Mɛriba wo lɔhɔ ki keree
20
A Izirayɛli nagoo pu bɛɛri di nɔ Zini siwaga ki ni, yeŋɛ nizhiige ki ni, na pu buguloo pu sin Kadɛsi ni. Wee xuu wu ni Mariyama ya xu, a pʼi wu ɲuŋɔ ŋmɔhɔ wà.2 A lɔhɔ di bye ki ya ta wà sipyiire ti mu wɛ. A pʼi puyɛ pinnɛ na yìri Musa ni Arɔn fɛni. 3 A pʼi ganha na Musa yɔgɔ na: «Wèe cebooloo pʼa to to xu tuun wemu ni Tɛhɛnɛ Baa Kilɛ ɲaha tàan ge, ali wèe bɛ ɲɛhɛ da bi xhu wee tuun wu ni, lee da bi bɔrɔ. 4 Ɲaha fɛni yee dʼa Tɛhɛnɛ Baa Kilɛ wo sipyii pu ɲaha co na pa naha ke siwaga ke ni, wù pa xhu, wù ni wù yapɔrɔyɔ yi bɛɛri ni wɛ? 5 Ɲaha na yi dʼa wù yeege Misira fiige ki ni, na pa naha ke takuuŋɔ ke ni wɛ? Naha ɲɛ faa tapyege wɛ. Nitoodige, ni ɛrɛzɛn tige, ni gerenadi tige, kee ka shishiin ɲɛ naha wɛ, ali logbaga bɛ ɲɛ naha wɛ.»
6 A Musa ni Arɔn di laha sipyiire ti tàan, na gari Ɲuŋɔ Tacirige Fàya Puga ki tajege ki ɲɔ na. A pʼi shɛ do do, na ɲahaya ye buri buri ɲiŋɛ na. A Tɛhɛnɛ Baa Kilɛ wo nɔɔrɔ wu wuyɛ shɛ pu na. 7 A Tɛhɛnɛ Baa Kilɛ di Musa pye: 8 «Ma pubiin li lɔ, ma ni ma ɲahafɔɔ Arɔn wu ni, yʼi sipyiire ti bɛɛri yiri pinnɛ. Yʼi jo ni ke faaga ke ni pu bɛɛri ɲii na, na ki lɔhɔ kan yi mu. Ma na ba lɔhɔ yeege faaga ki ni na kan sipyii pu mu, pu ni pu yapɔrɔyɔ yi ni, pu bɛɛri na gba.»
9 A Musa di pubiin li lɔ Tɛhɛnɛ Baa Kilɛ ɲaha tàan, ma na jo ba wʼa yi jo wu mu wɛ. 10 A Musa ni Arɔn di sipyiire ti yiri pinnɛ faaga ki fɛɛ ni. A Musa di pu pye: «Yee nʼa she fɛɛ piiri, yi ɲuwegee shan! Ke faaga ke ki wa mɛ ge, ta yee ya dà li na na wèe na já lɔhɔ yeege ki ni di gan yee mu ya?» 11 A Musa di wu keŋɛ yirige, na pubiin li taga faaga ki kpɔn fo tɔɔɲii shuun. A loɲɛhɛŋɛ di foro faaga ki ni. A sipyiire ti gba, a yapɔrɔyɔ yi bɛ di gba.
12 Wee tuun wu ni a Tɛhɛnɛ Baa Kilɛ di Musa ni Arɔn pye: «Yee ya ta dà nɛ na wɛ, a yee di bye yee ya ta nɛ pɛlɛ Izirayɛli nagoo pu ɲaha tàan na fɛfɛɛrɛ ti wuu na wɛ. Lee wuu na, fiige kemu nʼa da ba gan pii sipyii pii mu ge, yee wʼa da pu ɲaha co di jé ki ni wɛ.» 13 Yee yi ɲɛ Mɛriba wo lɔhɔyɔ ye. Wee xuu wu ni Izirayɛli nagoo pʼa yogo kɔn Tɛhɛnɛ Baa Kilɛ na, a wu wu wo fɛfɛɛrɛ ti shɛ pu niŋɛ ni wà.
Edomu nagoo pʼa li she Izirayɛli nagoo pu da doro wɛ
14 Ayiwa, na Izirayɛli nagoo pu yaha Kadɛsi ni, a Musa di tudunmɔɔ pii tun Edomu wo saan wu mu, na pu shɛ wu pye: «Ma ceborona Izirayɛli wʼa jo: ‹Kanhama pemu bɛɛri pʼa nɔ wèe na ge, ma wa pu fiin. 15 Taashiinɛ li ni wèe sefɛlɛɛ pʼa shɛ diin Misira fiige ki ni, a wèe shi shɛɛn pʼi sii mɔ wà. A Misira fiige kʼi wèe ni wù sefɛlɛɛ pu cogaguunɔ co. 16 A wèe di sipyaa wá Tɛhɛnɛ Baa Kilɛ mu, a wu wèe sipyaa ki logo, na wu mɛlɛkɛ wu tun wʼa pa wèe yeege Misira fiige ki ni. Wèe nimɛ wuu wa Kadɛsi kulo li ni, lee lemu li wa ma wo ɲiŋɛ ki tɛhɛnɛ li na ge. 17 Wʼa ma ɲɛɛri ma wù yaha wù ma fiige ki ja toro. Wù wa da doro kɛrɛyɛ, kelee ɛrɛzɛn tiire tɛyɛ yi ni wɛ. Wù wa da yi keeye yi bɛ wo lɔhɔ gba wɛ. Saan wu wo koogbɔɔ li ni wʼà da doro, wù wa da waa kanige cɛ kelee kamɛnɛ cɛ wɛ, fo ma fiige ki tɛhɛnɛ le.› »
18 A Edomu wo saan wu pu ɲɔ shɔ na: «Yi wa da doro nɛ wo fiige ki ni wɛ! Lee bu bye, ŋmɔpara ni nʼa da yi ɲuŋɔ círi.»
19 A Izirayɛli nagoo pʼi guri wu pye: «Koogbɔɔ li yɛ cɛ fɛni wʼà da zii da se. Wù bu ma lɔhɔ ka gba, wù ni wù yapɔrɔyɔ yi ni, wʼà da kee saraa ma mu. Wù yaha wù ɲaari toro yɛ yi fiige ki ni, wù wa latii shaa wɛ.» 20 A Edomu saan wu nugo jo sanha na: «Ma tatorogo wa naha wɛ!» A Edomu di foro na Izirayɛli nagoo pu ɲuŋɔ círi ni kashɛn keŋɛ nagaŋa ni baraga ɲɛ kemu ni xuuni ge. 21 Mu shiin Edomu ya li she Izirayɛli da doro wu fiige ki ni wɛ. A Izirayɛli di waa toro xuu watii ni.
Arɔn ya xu
22 A Izirayɛli nagoo pu bɛɛri di yìri Kadɛsi ni, na shɛ nɔ Xhɔri faaboboŋɔ ki na. 23 Na pu yaha Xhɔri faaboboŋɔ ki fɛɛ ni, Edomu fiige ki tɛhɛnɛ li na, a Tɛhɛnɛ Baa Kilɛ di Musa ni Arɔn pye: 24 «Arɔn wʼa da ba shɛ binnɛ ni wu sefɛlɛɛ pu ni. Fiige kemu nʼa da ba gan Izirayɛli nagoo pu mu ge, wu wa da ba jé ki ni wɛ, bani yee shuun wu bɛɛri ya ta nɛ ɲɔmɛɛ co Mɛriba lɔhɔyɔ yi xuu wu ni wɛ. 25 Arɔn ni wu ja Eleyazari lɔ, mʼa dugi ni pu ni Xhɔri faaboboŋɔ ki na. 26 Mʼa Arɔn wo saraya ɲaha shɔɔnrivɛɛrɛ ti wo fàya yi wolo wu na, mʼa yi le wu ja Eleyazari na. Bani wà Arɔn wʼa da xhu, wu shɛ binnɛ ni wu sefɛlɛɛ pu ni.»
27 Yemu Tɛhɛnɛ Baa Kilɛ ya jo ge, a Musa di yee koo ɲaari. A pʼi dugi Xhɔri faaboboŋɔ ki na sipyiire ti bɛɛri ɲii na. 28 A Musa di Arɔn wo saraya ɲaha shɔɔnrivɛɛrɛ ti wo fàya yi wolo wu na, na yi le wu ja Eleyazari na. A Arɔn di xhu wà faaboboŋɔ ki ɲidii li ni. A Musa ni Eleyazari di digi faaboboŋɔ ki na. 29 A sipyiire ti bɛɛri di li cɛ na Arɔn ya xu. A Izirayɛli nagoo pu bɛɛri di Arɔn nixhugo ki mɛɛ su fo cabyaa kɛlɛɛ taanri (30).