Izirayɛli nagoo pʼa se ta Aradi saan wu na
21
Ayiwa, Kana shɛɛn wo saan wa, wee bye Aradi kulo li wo saan, na ɲɛ fiige ki woroo kulo kacɛ ki na. A wee di ba logo na Izirayɛli nagoo pu wa ma Atarimu koo li ni. A wu shɛ do pu na, na pii co pu ni na pye kashɛn buloo.* 2 Wee tuun wu ni a Izirayɛli nagoo pʼi ɲɔ faa Tɛhɛnɛ Baa Kilɛ mu, na jo: «Ma bu we shi we le wèe keŋɛ ni, wèe na ba pu kulogoo ki bɛɛri kyɛɛgi fɛɛfɛɛ mu Tɛhɛnɛ Baa Kilɛ mu.» 3 A Tɛhɛnɛ Baa Kilɛ di Izirayɛli nagoo pu wo ɲɛrɛgɛ ki logo, na se kan pu mu Kana shɛɛn pu na. A pʼi Kana shɛɛn ni pu kulogoo ki kyɛɛgi fɛɛfɛɛ Tɛhɛnɛ Baa Kilɛ mu. A pʼi wee xuu wu mɛgɛ le na ƆrimaaMusa ya wɔ wa yàa ni daɲaa tɔɔrɔ ni
4 Ayiwa, a Izirayɛli nagoo pʼi yìri laha Xhɔri faaboboŋɔ ki na, na Suumɔ Loɲiga ki wo koo li lɔ, na Edomu fiige ki maha toro. Na pu yaha koo li na, sipyiire ti ya já pu logoo mara wɛ.b 5 A pʼi tigire taha Kilɛ ni Musa na na: «Ɲaha na yee dʼa wèe yeege Misira fiige ki ni, wù pa xhu ke siwaga ke ni wɛ? Bani buuri ɲɛ naha wɛ, lɔhɔ bɛ di ɲɛ naha wɛ. Ke yalige ke bɛ la dʼa wolo, ke ɲaa fɛɛ yalige ke!» 6 Wee tuun wu ni a Tɛhɛnɛ Baa Kilɛ di wɔkuuyoc yeege sipyiire ti fɛni. A yee di Izirayɛli nagoo niɲɛhɛmɛɛ nɔ gbo.*
7 A sipyiire tʼi gari Musa fɛni, na shɛ wu pye: «Jurumu wèe ya pye, bani wèe ya tigire taha Tɛhɛnɛ Baa Kilɛ na, na tigire taha mu bɛ na. Tɛhɛnɛ Baa Kilɛ ɲɛɛri wù mu, kɔnhɔ wu pii wɔlɔɔ pii sanha lii wù na.» A Musa di Kilɛ ɲɛɛri sipyiire ti mu. 8 A Tɛhɛnɛ Baa Kilɛ di wu pye: «Wɔkuuŋɔ ka tuugo yàa, mʼa ki yirige suri kagaantɔɔngɔ ka ni. Wɔ wa bu sipya wa bɛɛri nɔ, a wufɔɔ di ɲuŋɔ yirige na wee wii, wufɔɔ da xhuu wɛ.» 9 A Musa di wɔ wu tuugo yàa ni daɲaa tɔɔrɔ ni, na wu yirige suri kagaantɔɔngɔ ka ni. Wɔkuuyo ya piimu bɛɛri nɔ, a pʼi ɲuŋɔ yirige na wu wii ge, pee ya xu wɛ.*
Izirayɛli nagoo pʼa kari Mowabu wo fadaaŋa ki na
10 Lee kadugo na a Izirayɛli nagoo pʼi yìri wà, na shɛ pu buguro ti sin Oboti ni. 11 A pʼi ba yìri Oboti ni, na shɛ pu buguro ti sin Iye-Abarimu ni, siwaga ki ni, Mowabu fiige ki ɲahatii wu ni, Kilɛ-nɔhɔ kacɛ ki na. 12 A pʼi ba yìri wà, na shɛ pu buguro ti sin Zɛrɛdi wo dugo ki ɲɔ na. 13 A pʼi ba yìri wà, na shɛ pu buguro ti sin Arinɔ gba wu kɔn-ma-ɲɛrɛmɛ pu ni. Amɔri shɛɛn wo fiige ki ni wee gba wʼa yìri na fuu na gaaŋi siwaga ki ni. Wee wu ɲɛ kodɛhɛnɛ Mowabu shɛɛn ni Amɔri shɛɛn tɛ ni. 14 Lee wuu na lʼa ka Tɛhɛnɛ Baa Kilɛ wo kashɛnyɛ sɛmɛ wu ni na:
Wayebu gba ni wu gbakeye
Sufa koomɔ pu ni, Arinɔ gba ni wu gbakeye
15 yee yemu yʼa tigi kari Ari kulo li yíri,
na shɛ bye Mowabu fiige ki kodɛhɛnɛ ge.»
16 Ayiwa, a Izirayɛli nagoo pʼi ba yìri wee xuu wu ni, na gari Bɛɛrid ni. Bɛɛri wo keeŋɛ ki na Tɛhɛnɛ Baa Kilɛ ya Musa pye na: «Sipyiire ti bɛɛri pinnɛ, kɔnhɔ di lɔhɔ kan pu mu.» 17 Wee tuun wu ni Izirayɛli nagoo pʼa ke yogo ke cɛɛ na:
«Keeŋɛ ke, lɔhɔ yeege fo ki da fuu!
Yʼa masɔŋɔ yoyo cɛɛ wu mu!
18 Ɲuŋɔfɛɛ pʼa ke keeŋɛ ke tugi, mɛgbɔhɔ fɛɛ pʼa ki tugi
ni pu fanhabegee, ni pu saanrabegee ni.»
Ayiwa, a Izirayɛli nagoo pʼi ba yìri Bɛɛri ni siwaga ki ni, na gari Matana ni. 19 A pʼi yìri Matana ni, na gari Naliyɛli ni, na yìri Naliyɛli ni, na gari Bamɔti ni. 20 A pʼi ba yìri Bamɔti ni, na gaaŋi Mowabu fiige ki wo kpɛɛngbɔhɔ ki na, Pisiga faaboboŋɔ ki yíri kemu ɲaha kʼa saha ni siwaga ki ni ge.
Izirayɛli nagoo pʼa se ta saannaa Sixhɔn ni Ɔgi na
21 A Izirayɛli nagoo pʼi tudunmɔɔ pii tun kari Amɔri shi wu wo saan wu mu, wee ɲɛ na Sixhɔn. A pʼi shɛ wu pye:
22 «Wù yaha wù já toro ma fiige ki ni. Wʼà da waa di jé kɛrɛyɛ, kelee ɛrɛzɛn tiire tɛyɛ ya shishiin ni wɛ. Wʼà da lɔhɔ gba keeŋɛ ka shishiin ni wɛ. Wù na ba doro saan wu wo koogbɔɔ li ni, fo na shɛ ma fiige ki tɛhɛnɛ li xɔ.»
23 Ga Sixhɔn ya ta sɔɔ Izirayɛli nagoo pu wu fiige ki já toro wɛ. A wu wu sipyii pu bɛɛri yiri pinnɛ, na foro na shɛ Izirayɛli nagoo pu ɲuŋɔ círi siwaga ki ni. A wu shɛ nɔ Yaxhasi ni, na kashɛn kɔn pu na wà. 24 A Izirayɛli nagoo di pu gbo ni ŋmɔpara ni, na wu fiige ki co, na lɔ Arinɔ gba wu ɲɔ ki na na shɛ nɔ Zhabɔki Gba wu ɲɔ na, fo na shɛ nɔ Amɔ shi wu wo kodɛhɛnɛ li na. Bani kashɛn ɲaha kɔn kɔn kasɔrɔgɔ ki bye Amɔ shi wu wo kodɛhɛnɛ li na. **** 25 A Izirayɛli nagoo pʼi Amɔri shi shɛɛn pu wo kulogoo ki bɛɛri co, na diin ki ni. A pʼi Ɛshibɔn kulo li bɛ co, li ni li mahama kulogoo ki bɛɛri. 26 Ɛshibɔn wu bi bye Amɔri shi shɛɛn pu wo kugbɔɔ le. Lee ni Sixhɔn bi bye, pu wo saan we. Wee Sixhɔn wu wʼa bi kashɛn ŋmɔ ni Mowabu shɛɛn wo saan nilɛ wu ni, na wee wo fiige ki bɛɛri shɔ wu na, fo na shɛ nɔ Arinɔ gba wu na. 27 Lee na talejuu wa ma yu na:
«Yi pa Ɛshibɔn ni!
Yi pa Sixhɔn kulo li sinvonɔ sin, yʼi li yaavonɔ yàa!
28 Bani na ka kʼa foro Ɛshibɔn ni,
Naɲiŋɛ ka kʼa foro Sixhɔn wo kulo li ni.
Kee ya Ari kulo li sòrogo Mowabu fiige ki ni,
na Arinɔ bɛ wo pɛɛŋɛ tapyeye yi wo ɲuŋɔfɛɛ pu sòrogo.
29 Bɔɔngɔ ki ɲɛ mu wogo Mowabu!
Oo dɛ, Kemɔshie nagoo, yee kaa ya xɔ.
Kemɔshi jalaa pʼa fɛ, a wu pushaa pʼi jé bulooro ni
Amɔri shi shɛɛn pu wo saan wu keŋɛ ni,
Oo dɛ, saannaa Sixhɔn kunni.*
30 Wèe ya pu ŋmɔ ni ŋmaya ni na co Ɛshibɔn na,
fo na shɛ nɔ Dibɔn na, wee xuu wu bɛɛri ya kyɛɛgi.
Wèe ya kakara ti pye fo na shɛ nɔ Nofaki ni,
fo na shɛ nɔ Medeba bɛ ni.»
31 Ayiwa, a Izirayɛli nagoo pʼi diin Amɔri shi shɛɛn pu wo fiige ki ni. 32 A Musa di sipyii pii yaha kari pʼa shɛ Yazɛri koomɔ pu peele saala. Lee kadugo na, a wu Yazɛri tàan kulogoo ki co. Amɔri shi shɛɛn piimu pu bye wà ge, a pʼi pee kɔri laha wà.
33 Lee kadugo tàan a pʼi lee koo li yaha, na ŋmahana ɲɛri, na Bashan fiige ki koo li lɔ. A Bashan saan we, Ɔgi ni wu wo sipyii pu bɛɛri di foro na shɛ pu ɲuŋɔ círi, na kashɛn kɔn pu na Edereyi kulo li ni. 34 A Tɛhɛnɛ Baa Kilɛ di Musa pye: «Ma ganha bu fya wu na wɛ, bani nɛ wu le ma keŋɛ ni, wu ni wu sipyii pu bɛɛri, ni wu fiige ki bɛɛri. Amɔri shi wu wo saan Sixhɔn wu bye Ɛshibɔn ni ge, lemu mʼa pye wee na ge, lee shi pye we bɛ na.» 35 A pʼi saan wu ni wu jalaa, ni wu kashɛnŋmuu pu bɛɛri gbo, shɛn nigin bɛ ya shɔ wɛ. A pʼi wu fiige ki co.