Doɲiŋɛ pushaa wo cɛn taagana
27
Ayiwa, Yusufu ja Manase wo tirige shɛn wa bye wà na Selofadi, wee bi ta ja ta wɛ, fo pushaa. Selofadi to wu bye Xhefɛri, Xhefɛri to di ɲɛ Galadi, Galadi to di ɲɛ Makiri, Makiri to di ɲɛ Manase. Selofadi pushaa pu mɛyɛ yi bye na Mala ni Nowa ni Ogila ni Milika ni Tirisa. A pee pushaa pʼi ba gari caŋa ka, 2 Musa ni saraya ɲaha shɔɔnrivɛɛ Eleyazari mu, na fara Izirayɛli nagoo pee ni pu ɲuŋɔfɛɛ pu na, Ɲuŋɔ Tacirige Fàya Puga ki ɲɔ na, na shɛ pu pye: 3 «Wèe to wʼa xu siwaga ki ni. Kore ni wu wo tahama-nɔhɔmɔɔ piimu pʼa bi ɲuŋɔ nari Tɛhɛnɛ Baa Kilɛ na ge, wu bi ta pye pee ni wɛ. Wuyɛ pyaa ki wo katiibaana wuu na wʼa xu. Ga wu ya ta funana se wɛ. 4 Ta wèe to wu mɛgɛ kʼa yaa na piin wu to wu tashɔhɔŋɔ ki ni, na li kaɲuŋɔ pye na wu ya ta funana ta-ɛ ya? Wù bɛ wo taa cɛn kan wù mu ba wu to wu cebooloo pu ɲɛ wɛ.»5 Ayiwa, a Musa di kee keree ki lɔ shɛ Tɛhɛnɛ Baa Kilɛ mu. 6 A Tɛhɛnɛ Baa Kilɛ di wu pye: 7 «Kaɲii wa Selofadi pushaa pu mu. Pu bɛ wo taa cɛn kan pu mu ba pu to wu cebooloo pu ɲɛ wɛ. Pu to wu wo taa li kan pu mu. 8 Mʼa yi jo Izirayɛli nagoo pu mu na: ‹Ná wa bu xhu, na ta wu ya funana se wɛ, yi wu wo taa cɛn wu kan wu pushaa pu mu. 9 Wu bu da wu ya fucɛɛrɛ bɛ se wɛ, yʼi wu taa cɛn wu kan wu cebooloo pu mu. 10 Wu bu da cebooloo baa, yʼi wu taa cɛn wu kan wu to wu wo cebooloo pu mu. 11 Wu to wu bɛ bu da cebooloo baa, wu kpuun shɛn wemu wʼa sogi wu na ge, yʼi wu cɛn wu kan wee mu. Wee na ba wu cɛn wu lɔ.› Yi na ba lee ɲɔmɛɛ le koo ɲaari gbee, ma na jo ba nɛ yi jo ma mu wɛ.»
Pʼa Zhozuwe ɲaha bulo, na wee teŋɛ Musa tɛgɛ
12 A Tɛhɛnɛ Baa Kilɛ di Musa pye: «Dugi ke faaboboŋɔ ke na, Abarimu faaboboyo yi ni. Fiige kemu nʼa kan Izirayɛli nagoo pu mu ge, mʼa kee wii. 13 Ma bu ki ɲa xɔ tuun wemu ni, ma bɛ na zhɛ binnɛ ni ma wo sefɛlɛɛ pu ni ba Arɔn ya shɛ binnɛ ni pu ni pinnɛgana lemu na wɛ. 14 Bani tuun wemu ni sipyiire ti bi yogo ki shaa nɛ mu lɔhɔ ki keree na, Zini siwaga ki ni ge, lemu nɛ jo yee mu ge, yee ya ta lee pye wɛ. Yee ya ta gbɔɔrɔ taha nɛ na na fɛfɛɛrɛ ti wuu na Izirayɛli shi wu ɲaha tàan wɛ.» Keree kiimu kʼa pye Mɛriba wo lɔhɔ ki shizhaa na Zini wo siwaga ki ni, Kadɛsi ni ge, kee kaa Kilɛ wʼa yu. Yee ɲɛ Mɛriba wo lɔhɔyɔ ye Zini wo siwaga ki ni, Kadɛsi ni.
15 A Musa di Tɛhɛnɛ Baa Kilɛ pye: 16 «Tɛhɛnɛ Baa Kilɛ, sipyiire ti bɛɛri wo munahaa ki fɔɔ Kilɛ we, sipya watii sha, mʼa wee teŋɛ sipyiire ti ɲuŋɔ ni. 17 Wee di da fòro, wu da jin ba pu ɲuŋɔfɔɔ ɲɛ wɛ. Wu da pu ɲaha coni wʼa fòro, wu da pu ɲaha coni wʼa jin, kɔnhɔ Tɛhɛnɛ Baa Kilɛ wo sipyiire ti ganha bu da bye ba nahavɔɔ baa yatɔɔyɔ ɲɛ wɛ.»
18 A Tɛhɛnɛ Baa Kilɛ di Musa pye: «Nuni ja Zhozuwe lɔ, wee wemu na Kilɛ Munaa li wa ge. Mʼa keŋɛ taha wu na. 19 Mʼa shɛ wu yereŋɛ saraya ɲaha shɔɔnrivɛɛ Eleyazari ni Izirayɛli nagoo pu bɛɛri ɲahagbaa na, mʼa tuduro ti jo wu mu pu ɲii na. 20 Fanha ke ki wa ma ni ge, mʼa kee ka kan wu mu, kɔnhɔ Izirayɛli nagoo pu bɛɛri di da wu ɲɔmɛɛ coni. 21 Wu na ba yeree saraya ɲaha shɔɔnrivɛɛ Eleyazari ɲaha tàan, wee ma ganha na nɛ yegee ni Urimua wu ni. Eleyazari ba yemu jo, Zhozuwe ni Izirayɛli nagoo pu bɛɛri di yee koo ɲaari.
22 A Musa di li pye ba Tɛhɛnɛ Baa Kilɛ ya yi jo wu mu wɛ. A wu ba ni Zhozuwe ni, na wu yereŋɛ saraya ɲaha shɔɔnrivɛɛ Eleyazari ni sipyiire ti bɛɛri ɲaha tàan. 23 A wu keye taha wu na, na wu tuduro ti kaa le wu keŋɛ ni ba Tɛhɛnɛ Baa Kilɛ ya yi jo wu ɲɔ na wɛ.