŋa kemu kʼa yaha Tɛhɛnɛ Baa Kilɛ wo yahama ni ge. Yi la ɲɛ yʼi yaaga kemu kaa ge, yi kee kaa niɲaa. Yi la ɲɛ yʼi yaaga kemu taha ge, yi kee taha niɲaa. Yʼi niɲaa wo ɲɔlige wolo ki ni, yʼi kisaŋa yaha ɲiga ɲaha na.» 24 A pʼi ka yaha ɲimuguro ti ɲaha na ba Musa ya yi jo pu mu wɛ. Kee nugo ya ta foro wɛ, fyɛɛnrɛ bɛ di ya jé ki ni wɛ. 25 A Musa di pu pye: «Yalige kemu yi da yaha taɲaa ge, yi kee li niɲaa. Bani niɲaa ɲɛ cadɛɛngɛ, caŋa kemu ya yaha Tɛhɛnɛ Baa Kilɛ wo yahama ni ge. Yi wa da ba yaaga ta niɲaa sizaya yi ni wɛ. 26 Yi na ba cewuu li cabyaa gbaara wu bɛɛri pye na wu kori, ga caŋa gbarashuun wogo ke, kee ɲɛ cadɛɛngɛ ke, yi wa da ba yaaga ta kee caŋa wɛ.»

27 Ga lee bɛ na, cewuu li caŋa gbarashuun wogo ki na, a pʼi di foro na pu da zhɛ wa kuu, pu ya yafiin bɛ ta wɛ. 28 Wee tuun wu ni a Tɛhɛnɛ Baa Kilɛ di Musa pye: «Yee na ba nɛ wo ɲɔmɛjogoo kee, ni na saliya wu shege fo na shɛ nɔ tuun wekɛ na wɛ? 29 Yi li cɛ fiinŋɛ na nɛ cadɛɛngɛ ki kan yee mu kɔnhɔ yʼi da ŋmɔni. Lee shiin wuu na nɛ ma ɲɔliye shuun kan yee mu caŋa gbaara wogo ki na. Wee tuun wu ni yi bɛɛri pu pa diin yi piyɛyɛ caŋa gbarashuun wogo ki na, wa shishiin ganha bu foro wɛ.»

30 Lee ya pye mu ge, a sipyiire tʼi na na ŋmɔni caŋa gbarashuun wogo ki na.

31 A Izirayɛli nagoo pʼi kee yalige ki mɛgɛ le na maanɛ†. Wʼa foro kalapya fɛni, na fiinŋɛ na daan ba sɛrɛ mahaliigee ɲɛ wɛ.

32 A Musa di jo: «Tɛhɛnɛ Baa Kilɛ ya tuduro temu jo ge, tee ti wa mɛ: ‹Yi yataanga ki ɲìi shishɛɛrɛ shi lɔ we maanɛ we ni yi yaha yi kadugo shi nibama wu ɲaha na. Nɛ yi yeege Misira fiige ki ni, na yalige kemu taga yi ɲɔ sha siwaga ki ni ge, kɔnhɔ pu bɛ di ba kee cɛ.› » 33 A Musa di Arɔn pye: «Yaaga ka lɔ, mʼa maanɛ yataanga ki ɲìi shishɛɛrɛ shishiin le ki ni, mʼa shɛ ki yaha Tɛhɛnɛ Baa Kilɛ ɲaha tàan. Wee na ba gemɛ yaha yi kadugo shi nibama wu ɲaha na.» 34 A Arɔn di maanɛ wu le shɔɔ la ni, na shɛ lee yereŋɛ Tɛhɛnɛ Baa Kilɛ wo kariɲɛɛgɛ ɲɔmɛɛ li keshi wu tàan ma na jo ba Tɛhɛnɛ Baa Kilɛ ya yi jo Musa mu wɛ. 35 A Izirayɛli nagoo pʼi maanɛ wu li na ta fo yee kɛlɛɛ shishɛɛrɛ (40) fo na shɛ pu pye pʼa nɔ fiige ka ni sipyii wa kemu ni ge. Wee maanɛ wu pu bi li fo na shɛ pu pye pʼa nɔ Kana fiige ki tajege ki na.

36 Yataanga ki ɲii shishɛɛrɛ wʼa bɛ ni omɛri ɲii nigin ni, omɛri ɲi nigin bɛ di ɲɛ efa taaga kɛ wogo.