Ɛkizode 14

Izirayɛli nagoo pʼa Suumɔ Loɲiga ki kɔn ɲɛri

Ayiwa, a Tɛhɛnɛ Baa Kilɛ di Musa pye: 2 «Yi jo Izirayɛli nagoo pu mu na pu kuri pa diin Piyarɔti tàan, Migidoli ni suumɔ lɔhɔ ki tɛ wu ni. Yʼi ba yi fàya buguloo pu sin wà na ɲaha tii ni Baali-Zɛfɔn ni, suumɔ lɔhɔ ki ɲɔ ki na. 3 Farawɔn na ba giin na yee ya piin siwaga ki ni, na yee ya ɲɛri ba kasolemɛɛ ɲɛ wɛ siwaga ki ni. 4 Nɛ na ba Farawɔn nige waha, wʼa yi nɔhɔ niinɛ. Nɛ na ba na wo nɔɔrɔ wu shɛ, na li ɲɔ pɛn wu ni wu kashɛnŋmuu pu bɛɛri na. Misira shɛɛn pu na ba li cɛ na nɛ wu ɲɛ Tɛhɛnɛ Baa Kilɛ we.» A Izirayɛli nagoo pʼi li pye mu.

Farawɔn ya Izirayɛli nagoo pu nɔhɔ niinɛ

5 Tuun wemu ni yʼa jo Misira saan wu mu na pii sipyii pii ya paa gbee ge, a Farawɔn ni wu gbafɛnɛmɛ wu kapyebyii pu fungɔnyɔ di ɲɛri pii sipyii pii shizhaa na. A pʼi puyɛ pye na: «Ɲaha kʼa wèe wá le bye na wɛ, na Izirayɛli nagoo pu yaha na foro wù labye wu ni wɛ?» 6 A Farawɔn di wu wotoriyo, ni wu sipyii pu gbegele, na kari. 7 A wu wotoriyo nizaaya xhuu gbaara (600) wu lɔ, ni Misira wotoriyo yisaya bɛɛri. Kashɛnŋmuu ɲahagbaa fɛɛ bi bye yi bɛɛri ni. 8 A Tɛhɛnɛ Baa Kilɛ di Misira saan Farawɔn nige waha. A Farawɔn di foro na Izirayɛli nagoo pu nɔhɔ niinɛ, pee piimu ɲuyirige wuu pʼa bi foro ge. 9 A Misira shɛɛn pʼi Izirayɛli nagoo pu nɔhɔ niinɛ, Farawɔn wo shɔnyɔ ye ni wu wotoriyo ni wu shɔnyɔ fɛɛ ni wu kashɛnŋmuu pee. A pʼi shɛ Izirayɛli nagoo pu ta pu buguro ti na suumɔ lɔhɔ ki ɲɔ na, Piyarɔti faaboboŋɔ ki shizhaa wu na, na saha ni Baali-Zɛfɔn wo faaboboŋɔ ki ni. 10 Ba Farawɔn ya tɛɛŋɛ Izirayɛli nagoo pu na wɛ, a pʼi pu ɲuyɔ yirige. Pati! A pʼi Misira shɛɛn pu ɲa pu na ma pu fɛni. A Izirayɛli nagoo pʼi sii fya fo xuuni na sipyaa wá Tɛhɛnɛ Baa Kilɛ mu. 11 A pʼi Musa pye: «Ta faya baara na Misira fiige ki ɲɛ, fo mu wèe lɔ pa ke siwaga ke ni naha, wèe di ba xhu ya? Ɲaha kaa pyaa pyaa na mʼa wèe lɔ yeege Misira fiige ki ni wɛ? 12 Na wèe yaha Misira fiige ki ni, ta wèe ya mu pye jo ma wù yaha wù da labye pyi Misira shɛɛn pu mu wɛ? Na labye pyi Misira shɛɛn mu, lee ya pɔrɔ kanha wèe mu wèe pu xu ke siwaga ke ni.»

13 A Musa di sipyii pu ɲɔ shɔ na: «Yi ganha ba fyagi-i sa! Yi kori yi tatiinyɛ yi ni. Tɛhɛnɛ Baa Kilɛ na ba lemu pye wu yi shɔ ge, yi na lee ɲa. Misira shɛɛn piimu yee ya ɲaa niɲaa ge, yee ɲii da ga ba daha pu na nige bada wɛ. 14 Tɛhɛnɛ Baa Kilɛ wʼa da ba kashɛn ŋmɔ yi mu, yee kunni pu yi logoo gbo.»

15 A Tɛhɛnɛ Baa Kilɛ di Musa pye: «Ɲuŋɔ wa li na mʼa mujuu waa na mu wɛ. Yi jo Izirayɛli nagoo pu mu na pu yìri pʼi shɛ ɲahagbaa na. 16 Mu wi ge, ma pubiin li yirige, mʼa ma keŋɛ ki sanha ni li ni suumɔ lɔhɔ ki ɲuɲɔ na, mʼa ki taa taaya shuun, kɔnhɔ Izirayɛli nagoo pʼi ɲaari toro ɲiwaga ki na suumɔ lɔhɔ ki tɛ wu ni. 17 Nɛ wi ge, nɛ na ba Misira shɛɛn pu nige waha, pʼa yi nɔhɔ niinɛ. Nɛ na ba na nɔɔrɔ wu shɛ, na li ɲɔ pɛn Farawɔn ni wu kashɛn keŋɛ ki bɛɛri na, na fara wu shɔnyɔ wotoriyo ye, ni wu shɔnduguloo pu na. 18 Nɛ ba na wo nɔɔrɔ wu shɛ na li ɲɔ pɛn Farawɔn ni wu shɔnyɔ wotoriyo ye, ni wu shɔnduguloo pu na tuun wemu ni, Misira shɛɛn pu na ba li cɛ na Tɛhɛnɛ Baa Kilɛ nɛ ɲɛ.»

19 Kilɛ wo mɛlɛkɛ wemu wu bi Izirayɛli nagoo pu ɲaha co ge, a wee di ŋmahana ɲɛɛri pu kadugo yíri, a ɲahaŋa ki bɛ di yìri pu ɲahagbaa li na, na shɛ yere pu kadugo yíri. 20 A kʼi shɛ jé yere Misira shɛɛn wo kashɛn keŋɛ ke ni Izirayɛli wo kashɛn keŋɛ ki tɛ wu ni. Kee ɲahaŋa ki kabanugo nigin wa ya bi bye piige, keki di kpɛɛngɛ yeege piige ki ni. A lee di pu pye pu ya já fulo puyɛ na kee piige ki bɛɛri ni wɛ.

21 A Musa di wu keŋɛ ki sanha suumɔ lɔhɔ ki ɲuɲɔ na. A Tɛhɛnɛ Baa Kilɛ di Kilɛ-nɔhɔ kafɛɛgbɔhɔ ka tɛgɛ suumɔ lɔhɔ ki ŋmunuŋɔ piige ki bɛɛri ni. A suumɔ lɔhɔ kʼi daa taaya shuun na ɲiwaga yeege. 22 A Izirayɛli nagoo pʼi doro suumɔ lɔhɔ ki tɛ ni, ɲiwaga ki na. Lɔhɔ kʼa bi bye ba kasɔrɔyɔ ɲɛ wɛ pu kanige cɛ, ni pu kamɛnɛ cɛ. 23 A Misira shɛɛn di pu nɔhɔ niinɛ, a Farawɔn wo shɔnyɔ yi bɛɛri ni wu wotoriyo ni wu shɔnyɔ fɛɛ pʼi jé pu fɛni suumɔ lɔhɔ ki tɛ wu ni. 24 Ɲimuguɲɔ wu na, na Tɛhɛnɛ Baa Kilɛ yaha kee ɲahaŋa na wogo ki ni, a wu Misira kashɛn kuruŋɔ ki wii na ki keree wuregi. 25 A wu pu wotoriyo yi gɔrɔyɔ yi wolo, na pu ɲara li waha, fo Misira shɛɛn pu na yu na: «Wù paa gbee Izirayɛli nagoo pu ɲaha na, bani Tɛhɛnɛ Baa Kilɛ wʼa kashɛn kɔɔn wèe na pu kaa na.»

26 A Tɛhɛnɛ Baa Kilɛ di yi jo Musa mu na: «Ma keŋɛ ki sanha suumɔ lɔhɔ ki ɲuɲɔ na, kɔnhɔ lɔhɔ kʼi guri pa dɔ wá Misira shɛɛn ni pu wotoriyo ni pu shɔnyɔ fɛɛ pu na.» 27 A Musa di wu keŋɛ ki sanha suumɔ lɔhɔ ki ɲuɲɔ na. Ɲiga ki na mugi xɔ na, a suumɔ lɔhɔ kʼi guri ki talɛgɛ ni. Misira shɛɛn ya bi fe ki ɲaha na, ga a Tɛhɛnɛ Baa Kilɛ di pu shan suumɔ lɔhɔ ki niŋɛ ni. 28 Farawɔn wo kashɛn kuruŋɔ ke ni wotoriyo ye ni shɔnyɔ fɛɛ piimu ya jé suumɔ lɔhɔ ki ni Izirayɛli nagoo pu fɛni ge, a lɔhɔ kʼi guri pa pu bɛɛri tɔ, shɛn nigin bɛ ya ta shɔ wɛ. 29 Ga Izirayɛli nagoo pu kunni bi ɲaari toro ɲiwaga ki na suumɔ lɔhɔ ki tɛ wu ni. Lɔhɔ ki bye ba kasɔrɔyɔ ɲɛ wɛ, pu kanige cɛ ni pu kamɛnɛ cɛ. 30 Kee caŋa a Tɛhɛnɛ Baa Kilɛ di Izirayɛli nagoo pu shɔ Misira shɛɛn pu na. A Izirayɛli nagoo pʼi Misira shɛɛn pu nixhuyo ɲa suumɔ lɔhɔ ki ɲɔ na. 31 Tɛhɛnɛ Baa Kilɛ ya wu fanha keŋɛ ki digi Misira shɛɛn pu na digigana lemu na ge, a Izirayɛli nagoo pʼi lee ɲa. A sipyii pʼi sii fya Tɛhɛnɛ Baa Kilɛ na, na dà wu ni wu kapyebye Musa na.