Izirayɛli nagoo pu tɔrɔnɔ shuun wuu le
26
Ayiwa, ba pee kafɛɛgɛ yama pʼa toro wɛ, a Tɛhɛnɛ Baa Kilɛ di Musa ni saraya ɲaha shɔɔnrivɛɛ Arɔn ja Eleyazari pye:a 2 «Yi Izirayɛli nagoo pu bɛɛri tɔrɔ, namaa piimu bɛɛri shi wʼa co yee kɛlɛɛ shuun (20) na na duri ge. Sipya bɛɛri wʼa nɔ kashɛn ŋmɔmɔ ge, yʼi pu bɛɛri tɔrɔ gbaweye yi cɛ fɛni.* 3 Lee bi sipyiire ti ta Mowabu fadaaŋa ki na, Zhurudɛn Gba wu ɲɔ ki na, Zheriko ɲahatii wu ni. A Musa ni saraya ɲaha shɔɔnrivɛɛ Eleyazari di shɛ pu pye: 4 «Yi namaa pu bɛɛri tɔrɔ, piimu shi wʼa co yee kɛlɛɛ shuun (20) na na duri ge, ma na jo ba Tɛhɛnɛ Baa Kilɛ ya yi jo Musa mu wɛ.»Ayiwa, Izirayɛli jalaa piimu pʼa foro Misira fiige ki ni ge, pee pu wa piiri.
5 Urubɛn wu bi bye Izirayɛli wo jashiimɛ we. Urubɛn wo tirige shɛɛn pu piiri: Henɔki, wee ni Henɔki shi wʼa foro. Palu, wee ni Palu shi wʼa foro. 6 Ɛsirɔmu, wee ni Ɛsirɔmu shi wʼa foro. Karimi, wee ni Karimi shi wʼa foro 7 Ye yʼa pye Urubɛn wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ shishɛɛrɛ ni taanri, di xhuu gbarashuun ni kɛlɛɛ taanri (43.730).
8 Ayiwa, Palu wo ja wa mɛgɛ ki bye na Eliyabu. 9 Wee Eliyabu wu wo jalaa pu ɲɛ Nɛmuwɛli, Datan ni Abiramu. Izirayɛli wo ɲuŋɔfɛɛ piimu pʼa bi fara Kore ni wu wo sipyii pu na, na yìri Musa ni Arɔn fɛni, na ɲuŋɔ nari Tɛhɛnɛ Baa Kilɛ na ge, Datan ni Abiramu bɛ wu bye pee ni. 10 A ɲiŋɛ di ki ɲɔ mugi, na pee sipyii pu pinnɛ li ni Kore bɛ ni shiizhan. Kore wo sipyii pu bɛɛri bi kori na ni kee caŋa. Namaa xhuu shuun ni kɛlɛɛ kaguro (250) kee na kʼa bi sòrogo. Kee keree kii bi toro mu lee torogana li na, kɔnhɔ kʼi bye fundogo kaa. 11 Ga Kore yɛpyaa wo jalaa pu bi ta xu wɛ.
12 Simiɲɔ wo tirige shɛɛn pu piiri tashɔhɔyɔ tashɔhɔyɔ: Nɛmuwɛli, wee ni Nɛmuwɛli shi wʼa foro. Yamini, wee ni Yamini shi wʼa foro. Yakini, wee ni Yakini shi wʼa foro. 13 Zera, wee ni Zera shi wʼa foro. Shawuli, wee ni Shawuli shi wʼa foro. 14 Ye yʼa pye Simiɲɔ wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ shuun ni shuun, di xhuu shuun (22.200).
15 Gadi wo tirige shɛɛn pu piiri tashɔhɔyɔ tashɔhɔyɔ: Zefɔn, wee ni Zefɔn shi wʼa foro. Agi, wee ni Agi shi wʼa foro. Shuni, wee ni Shuni shi wʼa foro. 16 Ozini, wee ni Ozini shi wʼa foro. Ɛri, wee ni Ɛri shi wʼa foro. 17 Arodi, wee ni Arodi shi wʼa foro. Areyɛli, wee ni Areyɛli shi wʼa foro. 18 Ye yʼa pye Gadi wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ shishɛɛrɛ, di xhuu kaguro (40.500).
19 Zhuda wo tirige shɛɛn pee: Zhuda wo jalaa shuun wa wʼa xu Kana fiige ki ni, pee ɲɛ Eri ni Ona. 20 Zhuda wo tirige shɛɛn pusamaa na saha ni pu tashɔhɔyɔ yi ni: Shela, wee ni Shela shi wʼa foro. Pɛrɛzi, wee ni Pɛrɛzi shi wʼa foro. Zera, wee ni Zera shi wʼa foro. 21 Jalaa shuun Pɛrɛzi ya ta: Ɛsirɔmu, wee wemu ni Ɛsirɔmu shi wʼa foro ge, ni Amuli, wee wemu ni Amuli shi wʼa foro ge. 22 Ye yʼa pye Zhuda wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ gbarashuun ni gbaara, di xhuu kaguro (76.500).
23 Isakari wo tirige shɛɛn pu piiri tashɔhɔyɔ tashɔhɔyɔ: Tola, wee ni Tola shi wʼa foro. Puva, wee ni Puva shi wʼa foro. 24 Yashubu, wee ni Yashubu shi wʼa foro. Shimurɔn, wee ni Shimurɔn shi wʼa foro. 25 Ye yʼa pye Isakari wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ gbaara ni shishɛɛrɛ, di xhuu taanri (64.300).
26 Zabulɔn wo tirige shɛɛn pu piiri tashɔhɔyɔ tashɔhɔyɔ: Serɛdi, wee ni Serɛdi shi wʼa foro. Elɔn, wee ni Elɔn shi wʼa foro. Yalɛli, wee ni Yalɛli shi wʼa foro. 27 Ye yʼa pye Zabulɔn wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ gbaara, di xhuu kaguro (60.500).
28 Yusufu wo tirige shɛɛn pʼa pye jalaa shuun: Manase wo gbawege ke, ni Efirayimu wo gbawege ke.
29 Manase wo tirige shɛɛn pu piiri tashɔhɔyɔ tashɔhɔyɔ: Makiri, wee ni Makiri shi wʼa foro. Galadi wʼa pye Makiri wo ja, wee Galadi wu ni Galadi shi wʼa foro. 30 Galadi wo tirige shɛɛn pu piiri: Yezɛri, wee ni Yezɛri shi wʼa foro. Elɛki, wee ni Elɛki shi wʼa foro. 31 Asiriyɛli, wee ni Asiriyɛli shi wʼa foro. Sisɛmu, wee ni Sisɛmu shi wʼa foro. 32 Shemida, wee ni Shemida shi wʼa foro. Xhefɛri, wee ni Xhefɛri shi wʼa foro. 33 Xhefɛri ja wa mɛgɛ ki bye na Selofadi, wee ya ta ja se wɛ, fo pushaa. Wu pushaa pʼa pye Mala ni Nowa ni Ogila ni Milika ni Tirisa. 34 Ye yʼa pye Manase wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ kaguro ni shuun, di xhuu gbarashuun (52.700).
35 Efirayimu wo tirige shɛɛn pu piiri tashɔhɔyɔ tashɔhɔyɔ: Shutela, wee ni Shutela shi wʼa foro. Bekɛri, wee ni Bekɛri shi wʼa foro. Taxhan, wee ni Taxhan shi wʼa foro. 36 Shutela ja Eran ni Eran shi wʼa foro. 37 Ye yʼa pye Efirayimu wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ taanri ni shuun, di xhuu kaguro (32.500). Pii pʼa pye Yusufu jalaa shuun wu wo tirige shɛɛn pee na saha ni pu tashɔhɔyɔ yi ni.
38 Bɛnzhamɛ wo tirige shɛɛn pu piiri tashɔhɔyɔ tashɔhɔyɔ: Bela, wee ni Bela shi wʼa foro. Ashibɛli, wee ni Ashibɛli shi wʼa foro. Ayiramu, wee ni Ayiramu shi wʼa foro. 39 Shufamu, wee ni Shufamu shi wʼa foro. Ufamu, wee ni Ufamu shi wʼa foro. 40 Bela wo jalaa pʼa pye Aradi ni Naama. Aradi shi wʼa foro Aradi ni, a Naama shi wu foro Naama ni. 41 Ye yʼa pye Bɛnzhamɛ wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ shishɛɛrɛ ni kaguro, di xhuu gbaara (45.600).
42 Dan wo tirige shɛɛn pu piiri tashɔhɔyɔ tashɔhɔyɔ: Shuwamu, wee ni Shuwamu shi wʼa foro. Pee pʼa pye Dan wo tirige shɛɛn pee na saha ni pu tashɔhɔyɔ yi ni. 43 Shuwamu shi wu wo tashɔhɔyɔ yi namaa pu bɛɛri na tɔrɔ, pee ya bɛ ni sipyii kabɔfoŋɔɔ kɛlɛɛ gbaara ni shishɛɛrɛ, di xhuu shishɛɛrɛ (64.400).
44 Azɛri wo tirige shɛɛn pu piiri tashɔhɔyɔ tashɔhɔyɔ: Yimina, wee ni Yimina shi wʼa foro. Yishivi, wee ni Yishivi shi wʼa foro. Beriya, wee ni Beriya shi wʼa foro. 45 Beriya wo tirige shɛɛn pʼa pye Ebɛri ni Malikiyɛli. A Ebɛri shi wu foro Ebɛri ni, a Malikiyɛli shi wu foro Malikiyɛli ni. 46 Doɲiŋɛ pushɔ wʼa bye Azɛri mu, wee mɛgɛ ki bye na Sera. 47 Ye yʼa pye Azɛri wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ kaguro ni taanri, di xhuu shishɛɛrɛ (53.400).
48 Nɛfitali wo tirige shɛɛn pu piiri tashɔhɔyɔ tashɔhɔyɔ: Yaseyɛli, wee ni Yaseyɛli shi wʼa foro. Guni, wee ni Guni shi wʼa foro. 49 Yesɛri, wee ni Yesɛri shi wʼa foro. Shilɛmu, wee ni Shilɛmu shi wʼa foro. 50 Ye yʼa pye Nɛfitali wo gbawege ki wo tashɔhɔyɔ ye. Namaa piimu pʼa tɔrɔ wà ge, pee ya pye namaa kabɔfoŋɔɔ kɛlɛɛ shishɛɛrɛ ni kaguro, di xhuu shishɛɛrɛ (45.400).
51 Ayiwa, Izirayɛli nagoo piimu pʼa tɔrɔ ge, pee ya pye namaa kabɔfoŋɔɔ xhuu gbaara ni kabɔfonɔ nigin, di xhuu gbarashuun ni kɛlɛɛ taanri (601.730).
Fiige ki taagana
52 Ayiwa, A Tɛhɛnɛ Baa Kilɛ di Musa pye:* 53 «Pii sipyii pii na ma da ba fiige ki taa taa na saha ni gbaweye yi sipyii pu ɲuŋɔkana li ni, kʼi bye pu wogo. 54 Piimu bu ɲɛhɛ, mʼa pee wo taa li pɛlɛ, piimu bu jɛrɛ, mʼa pee wo taa li cɛrɛŋɛ. Gbawege ka bɛɛri na ba ki wo taa ta na saha ni ki sipyii pu ɲuŋɔkana ni. 55 Ga lee bɛ na, kagaanshaan li da ba bye na fiige ki taa taa pu na, gbawege ka bɛɛri na ki wo taa lɔ na saha ni ki sipyii pu ɲuŋɔkana li ni. 56 Gbaweye yemu wo sipyii pʼa ɲɛhɛ ge, kagaanshaan li lʼa da ba pee wo taa li shɛ, piimu bɛ pʼa cɛ́rɛ ge, na pee bɛ wuu li shɛ.»
Levi wo tirige shɛɛn pu tɔrɔnɔ shuun wuu
57 Ayiwa, Levi wo tirige shɛɛn piimu pʼa bi tɔrɔ tashɔhɔyɔ tashɔhɔyɔ fɛni ge, pee pu wa piiri: Gɛrɛshɔn, wee ni Gɛrɛshɔn shi wʼa foro. Kexhati, wee ni Kexhati shi wʼa foro. Marari, wee ni Marari shi wʼa foro. 58 Levi ni ye tashɔhɔyɔ ye bɛ ya foro: Libini wo tashɔhɔŋɔ ke, ni Eburɔn wo tashɔhɔŋɔ ke, ni Makili wo tashɔhɔŋɔ ke, ni Mushi wo tashɔhɔŋɔ ke, ni Kore wo tashɔhɔŋɔ ke. A Kexhati di Amuramu se. 59 Amuramu shɔ wu mɛgɛ ki bye na Zhokebɛdi, wee bye Levi wo poro. Wʼa bi wee se Misira fiige ki ni. A wee di nagoo taanri se Amuramu mu: Arɔn ni Musa, ni pu ceboroshɔ Mariyama. 60 A Arɔn di jalaa shishɛɛrɛ se: Nadabu ni Abiyu ni Eleyazari ni Itamari* 61 Ga, a Nadabu ni Abiyu di ba nategeb ka lɔ shɛ Tɛhɛnɛ Baa Kilɛ mu, a lee di pee gbo.* 62 Levi wo tirige shɛɛn namaa pu bɛɛri, ma lɔ yeŋɛ nigin na na duri fugba wu ni. A pu bɛɛri di bɛ ni namaa kabɔfoŋɔɔ kɛlɛɛ shuun ni taanri (23.000) ni. Levi wo tirige shɛɛn pu ya ta tɔrɔ le Izirayɛli nagoo pusamaa ni wɛ, bani ɲiŋɛ bi yaa na kan pu mu na pye pu taa cɛn, ba Izirayɛli nagoo pusamaa ɲɛ-ɛ wɛ.
63 Ayiwa, pii pʼa pye Izirayɛli nagoo pee, Musa ni saraya ɲaha shɔɔnrivɛɛ Eleyazari ya piimu tɔrɔ Zhurudɛn Gba wu ɲɔ ki na, Zheriko ɲahatii wu ni, Mowabu wo fadaaŋa ki na ge. 64 Musa ni saraya ɲaha shɔɔnrivɛɛ Arɔn bi sipyii piimu tɔrɔ Izirayɛli nagoo pu ni na pu yaha Sinayi siwaga ki ni ge, wee wa shishiin bye nige pu ni wɛ. 65 Bani Tɛhɛnɛ Baa Kilɛ bi jo na pee bɛɛri pu da xhuu siwaga ki ni. Lee lʼa pu pye shɛn nigin bɛ ya kori pu ni wɛ, fo Zhefunɛ ja Kalɛbu ni Nuni ja Zhozuwe yɛ pe.