24
Ayiwa, ba Balamu ya li cɛ na Kilɛ ɲidaan wu ɲɛ na duba we shi wemu wɛ, wu ya shɛ Tɛhɛnɛ Baa Kilɛ ɲuŋɔ círi nige ba wʼa li pye tɔɔɲishiinɛ le ni shuun wuu li ni wɛ. Ga a wu wu ɲaha ki tagi sipoŋɔ ki yíri, 2 na Izirayɛli nagoo pu wii, pu na tiin gbaweye gbaweye. A Kilɛ Munaa di digi wu na wee tuun wu ni. 3 A Balamu di kii ɲɔmɛhɛɛ kii jo na:«Nɛ Balamu, Bewɔri ja we, nɛ ɲɔjomɔ pu ɲɛ pe.
Ná wemu wʼa ɲaa ge, wee ɲɔjomɔ pu ɲɛ pe.
4 Ná wemu wʼa Kilɛ Jomɔ nuri ge,
wemu wʼa Se Bɛɛri Fɔɔ wu wo kashɛgɛɛ ki ɲaa ge,
wemu wu ɲɛ wu bu do ɲiŋɛ na,
wu ɲìi na bahala keree ki bɛɛri na ge, wee ɲɔjomɔ pu wa pe.
5 Ee! Yakuba, ga ma buguloo pʼa ɲɔ!
Ee! Izirayɛli ga ma tatɛɛnyɛ yʼa ɲɔ!
6 Yʼa pii ba lofomɔ ɲɛ wɛ,
ba gba ɲɔ loyɔ yapyiire ɲɛ wɛ.
Yi ɲɛ ba alowɛsi tiire ɲɛ wɛ,
Tɛhɛnɛ Baa Kilɛ yɛpyaa ya temu nɔri ge,
ba lɔhɔ ɲɔ sɛdiri tiire ɲɛ wɛ.
7 Yi ɲɛ ba lɔhɔ kpɔngɔɔ ɲɛ wɛ, kiimu ya ɲi fo na woni,
na fuu na jin pu tanuguyo yi ni ge.
Pu saan wu ɲɛ Agagi ɲaha na,
pu saanra ti na ba baraga ta.
8 Kilɛ ya pu yeege Misira fiige ki ni,
wu fanha ki ɲɛ ba senu wogo ɲɛ wɛ.
Shi wemu wʼa yìri pu kaa na ge,
a wʼi ganha na wee kyɛɛgi, na wu kaciiye jii,
na wu furegi ni wu ŋmaya ni.
9 Pʼa nuguro sin, na sinnɛ ba cɛnri ɲɛ wɛ,
ba cɛnri nufɔɔ ɲɛ wɛ.
Jɔgɔ wu da já wu yirige wɛ?
Piimu pʼa duba pyi yi mu ge, Kilɛ wu baraga le pee *
10 Ayiwa, a Balaki luu di yìri Balamu tàan. A wu kadaa kori, na Balamu pye: «Go nɛ mu yiri mʼi ba na pɛɛn pu laŋi dɛ, a mʼi dɛrɛɛ pa duba pye pu mu fo tɔɔɲii taanri! 11 Ni li wa mu, nimɛ ya ma ta mʼa yìri na gaaŋi! Nɛ bi jo jo nɛ na ba mu boɲa fo xuuni, ga Tɛhɛnɛ Baa Kilɛ ya ma fɔ wee boɲa wu ni.
Balamu ya Izirayɛli wo ɲibaŋa keree ki jo
12 Ayiwa, a Balamu di Balaki pye: «Tudunmɔɔ piimu mu ya tun nɛ mu ge, go nɛ bi sii yi jo pee mu jo: 13 ‹Ali Balaki ɲɛhɛ wu puga ki ɲi warifyɛn ni sanni na, na wee bɛɛri kan nɛ mu, nɛ da já doro Tɛhɛnɛ Baa Kilɛ wo ɲɔjomɔ tàan wɛ. Nɛ da já kasaana, kelee kakuunɔ la shishiin pye nayɛ ni wɛ. Tɛhɛnɛ Baa Kilɛ bu yemu jo, yee nʼa da jo.› 14 Ayiwa, nimɛ nʼa da guri da gaaŋi na wo shi wu yíri. Ga we shi we na ba lemu pye mu wo shi wu na cabaya na ge, pa di ba lee jo ma mu!» 15 A Balamu di kii ɲɔmɛhɛɛ kii jo na:
«Nɛ Balamu, Bewɔri ja we, nɛ ɲɔjomɔ pu wa pe.
Ná wemu wʼa ɲaa ge, wee ɲɔjomɔ pu wa pe.
16 Ná wemu wʼa Kilɛ jomɔ nuri ge,
wee ɲɔjomɔ pu wa pe.
Ná wemu wʼa Fugba Lii Lii Kilɛ wu fungeree cɛ ge,
wee ɲɔjomɔ pu wa pe.
Ná wemu wʼa Se Bɛɛri Fɔɔ wu wo kashɛgɛɛ ki ɲaa ge,
wee ɲɔjomɔ pu wa pe.
Wemu wu ɲɛ wu bu do ɲiŋɛ na,
wu ɲìi na bahala keree ki bɛɛri na ge,
wee ɲɔjomɔ pu wa pe.
17 Lemu lʼa da ba bye ge, lee nɛ ɲaa,
ga niɲaa kaa bɛ wɛ. Nɛ ɲii wa li ni, ga li dʼa lii.
Wɔrɔ la na ba foro Yakuba ni,
fanha pubiin na ba yìri na foro Izirayɛli ni.
Lee na ba Mowabu kpɔn wu ɲuŋɔ ni.
na Sɛti shi wu bɛɛri kyɛɛgi.
18 Edomu fiige ki na ba bye wu wogo.
Pu pɛɛn pu wo fiige ke, Seyiria fiige ke, kee bɛ na ba bye pu wogo.
Izirayɛli na ba wu fanhagbɔhɔ ki shɛ.
19 Ɲuŋɔfɔɔ wa na ba foro Yakuba shi wu ni.
Kulogoo ki shɛɛn piimu pʼa kori ge, wu na ba peesamaa kyɛɛgi.»
Balamu ya Izirayɛli wo pɛɛn pu gyɛɛgi wu jo
20 Ayiwa, a Balamu di Amalɛki shi wu ɲa, na kii ɲɔmɛhɛɛ kii jo na:
«Amalɛki shi wu baraga ya pɛlɛ shi wusama bɛɛri na,
ga wu bɛɛri na ba gyɛɛgi.»
21 Lee kadugo na, a Balamu di Keni shi wu wii, na kii ɲɔmɛhɛɛ kii jo na:
«Keni shi we, yi tatɛɛngɛ kʼa yàa ɲɔ.
Ki ɲɛ ba shazhira shiire ɲɛ wɛ, temu ya tagi faaga ɲuŋɔ ni ge.
22 Ga lee bɛ na, Keni shi wu na ba gyɛɛgi.
Asuuri shɛɛn pu na ba yi co bulooro na, na gari ni yi ni.
23 A Balamu di kii ɲɔmɛhɛɛ kii jo sanha na:
«Kakara! Jɔgɔ wu da já ɲiifɛɛrɛ pye,
Kilɛ dʼa wu nibyii pye wɛ?
24 Kɔɔgbɔyɔ yi wa ma na yìri Kitimu fiige ki ni.
Pu na ba se ta Asuuri shɛɛn pu na, na se ta Xhɛbɛri shi wu bɛ na.
Ga puyɛ pyaa ki bɛ na ba gyɛɛgi.»
25 Lee kadugo na a Balamu di yìri na gaaŋi wu fiige ni, a Balaki bɛ di yìri na gaaŋi wu tashɛgɛ ni.