Nagoo nizhiilee pu bɛɛri ya kan Kilɛ mu
13
Ayiwa, a Tɛhɛnɛ Baa Kilɛ di Musa pye: 2 «Yi nagoo nizhiilee pu bɛɛri yaha na yahama ni, sipyii jashiilee ni yatɔɔyɔ wo nagoo nizhiilee pee, piimu pu ɲɛ bee ge. Yee bɛɛri ɲɛ nɛ woyo.» 3 A Musa di sipyii pu pye: «Caŋa kemu yee ya foro Misira wo bulooro puga ki ni ge, yi yi funŋɔ yaha nidogo kee caŋa ki wo kalenɛ li na, lee di bye yi mu kalɛɛ, bani wu keŋɛ baraga wogo ki fanha ni Tɛhɛnɛ Baa Kilɛ ya yee yeege. Sipya wa shishiin ganha da shizhɛnhɛrɛ buuri li wɛ. 4 Niɲaa yɛ pyaa yi wa fòro, ke yeŋɛ ke ni, kee kemu pʼa byi na Abibu yeŋɛa ge. 5 Tɛhɛnɛ Baa Kilɛ ya kàa, na fiige kemu wo ɲɔmɛɛ lɔ yi sefɛlɛɛ pu mu, na wee na ba ki kan yi mu ge, wu ba ba yi leŋɛ ki ni tuun wemu ni, yʼi da le kalenɛ le pyi wu mɛgɛ na. Kee fiige ke ɲɛ Kana shɛɛn, ni Xhɛti shi shɛɛn, ni Amɔri shi shɛɛn, ni Xhɛvi shi shɛɛn, ni Zhebusi shɛɛn wo fiige ke. Kee fiige ke wʼa ɲi nujirimɛ ni sɛrɛ na fo yi na fùu. 6 Yi na ba shizhɛnhɛrɛ baa buuri li fo cabyaa gbarashuun. Caŋa gbarashuun wogo ki na ba bye kalenɛ nigbɔɔ caŋa Tɛhɛnɛ Baa Kilɛ mɛgɛ na. 7 Yi na ba shizhɛnhɛrɛ baa buuri li kee cabyaa gbarashuun wu bɛɛri funŋɔ ni. Shizhɛnhɛrɛ buuri ya yaa na ta yee wa shishiin puga wɛ. Shizhɛnhɛrɛ ti ya yaa na ɲa fiige ki xuu wa shishiin ni wɛ. 8 Yi ba lee kalenɛ li pyi yee bɛɛri, yʼi yi jalaa pu pye: ‹Tɛhɛnɛ Baa Kilɛ ya kaa lemu pye wèe mu wù foroduun wu ni Misira fiige ki ni ge, wèe ya le pyi na wùyɛ funyɔ tun lee na.› 9 Lee kalenɛ le na ba bye yi mu ɲaha shɛshɛɛrɛ yi keye na, na bye fɛ yi gbahaa ki na. Lee funŋɔ ni yi funyɔ na ba dun na yʼa yaa na Tɛhɛnɛ Baa Kilɛ wo saliya wu kaa yu, bani wee wʼa yi yeege Misira fiige ki ni wu wo sefɛɛrɛ ti gbɔɔrɔ ni. 10 Yi na ba le kalɛɛ le pyi li tuun ni yee bɛɛri.11 «Tɛhɛnɛ Baa Kilɛ ya ɲɔmɛɛ lɔ yee ni yi sefɛɛ pu mu Kana fiige ki shizhaa na, wu ba yee leŋɛ wà, wu kee kan yee mu. 12 Yi na ba yi jashiilee pu bɛɛri kaan Tɛhɛnɛ Baa Kilɛ mu, ni yi yatɔɔyɔ yi nagoo nizhiilee pu bɛɛri, piimu pu ɲɛ bee ge. Pee bɛɛri pu ɲɛ Tɛhɛnɛ Baa Kilɛ wuu. 13 Kafabige nizhiige kemu bɛɛri ki ɲɛ boo ge, mʼa kee ɲuŋɔ wolo ni dubyapige ni. Ma funŋɔ bi ɲɛ mʼa ki ɲuŋɔ wolo wɛ, mʼa ki katige ŋmahana kɛgi. Yi na ba sipyii pu bɛ wo jashiilee pu ɲuŋɔ wo. 14 Cabaya na ma pya bu ba ma yege, lee wo kapyii ɲuŋɔ na, mʼa wu pye na: ‹Wu keŋɛ baraga wogo ki fanha ni Tɛhɛnɛ Baa Kilɛ ya wèe yeege Misira fiige ki ni bulooro puga ki ni. 15 Tuun wemu ni Farawɔn bi nige waha, na zhe wèe yahaŋa na ge, a Tɛhɛnɛ Baa Kilɛ di Misira fiige ki nagoo nizhiilee pu bɛɛri gbo, na ɲɔ co sipyii wo jashiilee na fo na shɛ nɔ yatɔɔyɔ yi wo bee nizhiilee na, lee wuu na wèe ya yaa na yapɔrɔyɔ yi wo bee nizhiilee pu pye saraga Tɛhɛnɛ Baa Kilɛ mu, ga wùyɛ pyaa wo jashiilee pee, wù ma pee ɲuŋɔ wolo.› 16 Lee na ba bye ba fɛ ɲɛ wɛ, ma keŋɛ ni ma gbaa na, na yi funŋɔ tun na wu keŋɛ baraga wogo ki fanha ni Tɛhɛnɛ Baa Kilɛ ya yee yeege Misira fiige ki ni.»
Kilɛ ya Izirayɛli nagoo pu ɲaha co siwaga ki ni
17 Ayiwa, tuun wemu ni Farawɔn ya sipyii pu yaha kari ge, Kilɛ ya ta pu ɲaha co na shɛ Filisiti shɛɛn fiige ki koo li ni wɛ, ali na lee koo le ta bɛ lee ya bi gbere, bani Kilɛ bi wuyɛ pye na: «Pii sipyii pii bu shɛ li ɲa na pu na ba kashɛn ŋmɔ wà, daajeŋɛ na jé pu ni, pʼa guri kari Misira ni sanha.» 18 Ayiwa a Kilɛ di pii sipyii pii caanna ɲɛri siwaga ki ni, a pʼi maha shɛ suumɔ loɲigab ki koo li ni. Izirayɛli nagoo pu nigbegeyahaya yʼa foro Misira fiige ki ni ni pu kashɛn yagboyo yi ni. 19 A Musa di gari ni Yusufu nixhugo ki kaciiye yi ni, bani sani Yusufu wu xu ge, wu bi Izirayɛli nagoo pu pye: «Nakaara baa Tɛhɛnɛ Baa Kilɛ na ba yi yeege naha. Yi ba fòro yʼi na kaciiye yi lɔ yʼa gaaŋi.» Yusufu bi pu karamu fo pʼa kàa wu mu lee bye na.*
20 Ayiwa, a Izirayɛli nagoo pʼi yìri Sukɔti ni, na shɛ pu buguloo pu sin Etamu ni siwaga ki ɲɔ ki na. 21 Tɛhɛnɛ Baa Kilɛ ya bi gaaŋi pu ɲaha na ɲahaŋa ni, na koo li shɛɛ pu na caŋa ni. Piige ni wʼa bi gaaŋi pu ɲaha na ɲahaŋa na wogo ni, na kpɛɛngɛ yeege pu mu, kɔnhɔ pʼi sii pʼa ɲaari caŋa ni piige. 22 Ɲahaŋa ki ya laha ɲa pu ɲahagbaa na caŋa ni wɛ, ɲahaŋa na wogo ki bɛ di ya laha ɲa pu ɲahagbaa na piige ni wɛ.