Saannaa Balaki ya Balamu yiri
22
A Izirayɛli nagoo pʼi yìri wee xuu wu ni, na shɛ pu fàya piyɛyɛ yi sin Mowabu wo mura wu ni, wee xuu wu ɲɛ Zhurudɛn Gba wu kadugo yíri Zheriko kulo li ɲahatiimɛ pu ni.2 Izirayɛli nagoo pʼa lemu pye Amɔri shi wu na ge, Zipɔri ja Balaki ya lee bɛɛri ɲa. 3 A Izirayɛli nagoo pu keree di sii Mowabu shɛɛn pu funŋɔ pɛn fo xuuni, bani pu bi sii ɲɛhɛ. A Mowabu shɛɛn pʼi fya fo na pu jaalaa yirige. 4 A Mowabu shɛɛn pʼi Majan shɛɛn wo nɔhɔlɛɛ pu pye: «Le sipyiɲɛhɛnɛ le wa da ba wèe tàan wu bɛɛri li fɛɛfɛɛ ba nù ma sige funŋɔ ɲà li mɛ fɛɛfɛɛ wɛ. Zipɔri ja Balaki, wee wu bye Mowabu wo saan we lee caŋa ɲii li ni.
5 A wu tudunmɔɔ pii tun kari Bewɔri ja Balamu mu, wee bye Petɔri kulo li ni, wu to kulo le, lee bye Efirate gba wu ɲɔ na. A wu jo na pu shɛ wu pye:
«Wii! Shi wa wʼa foro Misira fiige ki ni. Wʼa sii fiige ki bɛɛri tɔ! Wʼa pa diin na saha ni nɛ ni. 6 Ayiwa, nʼa ma ɲɛɛri, Pa mʼa ba pii sipyii pii laŋi na mu, bani pu baraga kʼa pɛlɛ nɛ wogo ki na. Lee bu bye, la wa la ni wèe na já pu na, na pu kɔri yeege fiige ki ni. Bani nɛ li cɛ jo mu bu duba pye sipya wemu mu, weefɔɔ na duba ta, mu bu wemu bɛ laŋi, weefɔɔ ya laŋi.»
7 A Mowabu ɲahagbaa fɛɛ pee ni Majan ɲahagbaa fɛɛ pʼi yìri kari ni yakanya ni di zhɛ gan cɛmɛ fɛɛ Balamu mu. A pʼi gari wu yíri, na shɛ Balaki wo tuduro ti jo wu mu. 8 A Balamu di pu pye: «Yi shɔn naha niɲaa! Tɛhɛnɛ Baa Kilɛ ba yemu jo na mu, nɛ na yee ɲaha jo yi mu.» Wee tuun wu ni a Mowabu ɲahagbaa fɛɛ pʼi gori Balamu puga. 9 A Kilɛ di ba ba Balamu mu na ba wu pye: «Sipyii piikɛ tuugo ki wa mɛ ma mu wɛ?» 10 A Balamu di Kilɛ pye: «Zipɔri ja Balaki, Mowabu wo saan we, wee wʼa pu tun na pu pa nɛ pye: 11 ‹Wii, shi wa wʼa foro Misira fiige ki ni na ba fiige ki bɛɛri tɔ. Pa mʼa ba wu laŋi na mu, la wa la ni nɛ na já pu na, na pu kɔri yeege fiige ki ni.› » 12 A Kilɛ di Balamu pye: «Ma ganha bu shɛ ni pu ni wɛ, ma ganha bu we shi we laŋi wɛ, bani nɛ duba wu mu.» 13 Ɲisɔɔgɔ ki na a Balamu di yìri, Balaki ya ɲahagbaa fɛɛ piimu tun wu mu ge, a wu pee pye: «Yi kuri yʼa se yi wo fiige ki ni, bani Tɛhɛnɛ Baa Kilɛ ya ta sɔɔ nɛ wu pinnɛ shɛ ni yee ni wɛ.» 14 A Mowabu ɲahagbaa fɛɛ pʼi guri kari Balaki yíri, na shɛ wu pye: «Balamu ya li she wu da ba ni wèe ni wɛ.»
15 A Balaki di ɲuŋɔfɛɛ pii bɛ yaha kari sanha. Pee bi ɲɛhɛ nizhiilee pu na, pu mɛgɛ bɛ dʼa pɛlɛ nizhiilee pu wo mɛgɛ na. 16 A pʼi gari Balamu yíri, na shɛ wu pye:
«Zipɔri ja Balaki ya jo: ‹Sii ɲɔ mayɛ na, ma ganha bu kaa la shishiin yaha li ma sige zhɛ na nɛ yíri wɛ. 17 Bani nʼa da ba naafuu yaŋmuyɔ kan ma mu fo xuuni. Ma ba lemu bɛɛri jo, nɛ na lee pye. Nʼa ma ɲɛɛri, pa, ma ba pii sipyii pii laŋi na mu.› »
18 Ga a Balamu di Balaki wo tudunmɔɔ pu pye: «Ali Balaki ɲɛhɛ wu puga ki ɲi warifyɛn ni sanni na, na wee bɛɛri kan nɛ mu, nɛ da já kaa la shishiin pye li nigbɔɔ fara li nibire na, na toro Tɛhɛnɛ Baa Kilɛ, na Kafɔɔ wu wo ɲɔjomɔ tàan wɛ. 19 Wee tuun wu ni na yi ɲɛɛri, yi bɛ pu shɔn naha, Tɛhɛnɛ Baa Kilɛ na ba yemu jo na mu ge, di yee cɛ.»
20 A Kilɛ di ba ba Balamu mu piige ki ni, na ba wu pye: «Ni pii sipyii pii da pa ma yíri, yìri mʼa binnɛ ni pu ni. Ga di ba shɛ lemu jo ma mu, mʼa lee yɛ pye.» 21 Ba Balamu ya yìri ɲisɔɔgɔ ki na wɛ, na bɔrɔgɔ taha wu kafazhɔ wu na, na binnɛ na gaaŋi ni Mowabu wo ɲuŋɔfɛɛ pu ni.
Kafazhɔ wʼa jo ni Balamu ni
22 Balamu ya koo li lɔ na gaaŋi ge, a Kilɛ luu di yìri wu tàan. A Tɛhɛnɛ Baa Kilɛ wo mɛlɛkɛ wu shɛ koo li pari wu ɲahagbaa na. Balamu nidɛɛngɛ ki bye kafaŋa ki na na gaaŋi, wu kapyebyii shuun wu dʼa taha wu fɛni. 23 Ba kafazhɔ wʼa pa shɛ Tɛhɛnɛ Baa Kilɛ wo mɛlɛkɛ wu ɲa wʼa ŋmɔpara kɔɔngi co wu keŋɛ ni, na yere koo li niŋɛ ni wɛ, a kafaŋa kʼi fya, na gbɔn waa kɛrɛyɛ yi ni. A Balamu di kafaŋa ki kpɔn, na ki ɲaha ɲɛri koo li ni. 24 A Tɛhɛnɛ Baa Kilɛ wo mɛlɛkɛ wu shɛ yere ɛrɛzɛn tɛyɛ ya tɛ ni koo li ni. Koo li dʼa cɛ́rɛ wee xuu wu ni, kasɔrɔyɔ bɛ dʼa li shuu li kabanuyo shuun wu na. 25 Ba kafaŋa kʼa Tɛhɛnɛ Baa Kilɛ wo mɛlɛkɛ wu ɲa wɛ, na shɛ kiyɛ sereŋɛ kasɔrɔgɔ ki na, na Balamu tɔɔgɔ tirege kasɔrɔgɔ ki na. A Balamu di kafaŋa ki kpɔn sanha. 26 A Tɛhɛnɛ Baa Kilɛ wo mɛlɛkɛ wu shɛ ɲaha na sanha, na shɛ yere kakuuro la ni, tawaadorogo bɛ ɲɛ xuu wemu ni kanige cɛ, kelee kamɛnɛ cɛ wɛ. 27 Ba kafaŋa kʼa Tɛhɛnɛ Baa Kilɛ wo mɛlɛkɛ wu ɲa wɛ, na sinnɛ ni Balamu ni. A Balamu luu di sii yìri fo xuuni, a wu pubiin ɲìi wolo wolo kafaŋa ki ni. 28 Wee tuun wu ni a Tɛhɛnɛ Baa Kilɛ di kafaŋa ki ɲɔ mugi, a kʼi jo ni Balamu ni na: «Lekɛ nɛ dʼa pye ma na a lee di ma pye mʼa na kpɔn fo tɔɔɲii taanri wɛ?» 29 A Balamu di kafaŋa ki pye: «Mu ya nɛ yaha ma yaxɔnhɔŋɔ. Ŋmɔpara da bi ɲɛ nɛ keŋɛ ni, go nɛ bi da mu gbo nimɛ.» 30 A kafaŋa kʼi Balamu pye: «Ta mu wo kafaŋa bɛ nɛ sii wɛ? Ta nɛ na bɛ mu yá sii na duri fo na pa nɔ niɲaa na wɛ? Nɛ sanha dee le la pye mu na ya?» A wu jo: «Ahayi.»
31 Wee tuun wu ni a Tɛhɛnɛ Baa Kilɛ di Balamu ɲìi mugi, a wu Tɛhɛnɛ Baa Kilɛ wo mɛlɛkɛ wu ɲa wʼa wu ŋmɔpara kɔɔngi co, na yere koo li ni. A Balamu di do, na ɲaha ke buri ɲiŋɛ na. 32 A Tɛhɛnɛ Baa Kilɛ wo mɛlɛkɛ wu wu pye: «Ɲaha na ma dʼa ma kafaŋa ki kpɔn fo tɔɔɲii taanri wɛ? Nɛ wʼa pa ma koo li pari, bani nɛ mu piinŋɛ koo lʼa lii. 33 Kafaŋa kʼa nɛ ɲa, na waa nɛ ɲaha na tɔɔɲii taanri. Kafaŋa ki da bye ki ya waa nɛ ɲaha na wɛ, nɛ bi da mu gbo, na kafaŋa ki yaha ɲìi na.»
34 A Balamu di Tɛhɛnɛ Baa Kilɛ wo mɛlɛkɛ wu pye: «Jurumu nɛ pye, bani nɛ bi ta li cɛ na mu wʼa pa yere koo li ni, mʼa na ɲaha kɔn wɛ. Ayiwa nimɛ, li bu da li ya bɛ ma mu wɛ, nɛ na guri.» 35 A Tɛhɛnɛ Baa Kilɛ wo mɛlɛkɛ wu Balamu pye: «Pinnɛ mʼa se ni pii sipyii pii ni. Ga yemu nʼa da zhɛ jo ma mu ge, mʼa shɛ da yee yɛ na.» Balaki ya ɲuŋɔfɛɛ piimu tun ge, a Balamu di binnɛ kari ni pee ni.
Balaki ya shɛ Balamu ɲuŋɔ círi
36 Ayiwa, tuun wemu ni Balaki ya logo na Balamu wʼa ma ge, Mowabu shɛɛn wo kulo lemu li wa Arinɔ gba wu ɲɔ na Mowabu fiige ki tɛhɛnɛ li na ge, a wu foro na shɛ Balamu ɲuŋɔ círi fo lee kulo li ni. 37 A Balaki di Balamu pye: «Ta nɛ ya tuduro yaha pu shɛ mu yiri wɛ? A ɲaha di ma pye ma ya pa wee tuun wu ni-i wɛ? A lʼi bye kanna naafuu yaŋmuyɔ wa nɛ mu can na di gan mu mu-i gɛ?»
38 A Balamu di Balaki pye: «Ayiwa, nimɛ kunni nʼa pa ma yíri. Ga ta nɛ na já yatii jo? Kilɛ ba yemu le nɛ ɲɔ ni, yee yɛ nʼa da ba jo.» 39 A Balamu di gari ni Balaki ni, a pʼi shɛ nɔ Kiriyati-Usɔti kulo li ni. 40 A Balaki di niiyɛ ni dubyaa gbo na pye saraga, na tee xaara ta kan Balamu mu. Ɲuŋɔfɛɛ piimu pu bye ni wu ni ge, na ta kan pee bɛ mu. 41 Kee caŋa ki ɲimuguro ɲisɔɔgɔ ki na, a Balaki di ba Balamu lɔ, a pʼi dugi Bamɔti-Baali wo faaboboŋɔ ki na. Na pu yaha wà, a Balamu di Izirayɛli nagoo pu kabanugo ka ɲa nɔhɔdaan wu ni.