Izirayɛli nagoo pʼa pu tɔɔgɔ le yapɛɛgaan ni
25
Ayiwa, a Izirayɛli nagoo pʼi shɛ diin Sitimu ni. A sipyiire tʼi ɲɔ kɔn wee xuu wu ni na taanfɛɛgɛ pyi ni Mowabu pushaa pu ni. 2 A pee pushaa pʼi Izirayɛli nagoo pu nɛgɛ le sarawuunɔ ni pu wo yasunyɔ yi mu. A Izirayɛli nagoo pʼi ganha na kee saraya yaligee ki li, na nuguro sinni pu yasunyɔ yi fɛɛ ni. 3 A Izirayɛli nagoo pʼi ɲɔ kɔn na jin mu yapɛrɛɛ Baali-Pewɔri wo pɛɛŋɛ ki ni. A Tɛhɛnɛ Baa Kilɛ luu di yìri pu tàan. 4 A Tɛhɛnɛ Baa Kilɛ di Musa pye: «Izirayɛli nagoo pu ɲahagbaa fɛɛ pu bɛɛri co, mʼa pu kori tiye na, caŋa ke na, Tɛhɛnɛ Baa Kilɛ ɲaha tàan, kɔnhɔ Tɛhɛnɛ Baa Kilɛ wo loyire nigbɔɔ lʼi yìri laha Izirayɛli ɲuŋɔ ni.» 5 A Musa di Izirayɛli wo kiirikɔɔn pu pye: «Yee bɛɛri nigin nigin wu wo sipyii piimu pʼa taha Baali-Pewɔri wo pɛɛŋɛ ki fɛni ge, yi pee gbo!»6 Ayiwa, na Izirayɛli nagoo pu yaha pu na mɛhɛɛ suu Ɲuŋɔ Tacirige Fàya Puga ki tajege ki ɲɔ na, a Izirayɛli shɛn ná wa di nɔ toro wee tuun wu ni wu cebooloo pu tàan ni Majan shɛn cee wa ni. Musa ni Izirayɛli shi shɛɛn pu bɛɛri ɲii ɲɛ wu ni. 7 Ba Eleyazari ja Finiyasi ya lee ɲa wɛ, saraya ɲaha shɔɔnrivɛɛ Arɔn wo ɲabige ke, a wu yìri foro sipyiire ti tɛ wu ni, na canmi wa lɔ, 8 na shɛ jé wee ná wu fɛni wu fàya puga ki ni, na shɛ canmi wu taga pu shuun wu bɛɛri su gbo tɔɔɲii nigin na. A canmi wu ná wu wa shuuri, na shɛ cee wu yacɛrɛ su furi. Kafɛɛgɛ yama pemu pu bye Izirayɛli nagoo pu ɲuŋɔ ni ge, a pee di yere. 9 Ga lee bi pee yama pu ta pʼa sipyii kabɔfoŋɔɔ kɛlɛɛ shuun ni shishɛɛrɛ (24.000) gbo xɔ.
10 Ayiwa, a Tɛhɛnɛ Baa Kilɛ di Musa pye: 11 «Eleyazari ja Finiyasi, saraya ɲaha shɔɔnrivɛɛ Arɔn wo ɲabige ke, wee ya nɛ wo loyire li laha Izirayɛli nagoo pu ɲuŋɔ ni, bani le kaa le ya waha nɛ na wahagana lemu na ge, mu lʼa waha wu bɛ na. Lee lʼa nɛ pye nɛ ta Izirayɛli nagoo pu kyɛɛgi na wo naŋmegea ki wuu na wɛ. 12 Shɛ yi jo wu mu na nʼa da ba ɲaɲiŋɛ wo kariɲɛɛgɛ ɲɔmɛɛ lɔ wu mu lee wuu na, 13 jo wu ni wu kadugo shi nibama wu na ba gori yaha gbee saraya ɲaha shɔɔnrivɛɛrɛ ti ni, bani ɲɛpɛɛn lʼa jé wu ni wu Kilɛ wu wuu na, a wu Izirayɛli nagoo pu wo jurumu yafa yaaŋa ki pye.»
14 Izirayɛli shɛn ná wemu pʼa pinnɛ gbo ni Majan shɛn cee wu ni ge, wee mɛgɛ ki bye na Zimuri. Wu to wu mɛgɛ ki bye na Salu, wee bye Simiɲɔ wo gbawege ki wo tashɔhɔyɔ ya wo ɲuŋɔfɔɔ wa. 15 Majan shɛn cee wemu pʼa gbo ge, wee mɛgɛ ki bye na Kozibi. Wu to wu mɛgɛ ki bye na Zuri. Wee bye Majan shɛɛn wo gbawege ka wo tashɔhɔyɔ niɲɛhɛyɛ wo ɲuŋɔfɔgbɔ wa.
16 Lee kadugo na, a Tɛhɛnɛ Baa Kilɛ di Musa pye: 17 «Yi shɛ do Majan shɛɛn pu na, yʼi pu bɛɛri gbo! 18 Bani pʼa yee pye pu pɛɛn, na yee le piinŋɛ ni ni Baali-Pewɔri wo pɛɛŋɛ ki ni, ni pu ɲuŋɔfɔɔ wa wo poro, pu ceboroshɔ Kozibi bɛ wo keree ki ni, wee wemu pʼa gbo Baali-Pewɔri wo kafɛɛgɛ yama pu tuun wu ni ge.»