Masɔŋɔ yogo na ɲaha tii Tɛhɛnɛ Baa Kilɛ na
15
Wee tuun wu ni a Musa ni Izirayɛli nagoo pʼi ke yogo ke cɛɛ Tɛhɛnɛ Baa Kilɛ mu na:«Nʼa da yogo cɛɛ di Tɛhɛnɛ Baa Kilɛ pɛlɛ,
bani wʼa se ta.
Wʼa shɔngɔ ni shɔndugumɔ wu wá suumɔ lɔhɔ ni.*
2 Tɛhɛnɛ Baa Kilɛ wu ɲɛ nɛ wo baraga ke,
ni nɛ wo ciire ti kaɲuŋɔ.
Wʼa na shɔ.
Nɛ wo Kilɛ wu ɲɛ wii,
nɛ na da wu sɔni.
Na to wu bɛ wo Kilɛ wu ɲɛ wii,
Nɛ na da wu pɛlɛ.*
3 Kashɛnŋmɔ naŋmaga ki ɲɛ Tɛhɛnɛ Baa Kilɛ.
Wu mɛgɛ ki ɲɛ na Tɛhɛnɛ Baa Kilɛ.
4 Farawɔn wotoriyo yi fara wu kashɛnŋmuu pu na,
wʼa yi bɛɛri wá suumɔ lɔhɔ ni.
Suumɔ Loɲiga kʼa wu kashɛnŋmɔjemɛɛ pu bɛɛri li.
5 Pʼa tigi suumɔ lɔhɔ ki nɔhɔdaan ba kagereye ɲɛ wɛ,
a lokuruyo di pu bɛɛri tɔ.
6 Ee, Tɛhɛnɛ Baa Kilɛ! Ma kanige keŋɛ kʼa ki sefɛɛrɛ ti shɛ.
Ma kanige keŋɛ kʼa wù pɛn wu tɔnhɔnɔ.
7 Sipyii piimu pʼa yìri ma kaa na ge,
mʼa pee bɛɛri ɲɛri buri ma sefɛɛrɛ ti gbɔɔrɔ ni.
Mʼa ma loyire li na ki yeege pu fɛni,
a kee di pu sòrogo ba waha ɲɛ wɛ.
8 Ma ɲɔ kafɛɛgɛ ki fanha kʼa lɔhɔ ki pinnɛ kiyɛ ɲuŋɔ ni.
A lokuruyo yʼi yere ba kasɔrɔgɔ ɲɛ wɛ.
A nɔhɔdaan lɔhɔ kʼi ŋmunɔ suumɔ lɔhɔ ki niŋɛ ni.
9 Wèe pɛɛn pu bi yu na:
‹Wʼà da pu nɔhɔ niinɛ, fo na pu ta co.
Wù pu keŋɛ yaŋmuyɔ yi kuu, wù yi loolo wùyɛ na.
Wù logoo na ba ɲiŋɛ, wù funyɔ bɛ na ɲiŋɛ.
Wù na ba wù ŋmɔparaa ki kɔ
na pu bɛɛri kyɛɛgi.›
10 Ga mu Tɛhɛnɛ Baa Kilɛ, ɲɔ kafɛɛgɛ mu ya taga suumɔ lɔhɔ ki fɔ,
a suumɔ lɔhɔ kʼi pu bɛɛri tɔ!
A pʼi digi locogoŋɔ ki nɔhɔdaan
ba tuukunnɔyɔ ɲɛ wɛ.
11 Ee, Tɛhɛnɛ Baa Kilɛ! Pɛɛŋɛ yaaga kekɛ kʼi ɲɛ ba mu ɲɛ-ɛ wɛ?
Pɛɛŋɛ yaaga kekɛ wo fɛfɛɛrɛ ɲafɛ wu dʼa pɛlɛ ba mu ɲɛ-ɛ wɛ?
Ma ɲɛ fyaara yaaga.
Mʼa yaa ni pɛɛŋɛ ni,
mu wemu wʼa kakanhaŋaa pyi ge.
12 Mʼa ma kanige keŋɛ ki sanha yɛ,
a ɲiŋɛ di wèe niinɛvɛɛ pu li.
13 Mʼa ma shi wu ɲuŋɔ wolo!
Mʼa ma saama pe ni ma sefɛɛrɛ taga
wu ɲaha co na se ma fɛfɛɛrɛ fiige ki ni.
14 Ba shi wusama ya yee logo wɛ,
na fya fo na jɛlɛ.
A Filisiti shɛɛn funyɔ di jɔnri.
15 A Edomu fiige ki wo ɲuŋɔfɛɛ pu jaalaa di yìri.
A Mowabu wo saannaa pʼi ganha na fuguri.
A Kana shɛɛn pu bɛɛri yatɛnyɛ di xhu.
16 Fyaara ni funbɛɛnrɛ ya kɔn to pu ɲuŋɔ ni.
Ma keŋɛ ki sefɛɛrɛ tʼa fɛhɛnɛ wá pu na,
ba faapinnɛ ɲɛ wɛ.
Fo ma sipyii pu ba shɛ doro, Tɛhɛnɛ Baa Kilɛ.
Sipyii piimu ɲuŋɔ mʼa wolo ge,
fo pee bɛɛri ba shɛ doro.
17 Ma na ba ni pu ni ma wo faaboboŋɔ ki na,
na ba pu teŋɛ wà Tɛhɛnɛ Baa Kilɛ.
Muyɛ pyaa kʼa wee xuu wu gbegele.
Wee xuu wu na ba bye ma tatɛɛngɛ.
Wu na ba bye ma fɛfɛɛrɛ tatɛɛngɛ.
18 Tɛhɛnɛ Baa Kilɛ na ba bye wà saan fo gbee.»
Mariyama wo yoceege
19 Ayiwa, tuun wemu ni Farawɔn wo shɔnyɔ ye, ni wu wotoriyo ye, ni wu shɔnduguloo pʼa jé suumɔ lɔhɔ ki ni ge, a Tɛhɛnɛ Baa Kilɛ di lɔhɔ ki tɛrɛŋɛ pa pu ɲɔ tɔ. Ga Izirayɛli nagoo pu kunni, ɲiwaga na pee bi ɲaari toro suumɔ lɔhɔ ki niŋɛ ni.
20 Kilɛ tudunmɔɔ Mariyama, Arɔn wo muzhɔ we, a wee di taŋa lɔ, a cèe pu bɛɛri di taya lɔ, na foro taha wu fɛni na xhɔnhɔni.
21 A Mariyama di yogo shan le na:
«Yʼa yogo cɛɛ Tɛhɛnɛ Baa Kilɛ mu,
bani wʼa se ta.
Wʼa shɔngɔ ni shɔndugumɔ wu wá suumɔ lɔhɔ ni.»
Mara wo losorogo ki keree
22 A Musa di Izirayɛli nagoo pu ɲaha co na yìri Suumɔ Loɲiga ki xuu wu ni na pa Shuri siwaga ki ni. A pʼi cabyaa taanri ɲara pye siwaga ki ni, pu ya lɔhɔ ta wɛ. 23 Ba pʼa nɔ Mara ni wɛ, pu ya já Mara lɔhɔ ki gba zoro keŋɛ ni wɛ. Lee wuu na pʼa wee xuu wu mɛgɛ le na Maraa. 24 A sipyii pʼi ganha na Musa yɔhɔyɔhɔ na: «Ɲaha wèe di da gba wɛ?» 25 A Musa di mɛɛ wá Tɛhɛnɛ Baa Kilɛ mu, a wu tige ka shɛ Musa na, a wu kee shan lɔhɔ ki ni, a lɔhɔ kʼi daan. Wee xuu wu ni Tɛhɛnɛ Baa Kilɛ ya wu wo saliya we, ni wu ɲɔmɛhɛɛ ki kan pu mu. Wee xuu wu ni bɛ wʼa pu taanna wii, na jo: 26 «Yi bu niwegee deele shan ni Tɛhɛnɛ Baa Kilɛ wo jomɔ pu ni, yi wo Kilɛ we, na katiigee pyi wu ɲaha tàan, yi bu niwegee shan na wu ɲɔmɛjogoo ki nuri, na wu saliyaa pu bɛɛri koo ɲaari, yama pemu bɛɛri nɛ wá Misira shɛɛn pu na ge, nɛ da ba pee pa shishiin yaha pu nɔ yi na wɛ, bani nɛ ɲɛ Tɛhɛnɛ Baa Kilɛ, yee wo sicuumɔ pu kanvɔɔ we.»
27 Lee kadugo na a Izirayɛli nagoo pʼi nɔ Elimu ni. Lobulowegee kɛ ni shuun ni fɛnhɛdiye kɛlɛɛ gbarashuun (70) wu bi bye wà, a pʼi buguloo pu sin lɔhɔ ki ɲɔ ki na.