Balamu ni Balaki ya saraya yemu wolo ge
23
A Balamu di Balaki pye: «Saraya tawoloyo gbarashuun wʼa yàa na mu naha, mʼa nupɛhɛɛ gbarashuun ni dubyapee gbarashuun wa gbegele na kan.» 2 Yemu Balamu ya jo ge, a Balaki di lee pye. A Balaki ni Balamu di nupɛhɛɛ nigin nigin ni dubyapee nigin nigin wolo yee saraya tawoloyo yi bɛɛri nigin nigin wu na. 3 A Balamu di Balaki pye: «Yere naha ma saraya yi tàan, di laraga kɔn ma na. La wa la ni Tɛhɛnɛ Baa Kilɛ na ba wuyɛ shɛ na na. Wu ba yemu jo na mu, nɛ na ba yee jo ma mu.» A Balamu di shɛ dugi faaboboŋɔ ka ɲidii ni. 4 A Tɛhɛnɛ Baa Kilɛ di ba wuyɛ shɛ Balamu na. A Balamu di wu pye: «Saraya tawoloyo gbarashuun nɛ yereŋɛ, na nupɛhɛɛ nigin nigin ni dubyapee nigin nigin wolo yi bɛɛri na.» 5 A Tɛhɛnɛ Baa Kilɛ di jomɔ jo le Balamu ɲɔ ni, na xhɔ na wu pye: «Kuri shɛ Balaki yíri, mʼa shɛ pee jomɔ pu jo wu mu.» 6 A Balamu di guri pa Balaki yíri, na ba wu niyerege ta wu saraya yi tàan ni Mowabu ɲuŋɔfɛɛ pu bɛɛri ni.Balamu ya duba pye Izirayɛli nagoo pu mu
7 A Balamu di ke zagunnuŋɔ ke jo:
«Balaki wʼa nɛ yiri na foro Aramu fiige ki ni,
Mowabu wo saan wʼa nɛ yiri na foro
Kilɛ-nɔhɔ faaboboyo yi xuu wu ni.
Na nɛ wu pa Yakuba laŋi wee mu.
Na nɛ wu pa ɲɔmɛkuuŋɔɔ jo wá Izirayɛli na.
8 Kilɛ ya wemu laŋi wɛ, nɛ ma já wee laŋi dii wɛ?
Tɛhɛnɛ Baa Kilɛ ya luu yirige wemu tàan wɛ,
nɛ ma já ɲɔmɛkuuŋɔɔ jo wá weefɔɔ na dii wɛ?
9 Nɛ wa faaya yi ɲidii li ni na wu ɲaa.
Nɛ wa yaŋa boboyo yi ɲidii li ni na wu sɛɛri.
Shi wu ɲɛ wii wemu ya waa yaha wu yɛ ge.
Wu ya wuyɛ wii ni shi wusama ni nigin wɛ.
10 Jɔgɔ wu da já Yakuba tɔrɔ wɛ?
Wʼa ɲɛhɛ ba gbazhɛnhɛ pya ɲɛ wɛ.
Jɔgɔ wu da já Izirayɛli taaga shishɛɛrɛ wogo ki ɲɔ jo wɛ?
Tiimɛ fɛɛ pʼa xhuli xugana lemu na ge,
na bɛ wu xu lee xugana li na.
Nɛ wo taxɔgɔ kʼi bye ba pu wo taxɔgɔ ki ɲɛ wɛ.»
11 A Balaki di Balamu pye: «Lekɛ ma dʼa pye mɛ na na wɛ? Nɛ pa ni mu ni jo ma ba na pɛɛn pu laŋi, ga a mʼi dɛri pa duba pye pu mu!» 12 A Balamu di jo: «Yemu Tɛhɛnɛ Baa Kilɛ ya le nɛ ɲɔ ni ge, ta yee na bɛ nɛ yaa na kasɛɛgɛ yaha, na yee jo wɛ?»
Balamu duba shuun wo Izirayɛli nagoo pu mu
13 Ayiwa, a Balaki di jo: «Pa wù shɛ kabaŋa katii na ma na já pii sipyii pii ɲa kabaŋa kemu na ge. Pii yɛ mʼa da zhɛ ɲa pu ni, ma wa da já pu bɛɛri ɲa wɛ. Mʼa shɛ pu laŋi na mu kee kabaŋa ki na.» 14 A Balaki di gari ni Balamu ni kasɛɛgɛ tapyege ka ni, Pisiga wo faaboboŋɔ ki ɲidii li ni. A wu shɛ saraya tawoloyo gbarashuun wa yereŋɛ wee xuu wu bɛ ni, na nupɛhɛɛ nigin nigin ni dubyapee nigin nigin wolo yi bɛɛri na. 15 A Balamu di Balaki pye: «Yere naha ma saraya yi tàan, na bɛ di shɛ Tɛhɛnɛ Baa Kilɛ ɲuŋɔ círi.» 16 A Tɛhɛnɛ Baa Kilɛ di ba wuyɛ shɛ Balamu na na jomɔ jo le wu ɲɔ ni, na wu pye: «Kuri shɛ Balaki yíri, yemu nʼa jo ma mu ge, mʼa shɛ yee jo wu mu.» 17 A Balamu di guri kari Balaki yíri. Wee niyerege ki bye wu saraya yi tàan ni Mowabu wo ɲuŋɔfɛɛ pu ni. A Balaki di wu yege na: «Yekɛ Tɛhɛnɛ Baa Kilɛ dʼa jo wɛ?» 18 Wee tuun wu ni a Balamu di kii ɲɔmɛhɛɛ kii jo na:
«Balaki, yìri, mʼa ye logo!
Zipɔri ja we, logo na ɲɔ na!
19 Kilɛ ɲɛ sipya wʼa kafinɛyɛ yu wɛ.
Wu di ɲɛ bɛ sipyiyawyii wu fungɔngɔ kʼa waa kʼa ɲɛri wɛ.
Wu sanha kaa jo ɲa, lʼa gori pyebaa ya?
Wu bu ɲɔmɛɛ lemu lɔ, ta wu ɲɛ ma li ɲɔ fa wɛ?
20 Li wii, nɛ tun na nɛ wu duba pye.
Kilɛ ya baraga le pu ni na xɔ,
Nɛ da já yafiin bɛ ɲɛri kee baraga ke ni wɛ.
21 Wu ya ta nahama ɲa Yakuba na wɛ.
Wu ya kakuunɔ ɲa Izirayɛli na wɛ.
Tɛhɛnɛ Baa Kilɛ, wu Kilɛ wu ɲɛ ni wu ni.
Saan wu fo mujoŋɔɔ ya foro pu niŋɛ ni.
22 Kilɛ ya pu yeege Misira fiige ki ni.
Wu fanha ki ɲɛ ba senu wogo ɲɛ wɛ.
23 Siganma wa yaaga kyɛɛgi Yakuba mu wɛ.
Cɛmɛ wa yaaga kyɛɛgi Izirayɛli mu wɛ.
Li tuun ba nɔ, pu na ba yu Yakuba shizhaa na na:
‹Kagbɔɔ lemu Kilɛ ya pye Izirayɛli mu ge, lee le.›
24 Li wii, we shi we ma yìri ba cɛnrizhɔ ɲɛ wɛ.
Wu ma yere ba cɛnri ɲɛ wɛ. Wu ma wu xacoro ti xa,
Yaaga ke wʼa co ge, na ki shishan gba, na da shɛ sinnɛ.»
25 Ayiwa, a Balaki di Balamu pye: «Ma bye ma di wa da já pu laŋi wɛ, ma kunni ganha bu dubya pye pu mu wɛ!» 26 A Balamu di Balaki pye: «Ta nɛ sii yi jo mu mu jo Tɛhɛnɛ Baa Kilɛ ba yemu bɛɛri jo nɛ mu, jo lee nʼa da bye wɛ?»
Balamu duba taanri wo Izirayɛli nagoo pu mu
27 Ayiwa, a Balaki di Balamu pye: «Pa di shɛ ni ma ni kabaŋa kabɛtii na. La wa la ni Kilɛ na zhɛ sɔɔ ma pii sipyii pii laŋi nɛ mu kee kabaŋa ki na.» 28 A Balaki di gari ni Balamu ni Pewɔri faaboboŋɔ ki ɲidii ni. Siwaga ki bɛɛri ma ɲaa wee xuu wu ni. 29 A Balamu di nugo Balaki pye sanha na wu saraya tawoloyo gbarashuun wa yereŋɛ, wu nupɛhɛɛ gbarashuun ni dubyapee gbarashuun wa gbegele wee kan. 30 Balamu ya yemu jo Balaki mu ge, a Balaki di yee bɛɛri pye. A wu nupɛhɛɛ nigin nigin ni dubyapee nigin nigin wolo yee saraya tawoloyo yi bɛɛri nigin nigin wu na.